(vovworld)- ພາຍຫລັງຖົກຖຽງກັນມາເປັນຫລາຍເທື່ອ, ວັນທີ 11/5, ສະພາສູງ ບຣາຊີນ ເລີ່ມດຳເນີນກອງປະຊຸມຄົບຄະນະຢ່າງເປັນທາງການ ເພື່ອປ່ອນບັດ ຢຸດຕິການດຳລົງຕຳແຫນ່ງປະທານາທິບໍດີປະເທດນີ້ຂອງ ທ່ານນາງ Dilma Rousseff ກ່ຽວຂ້ອງເຖິງເລື່ອງກ່າວຫາວ່າລະເມີດກົດໝາຍງົບປະມານແຫ່ງຊາດ. ເລື່ອງນີ້ສະແດງໃຫ້ເຫັນວ່າ ບຣາຊີນ ພວມຕົກເຂົ້າສູ່ວິກິດການດ້ານການເມືອງຢ່າງຮ້າຍແຮງທີ່ສຸດໃນປະຫວັດສາດ ແລະ ໄດ້ເປັນການກະທົບບໍ່ແມ່ນນ້ອຍເຖິງການພັດທະນາເສດຖະກິດຂອງປະເທດ ອາເມລິກາໃຕ້.
ປະທານາທິບໍດີບຣາຊີນDilma Rousseff.
ພາບ: AFP
|
ກອງປະຊຸມຂອງສະພາສູງ ບຣາຊີນ ເລີ່ມຕົ້ນໃນເວລາ 13 ໂມງຕາມ ເວລາ GMT ຂອງວັນທີ 11/5. ສະມາຊິກສະພາແຫ່ງຊາດ 81 ຄົນ ໄດ້ດຳເນີນການປ່ອນບັດ ເພື່ອມີຂໍ້ຕົກລົງສຸດທ້າຍກ່ຽວກັບການຢຸດຕິຕຳແຫນ່ງປະທານາທິບໍດີຂອງທ່ານນາງ Rousseff ແລະ ເລີ່ມຕົ້ນດຳເນີນວິວັດການ ພິຈາລະນາໂທດ, ການນຳຜູ້ນີ້ພຽງແຕ່ຕ້ອງການສະມາຊິກສະພາ 41 ຄົນໃນຈຳນວນ 81 ຄົນຮັບຮອງເອົາເລື່ອງດຳເນີນລະບຽບການພິຈາລະນາໂທດເທົ່ານັ້ນ. ປະທານາທິບໍດີ ບຣາຊີນ ຈະຖືກຢຸດຕິບົດບາດເປັນການນຳໃນເວລາ 6 ເດືອນ ແລະ ຮອງປະທານາທິບໍດີ Michel Temer ຈະຂຶ້ນແທນທີ່ຕຳແຫນ່ງໃນໄລຍະຊົ່ວຄາວ. ເຖິງຢ່າງໃດກໍຕາມ, ປະທານສະພາສູງ Renan Calherios ໄດ້ຕີລາຄາວ່າ ວິວັດການພິຈາລະນາໂທດ ທ່ານນາງ Rousseff ຈະ “ຍາວນານ ແລະ ຫຍຸ້ງຍາກທີ່ສຸດ”.
ກ່ອນນີ້ເກືອບ 1 ເດືອນ, ວັນທີ 17/4, ສະພາຕ່ຳ ບຣາຊີນ ກໍໄດ້ປ່ອນບັດຮັບຮອງເລື່ອງດຳເນີນການພິຈາລະນາໂທດ ທ່ານນາງປະທານາທິບໍດີ Rousseff ເຖິງວ່າຜູ້ນຳທ່ານນີ້ ບໍ່ຖືກສືບສວນສອບສວນຫລືບໍ່ມີການກ່າວຫາໃດທີ່ກ່ຽວຂ້ອງເຖິງ ການສໍ້ລາດບັງຫລວງ.
ຄັດຄ້ານບັນດາຄຳກ່າວຫາ
ຕໍ່ຫນ້າບັນດາຄຳກ່າວຫາລະເມີດກົດໝາຍງົບປະມານແຫ່ງຊາດ, ປະທານາທິບໍດີບຣາຊີນ ທ່ານນາງ Dilma Rousseff ໄດ້ກ່າວຫາຮອງ ປະທານາທິບໍດີ Michel Temer ແລະ ອະດີດປະທານສະພາຕ່ຳ Eduardo Cunha ແມ່ນບັນດາຫົວໂປ່ຂອງກົນອຸບາຍລັດຖະປະຫານທັນສະໄຫມ, ສົ່ງຜົນສະທ້ອນເຖິງລັດຖະທຳມະນູນຢ່າງຮ້າຍແຮງ. ທ່ານນາງ Rousseff ຖືວ່າ ທຸກສິ່ງທຸກຢ່າງພວມດຳເນີນໄປແມ່ນວິວັດການເລືອກຕັ້ງໂດຍທາງອ້ອມ ເຊິ່ງບັນດາຜູ້ມີສິດເລືອກຕັ້ງບໍ່ມີສິດເລືອກເຟັ້ນ.
ໃນຂະນະນັ້ນ ບັນດາຜູ້ສະຫນັບສະຫນູນປະທານາທິບໍດີ ບຣາຊີນ ທ່ານນາງ Dilma Rousseff ໄດ້ຈູດເຜົາບັນດາຮົ້ວກີດຂວາງ ແລະ ສະກັດກັ້ນບັນດາເສັ້ນທາງໃນທົ່ວປະເທດເມື່ອວັນທີ 10/5 ເຮັດໃຫ້ຄົມມະນາຄົມຖືກຕິດຂັດໃນບໍລິເວນກວ້າງຂວາງເພື່ອຄັດຄ້ານເລື່ອງພິຈາລະນາໂທດ ທ່ານນາງ. ຕຳຫລວດ ບຣາຊີນ ໄດ້ຕັ້ງຮົ້ວກີດຂວາງຕາມສາຍທາງດ່ວນ 14 ສາຍຢູ່ 26 ລັດຂອງ ບຣາຊີນ ແລະ ເມືອງສະຫະລັດ ຊື່ງແມ່ນແຫ່ງມີນະຄອນຫລວງ ບຣາຊີນ. ຢູ່ Rio de Janeiro, ຜູ້ແຫ່ຂະບວນປະທ້ວງຄັດຄ້ານ ການພິຈາລະນາໂທດ ໄດ້ຮັບການຈັດຕັ້ງຈາກຝ່າຍຊ້າຍແນວໂຮມຮ່ວມ ບຣາຊີນ. ໃນສານອອກຜ່ານ facebook, ອົງການນີ້ໄດ້ຢັ້ງຢືນຈະຕໍ່ສູ້ຢູ່ທຸກແຫ່ງເພື່ອປົກປັກຮັກສາພື້ນຖານອະທິປະໄຕ. ບຣາຊີນຄັດຄ້ານການລັດຖະປະຫານ. ໃນວັນດຽວກັນ, ຫົວຫນ້າໄອຍະການ Eduardo Cardozo ກໍໄດ້ຮຽກຮ້ອງສານສູງສຸດ ຕ້ອງຍົກເລີກວິວັດການ ການພິຈາລະນາໂທດ ປະທານາທິບໍດີ ດ້ວຍສາຍເຫດເລື່ອງນີ້ມີລັກສະນະດ້ານການເມືອງ ແລະ ບໍ່ມີພື້ນຖານດ້ານກົດໝາຍ.
ຜູ້ແຫ່ຂະບວນປະທ້ວງສະໜັບສະໜູນທ່ານນາງRousseff. (ພາບ: Reuters)
|
ໃນຂະນະນັ້ນ ເລຂາທິການໃຫຍ່ ອົງການຈັດຕັ້ງບັນດາປະເທດປະເທດ ອາຟຼິກາ Luis Almagro ໄດ້ແຈ້ງວ່າ ຈະມີການທາບທາມດ້ານຕຸລາການກັບສານສິດທິມະນຸດລະຫວ່າງອາເມລິກາ ກ່ຽວກັບວິວັດການ ການພິຈາລະນາໂທດ ທ່ານນາງປະທານາທິບໍດີ Rousseff. ທ່ານໄດ້ຢືນຢັນວ່າ ອົງການດັ່ງກ່າວມີຫນ້າທີ່ຕິດຕາມການປະຕິບັດປະຊາທິປະໄຕຢູ່ພາກພື້ນ ພ້ອມທັງສະແດງຄວາມວິຕົກກັງວົນຕໍ່ສະພາບຄວາມປອດໄພດ້ານຕຸລາການຂອງ ບຣາຊີນ. ຕາມທ່ານ Almagro ແລ້ວ, ປະທານາທິບໍດີ ບຣາຊີນ ໄດ້ຮັບຄວາມໄວ້ເນື້ອເຊື່ອໃຈຈາກຜູ້ມີສິດເລືອກຕັ້ງໃນຕະຫລອດໄລຍະກຳອຳນາດ.
ຄວາມຫຍຸ້ງຍາກ ສຳລັບບຣາຊີນ
ຕາມວົງການນັກສັງເກດການແລ້ວ, ເລື່ອງທ່ານນາງ Dilma Rousseff ສືບຕໍ່ກຳອຳນາດຫລືລາອອກຈາກຕຳແຫນ່ງ ກໍ່ບໍ່ສາມາດແກ້ໄຂບັນດາບັນຫາຍັງຄົງຄ້າງຢູ່ ບຣາຊີນຢ່າງເຖິງຖອງໄດ້. ຜູ້ຊ່ຽວຊານ ບຣາຊີນ Brazil Brian Winter ຈາກອງົການ Americas Society and Council of the Americas ຖືວ່າ ບໍ່ມີຜູ້ໃດຮັບໄຊຊະນະໃນການພິຈາລະນາໂທດ ທ່ານນາງປະທານາທິບໍດີ Dilma Rousseff, ເພາະວ່າ ສະພາແຫ່ງຊາດ ບຣາຊີນ ກໍບໍໍ່ໄດ້ຮັບຄວາມເຊື່ອໝັ້ນຈາກປະຊາຊົນ ເມື່ອໃນຈຳນວນສະມາຊິກສະພາແຫ່ງຊາດ 594 ຄົນມີ 352 ຄົນຖືກກ່າວຫາມີການກະທຳຜິດ. ປະຈຸບັນ ເສດຖະກິດ ບຣາຊີນ ພວມຖືກຊຸດໂຊມ ດ້ວຍລະດັບຂາດດຸ່ນງົບປະມານຂຶ້ນເຖິງ 11% GDP ພ້ອມກັນນັ້ນ ແມ່ນໂລກພະຍາດ Zika ພວມມີຄວາມສ່ຽງຕິດແປດຢູ່ບັນດາລັດພາກຕາເວັນອອກສຽງເຫນືອ.
ເພື່ອນຳພາປະເທດຊາດຫລຸດພົ້ນອອກຈາກວິກິດການດ້ານເສດຖະກິດ, ການເມືອງ ປະຈຸບັນ, ສິ່ງທ້າທາຍທີ່ວາງອອກສຳລັບຜູ້ນຳຂອງ ບຣາຊີນ ນັ້ນແມ່ນ: ປະຕິຮູບລະບົບການເມືອງ, ຄວບຄຸມລາຍຈ່າຍຂອງລັດ, ປັບປຸງລະບົບພາສີ ແລະ ຊຸກຍູ້ການພັດທະນາເສດຖະກິດ. ນີ້ແມ່ນບັນດາສິ່ງທ້າທາຍຍາກທີ່ຈະແກ້ໄຂໄດ້ສຳລັບບໍ່ວ່ານັກການເມືອງຜູ້ໃດ. ວິກິດການດ້ານການເມືອງປະຈຸບັນ ຢູ່ ບຣາຊີນ ຍິ່ງເຮັດໃຫ້ເລື່ອງແກ້ໄຂບັນຫາເສດຖະກິດມີຄວາມຫຍຸ້ງຍາກຍິ່ງກວ່າເວລາໃດໝົດ.