(vovworld)- ກົງກັນຂ້າມກັບສັນຍານທີ່ປະເອີບໃຈຂອງພື້ນຖານເສດຖະກິດທົ່ວໂລກ, ໂລກຍັງເຫັນປະຈັກຕາການຜັນແປດ້ານການເມືອງຫຼາຍຢ່າງ ແລະ ຕ້ອງປະເຊີນໜ້າກັບບັນດາສິ່ງທ້າທາຍດ້ານຄວາມສະຫງົບປອດໄພໃນປີ 2013. ການຜັນແປເຫຼົ່ານີ້ມີການກະທົບບໍ່ແມ່ນໜ້ອຍເຖິງສະພາບດ້ານການເມືອງໂລກ ອັນໄດ້ເຮັດໃຫ້ຫາງສຽງໂລກມີຄວາມວິຕົກກັງວົນກ່ຽວກັບແງ່ຫວັງແກ້ໄຂບັນດາຂໍ້ຂັດແຍ້ງ, ສະຖານທີ່ເຄັ່ງຮ້ອນ.
ການແຫ່ຂະບວນປະທ້ວງຢູ່ໄທ
(ພາບ: .baomoi.com)
ປີ 2013, ເສດຖະກິດໂລກໄດ້ຟື້ນຕົວແລ່ວແຕ່ຍັງຊັກຊ້າຢູ່, ບໍ່ສະໝ່ຳສະເໝີ ແລະ ຍັງຄົງມີຄວາມສ່ຽງຫຼາຍຢ່າງ. ໃນດ້ານການເມືອງ, ຂໍ້ຕົກລົງບັນລຸໄດ້ລະຫວ່າງປະເທດຕ່າງໆພຽງແຕ່ແມ່ນບາດກ້າວເບື້ອງຕົ້ນເທົ່ານັ້ນ, ຕ້ອງໃຊ້ເວລາຫຼາຍກ່ວາອີກເພື່ອກ້າວໄປເຖິງມາດຕະການຮອບດ້ານ. ສິ່ງທີ່ໜ້າວິຕົກກັງວົນແມ່ນລັດທິກໍ່ການຮ້າຍສາກົນໄດ້ຟື້ນຕົວຢ່າງແຮງ ແລະ ນາບຂູ່ຄວາມສະຫງົບປອດໄພຂອງໂລກ.
ການແຫ່ຂະບວນປະທ້ວງແຜ່ຂະຫຍາຍອອກຢ່າງກວ້າງຂວາງ, ການພິພາດເຂດດິນແດນສືບຕໍ່ເກີດຂຶ້ນ
ປີ 2013, ໂດຍບໍ່ຫົວຊາຕໍ່ເລື່ອງອີຣານ ແລະ ກຸ່ມ P5+1 ບັນລຸໄດ້ການຕົກລົງກ່ຽວກັບເອກະສານນິວເຄຼຍ, ບັນດາປະເທດໃນເຂດຕາເວັນອອກກາງ ແລະ ອາຟຼິກກາເໜືອຕົກເຂົ້າສູ່ສະພາບຂາດສະຖຽນລະພາບທາງດ້ານການເມືອງ, ເສດຖະກິດຊຸດໂຊມ, ສັງຄົມຖືກແບ່ງແຍກຢ່າງເລິກເຊິ່ງ.
ການແຫ່ຂະບວນປະທ້ວງໄດ້ເກີດຂຶ້ນຢູ່ເອີລົບ ໃນສະພາບການ ປຊຊ ເກີດບໍ່ລົງລອຍກັນຕໍ່ນະໂຍບາຍຮັດເຂັມຄັດຊື່ງບັນດາລັດຖະບານນຳໃຊ້ເພື່ອຜ່ານຜ່າວິກິດການໜີ້ສາທາລະນະ.
ຢູ່ອາຊີ, ສະພາບການເມືອງກຳປູເຈຍ ແລະ ໄທ ສືບຕໍ່ປະເຊີນໜ້າກັບການຜັນປ່ຫຼາຍຢ່າງ. ດ້ວຍຄຳກ່າວຫາສໍ້ໂກງໃນການເລືອກຕັ້ງສະພາແຫ່ງຊາດຊຸດທີ 5 ທີ່ພາໄປເຖິງໄຊຊະນະຂອງພັກ ປຊຊ ກຳປູເຈຍ (CPP) ກຳອຳນາດ, ພັກກູ້ຊາດກຳປູເຈຍ (CNRP) ໄດ້ປຸກລະດົມການແຫ່ຂະບວນປະທ້ວງ ແລະ ຄັດຄ້ານວາລະປະຊຸມຄັ້ງປະຖົມມະເລິກຂອງສະພາແຫ່ງຊາດ ຊື່ງໄດ້ກີດຂວາງວິວັດການສ້າງຕັ້ງລັດຖະບານ ແລະ ກໍ່ຄວາມຂາດສະຖຽນລະພາບໃນສັງຄົມ. ໃນຂະນະນັ້ນ, ປະເທດໄທພວມ ປະເຊີນໜ້າກັບການແຫ່ຂະບວນປະທ້ວງຂອງຝ່າຍຄ້ານ ທີ່ຮຽກຮ້ອງໃຫ້ລັດຖະບານຂອງທ່ານນາງ ຍິ່ງຮັກ ຊີນນະວັດ ຕ້ອງລາອອກຈາກຕຳແໜ່ງ. ແລະ ກໍ່ໃນທະວີບອາຊີ, ການພິພາດເຂດດິນແດນລະຫວ່າງຈີນ, ຍີ່ປຸ່ນ, ສ.ເກົາຫຼີ ກໍ່ເຄັ່ງຕຶງຂຶ້ນຕື່ມ. ເລື່ອງຈີນ ປະກາດສ້າງຕັ້ງເຂດປ້ອງກັນອາກາດ (ADIZ) ໃນທະເລຮວາຕຸງ ພຽງລຳພັງຝ່າຍດຽວໄດ້ເຮັດໃຫ້ການພົວພັນກັບ ຍີ່ປຸ່ນ ແລະ ສ.ເກົາຫຼີ ຍິ່ງມີຄວາມເຄັ່ງຕຶ້ງຂຶ້ນ
ລັດທິກໍ່ການຮ້າຍເກີດຂຶ້ນ
ໃນປີ 2013, ໂລກໄດ້ເຫັນປະຈັກຕາການຟື້ນຕົວຢ່າງແຮງຂອງເຄືອຂ່າຍກໍ່ການຮ້າຍອານເກດາ ດ້ວຍບັນດາເຫດບຸກໂຈມຕີອັນນອງເລືອດ ຊື່ງເຮັດໃຫ້ ປຊຊ ນັບພັນຄົນຖືກເສຍຊີວິດ. ໃນນັ້ນ, ອາບການນີສະຖານ ແລະ ຊີຣີ ແມ່ນສະຖານທີ່ 2 ແຫ່ງທີ່ສຳຄັນຂອງການກໍ່ການຮ້າຍທົ່ວໂລກ, ອັນໄດ້ນາບຂູ່ຄວາມສະຫງົບປອດໄພຢູ່ພາກພື້ນອາຊີໃຕ້, ອາຊີຕາເວັນຕົກ ແລະ ອາຟຼິກກາເໜືອ.
ນອກຈາກນັ້ນ, ຍັງມີເຫດການກໍ່ການຮ້າຍຢູ່ Boston ປະເທດອາເມລິກາ, ການບຸກໂຈມຕີກໍ່ການຮ້າຍຢູ່ສະໜາມຫຼວງ ທຽນອານເມິນ ແລະ ໃນເວລາມໍ່ໆມານີ້ແມ່ນເຫດວາງລະເບີດສະຫຼະຊີບຢູ່ສະຖານີລົດໄຟທີ່ນະຄອນ Volgograd ປະເທດລັດເຊຍ.
ເຫດວາງລະເບີດສະຫຼະຊີບຢູ່ Volgograd
(ພາບ: RIA Novosti.)
ເສດຖະກິດໂລກຟື້ນຕົວຢ່າງຊັກຊ້າ
ພາຍຫຼັງເກີດວິກິດການເສດຖະກິດ-ການເງິນໂລກຂະໜາດໃຫ່ຍສຸດນັບແຕ່ຊຸມປີ 30 ຂອງສັດຕະວັດກ່ອນມາເປັນເວລາ 5 ປີ, ພື້ນຖານເສດຖະກິດໂລກໄດ້ມີບັນດາສັນຍານຟື້ນຕົວຂຶ້ນ, ໂດຍສະເພາະແມ່ນຢູ່ບັນດາປະເທດພັດທະນາຄືອາເມລິກາ, ຍີ່ປຸ່ນ ແລະ ບັນດາປະເທດເອີລົບ. ພາກພື້ນໃຊ້ສະກຸນເງິນເອີໂຣ ໄດ້ຢຸດຕິການຊຸດໂຊມໃນຕະຫຼວດ 6 ໄຕມາດຢ່າງລຽນຕິດ. ໄປຄຽງຄູ່ກັນນັ້ນແມ່ນລະດັບເຕີບໂຕທີ່ໜ້າປະເອີບໃຈຂອງພື້ນຖານເສດຖະກິດອາເມລິກາ ເຮັດໃຫ້ທະນາຄານສະສົມສະຫະລັດ ອາດຈະຢຸດຕິໂຄງການກະຕຸ້ນເສດຖະກິດ, ໃນຂະນະນັ້ນ, ໂຄງການປະຕິຮູບຂອງຍີ່ປຸ່ນ ຊື່ງແມ່ນພື້ນຖານເສດຖະກິດໃຫ່ຍອັນດັບທີ 3 ໃນໂລກກໍ່ບັນລຸໄດ້ໝາກຜົນອັນຕັ້ງໜ້າໃນເບື້ອງຕົ້ນ…
ແຕ່ເຖິງຢ່າງໃດກໍ່ຕາມ, ທ່ານ Christine Lagarde ຜູ້ອຳນວຍການໃຫ່ຍກອງທຶນເງິນຕາສາກົນ ໃຫ້ຂໍ້ສັງເກດວ່າ: ການຟື້ນຕົວເສດຖະກິດພວມດຳເນີນໄປໃນໂລກແຕ່ລະດັບການເຕີບໂຕນີ້ຍັງຊັກຊ້າທີ່ສຸດ ເພື່ອສາມາດສ້າງວຽກເຮັດງານທຳໃຫ້ແກ່ຫຼາຍຄົນໄດ້. ໜ້າເອົາໃຈໃສ່ແມ່ນ, ພາກພື້ນໃຊ້ສະກຸນເງິນເອີໂຣ ຍັງຄົງແມ່ນສະຖານທີ່ກໍ່ໃຫ້ເກີດຄວາມວິຕົກກັງວົນ ໃນຂະນະທີ່ພື້ນຖານເສດຖະກິດຂອງຫຼາຍປະເທດໃນພາກພື້ນນີ້ ຍັງບໍ່ທັນຫລຸດພົ້ນອອກຈາກສະພາບຫຍຸ້ງຍາກນັບແຕ່ຫຼາຍປີມານີ້ໄດ້. ໃນຂະນະນັ້ນ, ເສດຖະກິດອາເມລິກາ ຊື່ງແມ່ນພື້ນຖານເສດຖະກິດອັນດັບໜຶ່ງໃນໂລກກໍ່ບໍ່ຮັບຜົນດີ ຍ້ອນງົບປະມານຂອງລັດຖະບານຖືກຫລຸດລົງ.
ປີ 2013 ໄດ້ອັດລົງດ້ວຍສິ່ງທີ່ຄົງຄ້າງຫຼາຍຢ່າງຈຳເປັນຕ້ອງໄດ້ຮັບການແກ້ໄຂ. ຫາງສຽງຫວັງວ່າ, ໃນປີ 2014, ບັນດາຂໍ້ຂັດແຍ້ງດ້ານການເມືອງຈະໄດ້ຮັບການແກ້ໄຂເທື່ອລະກ້າວ, ເສດຖະກິດຟື້ນຕົວຢ່າງໄວກ່ວາເພື່ອໃຫ້ສະພາບການໂລກພັດທະນາກ່ວາອີກ./.