ວຽກງານຜັນຂະຫຍາຍການປະຕິບັດລັດຖະທຳມະນູນປີ 2013
(ພາບປະກອບ)
(vovworld)- ວຽກງານຜັນຂະຫຍາຍການປະຕິບັດລັດຖະທຳມະນູນປີ 2013 ໄດ້ ແລະ ພວມດຳເນີນໄປຢ່າງກວ້າງຂວາງ, ເລິກເຊິ່ງໃນທົ່ວປະເທດ. ມາຮອດຈຸດເວລານີ້, ບັນດາກະຊວງ, ຂະແຫນງການຂັ້ນສູນກາງ ແລະ ຮາກຖານ ໄດ້ເອົາໃຈໃສ່ເປັນພິເສດເຖິງການຜັນຂະຫຍາຍ ລັດຖະທຳມະນູນປີ 2013. ການສະຫນັບສະຫນູນຢ່າງຕັ້ງຫນ້າຂອງປະຊາຊົນໃນການຜັນຂະຫຍາຍກົດໝາຍພື້ນຖານສະບັບນີ້ ໄດ້ສະແດງໃຫ້ເຫັນຄວາມເຫັນດີເຫັນພ້ອມຂອງສັງຄົມ.
ວຽກງານຜັນຂະຫຍາຍການປະຕິບັດລັດຖະທຳມະນູນປີ 2013 ໄດ້ຮັບການຍູ້ແຮງຢູ່ຫລາຍທ້ອງຖິ່ນ, ອົງການຈັດຕັ້ງມະຫາຊົນ ແລະ ໃນບັນດາຮາກຖານການສຶກສາ, ມຸ່ງໄປເຖິງຈຸດໝາຍມີປະຊາຊົນຫລາຍຄົນເຈົ້າໃຈແຈ້ງ ແລະ ຖືກຕ້ອງກ່ຽວກັບເນື້ອໃນ ລັດຖະທຳມະນູນປີ 2013.
ຍູ້ແຮງຄວາມຄືບຫນ້າໃນວຽກງານຜັນຂະຫຍາຍການປະຕິບັດລັດຖະທຳມະນູນປີ 2013
ດ້ວຍບົດບາດແມ່ນກົດໝາຍພື້ນຖານ, ມີຜົນສັກສິດທາງດ້ານກົດໝາຍສູງສຸດ, ເລື່ອງຜັນຂະຫຍາຍການປະຕິບັດ ລັດຖະທຳມະນູນ ມີຄວາມໝາຍສຳຄັນ, ໄດ້ຮັບຄວາມເອົາໃຈໃສ່, ຈັດຕັ້ງຢ່າງເປັນລະບົບ, ມີວິທະຍາສາດໃນຂອບເຂດທົ່ວປະເທດ. ເປັນຫນ້າສົນໃຈ, ແມ່ນວິທີເຮັດຄືແນວໃດເພື່ອສາມາດເຂົ້າໃຈເນື້ອໃນ, ຈິດໃຈ ແລະ ຄວາມໝາຍຂອງ ລັດຖະທຳມະນູນປີ 2013 ຢ່າງຖືກຕ້ອງ ແລະ ເປັນເອກະພາບນັ້ນ, ແມ່ນມີຄວາມໝາຍຕັດສິນຊີ້ຂາດເຖິງການຍົກສູງສະຕິປະຕິບັດລັດຖະທຳມະນູນປີ 2013 ແລະ ກົດໝາຍ, ປະກອບສ່ວນນຳລັດຖະທຳມະນູນເຂົ້າສູ່ຊີວິດ ແລະ ເສີມຂະຫຍາຍຄຸນຄ່າໃນພຶດຕິກຳຕົວຈິງ. ທ່ານ ດີງຊວນຖາວ, ຫົວຫນ້າສະຖາບັນສ້າງກົດໝາຍຖືວ່າ:
“ເປົ້າໝາຍຮັບຟັງ, ຮັບເອົາລັດຖະທຳມະນູນ ຍັງມີຄວາມຮູ້, ຄວາມຮຽກຮ້ອງທີ່ຕ່າງກັນ. ສະນັ້ນ, ການເຜີຍແຜ່ ລັດຖະທຳມະນູນຕ້ອງໄດ້ຮັບການປະຕິບັດຢ່າງລະອຽດ, ລຽນຕິດ, ເປັນປະຈຳ ແລະຍາວນານ, ເໝາະສົມກັບຈຸດພິເສດສະເພາະຂອງແຕ່ລະເປົ້າໝາຍ.”
ເພາະສະນັ້ນ, ໃນໄລຍະຜ່ານມາ, ຫລາຍທ້ອງຖິ່ນໄດ້ຍູ້ແຮງການເຜີຍແຜ່ເນື້ອໃນລັດຖະທຳມະນູນເຖິງແຕ່ລະເປົ້າໝາຍ, ອີງໃສ່ແຕ່ລະລະດັບຄວາມຮູ້, ຄວາມຮັບຮູ້ດ້ານກົດໝາຍຂອງປະຊາຊົນ. ໃນກາງເດືອນ 3/2014, ບັນດາອົງການ, ຫົວຫນ່ວຍ, ເມືອງ, ນະຄອນຢູ່ແຂວງ ຮ່ວາບີງ ໄດ້ສຳເລັດການຈັດຕັ້ງກອງປະຊຸມເຜີຍແຜ່ເນື້ອໃນ, ຄວາມໝາຍຂອງ ລັດຖະທຳມະນູນ ແລະ ບັນດາຄຳສັ່ງ, ມະຕິ, ແຜນການ, ການແນະນຳຂອງສູນກາງ ກໍ່ຄືຂອງແຂວງໃຫ້ແກ່ຖັນແຖວພະນັກງານຫລັກແຫລ່ງ ໂດຍພື້ນຖານ. ສ່ວນຢູ່ແຂວງ ຟຸ໋ທໍ້, ມາຮອດປະຈຸບັນ, ມີ 10/10 ຕາແສງຢູ່ເທດສະບານ ຟູທໍ້ ໄດ້ສຳເລັດການຈັດຕັ້ງຜັນຂະຫຍາຍການປະຕິບັດ ລັດຖະທຳມະນູນປີ 2013. ທົ່ວເທດສະບານໄດ້ຈັດຕັ້ງກອງປະຊຸມ 10 ຄັ້ງຢູ່ຂັ້ນຕາແສງ ແລະ ກວ່າ 100 ຄັ້ງຢູ່ເຂດຊຸມຊົນ ໂດຍມີການເຂົ້າຮ່ວມຂອງພະນັກງານ, ສະມາຊິກພັກ ແລະ ປະຊາຊົນກວ່າ 11.000 ເທື່ອຄົນ.
ຫັນຮູບການ, ເປົ້າໝາຍເປັນຫລາຍຮູບຫລາຍແບບ
ນອກຈາກຍູ້ແຮງຄວາມຄືບຫນ້າໃນການເຜີຍແຜ່, ໂຄສະນາລັດຖະທຳມະນູນປີ 2013, ບັນດາທ້ອງຖິ່ນ,ອົງການຈັດຕັ້ງມະຫາຊົນກໍມີຫລາຍຮູບການເພື່ອນຳກົດໝາຍພື້ນຖານນີ້ເຖິງປະຊາຊົນຢ່າງສະດວກທີ່ສຸດ. ຢູ່ເມືອງ ເຕີນລາກ ແຂວງ ຟູທໍ້ ໄດ້ຮຽບຮຽງ, ພິມເອກະສານເຜີຍແຜ່ 231 ຊຸດເພື່ອສະຫນອງໃຫ້ຄຸ້ມບ້ານ, ໝູ່ບ້ານ. ລະບົບໂທລະໂຄ່ງຂອງບັນດາຕາແສງ, ເທດສະບານ, ຄຸ້ມບ້ານໃນເມືອງກໍໄດ້ຮັບການເສີມຂະຫຍາຍຢ່າງມີປະສິດທິຜົນໃນການເຜີຍແຜ່ ລັດຖະທຳມະນູນ.
ສ່ວນຢູ່ແຂວງ ບີງເຢືອງ, ທ່ານນາງ ໂດທິທູຖຸຍ, ຫົວຫນ້າພະແນກກົດໝາຍ ນະຄອນ ຖຸເຢົາຫນື່ງໃຫ້ຮູ້ວ່າ:
“ອົງການປະຈຳ ໄດ້ຮຽບຮຽງເອກະສານຖາມຕອບກ່ຽວກັບກົດໝາຍເພື່ອສົ່ງເຖິງາຄະນະ, ຂະແຫນງການ, ອົງການຈັດຕັ້ງມະຫາຊົນ, ບັນດານັກເຜີຍແຜ່. ໄຕມາດທີ 2 ປີ 2014, ຄະນະກຳມະການປະຊາຊົນແຂວງ ໄດ້ຈັດຕັ້ງກອງປະຊຸມຜັນຂະຫຍາຍລັດຖະທຳມະນູນ ເຖິງການນຳຄະນະ, ຂະແຫນງການ, ອົງການຈັດຕັ້ງມະຫາຊົນຢູ່ບັນດາເມືອງ, ຕາແສງ ແລະ ປະຊາຊົນທຸກຊັ້ນວັນນະ.”
ໃນຂະນະນັ້ນ, ບັນດາຮາກຖານການສຶກສາກໍໄດ້ມີວິທີປະຕິບັດຢ່າງມີຫົວຄິດປະດິດສ້າງ ເພື່ອໃຫ້ພະນັກງານ ແລະ ນັກຮຽນ, ນັກສຶກສາເຂົ້າໃຈ ລັດຖະທຳມະນູນ. ຄູສອນຢູ່ໂຮງຮຽນມັດທະຍົມຕອນປາຍອຸດສາຫະກຳ ຫວຽດຈີ ແຂວງ ຟູທໍ້ ໄດ້ສົມທົບເນື້ອໃນ ລັດຖະທຳມະນູນກັບເນື້ອໃນບົດຮຽນກ່ຽວກັບການສຶກສາພົນລະເມືອງ, ຊ່ວຍໃຫ້ພວກນ້ອງນັກຮຽນເຂົ້າໃຈວ່າ ລັດຖະທຳມະນູນແມ່ນຄວາມເປັນຈິງ, ຕິດພັນກັບຊີວິດປະຈຳວັນ. ມະຫາວິທະຍາໄລຮຸ່ງເວືອງ ແຂວງ ຟູທໍ້ ໄດ້ເຜີຍແຜ່, ຊາບຊືມເນື້ອໃນ ລັດຖະທຳມະນູນຜ່ານ ການເຄື່ອນໄຫວປະຈຳເດືອນຂອງອົງການຈັດຕັ້ງມະຫາຊົນ, ຈັດຕັ້ງການເຄື່ອນໄຫວດ້ວຍຫົວເລື່ອງສະເພາະ, ສົມທົບກັບທິດສະດີການເມືອງເພື່ອສິດສອນໃຫ້ນັກສຶກສາ. ນອກນັ້ນ, ທາງໂຮງຮຽນກໍເຜີຍແຜ່ ລັດຖະທຳມະນູນ ຜ່ານລະບົບເວັບໄຊ. ໃນຂະນະນັ້ນ, ຢູ່ມະຫາວິທະຍາໄລກົດໝາຍຮ່າໂນ້ຍ, ສາດສະດາຈານ - ດຣ ທາຍຫວີທັງ ໃຫ້ຮູ້ວ່າ:
“ການຜັນຂະຫຍາຍ ລັດຖະທຳມະນູນປີ 2013 ແມ່ນຫນ້າທີ່ສຳຄັນພິເສດສຳລັບໂຮງຮຽນ. ພະນັກງານ, ຄູອາຈານທັງໝົດໃນໂຮງຮຽນ ລ້ວນແຕ່ຮູ້ຈັກເຖິງບັນດາຈຸດໃຫມ່ຂອງ ລັດຖະທຳມະນູນປີ 2013. ໃນປີ 2014, ພວກຂ້າພະເຈົ້າຈະສ້າງຫລັກສູດກ່ຽວກັບກົດໝາຍ ລັດຖະທຳມະນູນຫວຽດນາມຄືນໃຫມ່ ແລະ ປັບປຸງບັນດາຫລັກສູດທີ່ມີສ່ວນກ່ຽວຂ້ອງ. ທາງໂຮງຮຽນກໍໄດ້ເຮັດວາລະສານຫົວເລື່ອງສະເພາະກ່ຽວກັບບັນດາຈຸດໃຫມ່ຂອງ ລັດຖະທຳມະນູນປີ 2013 ແລະ ບັນດາບັນຫາວາງອອກໃນການປະຕິບັດຕົວຈິງ. ຄູອາຈານໃນໂຮງຮຽນ ຈະເຂົ້າຮ່ວມການຮຽບຮຽງປື້ມວິຈານກ່ຽວກັບ ລັດຖະທຳມະນູນປີ 2013. ນອກນັ້ນ ໂຮງຮຽນ ກໍ່ຈະຈັດຕັ້ງການເສັງຊອກຮູ້ກ່ຽວກັບລັດຖະທຳມະນູນໃຫ້ແກ່ນັກຮຽນໃນເດືອນ 5 ຈະມາເຖິງ.”
ລັດຖະທຳມະນູນແມ່ນກົດໝາຍພື້ນຖານທີ່ສຳຄັນ. ເລື່ອງຂັ້ນຮາກຖານຕັ້ງຫນ້າຍູ້ແຮງວຽກງານຜັນຂະຫຍາຍການປະຕິບັດລັດຖະທຳມະນູນປີ 2013 ທັງຊ່ວຍໃຫ້ປະຊາຊົນເຂົ້າໃຈແຈ້ງກ່ຽວກັບລັດຖະທຳມະນູນ, ຮັກສາລັດຖະທຳມະນູນ, ທັງຕິດຕາມກວດກາກົງຈັກລັດໃນການປະຕິບັດບັນດາຂໍ້ກຳນົດຂອງກົດໝາຍພື້ນຖານນີ້.