(vovworld)- ແຕ່ວັນທີ 13-15/10, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ໄດ້ໄປຢ້ຽມຢາມ ແລະ ເຮັດວຽກຢູ່ ລາຊະອານາຈັກ ແບນຊິກ, ສະຫະພາບເອີລົບ(EU) ແລະ ສ ສະຫະພັນເຢຍລະມັນ. ການຢ້ຽມຢາມເພື່ອແນໃສ່ແລກປ່ຽນທິດທາງ, ມາດຕະການຊຸກຍູ້ການພົວພັນຮອບດ້ານ, ແທດຈິງ ແລະ ມີປະສິດທິຜົນ ລະຫວ່າງຫວຽດນາມ ແລະ ບັນດາຄູ່ຮ່ວມມືສຳຄັນຢູ່ ເອີລົບ, ພິເສດແມ່ນໃນຂົງເຂດເສດຖະກິດ. ການຢ້ຽມຢາມ ກໍສືບຕໍ່ສະແດງແຜນນະໂຍບາຍເຊື່ອມໂຍງກັບສາກົນຢ່າງຮອບດ້ານ, ປະກອບສ່ວນເປັນເຈົ້າການ,ຕັ້ງຫນ້າ ຂອງຫວຽດນາມ ສຳລັບບັນດາບັນຫາຊື່ງໂລກສົນໃຈ.
ທ່ານນາຍົກລັດຖະມົນຕີ ຫງວຽນເຕີນຢູງ ແລະ
ທ່ານ ປະທານຄະນະກຳມະການເອີລົບ (EC) Manuel Baroso
|
ທ່ານນາຍົກລັດຖະມົນຕີ ຫງວຽນເຕີນຢູງ ຢ້ຽມຢາມ ແບນຊິກ, EU ແລະ ເຢຍລະມັນ ຕາມຄຳເຊີນຂອງທ່ານນາຍົກລັດຖະມົນຕີ ແບນຊິກ Elio Di Rupo, ປະທານຄະນະກຳມະການເອີລົບ (EC) Manuel Baroso ແລະ ທ່ານນາງ ນາຍົກເຢຍລະມັນ Angela Merkel. ນີ້ແມ່ນການເຄື່ອນໄຫວການຕ່າງປະເທດທີ່ສຳຄັນຂອງຫວຽດນາມ ໃນປີ 2014.
ການຮ່ວມມືດ້ານເສດຖະກິດແມ່ນຈຸດພົ້ນເດັ່ນໃນການພົວພັນສອງຝ່າຍຫວຽດນາມ-ແບນຊິກ
ປະເທດທຳອິດທ່ານນາຍົກລັດຖະມົນຕີ ຫງວຽນເຕີນຢູງ ໄປຢ້ຽມຢາມໃນການເດີນທາງຢ້ຽມຢາມບັນດາປະເທດເອີລົບ ນັ້ນແມ່ນ ລາຊະອານາຈັກ ແບນຊິກ. ໄລຍະຜ່ານມາ, ການພົວພັນລະຫວ່າງ ຫວຽດນາມ ແລະ ແບນຊິກ ສືບຕໍ່ມີບັນດາບາດກ້າວພັດທະນາອັນດີງາມໃນບັນດາຂົງເຂດ. ສະເພາະດ້ານເສດຖະກິດ, ການພົວພັນດ້ານການຄ້າ, ການລົງທຶນລະຫວ່າງ ຫວຽດນາມ ແລະ ແບນຊິກ ສືບຕໍ່ເພີ່ມຂຶ້ນ. ເຖິງວ່າ ແບນຊິກ ແມ່ນຕະຫລາດນ້ອຍ ແຕ່ການພົວພັນດ້ານການຄ້າລະຫວ່າງສອງປະເທດຢູ່ໃນລະດັບສູງເມື່ອທຽບໃສ່ຫລາຍປະເທດຢູ່ EU ແລະ ເອີລົບ, ພິເສດ ແມ່ນການສົ່ງອອກສິນຄ້າຂອງຫວຽດນາມ. ວົງເງິນການຄ້າສອງສົ້ນລະຫວ່າງສອງປະເທດ ບັນລຸ 1,8 ຕື້ USD ໃນປີ 2013, ເພີ່ມຂຶ້ນ 17% ເມື່ອທຽບໃສ່ປີ 2012. 6 ເດືອນຕົ້ນປີ 2014, ບັນລຸ 1,2 ຕື້ USD. ການລົງທຶນໂດຍກົງຂອງແບນຊິກເຂົ້າຫວຽດນາມ ບັນລຸກວ່າ 155 ລ້ານ USD. ຫວຽດນາມ ແມ່ນປະເທດ ອາຊີ ຫນຶ່ງດຽວ ໄດ້ຮັບການຊ່ວຍເຫລືອພັດທະນາຂອງແບນຊິກ (ປະມານ 78 ລ້ານ USD ໃຫ້ແກ່ໄລຍະ 2011-2015). ປະຈຸບັນ ສອງຝ່າຍ ພວມສຸມໃສ່ຮ່ວມມືໃນບັນດາຂົງເຂດບຸລິມະສິດຄື: ພັດທະນາພື້ນຖານໂຄງລ່າງທ່າກຳປັ່ນທະເລ ແລະ ບໍລິການພະລາທິການ, ຄົມມະນາຄົມຂົນສົ່ງ, ເຕັກໂນໂລຊີຂຽວ, ສາທາລະນະສຸກ, ການສຶກສາ…
ການຢ້ຽມຢາມແບນຊິກ ຢ່າງເປັນທາງການຂອງທ່ານນາຍົກລັດຖະມົນຕີ ຫງວຽນເຕີນຢູງ ຕາມຄຳເຊີນຂອງນາຍົກລັດຖະມົນຕີ Elio Di Rupo ປະກອບສ່ວນຊຸກຍູ້ການພົວພັນຮ່ວມມືສອງຝ່າຍລະຫວ່າງສອງປະເທດໃນບັນດາຂົງເຂດກວ່າອີກ, ເປັນຕົ້ນແມ່ນການຮ່ວມມືໃນຂົງເຂດທ່າກຳປັ່ນທະເລ, ບໍລິການຮັບສົ່ງສິນຄ້າ, ການເຕີບໂຕຂຽວ, ເຕັກໂນໂລຊີສູງ, ການຊ່ວຍເຫລືອພັດທະນາ.
ຜັນຂະຫຍາຍແຜນການດຳເນີນງານຍຸດທະສາດຫວຽດນາມ -ເຢຍລະມັນ
ໂດຍແມ່ນຫນຶ່ງໃນ 6 ປະເທດສະມາຊິກ ຂອງ EU ທີ່ມີການພົວພັນຄູ່ຮ່ວມມືຍຸດທະສາດ, ເຢຍລະມັນສືບຕໍ່ແມ່ນຄູ່ຮ່ວມມືດ້ານເສດຖະກິດສຳຄັນຕົ້ນຕໍຂອງຫວຽດນາມ ຢູ່ ເອີລົບ. ວົງເງິນການຄ້າສອງສົ້ນໃນ 6 ເດືອນຕົ້ນປີ 2014 ບັນລຸປະມານ 3,6 ຕື້ USD. ໄລ່ມາຮອດເດືອນ 8/2014, ການລົງທຶນໂດຍກົງຂອງເຢຍລະມັນ ຢູ່ຫວຽດນາມ ບັນລຸ 1,25 ຕື້ USD ດ້ວຍ 232 ໂຄງການຍັງມີຜົນສັກສິດ, ສຸມໃສ່ເຂົ້າໃນບັນດາຂົງເຂດຜະລິດອຸປະກອນ, ພະລັງງານ, ເຄມີ, ການແພດການຢາ.. ເຢຍລະມັນ ໃຫ້ຄຳໝັັ້ນສັນຍາສະຫນອງ ຈຳນວນເງິນ 100 ລ້ານ USD ຊ່ວຍເຫລືອພັດທະນາໃຫ້ແກ່ຫວຽດນາມ ໃນໄລຍະ 2014-2015, ແລະ ສຸມໃສ່ເຂົ້າໃນ 3 ຂົງເຂດບຸລິມະສິດ ນັ້ນແມ່ນ ພະລັງງານ, ສິ່ງແວດລອ້ມ ແລະສອນວິຊາຊີບ. ທ່ານ ຈູຕວນກາບ, ອະດີດຮອງລັດຖະມົນຕີການຕ່າງປະເທດ ຫວຽດນາມ, ຮອງປະທານສະມາຄົມມິດຕະພາບ ຫວຽດນາມ - ເຢຍລະມັນ ຖືວ່າ:
“ເມື່ອຫວນຄືນການພົວພັນລະຫວ່າງສອງປະເທດໃນໄລຍະຜ່ານມາເຫັນວ່າມີ ພັດທະນາຢ່າງລຽນຕິດ. ວິສາຫະກິດໃຫຍ່ ກໍຄືຂະຫນາດກາງ ແລະ ນ້ອຍຂອງເຢຍລະມັນ ລ້ວນແຕ່ມີຫນ້າຢູ່ຫວຽດນາມ. ວິສາຫະກິດຫວຽດນາມ ເລີ່ມຕົ້ນຜັນຂະຫຍາຍການເຄື່ອນໄຫວຢູ່ ເຢຍລະມັນ ນັ້ນແມ່ນສິ່ງເປັນຫນ້າຊື່ນຊົມ. ດ້ວຍຖານະແມ່ນພື້ນຖານເສດຖະກິດໃຫຍ່ສຸດ ໃນ EU, ເຢຍລະມັນ ພວມຕັ້ງຫນ້າຊຸກຍູ້ EU ຮັບຮອງຫວຽດນາມແມ່ນພື້ນຖານເສດຖະກິດການຕະຫລາດ.”
ປີ 2015, ສອງປະເທດ ຈະສະເຫລີມສະຫລອງ 40 ປີແຫ່ງວັນສ້າງຕັັ້ງການພົວພັນທາງການທູດ (1975-2015). ການຢ້ຽມຢາມເຢຍລະມັນຢ່າງເປັນທາງການຂອງທ່ານນາຍົກລັດຖະມົນຕີ ຫງວຽນເຕີນຢູງ, ແຜນການດຳເນີນງານຍຸດທະສາດ ຫວຽດນາມ - ເຢຍລະມັນ ຈະ ໄດ້ຮັບການຊຸກຍູ້ການພົວພັນຮ່ວມມືລະຫວ່າງສອງປະເທດໃນບັນດາຂົງເຂດແຮງງານ, ສອນວິຊາຊີບ, ການສຶກສາ ແລະ ບັນດາໂຄງການໃຫຍ່ທີ່ໄດ້ຮັບການລົງນາມ ແນ່ນອນວ່າຈະໄດ້ຮັບການຜັນຂະຫຍາຍຢ່າງຕັ້ງຫນ້າກວ່າ.
ເຮັດໃຫ້ການພົວພັນຮ່ວມມື ຫວຽດນາມ - EU ເລິກເຊິ່ງກວ່າອີກ
ສຳລັບ EU, ການພົວພັນລະຫວ່າງ ຫວຽດນາມ ແລະ EU ນັບມື້ນັບພັດທະນາຢ່າງແທດຈິງ ແລະ ຮອບດ້ານ ດ້ວຍເລື່ອງສອງຝ່າຍໄດ້ລົງນາມໃນສັນຍາແມ່ຄູ່ຮ່ວມມື ແລະ ນຮ່ວມມືຮອບດ້ານ (PCA) ຢ່າງເປັນທາງການ ແລະ ພວມມຸ່ງໄປເຖິງການສຳເລັດການເຈລະຈາສັນຍາການຄ້າເສລີ(EVFTA). ແຕ່ລະປີ ການແລກປ່ຽນດ້ານການຄ້າສອງຝ່າຍເພີ່ມຂຶ້ນຢ່າງລຽນຕິດແຕ່15-20%. ໃນ 6 ເດືອນຕົ້ນປີ 2014, ວົງເງິນການຄ້າສອງສົ້ນບັນລຸ 17,5 ຕື້ USD(ເພີ່ມຂຶ້ນປະມານ 13% ເມື່ອທຽບໃສ່ໄລຍະດຽວກັນຂອງປີກາຍ).
ຍ້ອນຫວຽດນາມ ໄດ້ສ້າງການພົວພັນຄູ່ຮ່ວມມືຍຸດທະສາດກັບ 6 ປະເທດສະມາຊິກ EU, ສະນັ້ນ EU ນັບມື້ນັບຢືນຢັນບົດບາດເປັນຄູ່ຮ່ວມມືຕົ້ນຕໍຂອງຫວຽດນາມ ກ່ຽວກັບດ້ານການຄ້າ, ການລົງທຶນ ແລະ ການຊ່ວຍເຫລືອພັດທະນາ. ຕາມສະຖິຕິຫລ້າສຸດໃຫ້ເຫັນວ່າ, ມີ 23/28 ປະເທດສະມາຊິກ EU ໄດ້ລົງທຶນຢູ່ຫວຽດນາມ, ດ້ວຍຍອດຈຳນວນທຶນຈົດທະບຽນບັນລຸເກືອບ 18,4 ຕື້ USD. EU ແລະ ບັນດາປະເທດສະມາຊິກ ແມ່ນນັກອຸປະຖຳສອງຝ່າຍໃຫຍ່ອັນດັບສອງ ກ່ຽວກັບທຶນ ODA ແລະ ແມ່ນນັກສະຫນອງການຊ່ວຍເຫລືອຫລ້າໃຫຍ່ສຸດໃຫ້ແກ່ຫວຽດນາມ. ທ່ານ ຟ້າມແຊງເຈົາ, ເອກອັກຄະລັດຖະທູດ ຫວຽດນາມ ປະຈຳ ແບນຊິກ ຢືນຢັນວ່າ:
“ໃນສະພາບການນັັ້ນ, ຫວຽດນາມ ໄດ້ຕັັ້ງຫນ້າຊຸກຍູ້ການພົວພັນກັບ EU ໃນຫລາຍດ້ານ. ຄຽງຄູ່ດ້ານການຄ້າເພີ່ມຂຶ້ນນັັ້ນ, ການຖ່າຍທອດເຕັກໂນໂລຊີກໍຕັ້ງຫນ້າ ແລະ ສຳຄັນກວ່າ ນັ້ນແມ່ນຫວຽດນາມ ຍັງຮັກສາ ODA ໄດ້. ປະຈຸບັນ ODA ຂອງປະເທດສະມາຊິກຈຳນວນຫນຶ່ງ ອາດຈະຫລຸດລົງ ແຕ່ EU ດ້ວຍຖານະແມ່ນສະຫະພັນ ສະນັ້ນຍັງຄົງສືບຕໍ່ເພີ່ມທຶນ ODA ໃຫ້ແກ່ຫວຽດນາມ.”
ໃນສະພາບການພົວພັນອັນດີງາມນັ້ນ, ການຢ້ຽມຢາມ EU ຂອງທ່ານນາຍົກລັດຖະມົນຕີ ຫງວຽນເຕີນຢູງ ແນໃສ່ແລກປ່ຽນທິດທາງການຮ່ວມມື ຫວຽດນາມ - EU ໃນໄລຍະຈະມາເຖິງ, ຊຸກຍູ້ສິ້ນສຸດການເຈລະຈາສັນຍາ EVFTAໂດຍໄວ ແລະ ປຶກສາຫາລືກ່ຽວກັບການເພີ່ມທະວີການສົມທົບຢູ່ບັນດາເວທີປາໄສຫລາຍຝ່າຍຄື: ສປຊ, ASEM, ASEAN- EU.
ຕໍ່ຈາກບັນດາການເຄື່ອນໄຫວການຕ່າງປະເທດທີ່ຟົດຟື້ນນັບແຕ່ຕົ້ນປີມາຮອດປະຈຸບັນ, ການຢ້ຽມຢາມບັນດາປະເທດເອີລົບ ຂອງນາຍົກລັດຖະມົນຕີ ຫງວຽນເຕີນຢູງ ແນ່ນອນວ່າ ຈະເປີດແງ່ຫວັງໃຫມ່ໃນການພົວພັນຮ່ວມມືຫລາຍດ້ານລະຫວ່າງຫວຽດນາມ ກັບບັນດາຄູ່ຮ່ວມມືຢູ່ ເອີລົບ.