(vovworld)- ໂດຍຮັບຄຳເຊີນຂອງທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ, ວັນທີ 6/4, ທ່ານນາຍົກລັດຖະມົນຕີ ສະຫະພັນ ລັດເຊຍ Dmitry Medvede ເລີ່ມຕົ້ນບັນດາການເຄື່ອນໄຫວຢ້ຽມຢາມ ຫວຽດນາມ ຢ່າງເປັນທາງການ ແຕ່ວັນທີ 5-7/4. ໃນສະພາບທີ່ການພົວພັນດ້ານການເມືອງ ລະຫວ່າງ ຫວຽດນາມ ແລະ ລັດເຊຍ ໃນໄລຍະຜ່ານມາບັນລຸຄວາມໄວ້ເນື້ອເຊື່ອໃຈສູງ ແລະ ໄດ້ຮັບການປັບປຸງຢ່າງບໍ່ຢຸດຢັ້ງ, ການຢ້ຽມຢາມຫວຽດນາມ ຄັ້ງນີ້ຂອງທ່ານ ນາຍົກລັດຖະມົນຕີ ສະຫະພັນ ລັດເຊຍ Dmitry Medvede ແມ່ນຂີດໝາຍສຳຄັນ, ສ້າງກຳລັງຫນູນຢ່າງແຮງໃຫ້ແກ່ການພັດທະນາການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ ສອງປະເທດ.
ທ່ານນາຍົກລັດຖະມົນຕີ ຫງວຽນເຕີນຢູງ ແລະ ທ່ານນາຍົກ
ລັດຖະມົນຕີ ລັດເຊຍ Dmitry Medvede
ພາບ:congan.com.vn
|
ການພົວພັນລະຫວ່າງຫວຽດນາມ ແລະ ລັດເຊຍ ແມ່ນການພົວພັນຈິງໃຈຢ່າງແທ້ຈິງ
ໃນນະໂຍບາຍການພົວພັນຕ່າງປະເທດເອກະລາດ, ເປັນເຈົ້າຕົນເອງ, ສັນຕິພາບ, ການຮ່ວມມື ແລະ ພັດທະນາຂອງຕົນ, ຫວຽດນາມ ຍາມໃດກໍຖື ສະຫະພັນລັດເຊຍ ແມ່ນຫນຶ່ງໃນບັນດາຄູ່ຮ່ວມມືສຳຄັນ ແລະ ໄວ້ເນື້ອເຊື່ອໃຈອັນດັບຕົ້ນ. ກົງກັນຂ້າມ, ລັດເຊຍ ຍາມໃດກໍສະຫງວນການຫນູນຊ່ວຍອັນໃຫຍ່ຫລວງ ນັບທັງດ້ານວັດຖຸ ແລະ ຈິດໃຈໃຫ້ແກ່ຫວຽດນາມ ທັງໃນກິດຈະການຕໍ່ສູ້ຍາດເອົາເອກະລາດກ່ອນນີ້ ກໍຄືໃນການສ້າງສາພັດທະນາເສດຖະກິດຂອງປະເທດຊາດປະຈຸບັນ. ການນຳສອງລັດ ຍາມໃດກໍສະຫງວນບັນດາບຸລິມະສິດສູງສຸດໃຫ້ກັນ. ກ່ອນການໄປຢ້ຽມຢາມຫວຽດນາມ, ໃນການຕອບສຳພາດຕໍ່ນັກຂ່າວ ຫວຽດນາມ, ທ່ານ ນາຍົກລັດຖະມົນຕີ ສະຫະພັນ ລັດເຊຍ Dmitry Medvede ໄດ້ຢືນຢັນວ່າ:
“ພວກເຮົາມີການພົວພັນຈິງໃຈຢ່າງແທ້ຈິງ. ມັນແມ່ນຄືແນວນັ້ນແທ້. ຂ້າພະເຈົ້າເຄີຍແບ່ງປັນຄວາມຮູ້ສຶກຂອງຕົນກ່ຽວກັບອະນຸສອນເມື່ອເປັນຄັ້ງທຳອິດໄດ້ພົບປະກັບໝູ່ເພື່ອນຫວຽດນາມ, ກັບບັນດາສະຫາຍກ່ອນນີ້ເຄີຍເຮັດວຽກຢູ່ Leningrad, ໃນນັ້ນ ມີມະຫາວິທະຍາໄລແຫ່ງທີ່ພໍ່ຂອງຂ້າພະເຈົ້າເປັນຄູສອນ. ນັບແຕ່ນັ້ນມາຮອດປະຈຸບັນ ບໍ່ມີຫຍັງປ່ຽນແປງ. ຂ້າພະເຈົ້າເຊື່ອໝັ້ນວ່າໄລຍະຈະມາເຖິງກໍຄືແນວນັ້ນ.”
ຍ້ອນຄວາມໄວ້ເນື້ອເຊື່ອໃຈດ້ານການເມືອງສູງຄືແນວນັ້ນ ໄດ້ຊຸກຍູ້ການຮ່ວມມືລະຫວ່າງ ຫວຽດນາມ ແລະ ລັດເຊຍ ພັດທະນາຢ່າງແຮງໃນທຸກຂົງເຂດ, ບັນລຸໝາກຜົນສຳຄັນຫລາຍຢ່າງ. ນັບແຕ່ເມື່ອສອງປະເທດ ສ້າງຂອບເຂດການພົວພັນຮ່ວມມືຍຸດທະສາດ ເມື່ອເດືອນ 3/2001 ແລະ ພິເສດ ນັບແຕ່ເມື່ອຍົກການພົວພັນຂຶ້ນສູ່ລະດັບ “ຄູ່ຮ່ວມມືຍຸດທະສາດຮອບດ້ານ”ໃນປີ 2012, ການພົວພັນລະຫວ່າງຫວຽດນາມ ແລະ ສະຫະພັນລັດເຊຍ ກ້າວເຂົ້າສູ່ໄລຍະໃຫມ່ຢ່າງທາງການ, ມີຄວາມຂະຫຍັນຂັນເຄື່ອນ ແລະ ປະສິດທິຜົນ, ເປັນຕົ້ນໃນບັນດາຂົງເຂດເສດຖະກິດ ການຄ້າ, ການຮ່ວມມືລົງທຶນ ແລະ ການປ້ອງກັນຊາດປ້ອງກັນຄວາມສະຫງົບ.
ການຮ່ວມມືສອງຝ່າຍບັນລຸຄວາມຄືບຫນ້າຫລາຍຢ່າງ
ປີ 2014, ວົງເງິນການຄ້າສອງຝ່າຍ ບັນລຸລະດັບເກືອບ 4 ຕື້ USD, ສູງກວ່າຫລາຍເມື່ອທຽບໃສ່ລະດັບ 400 ລ້ານ USD ໃນຊຸມປີ 90. ປະຈຸບັນ ລັດເຊຍ ຢືນອັນດັບ 17 ໃນຈຳນວນ 101 ປະເທດ ແລະ ເຂດແຄ້ວນລົງທຶນຢູ່ຫວຽດນາມ ດ້ວຍ 106 ໂຄງການ ແລະ ຍອດຈຳນວນທຶນຈົດທະບຽນເກືອບ 2 ຕື້ USD. ການລົງທຶນຂອງ ລັດເຊຍ ຢູ່ ຫວຽດນາມ ເພີ່ມຂຶ້ນຢ່າງໄວໃນຊຸມປີຜ່ານມາ, ສຸມໃສ່ຫລາຍສຸດເຂົ້າໃນຂົງເຂດຂຸດຄົ້ນບໍ່ແຮ່, ອຸດສາຫະກຳປຸງແຕ່ງ, ປະດິດສ້າງ.. ແລະ ສືບຕໍ່ເປີດກວ້າງໄປຍັງຫລາຍຂົງເຂດໃຫມ່ຄື: ທະນາຄານ, ໂທລະຄົມມະນາຄົມ, ດ້ວຍໂຄງການໃຫຍ່ຈຳນວນຫນຶ່ງຄື: ທະນາຄານ ຫວຽດນາມ - ລັດເຊຍ. ການລົງທຶນຂອງຫວຽດນາມ ໄປຍັງ ລັດເຊຍ ເພີ່ມຂຶ້ນຢ່າງໄວໃນຊຸມປີມໍ່ໆມານີ້. ປະຈຸບັນ ຫວຽດນາມ ມີ 19 ໂຄງການລົງທຶນຢູ່ ລັດເຊຍ ດ້ວຍຍອດຈຳນວນທຶນເກືອບ 2,5 ຕື້ USD. ຫວຽດນາມ ແລະ ບັນດາປະເທດພັນທະມິດເສດຖະກິດ ອາຊີ - ເອີລົບ ຊື່ງລວມມີ: ລັດເຊຍ, ເບລາຣຸດ ແລະ ກາຊັກສະຖານ ໄດ້ລົງນາມໃນຖະແຫລງການຮ່ວມພື້ນຖານກ່ຽວກັບສິ້ນສຸດການເຈລະຈາສັນຍາການຄ້າເສລີ ໃນທ້າຍປີ 2014 ຊື່ງຄາດວ່າ ລົງນາມຢ່າງເປັນທາງການໃນປີນີ້.
ພະລັງງານ ແມ່ນຂົງເຂດຮ່ວມມື ປາຍແຫລມ ໃນການພົວພັນລະຫວ່າງ ຫວຽດນາມ ແລະ ລັດເຊຍ. ນອກຈາກ Vietsopetro, ສອງປະເທດ ໄດ້ສ້າງຕັ້ງບັນດາບໍລິສັດຮ່ວມ Rusvietpetro, Vietgazprom, Gazpromviet ເພື່ອເປີດກວ້າງການຮ່ວມມືນ້ຳມັນອາຍແກດສ ຢູ່ ຫວຽດນາມ, ລັດເຊຍ ແລະ ປະເທດທີສາມ. ທີ່ການສຳພາດຕໍ່ນັກຂ່າວຫວຽດນາມກ່ອນການຢ້ຽມຢາມຫວຽດນາມ, ທ່ານນາຍົກລັດຖະມົນຕີ ສະຫະພັນ ລັດເຊຍ Dmitry Medvede ເນັ້ນຫນັກວ່າ:
“ສອງປະເທດພວກເຮົາ ມີການພົວພັນອຸດົມສົມບູນໃນຂົງເຂດຂຸດຄົ້ນຢູ່ໄຫລ່ທະວີບມາແຕ່ດົນນານແລ້ວ.ການຮ່ວມມືທຳອິດ ແມ່ນສ້າງຕັ້ງບໍລິສັດຮ່ວມທຸລະກິດນຳ້ມັນອາຍແກສ Vietsopetro. ສິ່ງດັ່ງກ່າວໄດ້ສະແດງໃຫ້ເຫັນວ່າ ນີ້ແມ່ນການຮ່ວມມືຕ່າງຝ່າຍຕ່າງມີຜົນປະໂຫຍດ. ບໍ່ພຽງແຕ່ບໍລິສັດ Zarubezhneft ເທົ່ານັ້ນ ຫາກມີກຸ່ມບໍລິສັດ ແລະ ບໍລິສັດຫລາຍແຫ່ງຂອງລັດເຊຍ, ບັນດາລັດວິສາຫະກິດຂະຫນາດໃຫຍ່ຄື Rosneft ແລະ Gazprom ກໍມີບັນດາຄູ່ຮ່ວມມືຂອງຕົນຢູ່ ຫວຽດນາມ ແລະ ວິສາຫະກິດແຕ່ລະແຫ່ງໃນຈຳນວນເຫົ່ຼານັ້ນ ພວມດຳເນີນຊຸກຍູ້ການຮ່ວມມື.”
ການຮ່ວມມືຢ່າງແຫນ້ນແຟ້ນຢູ່ບັນດາເວທີປາໄສຫລາຍຝ່າຍ
ບໍ່ພຽງແຕ່ມີການພົວພັນສອງຝ່າຍ, ຫວຽດນາມ ແລະ ລັດເຊຍ ຍັງມີຫລັກໝັ້ນຄ້າຍຄືກັນໃນບັນດາບັນຫາສາກົນ ແລະ ພາກພື້ນ, ພິເສດ ມີທັດສະນະຄືກັນໃນບັນຫາແກ້ໄຂຄວາມຂັດແຍ້ງຜືນແຜ່ນດິນ ຢູ່ ພາກພື້ນ ອາຊີ ປາຊີຟີກ. ຫລັກໝັ້ນຂອງລັດເຊຍ ແລະ ຫວຽດນາມ ແມ່ນສັນຕິພາບ, ບໍ່ນຳໃຊ້ອາວຸດ ແລະ ເຄົາລົບກົດໝາຍສາກົນໃນການແກ້ໄຂຄວາມຂັດແຍ້ງ. ໃນສະພາບການລັດເຊຍ ພວມຫັນຄວາມເອົາໃຈໃສ່ເຖິງຝ່າຍຕາເວັນອອກ ແລະ ເພີ່ມທະວີບົດບາດຢູ່ພາກພື້ນ ອາຊີ ປາຊີຟີກ, ລັດເຊຍ ຕີລາຄາສູງທີ່ຕັ້ງບົດບາດຂອງຫວຽດນາມ ຢູ່ ພາກພື້ນ ອາຊຽນ ແລະ ຖືຫວຽດນາມ ເປັນຂົວຕໍ່ເພື່ອຊຸກຍູ້ການພົວພັນກັບບັນດາປະເທດ ອາຊຽນ.
ການຢ້ຽມຢາມຫວຽດນາມ ຢ່າງເປັນທາງການຄັ້ງນີ້ ຂອງທ່ານ ນາຍົກລັດຖະມົນຕີ ສະຫະພັນ ລັດເຊຍ Dmitry Medvede ແມ່ນໂອກາດເພື່ອໃຫ້ສອງຝ່າຍສຳຫລວດກວດຄືນສະພາບການປະຕິບັດບັນດາຫນ້າທີ່ບຸລິມະສິດປີ 2014 ແລະ ເປັນເອກະພາບຜັນຂະຫຍາຍບັນດາຫນ້າທີບຸລິມະສິດ 2015, ຜັນຂະຫຍາຍບັນດາຂໍ້ຕົກລົງຂັ້ນສູງທີ່ບັນລຸໄດ້, ແລກປ່ຽນບັນດາບັນຫາພາກພື້ນ ແລະສາກົນຊື່ງຕ່າງຝ່າຍຕ່າງມີຄວາມສົນໃຈ. ການຢ້ຽມຢາມ ເພື່ອປະກອບສ່ວນປັບປຸງ, ເພີ່ມທະວີການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ ແລະ ລັດເຊຍ, ເພີ່ມຄວາມເຂົ້າໃຈ ແລະ ໄວ້ເນື້ອເຊື່ອໃຈລະຫວ່າງການນຳຂັ້ນສູງສອງປະເທດ.