(vovworld)- ທ່ານນາຍົກລັດຖະມົນຕີ ຣູມານີ Dacian Ciolos ພວມຢ້ຽມຢາມຫວຽດນາມ ຢ່າງເປັນທາງການ ແຕ່ວັນທີ 11-14/7/2016 ຕາມຄຳເຊີນຂອງທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ. ການຢ້ຽມຢາມແມ່ນເຫດການການເມືອງສຳຄັນ, ເປັນຂີດໝາຍໃຫມ່ໃນການພົວພັນສອງຝ່າຍ.
ທ່ານນາຍົກລັດຖະມົນຕີ ຣູມານີ Dacian Ciolos ແລະ
ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ
ພາບ:TTXVN
|
ໃນຂອບເຂດການຢ້ຽມຢາມ, ທ່ານນາຍົກລັດຖະມົນຕີ ຣູມານີ Dacian Ciolos ມີການເຈລະຈາກັບທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ແລະ ພົບປະກັບທ່ານເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ, ທ່ານປະທານປະເທດ ເຈີນດ້າຍກວາງ, ທ່ານນາງປະທານສະພາແຫ່ງຊາດ ຫງວຽນທິກີມເງິນ. ທ່ານນາຍົກລັດຖະມົນຕີ ຣູມານີ Dacian Ciolos ພ້ອມກັບບັນດາການນຳຫວຽດນາມ ເຂົ້າຮ່ວມ ແລະ ກ່າວປາໄສທີ່ເວທີປາໄສວິສາຫະກິດຫວຽດນາມ - ຣູມານີ ຊື່ງໄດ້ຮັບການຈັດຕັ້ງຂຶ້ນໃນໂອກາດນີ້.
ການພົວພັນມິດຕະພາບທີ່ເປັນມູນເຊື້ອມີມາແຕ່ດົນນານ
ຣູມານີ ແລະ ຫວຽດນາມ ມີການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫລາຍດ້ານ. ໃນຊຸມປີຕົ້ນທົດສະວັດທີ 50, ຫວຽດນາມ ແລະ ຣູມານີ ໄດ້ສ້າງຕັ້ງການພົວພັນທາງການທູດ ແລະ ນັບແຕ່ໄລຍະນັ້ນເປັນຕົ້ນໄປ, ສອງປະເທດໄດ້ເພີ່ມພູນຄູນສ້າງການພົວພັນມິດຕະພາບອັນດີງາມນັ້ນຢ່າງບໍ່ຢຸດຢັ້ງ. ສອງຝ່າຍໄດ້ແລກປ່ຽນບັນດາຄະນະຜູ້ແທນຂັ້ນສູງ, ສ້າງກຳລັງຫນູນຢ່າງແຮງໃຫ້ແກ່ການພັດທະນາການພົວພັນສອງຝ່າຍ. ປີ 2009, ທ່ານຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດຫວຽດນາມ ຟ້າມຢາຄຽມ ໄດ້ໄປຢ້ຽມຢາມ ຣູມານີ ແລະ ປີ 2014, ທ່ານນາງຮອງປະທານສະພາແຫ່ງຊາດ ຫວຽດນາມ ຫງວຽນທິກີມເງິນ ໄປຢ້ຽມຢາມ ຣູມານີ. ພ້ອມນັ້ນ, ທ່ານປະທານາທິບໍດີ ຣູມານີ Ion Iliescu ມາຢ້ຽມຢາມຫວຽດນາມເມື່ອ ປີ 2002, ທ່ານ Korodi Attila ປະທານກຳມາທິການການຕ່າງປະເທດ ສະພາຕ່ຳ ຣູມານີມາຢ້ຽມຢາມຫວຽດນາມ ເມື່ອປີ 2011.
ບົນພື້ນຖານການພົວພັນມິດຕະພາບທີ່ເປັນມູນເຊື້ອອັນດີງາມນັ້ນ, ຫວຽດນາມ ແລະ ຣູມານີ ສະຫນັບສະຫນູນເຊິ່ງກັນສະໝັກຮັບເລືອກຕັ້ງເປັນກຳມະການບໍ່ປະຈຳຂອງສະພາຄວາມໝັ້ນຄົງ ສປຊ. ໃນຂອບເຂດເວທີປາໄສການຮ່ວມມື ອາຊີ -ເອີລົບ (ASEM), ສອງຝ່າຍຮ່ວມກັນໃນການອຸປະກະລະຂໍ້ລິເລີ່ມຂອງ ຮູງກາຣີ ກ່ຽວກັບບົດບາດຂອງແຫລ່ງນ້ຳໃນຍຸດທະສາດພັດທະນາພາກພື້ນແບບຍືນຍົງ. ມາຮອດປະຈຸບັນ, ສອງຝ່າຍໄດ້ລົງນາມໃນເອກະສານສອງຝ່າຍ 7 ສະບັບ ເພື່ອສ້າງກອບກົດໝາຍ, ສ້າງເງື່ອນໄຂສະດວກໃຫ້ແກ່ການພັດທະນາການພົວພັນລະຫວ່າງສອງປະເທດ.
ການຮ່ວມມືດ້ານເສດຖະກິດການຄ້າລະຫວ່າງຫວຽດນາມ ແລະ ຣູມານີ ໃນໄລຍະຜ່ານມາ ໄດ້ພັດທະນາຢ່າງຂະຫຍັນຂັນເຄື່ອນ. ປີ 2015 ວົງເງິນການຄ້າສອງສົ້ນບັນລຸ 175,6 ລ້ານ USD, ເພີ່ມຂຶ້ນ 16% ເມື່ອທຽບໃສ່ປີ 2014. ນັບແຕ່ປີ 2010, ຣູມານີ ຈັດເຂົ້າບັນຊີລາຍຊື່ກຸ່ມບັນດາຕະຫລາດສົ່ງອອກສິນໃນນ້ຳໃຫຍ່ຂອງຫວຽດນາມ ດ້ວຍປະລິມານ 12.000 ໂຕນ/ປີ. ການພົວພັນຮ່ວມມືລົງທຶນລະຫວ່າງສອງປະເທດຍັງມີຄວາມສາມາດບົ່ມຊ້ອນຫລາຍຢ່າງ. ຮອດທ້າຍປີ 2015 ຣູມານີ ມີ 3 ໂຄງການ FDI ຢູ່ ຫວຽດນາມ ດ້ວຍຍອດຈຳນວນທຶນຈົດທະບຽນແມ່ນ 2,1 ລ້ານ USD.
ການຮ່ວມມືດ້ານການສຶກສາແມ່ນຈຸດພົ້ນເດັ່ນ
ການຮ່ວມມືດ້ານການສຶກສາບຳລຸງສ້າງແມ່ນຈຸດພົ້ນເດັ່ນໃນການພົວພັນລະຫວ່າງຫວຽດນາມ ແລະ ຣູມານີ. ປີ 1995, ສອງປະເທດໄດ້ລົງນາມກ່ຽວກັບການຮ່ວມມືໃນບັນດາຂົງເຂດຄື: ວັດທະນະທຳ, ວິທະຍາສາດ ແລະ ກິລາ, ຕາມນັ້ນແລ້ວ ແຕ່ລະປີ ຣູມານີ ມອບ ທຶນການສຶກສາມະຫາວິທະຍາໄລ ແລະ ເຫນືອມະຫາວິທະຍາໄລໃຫ້ແກ່ຫວຽດນາມ 10 ທຶນ. ສອງຝ່າຍໄດ້ລົງນາມໃນໂຄງການຮ່ວມມືດ້ານການສຶກສາໄລຍະ 2013-2016 ເນື່ອງໃນໂອກາດການຢ້ຽມຢາມຫວຽດນາມ ຂອງ ລັດຖະມົນຕີກະຊວງສຶກສາ ຣູມານີ ເມື່ອປີ 2013. ແຕ່ປີ 2006, ລັດຖະບານ ຣູມານີ ໄດ້ສ້າງລາຍການມອບທຶນການສຶກສາບຳລຸງສ້າງປະລິຍາເອກໃຫ້ບັນດາປະເທດໃຊ້ພາສາ ຝລັ່ງ, ໃນນັ້ນ ມີຫວຽດນາມ. ເດືອນ 10/2006,
ກຸ່ມບໍລິສັດ PetroVietnam ແລະ Petroconsult ຂອງຣູມານີ ໄດ້ລົງນາມໃນເອກະສານບຳລຸງສ້າງຊັບພະຍາກອນມະນຸດ ແລະ ການເຄື່ອນໄຫວທົດລອງໂຮງງານກັ່ນນ້ຳມັນ ຢູ່ ຣູມານີ ແລະ ມີຜູ້ຊ່ຽວຊານ ຣູມານີ 56 ຄົນ ໄດ້ໄປເຮັດວຽກຢູ່ໂຮງງານໃນໄລຍະເຄື່ອນໄຫວທົດລອງໂຮງງານດັ່ງກ່າວ. ນອກນັ້ນ ໃນໄລຍະ 2003 – 2009, ຣູມານີ ໄດ້ບຳລຸງສ້າງໃຫ້ Petrovietnam ນັກວິສາວະກອນ 35 ຄົນ. ປະຈຸບັນ, ມີນັກສຶກສາຫວຽດນາມ 50 ຄົນພວມຮ່ຳຮຽນຢູ່ ຣູມານີ ແລະ ມີກຳມະກອນຫວຽດນາມ ປະມານ 450 ຄົນພວມເຮັດວຽກຢູ່ບັນດາໂຮງງານ, ກິດຈະກຳກໍ່ສ້າງຕ່າງໆຂອງຣູມານີ. ວົງຄະນາຍາດຊາວຫວຽດນາມ ຢູ່ ຣູມານີ ປະມານ 500 ຄົນ ເຊື່ອມຕົວກັບສັງຄົມຣູມານີເປັນຢ່າງດີ ແລະ ຍາມໃດກໍສາມັກຄີ ແລະ ອວ່າຍຫນ້າເມືອຫາປະເທດຊາດ.
ການຢ້ຽມຢາມຫວຽດນາມຢ່າງເປັນທາງການຄັ້ງນີ້ຂອງທ່ານນາຍົກລັດຖະມົນຕີ ຣູມານີ ເພື່ອແນໃສ່ຢັ້ງຢືນຄວາມຕັດສິນໃຈຂອງການນຳ ແລະ ປະຊາຊົນຫວຽດນາມ ແລະ ຣູມານີ ເພື່ອຊຸກຍູ້ການພົວພັນມິດຕະພາບທີ່ເປັນມູນເຊື້ອ, ການຮ່ວມມືຫລາຍດ້ານລະຫວ່າງສອງປະເທດ. ການຢ້ຽມຢາມກໍຈະເພີ່ມທະວີການພົວພັນຮ່ວມມືຫລາຍດ້ານລະຫວ່າງສອງປະເທດໃນອະນາຄົດ.