(vovworld)- ວັນທີ 28/11, ກອງປະຊຸມສະໄຫມສາມັນເທື່ອທີ 8 ສະພາແຫ່ງຊາດຫວຽດນາມ ຊຸດທີ 13 ໄດ້ສຳເລັດໂຄງການດຳເນີນງານພາຍຫລັງເຮັດວຽກມາເປັນເວລາ ກວ່າ 1 ເດືອນ. ກອງປະຊຸມໄດ້ສ້າງຂີດໝາຍຫລາຍຢ່າງໃນການປະຕິບັດບັນດາຫນ້າທີ່ຂອງອົງການສິດອຳນາດແຫ່ງລັດສູງສຸດໃນ 3 ຂົງເຂດ: ນິຕິບັນຍັດ, ຕິດຕາມກວດກາ ແລະ ຕັດສິນຫລາຍບັນຫາສຳຄັນຂອງປະເທດຊາດ.
ກອງປະຊຸມສະໄຫມສາມັນເທື່ອທີ 8 ສະພາແຫ່ງຊາດຫວຽດນາມ
ຊຸດທີ 13
ພາບ:baomoi.com
|
ຂີດໝາຍເປັນຫນ້າສົນໃຈຂອງ ກອງປະຊຸມສະໄຫມສາມັນເທື່ອທີ 8 ສະພາແຫ່ງຊາດຫວຽດນາມ ຊຸດທີ 13 ນັ້ນແມ່ນ ເລື່ອງສະພາແຫ່ງຊາດຮັບຮອງເອົາຫລາຍຮ່າງກົດໝາຍສຳຄັນທີ່ມີຕໍ່ການພັດທະນາຂອງປະເທດຊາດ. ສະພາແຫ່ງຊາດ ກໍຕັດສິນບັນດາຈຸດໝາຍ, ຄາດໝາຍເສດຖະກິດສັງຄົມໃຫ້ປີ 2015 ກໍຄືຫລາຍມາດຕະການເພື່ອປະຕິບັດບັນດາຄາດໝາຍດັ່ງກ່າວໃຫ້ປະກົດຜົນເປັນຈິງ. ນອກນັ້ນ ຈຸດເດັ່ນທີ່ເປັນຫນ້າສົນໃຈຫນຶ່ງອີກນັ້ນແມ່ນ ທີ່ ກອງປະຊຸມສະໄຫມສາມັນເທື່ອທີ 8 ສະພາແຫ່ງຊາດຫວຽດນາມ ຊຸດທີ 13, ສະພາແຫ່ງຊາດ ດຳເນີນການລົງຄະແນນສຽງໄວ້ວາງໃຈ ແລະປ່ອນບັດໄວ້ວາງໃຈສຳລັບ 50 ຕຳແຫນ່ງ ໂດຍສະພາແຫ່ງຊາດເລືອກຕັ້ງ ຫລືໃຫ້ສັດຕະຍາບັນ.
ສ້າງລະບົບກົດໝາຍໃຫ້ສົມບູນແບບຕາມເນື້ອໃຈຈິດໃຈຂອງລັດຖະທຳມະນູນປີ 2013
ຫນຶ່ງໃນບັນດາຫນ້າທີ່ຈຸດສຸມຂອງ ກອງປະຊຸມສະໄຫມສາມັນເທື່ອທີ 8 ສະພາແຫ່ງຊາດຫວຽດນາມ ຊຸດທີ 13 ແມ່ນພິຈາລະນາ, ຮັບຮອງເອົາຮ່າງກົດໝາຍ 18 ສະບັບ, ໃຫ້ຄຳເຫັນໃສ່ຮ່າງກົດໝາຍອື່ນ 12 ສະບັບ. ນີ້ແມ່ນຈຳນວນຮ່າງກົດໝາຍຫລາຍສຸດໄດ້ຮັບການພິຈາລະຈາຮັບຮອງເອົາ, ໃຫ້ຄຳເຫັນທີ່ສະໄຫມປະຊຸມຂອງສະພາແຫ່ງຊາດນັບແຕ່ກອ່ນມາຮອດປະຈຸບັນ. ໃນຈຳນວນຮ່າງກົດໝາຍທີ່ໄດ້ຮັບການປຶກສາຫາລື ແລະ ຮັບຮອງເອົານັ້ນ ມີຮ່າງກົດໝາຍສຳຄັນຫລາຍສະບັບ ກ່ຽວຂ້ອງເຖິງເລື່ອງສືບຕໍ່ປັບປຸງລະບອບນະໂຍບາຍເສດຖະກິດ, ການຈັດຕັ້ງກົງຈັກລັດຄື: ກົດໝາຍວ່າດ້ວຍການຈັດຕັ້ງສະພາແຫ່ງຊາດ(ສະບັບປັບປຸງ), ກົດໝາຍວ່າດ້ວຍ ລັດຖະບານ(ສະບັບປັບປຸງ), ບັນດາກົດໝາຍກ່ຽວຂ້ອງເຖິງສິດທິມະນຸດ, ສິດ ແລະ ພັນທະພື້ນຖານຂອງພົນລະເມືອງ ແລະອື່ນໆ. ເມື່ອຕີລາຄາກ່ຽວກັບການສ້າງກົດໝາຍວ່າດ້ວຍການລົງທຶນສະບັບປັບປຸງ, ທ່ານ ບຸ່ຍກວາງວີງ, ລັດຖະມົນຕີວ່າການກະຊວງແຜນການ ແລະ ການລົງທຶນ ຢືນຢັນວ່າ:
“ກົດໝາຍສະບັບນີ້ ພາຍຫລັງໄດ້ຮັບການປັບປຸງ ຈະສ້າງກຳລັງຫນູນໃຫ້ການປະຕິຮູບສະພາບແວດລ້ອມແຫ່ງການລົງທຶນດຳເນີນທຸລະກິດຂອງຫວຽດນາມ ແລະ ຊຸກຍູ້ການສ້າງກໍຄືການພັດທະນາຂອງປະຊາຄົມວິສາຫະກິດ, ນຳມາເຊິ່ງຜົນປະໂຫຍດໃຫ້ແກ່ບັນດາວິສາຫະກິດ, ເປັນຕົ້ນແມ່ນວິສາຫະກິດພາກເອກະຊົນ, ວິສາຫະກິດຂະຫນາດກາງ ແລະ ນ້ອຍ, ວິສາຫະກິດຫາກໍເລີ່ມດຳເນີນອາຊີບ.”
ແລະຢູ່ທີ່ ກອງປະຊຸມສະໄຫມສາມັນເທື່ອທີ 8 ສະພາແຫ່ງຊາດຫວຽດນາມ ຊຸດທີ 13, ສະພາແຫ່ງຊາດຮັບຮອງເອົາມະຕິໃຫ້ສັດຕະຍາບັນສົນທິສັນຍາຂອງ ສປຊ ກ່ຽວກັບການຕ້ານການທໍລະມານ ແລະ ບັນດາຮູບການປະພຶດ ຫລື ປັບໄຫມລົງໂທດຢ່າງໂຫດຮ້າຍ, ໄຮ້ມະນຸດສະທຳຫລືເຮັດໃຫ້ເສຍກຽດສັກສີ; ຮັບຮອງເອົາມະຕິໃຫ້ສັດຕະຍາບັນສົນທິສັນຍາຂອງ ສປຊ ກ່ຽວກັບສິດຂອງຄົນພິການ. ເລື່ອງຫວຽດນາມໃຫ້ສັດຕະຍາບັນສົນທິສັນຍາສາກົນ 2 ສະບັບທີ່ກ່ຽວຂ້ອງເຖິງສິດທິມະນຸດນີ້ ໄດ້ປະກອບສ່ວນຮັບປະກັນບັນດາສິດພື້ນຖານຂອງມະນຸດຢູ່ຫວຽດນາມ ນັບມື້ນັບດີກວ່າ.
ຕົກລົງບັນດາຄາດໝາຍຕົ້ນຕໍກ່ຽວກັບເສດຖະກິດສັງຄົມຂອງປີ 2015
ຕົກລົງບັນດາບັນຫາສຳຄັນຂອງປະເທດຊາດແມ່ນຫນຶ່ງໃນ 3 ຫນ້າທີ່ສຳຄັນຂອງສະພາແຫ່ງຊາດ, ຄຽງຄູ່ຫນ້າທີ່ນິຕິບັນຍັດ ແລະ ຕິດຕາມກວດກາສູງສຸດ. ທີ່ ກອງປະຊຸມສະໄຫມສາມັນເທື່ອທີ 8 ສະພາແຫ່ງຊາດຫວຽດນາມ ຊຸດທີ 13, ບັນດາສະມາຊິກສະພາແຫ່ງຊາດ ໄດ້ຮັບຮອງເອົາມະຕິຂອງສະພາແຫ່ງຊາດກ່ຽວກັບແຜນການພັດທະນາເສດຖະກິດສັງຄົມປີ 2015. ໂດຍລະອຽດ: ການຈະເລີນເຕີບໂຕ GDP ບັນລຸ 6,2%, ລະດັບເພີ່ມຂຶ້ນດັດຊະນີລາຄາໃຊ້ສອຍ (CPI) ປະມານ 5%, ອັດຕາຄອບຄົວທຸກຍາກຫລຸດລົງ 1,7%-2%, ສ້າງວຽກເຮັດງານທຳໃຫ້ແກ່ຄົນງານ 1,6 ລ້ານຄົນ. ເພື່ອປະຕິບັດບັນດາຄາດໝາຍດັ່ງກ່າວໃຫ້ໄດ້, ສະພາແຫ່ງຊາດສະເຫນີລັດຖະບານ ຄວນສຸມໃສ່ຜັນຂະຫຍາຍຫລາຍຫນ້າທີ່ຈຸດສຸມ. ທ່ານ ຫງວຽນວັນຟຸກ, ຮອງຫົວຫນ້າກຳມາທິການເສດຖະກິດຂອງສະພາແຫ່ງຊາດ ຊີ້ແຈ້ງວ່າ:
“ສືບຕໍ່ປະຕິບັດບັນດາບຸກທະລຸຍຸດທະສາດ, ສ້າງໂຄງປະກອບພື້ນຖານເສດຖະກິດຕິດພັນກັບການຫັນປ່ຽນຮູບແບບການຈະເລີນເຕີບໂຕ, ຍົກສູງຄຸນນະພາບ, ປະສິດທິຜົນ ແລະ ກຳລັງແກ້ງແຍ້ງຂອງວິສາຫະກິດ ແລະ ຂອງພື້ນຖານເສດຖະກິດ ຢ່າງຂ້ຽວຂາດ ແລະ ມີປະສິດທິຜົນ. ການປະຕິຮູບລະບຽບການບໍລິຫານຢ່າງແຮງ, ພິເສດແມ່ນລະບຽບການລົງທຶນ, ກໍ່ສ້າງ, ທີ່ດິນ, ພາສີອາກອນ ແລະ ສິນເຊື່ອທະນາຄານ. ສຸມໃສ່ຍູ້ໄວລະດັບຄວາມໄວໃນການແກ້ໄຂຫນີ້ເສຍຕິດພັນກັບການສ້າງໂຄງປະກອບບັນດາອົງການສິນເຊື່ອຄືນໃຫມ່, ສູ້ຊົນຮອດປີ 2015 ຫລຸດອັດຕາຫນີ້ເສຍລົງຕ່ຳກວ່າ 3%. ຍົກສູງປະສິດທິຜົນການນຳໃຊ້ເງິນລົງທຶນຂອງລັດ, ຮັບປະກັນຫນີ້ສາທາລະນະ, ຫນີ້ຂອງລັດຖະບານ, ຫນີ້ຕ່າງປະເທດຂອງຊາດໃນລະດັບປອດໄພຕາມການກຳນົດ.”
ໃນຂອບເຂດ ກອງປະຊຸມສະໄຫມສາມັນເທື່ອທີ 8 ສະພາແຫ່ງຊາດຫວຽດນາມ ຊຸດທີ 13, ສະພາແຫ່ງຊາດໄດ້ດຳເນີນການຕິດຕາມກວດກາສູງສຸດກ່ຽວກັບຫົວເລື່ອງ “ການປະຕິບັດການສ້າງໂຄງປະກອບພື້ນຖານເສດຖະກິດຄືນໃຫມ່ໃນຂົງເຂດການລົງທຶນຂອງລັດ, ລັດວິສາຫະກິດ ແລະ ລະບົບທະນາຄານ, ດຳເນີນການຊັກຖາມທ່ານນາຍົກລັດຖະມົນຕີ ແລະ ລັດຖະມົນຕີ 4 ທ່ານ.
ຜົນສຳເລັດໃນການລົງຄະແນນສຽງໄວ້ວາງໃຈ
ເຫດການຫນຶ່ງໄດ້ຮັບຄວາມສົນໃຈຈາກຫາງສຽງນັ້ແມ່ນທີ່ ກອງປະຊຸມສະໄຫມສາມັນເທື່ອທີ 8 ສະພາແຫ່ງຊາດຫວຽດນາມ ຊຸດທີ 13 ນັ້ນ ສະພາແຫ່ງຊາດ ດຳເນີນການລົງຄະແນນສຽງໄວ້ວາງໃຈ ສຳລັບ 5 ຕຳແຫນ່ງໂດຍສະພາແຫ່ງຊາດເລືອກຕັ້ງ ຫລືໃຫ້ສັດຕະຍາບັນ. ນີ້ແມ່ນຄັ້ງທີ 2 ສະພາແຫ່ງຊາດຕາງຫນ້າຜູ້ມີສິດເລືອກຕັ້ງ ແລະ ປະຊາຊົນໃນທົ່ວປະເທດ ປະຕິບັດການຕີລາຄາຄວາມໄວ້ວາງໃຈສຳລັບບັນດາຕຳແຫນ່ງການນຳຫລັກແຫລ່ງໃນກົງຈັກລັດ. ໃນບົດປາໄສຕີລາຄາໝາກຜົນຂອງການລົງຄະແນນສຽງໄວ້ວາງໃຈ, ທ່ານປະທານສະພາແຫ່ງຊາດ ຫງວຽນຊີງຮຸ່ງ ເນັ້ນຫນັກວ່າ: ສະພາແຫ່ງຊາດ ໄດ້ປະຕິບັດວຽກງານຢ່າງເຂັ້ມງວດ, ຕອບສະຫນອງໄດ້ຈຸດປະສົງ, ຫລັກການ, ຂັ້ນຕອນ, ລະບຽບການຕາມການກຳນົດຂອງກົດໝາຍ.
ທ່ານ ຫວໍອາຍເຢີນ, ຜູ້ມີສິດເລືອກຕັ້ງ, ອະດີດ ຫົວຫນ້າກົມປະຕິບັດງານທາງພາກໃຕ້ ຫ້ອງວ່າການສະພາແຫ່ງຊາດ ຖືວ່າ:
“ຄຸນນະພາບຂອງການລົງຄະແນນສຽງຄັ້ງນີ້ ແມ່ນສ່ອງແສງໃຫ້ເຫັນຄວາມກ້າວຫນ້າ. ສິ່ງດັ່ງກ່າວໄດ້ສ້າງຄວາມໄວ້ເນື້ອເຊື່ອໃຈໃຫ້ແກ່ຕົນ, ມີການປ່ຽນໃຫມ່, ມີຄວາມຮັບຜິດຊອບຂອງບັນດາສະມາຊິກສະພາແຫ່ງຊາດໃນການລົງຄະແນນສຽງ. ແລະ ຂ້າພະເຈົ້າເຊື່ອໝັ້ນວ່າ ການລົງຄະແນນສຽງຄັ້ງທີ 3, ທີ 4 ຈະມີກ້າວຫນ້າຫນ້າກວ່າອີກ.”
ກອງປະຊຸມສະໄຫມສາມັນເທື່ອທີ 8 ສະພາແຫ່ງຊາດຫວຽດນາມ ຊຸດທີ 13 ສິ້ນສຸດລົງດ້ວຍຫລາຍບັນຫາສຳຄັນ. ບັນດາລັດຖະນະໂຍບາຍໄດ້ຮັບຮອງເອົາທີ່ ກອງປະຊຸມສະໄຫມສາມັນເທື່ອທີ 8 ສະພາແຫ່ງຊາດຫວຽດນາມ ຊຸດທີ 13 ຈະໄດ້ຮັບການຜັນຂະຫຍາຍໃນພຶດຕິກຳຕົວຈິງໂດຍໄວ, ປະກອບສ່ວນປະຕິບັດບັນດາຄາດໝາຍພັດທະນາເສດຖະກິດສັງຄົມໃຫ້ປະກົດຜົນເປັນຈິງ ກໍຄືປະກອບສ່ວນໃຫ້ແກ່ວິວັດການພັດທະນາຂອງປະເທດຊາດໃນໄລຍະໃຫມ່.