ຜົນຮ້າຍຢ້ອນຫຼັງຈາກເສິກກາງເມືອງຢູ່ຊີຣີ
(ພາບ: xaluan.com)
(vovworld) - ພາຍຫຼັງການເຈລະຈາຕ່າງໆ ເພື່ອຊອກຫາມາດຕະການແກ້ໄຂສະພາບເສິກກາງເມືອງຢູ່ຊີຣີ, ເຊິ່ງຫາກໍ່ດຳເນີນຢູ່ເຊີແນວ, ປະເທດສະວິດ ບໍ່ໄດ້ຮັບຜົນນັ້ນ, ວົງການນັກໄຈ້ແຍກໃຫ້ຂໍ້ສັງເກດວ່າ, ສິ່ງດັ່ງກ່າວບໍ່ພຽງແຕ່ເຮັດໃຫ້ເສຍຄວາມຫວັງຕໍ່ບາດກ້າວບຸກທະລຸດ້ານການເມືອງຜ່ານການເຈລະຈາສັນຕິພາບ ແນໃສ່ຢຸດຕິການປະທະກັນຢູ່ຊີຣີທີ່ແກ່ຍາວເປັນເວລາ 3 ປີເທົ່ານັ້ນ, ຫາກຍັງເຮັດໃຫ້ສະພາບເສິກກາງເມືອງຢູ່ປະເທດນີ້ນັບມື້ນັບຮ້າຍແຮງກວ່າ, ເພາະວ່າພາຍຫຼັງເຫດການນີ້, ທັງອຳນາດການປົກຄອງຊີຣີ ແລະ ຝ່າຍລຸກຮຶ້ຂຶ້ນຈະເພີ່ມກຳລັງດັນດ້ານການທະຫານຂຶ້ນຕື່ມ.
ເລື່ອງຜູ້ຕາງໜ້າອຳນາດການປົກຄອງ Damascus ແລະ ກຳລັງຝ່າຍຄ້ານຢູ່ຊີຣີ ເຫັນດີພົບປະກັນທີ່ການເຈລະຈາ ໄດ້ສ້າງຄວາມຫວັງຕໍ່ມາດຕະການສັນຕິພາບ ເພື່ອຢຸດຕິເສິກກາງເມືອງທີ່ແກ່ຍາວ ແລະ ນອງເລືອດນີ້. ແຕ່ຄວາມມານະພະຍາຍາມທັງໝົດຂອງປະຊາຄົມໂລກພັດບໍ່ນຳມາເຊິ່ງໝາກຜົນໃດໆ, ເມື່ອທັງສອງຝ່າຍເດັດດຽວຮັກສາຫຼັກໝັ້ນຂອງຕົນ. ໃນຂະນະທີ່ອຳນາດການປົກຄອງ Damascus ຖືເລື່ອງຕ້ານລັດທິກໍ່ການຮ້າຍ ແມ່ນບຸລິມາສິດອັນດັບໜຶ່ງໃນການເຈລະຈາ, ຝ່າຍຄ້ານພັດຖືວ່າມາດຕະການຕົ້ນຄໍເພື່ອຢຸດຕິການປະທະກັນແມ່ນສ້າງຕັ້ງລັດຖະບານຂ້າມຜ່ານ ແຕ່ບໍ່ມີປະທານາທິບໍດີ Bashar al – Assad.
ການປະລາໄຊບໍ່ໄດ້ຄາດຄະເນລ່ວງໜ້າ
ກ່ອນທີ່ດຳເນີນການເຈລະຈາ, ຜູ້ຊ່ຽວຊານຫຼາຍທ່ານໄດ້ຄາດຄະເນວ່າ, ການເຈລະຈາສັນຕິພາບແມ່ນການຕໍ່ສູ້ທີ່ຫຍຸ້ງຍາກ ແລະ ເຕັມໄປດ້ວຍການທ້າທາຍ. ເພາະວ່າມັນດຳເນີນໄປໃນສະພາບທີ່ມີຄວາມຜິດໂຕນກັນລະຫວ່າງກຳລັງທະຫານລັດຖະບານຊີຣີ ແລະ ກຳລັງຝ່າຍຄ້ານ. ໃນຂະນະທີ່ກອງທັບຂອງ ປະທານາທິບໍດີ Bashar al – Assad ພວມມີທ່າໄດ້ປຽບໃນສະໜາມຮົບ, ກຳລັງຝ່າຍຄ້ານຂອງຊີຣີ ພັດຖືກແບ່ງແຍກ ແລະ ມີຫຼາຍບັນຫາຂັດແຍ້ງພາຍໃນ. ສິ່ງທີ່ໜ້າສົນໃຈແມ່ນພັນທະມິດໃຫຍ່ຂອງ ອຳນາດການປົກຄອງ Damascus ແມ່ນອີຣານ ແລະ ລັດເຊຍ ເລີ່ມຂົນສົ່ງອາວຸດໃຫ້ຊີຣີ, ຊຳ້ບໍໜຳ ເຕເຮຣານ ຍັງສົ່ງເຈົ້າໜ້າທີ່ດ້ານການທະຫານມາຊ່ວຍອຳນາດການປົດຄອງ Assad ອີກ. ໃນຂະນະນັ້ນ, ບັນດາລາຍການໜູນຊ່ວຍອົບຮົມ ແລະ ປະກອບອາວຸດໃຫ້ກຳລັງລຸກຮຶ້ຂຶ້ນຊີຣີ ຂອງອາເມລິກາ ແລະ ຝ່າຍຕາເວັນຕົກພັດຖືກຈຳກັດ.
ການແຊກແຊງດ້ານການທະຫານຈະຖືກປ່ຽນແທນດ້ວຍມາດຕະການດ້ານການທູດຫຼືບໍ ?
ພາຍຫຼັງການເຈລະຈາບໍ່ໄດ້ຮັບຜົນ, ອາເມລິກາ ໄດ້ອອກສຽງຕິຕຽນວ່າລັດຖະບານຂອງ ປະທານາທິບໍດີ Bashar al – Assad ຕັ້ງໃຈກີດຂວາງຄວາມກ້າວໜ້າໃນການເຈລະຈາຢູ່ເຊີແນວ, ພ້ອມທັງກ່າວຫາ ອຳນາດການປົກຄອງ Damascus ເພີ່ມທະວີການບຸກໂຈມຕີໃສ່ສາມັນຊົນ. ອາເມລິກາ ພວມວາງແຜນການຍູ້ແຮງການແຊກແຊງເຂົ້າຊີຣີ.
ໃນການຢ້ຽມຢາມຈີນ ເມື່ອສັບປະດາກ່ອນ, ທ່ານລັດຖະມົນຕີການຕ່າງປະເທດອາເມລິກາ John Kerry ຍອມຮັບວ່າ, ວໍຊິງຕັນ ພວມປຶກສາຫາລືກ່ຽວກັບການປ່ຽນແທນນະໂຍບາຍສຳລັບຊີຣີ ແລະ ມາດຕະການດ້ານທະຫານແມ່ນເໝາະສົມກັບຊີຣີ ໃນປະຈຸບັນ. ສາຍເຫດເຊິ່ງທຳນຽບ 5 ແຈ ຍົກອອກມາແມ່ນ ເລື່ອງແຊກແຊງດ້ານການທະຫານນັ້ນ, ທັງແກ້ໄຂບັນຫາວິກິດການມະນຸດສະທຳຢູ່ຊີຣີ, ທັງຕ້ານບັນດາພາກສ່ວນກໍ່ການຮ້າຍໄດ້. ຄຽງຂ້າງນັ້ນ, ອຳນາດການປົກຄອງອາເມລິກາ ຍັງຖືວ່າ, ເລື່ອງກະກຽມບຸກໂຈມຕີດ້ານການທະຫານ ຈະເປັນກຳລັງດັນ ບັງຄັບໃຫ້ອຳນາດການປົກຄອງຂອງ ປະທານາທິບໍດີ Bashar al – Assad ຕ້ອງເຫັນດີຕໍ່ມາດຕະການ ການທູດ. ໜ້າສົນໃຈແມ່ນ, ຕົ້ນສັບປະດາກ່ອນ, ປະທານາທິບໍດີອາເມລິກາ Barack Obama ໄດ້ມີການປະຊຸມລັບກັບເຈົ້າຊີວິດ ຈໍແດນ Abdullah II ຢູ່ອາເມລິກາ ເພື່ອປຶກສາຫາລືບັນດາບັນຫາຂອງພາກພື້ນຕາເວັນອອກກາງ,ໃນນັ້ນມີຊີຣີ. ຕາມນັ້ນແລ້ວ, ຢາກໄດ້ຮັບບ້ວງເງິນກູ້ຢືມ ແລະ ບ້ວງທຶນຊ່ວຍເຫຼືອຂຶ້ນເຖິງ 1,6 ຕື້ USD, ຈໍແດນ ຈະຕ້ອງອະນຸຍາດໃຫ້ວໍຊິງຕັນນຳໃຊ້ດິນແດນຂອງຕົນ ໃນກໍລະນີອາເມລິກາ ຜັນຂະຫຍາຍການບຸກໂຈມຕີດ້ານການທະຫານໃສ່ຊີຣີ. ເພື່ອປະຕິບັດແຜນການແຊກແຊງເຂົ້າຊີຣີ, ອາເມລິກາ ຈະປະກອບອາວຸດໃຫ້ຝ່າຍລຸກຮຶ້ຂຶ້ນ, ຊ່ວຍໃຫ້ເຂົາເຈົ້າມີກຳລັງຢ່າງພຽງພໍ ເພື່ອຄວບຄູມເຂດທິດໃຕ້ຂອງນະຄອນຫຼວງ Damascus, ແລະ ເປັນແປ້ນຢັນໃຫ້ແກ່ການບຸກໂຈມຕີດ້ານການທະຫານຕ່າງໆເພື່ອດັບສູນກອງທັບລັດຖະບານ.
ໃນຂະນະນັ້ນ, ອັງກິດ ກໍ່ກະຕຸກຊຸກຍູ້ສະພາຄວາມໝັ້ນຄົງສະຫະປະຊາຊາດ ຄວນມີການກະທຳໃນທັນທີ ເພື່ອຢຸດຕິວິກິດການມະນຸດສະທຳຢູ່ຊີຣີ ຢ່າງວ່ອງໄວ. ປະລາໄຊຂອງການເຈລະຈາຕ່າງໆຜ່ານມາ ຍິ່ງເຮັດໃຫ້ປະຊາຄົມໂລກຕ້ອງມີການກະທຳຮັບມືຢ່າງແຮງກວ່າອີກ. ຫາງສຽງຖືວ່າ, ເສິກກາງເມືອງຢູ່ຊີຣີ ຈະນັບມື້ນັບເຄັ່ງຕຶງຢ່າງແນ່ນອນ.