ເປັນຄັ້ງທຳອິດ, ນັບແຕ່ປີ 1961 ມາຮອດປະຈຸບັນ, ອາເມລິກາ ແລະ ກູບາ ຈະເລີ່ມສ້າງການພົວພັນເປັນປົກກະຕິ. ການກະທຳທີ່ມີຄວາມໝາຍປະຫວັດສາດນີ້ ຫາກໍຖືກການນຳ 2 ຝ່າຍປະກາດເມື່ອວັນທີ 17/12 ແລະ ໃນທັນທີ, ໄດ້ຮັບຄວາມເຫັນດີຈາກປະຊາຄົມໂລກ. ຂໍ້ຕົກລົງນີ້ ໄດ້ເປີດໜ້າປະຫວັດສາດໃໝ່ໃນການພົວພັນລະຫວ່າງ ອາເມລິກາ ແລະ ກູບາ. ຕໍ່ໄປນີ້, ນັກຂ່າວແ້ອງຮວ່ຽນຂອງ VOV ມີບົດທີ່ພາດຫົວຂໍ້ວ່າ “ ບາດລ້ຽວໃໝ່ໃນການພົວພັນອາເມລິກາ - ກູບາ”. ເຊີນທ່ານຕິດຕາມຮັບຟັງ.
ວັນທີ 17/12/2014 ໄດ້ກາຍເປັນຂີດໝາຍປະຫວັດສາດທີ່ສຳຄັນໃນການພົວພັນທີ່ເຕັມໄປ ດ້ວຍພາຍຸລົມແດງລະຫວ່າງອາເມລິກາ ແລະ ກູບາໃນກ່ວາເຄິ່ງສະຕະວັດທີ່ຜ່ານມາ ຂະນະທີ່ທ່ານປະທານກູບາ Raul Castro ແລະ ປະທານາທິບໍດີອາເມລິກາ Barack Obama ໄດ້ພ້ອມກັນປະກາດຂໍ້ຕົກລົງສ້າງຕັ້ງການພົວພັນທາງການທູດຄືນ ໃໝ່, ອັນໄດ້ເປີດຊ່ອງທາງໃຫ້ແກ່ການສ້າງການພົວພັນ 2 ຝ່າຍເປັນປົກກະຕິໃນໄລຍະທີ່ຈະມາເຖິງ.
ປະທານາທິບໍດີ Obama ແລະ ປະທານ ກູບາ Raul Castro ໃນການພົບປະຢູ່ ອາບຟຣີກາໃຕ້
(ພາບ: Reuters)
ບັນດາບາດກ້າວເດີນທຳອິດໃຫ້ແກ່ການສ້າງການພົວພັນເປັນປົກກະຕິ
ໃນການກະທຳທຳອິດຂອງວິວັດທະນາການສ້າງການພົວພັນເປັນປົກກະຕິນັ້ນ, ພາລະກອນສືບລາຊະການລັບ 3 ຄົນຂອງກູບາຖືກກັກຕົວຢູ່ອາເມລິກາ ໄດ້ຮັບການຢັ້ງຢືນວ່າ ໄດ້ກັບເມືອບ້ານເກີດເມືອງນອນແລ້ວໃນວັນທີ 17/12. ເພື່ອຕອບແທນນັ້ນ, ກູບາກໍໄດ້ດຳເນີນການປ່ອຍຕົວເປັນອິດສະຫຼະໃຫ້ຊາວອາເມລິກາຄົນໜຶ່ງ ແລະ ນັກສືບສອດແນມຄົນໜຶ່ງທີ່ເຮັດວຽກໃຫ້ແກ່ລັດຖະບານອາເມລິກາ ຊຶ່ງ
ຖືກກັກຂັງນັບແຕ່ 20 ປີມານີ້. ອາເມລິກາຍັງຈະມີແຜນຈະເປີດສະຖານທູດຢູ່ນະຄອນຫຼວງ ລາຮາວານຂອງກູບາໃນ 2-3 ເດືອນທີ່ຈະມາເຖິງ. ອີກບັນຫາໜຶ່ງທີ່ທີ່ມີລັກສະນະຕັດສິນ, ນັ້ນແມ່ນເລື່ອງອາເມລິກາຍົກເລີກຄຳສັ່ງຂ້ໍວາບາດສຳລັບກູບາຢ່າງສິ້ນເຊິ່ງ ກໍໄດ້ຮັບບັນດາສັນຍານທີ່ຕັ້ງໜ້າ. ປະທານາທິບໍດີອາເມລິກາ Barack Obama ເອງໄດ້ຢືນຢັນວ່າ ຈະປຶກສາຫາລືກັບສະພາແຫ່ງຊາດອາເມລິກາເພື່ອ ຍົກເລີກຄຳສັ່ງຂ້ໍວາບາດດ້ານການຄ້າສຳລັບກູບາ, ພ້ອມກັນນັ້ນ ກໍອອກຄຳສັ່ງໃຫ້ລັດຖະມົນຕີການຕ່າງປະເທດອາເມລິກາ John Kerry ດຳເນີນການປຶກສາຫາລືກັບກູບາກ່ຽວກັບການຜັນຂະຫຍາຍບັນດາການເຄື່ອນໄຫວແນໃສ່ ສ້າງການພົວພັນເປັນປົກກະຕິໃນຊຸມມື້ທີ່ຈະມາເຖິງ.
ຫາງສຽງຊົມເຊີຍ
ອາດຈະເວົ້າໄດ້ວ່າ ຄຳຖະແຫຼງ ສ້າງການພົວພັນອາເມລິກາ - ກູບາເປັນປົກກະຕິ ແມ່ນເຫດການໄດ້ຮັບຄວາມລໍຄອຍຈາກປະຊາຊົນ 2 ປະເທດກໍຄືປະຊາຄົມໂລກ. ຢູ່ພາຍໃນປະເທດອາເມລິກາ, ຂໍ້ຕົກລົງນີ້ໄດ້ຮັບການສະໜັບສະໜູນຢ່າງກວ້າງຂວາງ, ບໍ່ພຽງແຕ່ໃນວົງການນັກການເມືອງ, ນັກຮຽນຮູ້, ນັກທຸລະກິດເທົ່ານັ້ນ ຫາກນັບທັງສາມັນຊົນອີກດ້ວຍ. ມີຄຳຄິດຄຳເຫັນຫຼາຍຂໍ້ຖືວ່າ ປະທານາທິບໍດີອາເມລິກາ Barack Obama ໄດ້ມີວິວັດທະນາການໃໝ່ທີ່ຖືກຕ້ອງກ່ຽວກັບ ກູບາ, ຮັບໃຊ້ໃຫ້ແກ່ບັນດາຜົນປະໂຫຍດຂອງອາເມລິກາຢູ່ເຂດທາງທິດຕາເວັນຕົກເຄິ່ງໜ່ວຍໂລກ ກໍຄືໃນໜ່ວຍໂລກ. ສ່ວນຢູ່ ກູບາ, ບັນດາການນຳຂອງປະເທດນີ້ຢືນຢັນວ່າ ກູບາ ບໍ່ມີຍາມໃດທີ່ເປັນນາບຂູ່ຕໍ່ຄວາມສະຫງົບແຫ່ງຊາດຂອງອາເມລິກາ ແລະ ລາຮາວານກຽມພ້ອມສ້າງການພົວພັນທີ່ຕ່າງຝ່າຍຕ່າງມີຜົນປະໂຫຍດກັບວໍຊິງຕັນ, ມີຄວາມສະເໝີພາບ ແລະ ເຄົາລົບຊຶ່ງກັນ ແລະ ກັນບົນພື້ນຖານກົດໝາຍສາກົນ ແລະ ກົດບັດ ສ.ປ.ຊ.
ໃນຂະນະນັ້ນ, ຂໍ້ຕົກລົງ ສ້າງການພົວພັນອາເມລິກາ - ກູບາເປັນປົກກະຕິໄດ້ຮັບການຊົມເຊີຍຈາກຫາງສຽງສາກົນ. ທ່ານເລຂາທິການໃຫຍ່ ສ.ປ.ຊ Ban Ki Moon ໄດ້ຊົມເຊີຍຂໍ້ຕົກລົງປະຫວັດສາດນີ້, ພ້ອມກັນນັ້ນ ກໍຢືນຢັນວ່າ ສ.ປ.ຊ ກຽມພ້ອມເຮັດທຸກສິ່ງທຸກຢ່າງເພື່ອຊ່ວຍ 2 ປະເທດຂະຫຍາຍການພົວພັນໃໝ່. ສັນທະປະປາ Francis ໄດ້ຊົມເຊີຍອາເມລິກາ ແລະ ກູບາກ່ຽວກັບເຫດການນີ້.
ນະໂຍບາຍທີ່ຫຼ້າສະໄໝ ແລະ ຫຼ້າຫຼັງ
ການພົວພັນອາເມລິກາ - ກູບາໄດ້ຖືກຕັດຕອນນັບແຕ່ການປະຕິວັດຢູ່ກູບາເມື່ອປີ 1959. ນັບແຕ່ເມື່ອກູບາຍາດເອົາອຳນາດການປົກຄອງຈາກກຳມືຂອງອະດີດຜະເດັດການ Fulgenci Batista ເພື່ອສ້າງຕັ້ງລັດ ກູບາ, ອາເມລິກາໄດ້ຮັກສາບັນດາຄຳສັ່ງຂວ້ຳບາດກູບາມາຮອດປະຈຸບັນ.
ໃນຕົວຈິງ, ຄາດຄະເນວ່າ ນັບແຕ່ເມື່ອອຳນາດການປົກຄອງອາເມລິກາຈັດວາງຄຳສັ່ງປິດລ້ອມຂວ້ໍາບາດ, ກູບາຕ້ອງໄດ້ຮັບຄວາມເສຍຫາຍຢ່າງມະຫາສານຊຶ່ງຄາດວ່າຈະຂຶ້ນເຖິງ 1.112 ຕື້ USD. ໃນນັ້ນ, ຂະແໜງທ່ອງທ່ຽວ ຊຶ່ງແມ່ນຂະແໜງໜຶ່ງທີ່ນຳມາເຊິ່ງແຫຼ່ງລາຍຮັບດ້ວຍເງິນຕາຕ່າງປະເທດຫຼາຍອັນດັບທີ 2 ໃຫ້ແກ່ພື້ນຖານເສດຖະກິດ ກູບາ ໄດ້ຖືກເສຍຫາຍຢ່າງໜັກໜ່ວງ.
ໃນບົດປາໄສທາງໂທລະພາບເມື່ອວັນທີ 17/12, ປະທານາທິບໍດີອາເມລິກາ Barack Obama ໄດ້ຍອມຮັບຮັບວ່າ ບັນດານະໂຍບາຍລົງໂທດ, ປິດລ້ອມຂວ້ໍາບາດຕ້ານກູບາມາເປັນເວລາກວ່າ 50 ປີທີ່ຜ່ານມານັ້ນ, ແມ່ນໄດ້ ຫຼ້າສະໄໝ ແລະ ຫຼ້າຫຼັງແລ້ວ ແລະ ບັນດາການດັດປັບໃນນະໂຍບາຍທີ່ມີຕໍ່ກູບາຈະສ້າງເງື່ອນໄຂເພື່ອໃຫ້ 2 ຝ່າຍຫຍັບມໍ່ເຂົ້າກັນກວ່າເກົ່າ, ຊອກຫາຄວາມເຊື່ອໝັ້ນຕໍ່ກັນຄືນໃໝ່ເພື່ອມຸ່ງໄປສູ່ອະນາຄົດທີ່ພັດທະນາ, ໝັ້ນຄົງ ແລະ ມີສະຖຽນລະພາບໃນພາກພື້ນ. ຕາມບັນດານັກສັງເກດການແລ້ວ, ວິວັດທະນາການ ສ້າງການພົວພັນເປັນປົກກະຕິ ອາດຈະປະສົບກັບສິ່ງກີດຂວາງບາງຢາ່ງ, ພິເສດເມື່ອປະທານາທິບໍດີອາເມລິກາ Barack Obama ຕ້ອງໄດ້ຮັບຄວາມຍິນຍອມເຫັນດີຈາກສະພາແຫ່ງຊາດ ເພື່ອຮັບຮອງເອົາການຍົກເລີກຄຳສັ່ງ ປິດລ້ອມຂວ້ໍາບາດ. ເຖິງຢ່າງນັ້ນກໍຕາມ, ເຫດການນີ້ ກໍແມ່ນບາດລ້ຽວຕັດສິນ, ສອດຄ່ອງກັບທ່າອຽງຂອງຍຸກສະໄໝ, ຕອບສະໜອງຄວາມມຸ່ງມາດປາຖະໜາອັນເປັນທຳຂອງປະຊາຊົນ 2 ປະເທດ./.