(vovworld)- ວັນທີ 27/10, ໂດຍໄດ້ຮັບຄຳເຊີນຂອງທ່ານນາຍົກລັດຖະມົນຕີ ສາທາລະນະລັດ ອິນເດຍ Narendra Modi, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ແລະ ພັນລະຍາ ເລີ່ມຕົ້ນການຢ້ຽມຢາມ ອິນເດຍ ຢ່າງເປັນທາງການ. ການຢ້ຽມຢາມ ອິນເດຍ ຄັ້ງນີ້ ຂອງທ່ານນາຍົກລັດຖະມົນຕີ ຫງວຽນເຕີນຢູງ ເພື່ອສືບຕໍ່ຊຸກຍູ້ການພົວພັນຄູ່ຮ່ວມມືຍຸດທະສາດລະຫວ່າງ ສອງປະເທດ ຢ່າງແຮງ ດ້ວຍຈຸດສຸມແມ່ນຮ່ວມມືເສດຖະກິດ, ພ້ອມທັງເປີດກວ້າງການຮ່ວມມືໃນບັນດາຂົງເຂດອື່ນ, ແລກປ່ຽນບັນດາບັນຫາກ່ຽວກັບພາກພື້ນ ແລະ ສາກົນຊື່ງຕ່າງຝ່າຍຕ່າງມີຄວາມສົນໃຈ.
ທ່ານນາຍົກລັດຖະມົນຕີຫວຽດນາມຫງວຽນເຕີນຢູງ
ພາບ:vtv.vn
|
ກ່ອນນີ້ 7 ປີເຕັມ(ປີ 2007), ໃນການຢ້ຽມຢາມ ອິນເດຍ ຂອງທ່ານນາຍົກລັດຖະມົນຕີ ຫງວຽນເຕີນຢູງ, ຫວຽດນາມ ແລະ ອິນເດຍ ໄດ້ສ້າງຕັ້ງສາຍພົວພັນຄູ່ຮ່ວມມືຍຸດທະສາດ, ຕາມນັ້ນແລ້ວ ໄດ້ກຳນົດ 5 ເສົາຄ້ຳໃນການພົວພັນຄູ່ຮ່ວມມືຍຸດທະສາດ, ຊື່ງລວມມີ: ການເມືອງ, ເສດຖະກິດ, ການປ້ອງກັນຊາດປ້ອງກັນຄວາມສະຫງົບ, ວິທະຍາສາດເຕັກໂນໂລຊີ ແລະ ວັດທະນະທຳການສຶກສາ. ເພື່ອຜັນຂະຫຍາຍປະສິດທິຜົນການພົວພັນຄູ່ຮ່ວມມືຍຸດທະສາດນີ້, ສອງຝ່າຍ ໄດ້ແລກປ່ຽນຄະນະຜູ້ແທນທຸກຂັ້ນຢ່າງລຽນຕິດ, ພິເສດ ແມ່ນບັນດາການຢ້ຽມຢາມຂັ້ນສູງ ພ້ອມທັງຍູ້ແຮງການຮ່ວມມືຄົ້ນຄ້ວາລະຫວ່າງບັນດາອົງການ, ສະຖາບັນຄົ້ນຄ້ວາ, ສືບຕໍ່ສ້າງກອບກົດໝາຍລວມໃຫ້ສົມບູນແບບ ເພື່ອຊຸກຍູ້ການຮ່ວມມືໃນທຸກຂົງເຂດ. ການຢ້ຽມຢາມ ອິນເດຍ ຄັ້ງນີ້ ຂອງທ່ານນາຍົກລັດຖະມົນຕີ ຫງວຽນເຕີນຢູງ ກໍເພື່ອສ້າງກາລະໂອກາດເພື່ອຊຸກຍູ້ການຮ່ວມມືລະຫວ່າງສອງປະເທດໃນທຸກຂົງເຂດຢ່າງແຮງ.
ເສດຖະກິດການຄ້າບັນລຸການເຕີບໂຕແຕ່ບໍ່ທັນສົມກັບຄວາມສາມາດບົ່ມຊ້ອນ
ຕາມການຕີລາຄາຂອງຜູ້ຊ່ຽວຊານ, ນັກການທູດ ຫລາຍທ່ານແລ້ວ, ບົນພື້ນຖານການພົວພັນດ້ານການເມືອງ, ການທູດ ອັນດີງາມ, ການຮ່ວມມືເສດຖະກິດລະຫວ່າງສອງປະເທດນັບມື້ນັບພັດທະນາຢ່າງແຮງ. ເຖິງວ່າ ວົງເງິນການຄ້າສອງສົ້ນ ຫວຽດນາມ - ອິນເດຍ ເພີ່ມຂຶ້ນໃນແຕ່ລະປີ ບັນລຸລະດັບເຕີບໂຕສະເລ່ຍ 16%/ປີ ໃນຮອບເວລາ 5 ປີຜ່ານມາ, ແຕ່ ຄວາມສາມາດບົ່ມຊ້ອນການພັດທະນາຍັງໃຫຍ່ຫລວງຢູ່. ທ່ານ ຫວູກວາງຢ້ຽມ, ຮອງປະທານສະມາຄົມມິດຕະພາບ ຫວຽດນາມ - ອິນເດຍ ໃຫ້ຮູ້ວ່າ:
“ເບິ່ງລວມແລ້ວ ການພົວພັນດ້ານເສດຖະກິດການຄ້າ, ວັດທະນະທຳທ່ອງທ່ຽວລະຫວ່າງສອງປະເທດ ໄດ້ພັດທະນາຢ່າງແຮງ, ພິເສດໃນຊຸມປີມໍ່ໆມານີ້, ແຕ່ບໍ່ທັນສົມກັບຄວາມສາມາດບົ່ມຊ້ອນ ແລະ ຄວາມປາດຖະຫນາຂອງສອງຝ່າຍ. ຍອດວົງເງິນການຄ້າຍັງກວມອັດຕາສ່ວນຫນ້ອຍ ສຳລັບອິນເດຍແມ່ນປະມານ 0,33%, ສ່ວນຫວຽດນາມ ແມ່ນ 1,25% ແລະ ຫວຽດນາມ ນຳເຂົ້າເກີນດຸນຫລາຍ. ການລົງທຶນຂອງອິນເດຍ ເຖິງວ່າ ມີການເພີ່ມຂຶ້ນແຕ່ບໍ່ສູງ, ຢືນອັນດັບທີ 32/88 ປະເທດ ແລະ ເຂດແຄ້ວນ. ການລົງທຶນຂອງຫວຽດນາມ ຢູ່ ອິນເດຍ ເກືອບຄືວ່າບໍ່ທັນມີ. ການທ່ອງທ່ຽວບໍ່ທັນໄດ້ຮັບການຂຸດຄົ້ນ, ຈຳນວນນັກທ່ອງທ່ຽວຍັງຈຳກັດຢູ່ ແລະ ບໍ່ທັນມີສາຍການບິນໂດຍກົງ. ແຕ່ຂ້າພະເຈົ້າເຊື່ອໝັ້ນວ່າ ດ້ວຍຄວາມຕັດສິນໃຈ ແລະ ຄວາມມານະພະຍາຍາມຂອງທັງສອງຝ່າຍ, ການພົວພັນລະຫວ່າງສອງປະເທດຈະຊຸກຍູ້ພັດທະນາກວ່າອີກ.”
ທ່ານນາຍົກລັດຖະມົນຕີອິນເດຍ Narendra Modi
ພາບ:vov.vn
|
ໂດຍມີທັດສະນະດຽວກັນ, ທ່ານ Rajit Rae, ເອກອັກຄະລັດຖະທູດ ອິນເດຍ ປະຈຳຫວຽດນາມ ຢືນຢັນວ່າ: ປະຈຸບັນ ຫວຽດນາມ ແລະອິນເດຍ ໄດ້ສ້າງການພົວພັນອັນດີງາມໃນຂົງເຂດການເມືອງ, ການປ້ອງກັນຊາດ ແລະ ປ້ອງກັນຄວາມສະຫງົບ. ເຖິງວ່າ ສອງຝ່າຍຍັງມີຫລາຍວຽກຕ້ອງເຮັດໃນຂົງເຂດເສດຖະກິດ ແລະ ການຄ້າ:
“ຈຸດສຸມຂອງສະຖານທູດ ອິນເດຍ ປະຈຳຫວຽດນາມ, ທູດການຄ້າ ອິນເດຍ ຕ້ອງເຮັດແນວໃດເຊື່ອມຕໍ່ວິສາຫະກິດສອງປະເທດໄດ້. ຍາມໃດພວກຂ້າພະເຈົ້າກໍຕ້ອນຮັບບັນດາວິສາຫະກິດ ອິນເດຍ ມາຫວຽດນາມ ເພື່ອຊອກຮູ້ບັນດາກາລະໂອກາດຮ່ວມມືລົງທຶນ ແລະ ບັນດາການພົບປະສົນທະນາກ່ຽວກັບດ້ານການຄ້າ ຈະຊ່ວຍວິສາຫະກິດສອງປະເທດເຂົ້າໃຈເຊິ່ງກັນ ແລະກັນ ກວ່າ. ສິ່ງສຳຄັນກວ່ານັ້ນແມ່ນ ເພີ່ມທະວີການພົວພັນແລກປ່ຽນດ້ານວັດທະນະທຳ, ສ້າງຄວາມເຂົ້າອົກເຂົ້າໃຈກ່ຽວກັບວັດທະນະທຳດຳເນີນທຸລະກິດຂອງແຕ່ລະຝ່າຍ ຈາກນັ້ນ ຊອກໄດ້ສຽງເວົ້າລວມ ແລະ ການກຳນົດທິດໃຫ້ແກ່ການພັດທະນາ.”
ເຮັດໃຫ້ການພົວພັນຄູ່ຮ່ວມມືຍຸດທະສາດ ຫວຽດນາມ-ອິນເດຍເລິກເຊິ່ງຂຶ້ນຕື່ມ
ຍາມໃດຫວຽດນາມ ກໍຢືນຢັນບຸລິມະສິດການພົວພັນມິດຕະພາບທີ່ເປັນ ມູນເຊື້ອແລະ ຄູ່ຮ່ວມມືຍຸດທະສາດຮອບດ້ານ ກັບອິນເດຍ ແມ່ນນະໂຍບາຍສະເໝີຕົ້ນສະເຫມີປາຍ. ລັດຖະບານ ອິນເດຍ ຍາມໃດກໍຖືຫວຽດນາມ ແມ່ນເສົາຄ້ຳໃນນະໂຍບາຍມຸ່ງໄປສູ່ທິດຕາເວັນອອກ, ການພັດທະນາການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານ ກັບຫວຽດນາມ ກໍແມ່ນນະໂຍບາຍຂອງທັງໝົດພັກການເມືອງຢູ່ ອິນເດຍ. ສອງປະເທດ ມີຫລາຍຈຸດຄ້າຍຄືກັນ ແລະ ການຮ່ວມມືຢ່າງແຫນ້ນແຟ້ນໃນບັນດາເວທີປາໄສພາກພື້ນ ແລະ ສາກົນ. ເມື່ອເວົ້າເຖິງການພົວພັນລະຫວ່າງ ຫວຽດນາມ ແລະ ອິນເດຍ ປະຈຸບັນ, ການນຳທຸກຂັ້ນ, ບັນດາກະຊວງ, ຂະແຫນງການ ແລະ ປະຊາຊົນສອງປະເທດ ລ້ວນແຕ່ຢືນຢັນ ນັ້ນແມ່ນການພົວພັນແບບພິເສດ, ບໍ່ພຽງແຕ່ເພື່ອຜົນປະໂຫຍດດ້ານການເມືອງ, ເສດຖະກິດເທົ່ານັ້ນ ຫາກຍັງແມ່ນໄມຕິຈິດມິດຕະພາບທີ່ເປັນມູນເຊື້ອມີມາແຕ່ດົນນານໃນອະດີດຕະການອີກດ້ວຍ. ສາດສະດາຈານ ດັ້ງດີງກູຍ, ຫົວຫນ້າສະຖາບັນການທູດ ຫວຽດນາມ ແບ່ງປັນວ່າ:
“ຫວຽດນາມ ແລະ ອິນເດຍ ຍາມໃດກໍເປັນເພື່ອນມິດບໍລິສຸດ, ແມ່ນຄູ່ຮ່ວມມືທີ່ໄວ້ເນື້ອເຊື່ອໃຈ, ແບ່ງປັນຜົນປະໂຫຍດ, ວິໄສທັດ. ການພົວພັນລະຫວ່າງສອງປະເທດ ໄດ້ມີບາດກ້າວພັດທະນາ. ການພົວພັນໃນທຸກຂົງເຂດພວມນັບມື້ນັບພັດທະນາ, ນຳມາເຊິ່ງຜົນປະໂຫຍດອັນແທດຈິງໃຫ້ແກ່ປະຊາຊົນສອງປະເທດ ແລະ ນັບມື້ນັບປະກອບສ່ວນຢ່າງໃຫຍ່ຫລວງໃຫ້ແກ່ສັນຕິພາບ, ສະຖຽນລະພາບ ແລະວັດທະນາຖາວອນຂອງພາກພື້ນ.”
ຕໍ່ຫນ້າບັນດາສິ່ງທ້າທາຍພວມເກີດຂຶ້ນຢູ່ພາກພື້ນ ແລະ ໃນໂລກ, ທັງສອງປະເທດລ້ວນແຕ່ຮັບຮູ້ຢ່າງຈະແຈ້ງຄວາມສຳຄັນຂອງການຮັກສາສາຍພົວພັນມິດຕະພາບທີ່ເປັນມູນເຊື້ອອັນດີງາມ, ເຮັດໃຫ້ການພົວພັນຄູ່ຮ່ວມມືຍຸດທະສາດ ທີ່ໄດ້ຮັບການສ້າງຕັ້ງນັ້ນເລິກເຊິ່ງຂຶ້ນຕື່ມ. ຄຽງຄູ່ກັບການພົວພັນດ້ານເສດຖະກິດ, ການພົວພັນຮ່ວມມືປ້ອງກັນຊາດປ້ອງກັນຄວາມສະຫງົບ ກໍແມ່ນເສົາຄ້ຳສຳຄັນຂອງການພົວພັນຄູ່ຮ່ວມມືຍຸດທະສາດ. ການພົວພັນແລກປ່ຽນວັດທະນະທຳເປັນປະຈຳ ໄດ້ປະກອບສ່ວນຮັດແຫນ້ນອາລົມຈິດລະຫວ່າງປະຊາຊົນສອງປະເທດ. ສອງຝ່າຍ ກໍໄດ້ສົມທົບກັນຢ່າງແຫນ້ນແຟ້ນ ແລະ ສະຫນັບສະຫນູນ ເຊິ່ງກັນ ແລະ ກັນທີ່ບັນດາເວທີປາໄສພາກພື້ນ ແລະ ໃນໂລກ.
ພາຍຫລັງ ທີ່ທ່ານປະທານາທິບໍດີ ອິນເດຍ Pranab Mukherjee ຢ້ຽມຢາມຫວຽດນາມ ກວ່າ 1 ເດືອນ, ການຢ້ຽມຢາມອິນເດຍຂອງທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ຄັ້ງນີ້ ອີກຄັ້ງຫນຶ່ງຢືນຢັນຄວາມໄວ້ເນື້ອເຊື່ອໃຈດ້ານການເມືອງ ລະຫວ່າງຫວຽດນາມ ແລະ ອິນເດຍ. ການຢ້ຽມຢາມ ດ້ວຍບັນດາໝາກຜົນການເຮັດວຽກລະອຽດ, ແນ່ນອນວ່າ ຈະສ້າງກຳລັງຫນູນໃຫມ່ໃຫ້ແກ່ການພົວພັນລະຫວ່າງຫວຽດນາມ ແລະ ອິນເດຍ ໃນໄລຍະຈະມາເຖິງ