(vovworld)-ບັນດາການກະທຳເກາະຜິດທວງເອົາອະທິປະໄຕທີ່ໄຮ້ເຫດຜົນຢູ່ທະເລຕາເວັນອອກ ໂດຍບໍ່ຫົວຊາຕໍ່ກົດໝາຍສາກົນຂອງຈີນໃນໄລຍະມໍ່ໆມານີ້ ໄດ້ສົ່ງຜົນສະທ້ອນບໍ່ດີເຖິງການພົວພັນລະຫວ່າງຈີນ ແລະ ບັນດາປະເທດອື່ນ. ປັກກີງ ພວມເຮັດໃຫ້ສາກົນຕ້ອງປ່ຽນແປງທັດສະນະກ່ຽວກັບປະເທດຈີນ ທີ່ສະຫນິດສະຫນົມ, ບໍ່ສົ່ງຜົນສະທ້ອນຕໍ່ປະເທດອື່ນ, ພັດທະນາສັນຕິພາບ.
ໃນຂະນະທີ່ເຫດການຈີນຕັ້ງຮ້ານເຈາະນ້ຳມັນໄຮຢາງ 981 ຢ່າງຜິດກົດໝາຍຢູ່ເຂດເສດຖະກິດຈຳເພາະ ແລະ ເຂດໄຫລ່ທະວີບຂອງຫວຽດນາມ ພວມແມ່ນເຫດການທີ່ເຄັ່ງຮ້ອນໃນສື່ມວນຊົນໂລກນັ້ນ, ຫາງສຽງສາກົນສືບຕໍ່ແປກປະຫລາດຕໍ່ເລື່ອງ ປັກກີງ ແຕ້ມແຜນທີ່ດ້ວຍຕົນເອງ, ຖະແຫລງອະທິປະໄຕກວມເອົາທະເລຕາເວັນອອກເກືອບທັງໝົດ.
ຖ້າຫາກຄຳຮຽກສິດເສັ້ນລິ້ນງົວ 9 ຕອນ ຢູ່ ທະເລຕາເວັນອອກ ຊື່ງຈີນປະກາດເອງກັບໂລກເມື່ອປີ 2009, ບໍ່ໄດ້ຮັບຄວາມສົນໃຈ, ແຜນທີ່ 10 ຕອນຄັ້ງນີ້ ພັດເຮັດໃຫ້ປະຊາຄົມໂລກ ຂັດໃຈ, ຍ້ອນມັນໄຮ້ເຫດຜົນ, ບໍ່ເຄົາລົບກົດໝາຍສາກົນ. ແລະ ການກຳທະນີ້ຂອງຈີນ ໄດ້ດຶງດູດຄວາມສົນໃຈຈາກຫາງສຽງສຳລັບເຂດທະເລຕາເວັນອອກ. ວົງການນັກໄຈ້ແຍກໄດ້ໃຫ້ຂໍ້ສັງເກດວ່າ, ການຄິດໄລ່ເພື່ອຈຸດປະສົງຂອງຈີນໃນການປະຕິບັດຄວາມມັກໃຫຍ່ໄຝ່ສູງແຜ່ອຳນາດ ໄດ້ ແລະ ພວມນຳມາເຊິ່ງຜົນສະທ້ອນບໍ່ດີທີ່ຈີນບໍ່ທັນຄິດເຖິງ.
ຄຳເວົ້າແລະການກະທຳບໍ່ເອກະພາບ
ແຕ່ກ່ອນມາຮອດປະຈຸບັນ, ຍາມໃດຈີນ ກໍເລືອກເຟັ້ນມາດຕະການແກ້ໄຂຄວາມຂັດແຍ້ງຢູ່ທະເລຕາເວັນອອກ ບົນພື້ນຖານສອງຝ່າຍ ຫາກບໍ່ຢາກໃຫ້ຝ່າຍທີ 3 ແຊກແຊງເຂົ້າ, ຍິ່ງກວ່ານັ້ນ ບໍ່ຢາກຫັນບັນຫານີ້ເປັນບັນຫາສາກົນ. ພາຍຫລັງ ຫວຽດນາມ ສະເຫນີເປັນຫລາຍຄັ້ງຢາກສອງຝ່າຍພົບປະເຈລະຈາເພື່ອແກ້ໄຂບັນຫາ ແຕ່ບໍ່ໄດ້ຮັບຄວາມເຫັນດີໃດຈາກຝ່າຍຈີນ, ຫວຽດນາມ ເດັດດ່ຽວສົ່ງສານການທູດຕໍ່ສປຊ ເພື່ອຄັດຄ້ານຈີນ. ການກະທຳນີ້ຂອງຫວຽດນາມ ໄດ້ຮັບການສະຫນັບສະຫນູນອັນໃຫຍ່ຫລວງຈາກຫາງສຽງພາຍໃນ ແລະ ຕ່າງປະເທດ.
ຈີນຕັ້ງຮ້ານເຈາະນ້ຳມັນຢູ່ເຂດເສດຖະກິດຈຳເພາະຂອງຫວຽດນາມ
ພາບ:internet
|
ຕໍ່ຫນ້າທ່າທີເດັດດ່ຽວຂອງຫວຽດນາມ ແລະ ການຕຳນິຕິຕຽນຢ່າງແຮງຈາກສາກົນ, ພາຍຫລັງຫວຽດນາມ ສົ່ງສານການທູດຕໍ່ ສປຊ ພຽງ 2,3 ມື້, ຈີນ ໄດ້ຟ້າວຟັ່ງສົ່ງເອກະສານຕໍ່ອົງການນີ້, ກ່າວຕູ່ຫາ ຫວຽດນາມ ເກາະຜິດ, ກີດຂວາງຈີນພວມເຄື່ອນໄຫວປົກກະຕິຢູ່ທະເລຕາເວັນອອກ, ໃຫ້ກຳປັ່ນສະກັດກັ້ນ,ຕຳໃສ່ກຳປັ່ນຈີນເປັນ 1416 ຄັ້ງ. ໃນຂະນະທີ່ຫວຽດນາມ ມີພະຍານຫລັກຖານຢ່າງພຽງພໍເພື່ອກ່າວຕູ່ຫາການກະທຳເກາະຜິດຂອງຈີນຢູ່ທະເລຕາເວັນອອກ, ຈີນພັດບໍ່ມີພະຍານຫລັກຖານໃດເພື່ອພິສູດວ່າ ຕົນເອງແມ່ນຜູ້ຖືກເຄາະຮ້າຍ ເວັ້ນເສຍແຕ່ຄຳເວົ້າລ້າໆບໍ່ເປັນເອກະພາບເທົ່ານັ້ນ. ໃນຂະນະ ພວມຊອກຫາວິທີເພື່ອສ້າງເຫດປອມເພື່ອພິສູດວ່າ ກຳປັ່ນຫວຽດນາມ ບຸກໂຈມຕີ ກຳປັ່ນຈີນ, ບັນດາຮູບພາບ, clip ແທ້ຈິງໂດຍຫວຽດນາມສະຫນອງ ໄດ້ແຜ່ພາບອອກໃນບັນດາພາຫະນະສື່ມວນຊົນສາກົນ. ບັນດາບົດວິຈານ, ຖ່າຍທອດສົດຂອງບັນດາສຳນັກຂ່າວໃຫຍ່ໃນໂລກ ໄດ້ເຜີຍແບການກະທຳເກາະຜິດ, ກະມືງກະມັງຂອງຈີນ ຢູ່ ທະເລຕາເວັນອອກ.
ຈີນເສຍອິດທິພົນຊື່ສຽງຢ່າງຫນັກຫນ່ວງ
ດ້ວຍການປະຕິເສດທຸກຮູບການເຈລະຈາ, ຄຳເວົ້າ ແລະ ການກະທຳບໍ່ເອກະພາບ, ຈີນ ໄດ້ເຮັດໃຫ້ອິດທີພົນຊື່ສຽງຂອງຕົນຫລຸດລົງ. ປີ 2012 ຈີນ ໄດ້ສຳເລັດຜົນເມື່ອສະກັດກັ້ນ ອາຊຽນ ວາງອອກຖະແຫລງການຮ່ວມກ່ຽວກັບທະເລຕາເວັນອອກ ຕໍ່ຫນ້າຄຳຮຽກຮ້ອງຂອງ ຟິລີບປີນ. ແຕ່ໃນຄັ້ງນີ້ ດ້ວຍການກະທຳລ່ວງລ້ຳອະທິດປະໄຕຂອງຫວຽດນາມ, ຈີນ ຫວັງວ່າ ດ້ວຍຍຸດໂທບາຍຂອງຕົນ, ອາຊຽນ ຈະສືບຕໍ່ຖືກແບ່ງແຍກ, ຈີນຈະຍາດໄດ້ກົນອຸບາຍຂອງຕົນ.ແຕ່ກົງກັນຂ້າມກັບການຄິດໄລ່ຂອງປັກກີງ, ອາຊຽນ ໄດ້ສະແດງກຳລັງແຮງສາມັກຄີຂອງທັງກຸ່ມ ດ້ວຍເລື່ອງເຫັນດີເຫັນພ້ອມຕໍ່ວິທີການແກ້ໄຂສະພາບການຢູ່ທະເລຕາເວັນອອກ. ສັນຕິພາບ, ຄວາມໝັ້ນຄົງ, ຄວາມປອດໄພ, ຄວາມເສລີໃນການເດີນທະເລ, ບໍ່ນຳໃຊ້ອາວຸດໃນການແກ້ໄຂຄວາມຂັດແຍ້ງກັນ, ເຄົາລົບກົດໝາຍສາກົນ ແລະ ບັນດາຂໍ້ຕົກລົງທີ່ໄດ້ລົງນາມກັບອາຊຽນ ແມ່ນຫລັກໝັ້ນຂອງອາຊຽນ. ຊ້ຳບໍ່ໜຳ, ໃນການພົບປະກັບປະທານປະເທດຈີນ ສີຈີ້ນຜິງ ຢູ່ ປັກກີງ ໃນທ້າຍເດືອນ 5, ທ່ານປະທານາທິບໍດີ ມຽນມາ Thein Sein ໄດ້ຖະແຫລງວ່າ: ມຽນມາສະຫນັບສະຫນູນອາຊຽນໃນບັນຫາທະເລຕາເວັນອອກ, ຂະນະທີ່ຈີນ ມີເຈດຈຳນົງຊອກຫາການສະຫນັບສະຫນູນຂອງປະເທດນີ້.
ຍາກທີ່ສ້າງຄວາມໄວ້ເນື້ອເຊື່ອໃຈຄືນໃຫມ່ໄດ້
ໂດຍບໍ່ຫົວຊາຕໍ່ກົດໝາຍສາກົນເພື່ອສ້າງຄວາມເປັນລະບຽບຮຽບຮ້ອຍດ້ວຍການແຜ່ອຳນາດຢູ່ພາກພື້ນ. ຈີນ ຍິ່ງຮັກສານະໂຍບາຍກະຫາຍສົງຄາມຍິ່ງທຳລາຍອິດທິພົນຊື່ສຽງ ແລະ ພາບພົດຂອງຕົນ. ນຳຮ້ານເຈາະນ້ຳມັນເຂົ້າເຂດທະເລທີ່ຂຶ້ນກັບອະທິປະໄຕຂອງຫວຽດນາມ, ເມີນເສີຍກໍລະນີຟ້ອງຮ້ອງຂອງ ຟີລີບປີນ, ຖະແຫລງອະທິປະໄຕເຂດນ້ຳແດນດິນຢູ່ທະເລຕາເວັນອອກຂອງປະເທດອື່ນ, ຈີນ ພວມເຮັດໃຫ້ບັນດາປະເທດອາຊຽນເພີ່ມທະວີການຮ່ວມສຳພັນກັບອາເມລິກາ. ນີ້ແມ່ນສິ່ງທີ່ປັກກີງ ບໍ່ປາດຖະຫນາຈັກເທື່ອ ເພາະວ່າ ສິ່ງນີ້ຈະຊ່ວຍແຜນການມຸູ່ງໄປສູອາຊີຂອງອຳນາດການປົກຄອງ ວໍຊິງຕັນ ສະດວກກວ່າ.
ແຕ່, ສິ່ງທີ່ເສຍຫາຍຢ່າງຫນັກຫນ່ວງທີ່ສຸດຂອງຈີນ ນັ້ນແມ່ນອິດທິພົນຊື່ສຽງຂອງຊາດ. ໃນຫລາຍທົດສະວັດຜ່ານມາ, ຈີນ ໄດ້ມີຄວາມມານະພະຍາຍາມຫລາຍຢ່າງເພື່ອສ້າງສິດອຳນາດໃນທົ່ວໂລກ. ປະຈຸບັນ ບັນດາດ້ວຍກົນອຸບາຍແຜ່ອຳນາດ, ບັນດາຄຳຖະແຫລງຂອງການນຳຈີນທີ່ວ່າ:ຈີນ ພັດທະນາສັນຕິພາບ”, ໃນສາຍເລືອດຂອງຊາວຈີນ ບໍ່ມີ gel ຮຸກຮານ” ຍິ່ງເປັນຫນ້າຫົວ. ໃນອະນາຄົດ ຈະມີປະເທດໃດໄວ້ເນື້ອເຊື່ອໃຈ ຫລື ມີການພົວພັນກັບຈີນ ເມື່ອຄວາມໄວ້ເນື້ອເຊື່ອໃຈທີ່ຈຳເປັນຖືກເສຍແລ້ວ.