ຮ່າງບັນດາເອກະສານທັງໝົດທີ່ກະກຽມຍື່ນສະເໜີຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ໄດ້ຖືກປະກາດຢ່າງເປີດເຜີຍຜ່ານບັນດາພາຫະນະສື່ມວນຊົນນັບແຕ່ວັນທີ 15/9/2015 ເປັນຕົນມາເພື່ອໃຫ້ປະຊາຊົນປະກອບຄຳເຫັນ. ບັ້ນດຳເນີນຊີວິດການເມືອງຢ່າງເລິກເຊິ່ງກ້ວາງຂວາງນີ້ ແມ່ນເພື່ອໃຫ້ປະຊາຊົນທຸກຊັ້ນວັນນະເຂົ້າຮ່ວມປະກອບຄຳເຫັນ ເພື່ອສ້າງແນວທາງການສ້າງສາ ແລະ ປົກປັກຮັກສາປະເທດຊາດ.
(ພາບປະກອບ) |
ຮ່າງບັນດາເອກະສານລວມມີ: ຮ່າງບົດລາຍງານການເມືອງຂອງຄະນະບໍລິຫານງານສູນກາງພັກຊຸດທີ 11 ຢູ່ທີ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ; ຮ່າງບົດລາຍງານຕີລາຄາໝາກຜົນແຫ່ງການປະຕິບັດໜ້າທີ່ພັດທະນາເສດຖະກິດ-ສັງຄົມໄລຍະ 5 ປີ 2011-2020. ການເຄື່ອນໄຫວຮັບເອົາການປະກອບຄຳເຫັນຂອງປະຊາຊົນໃສ່ບັນດາຮ່າງເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມຊຶ່ງແກ່ຍາວແຕ່ວັນທີ 15/9 ຫາວັນທີ 31/10/2015.
ຫຼາຍຮູບຫຼາຍແບບທາງດ້ານເນື້ອໃນທີ່ຍົກອອກມາເພື່ອຮັບເອົາການປະກອບຄຳເຫັນ
ການປະກອບຄຳເຫັນໃສ່ຮ່າງບົດລາຍງານການເມືອງຂອງ ຄະນະບໍລິຫານງານສູນກາງພັກຊຸດທີ 11 ຢູ່ທີ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ແມ່ນເລັ່ງໃສ່ບັນດາເນື້ອໃນເຊັ່ນ: ຕີລາຄາໂດຍສັງເຂບໝາກຜົນ 5 ປີແຫ່ງການປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກກອມມູນິດຫວຽດນາມ; 30 ປີແຫ່ງການປ່ຽນແປງໃໝ່ປະເທດຊາດ ແລະ 5 ບົດຮຽນໃຫຍ່; ການຄາດຄະເນສະຖານະການໂລກ ແລະ ປະເທດຊາດ; ຈຸດໝາຍ, ໜ້າທີ່ໂດຍສັງເຂບຂອງການພັດທະນາປະເທດຊາດໄລຍະ 5 ປີ (2016-2020); ກຳນົດທິດປ່ຽນແປງໃໝ່ຮູບແບບການເຕີບໂຕ ແລະ ທິດທາງ, ໜ້າທີ່ຍູ້ແຮງການຫັນປະເທດຊາດເປັນປະເທດອຸດສາຫະກຳ ແລະ ທັນສະໄໝ. ທິດທາງ, ເປົ້າໝາຍພັດທະນາພື້ນຖານເສດຖະກິດຕະຫຼາດກຳນົດທິດສັງຄົມນິຍົມ; ທັດສະນະ, ຈຸດໝາຍ, ນະໂຍບາຍ, ນະໂຍບາຍການຕ່າງປະເທດ ແລະ ເຊື່ອມໂຍງເຂົ້າກັບສາກົນ; ກຳນົດທິດ, ມາດຕະການແກ້ໄຂເສີມຂະຫຍາຍກຳລັງແຮງມະຫາສາມັກຄີທົ່ວປວງຊົນທັງຊາດ, ເສີມຂະຫຍາຍປະຊາທິປະໄຕຕິດພັນກັບການເພີ່ມທະວີການປະຕິບັດກົດລະບຽບຂໍ້ບັງຄັບ, ສ້າງລັດແຫ່ງອຳນາດນິຕິບັນຍັດສັງຄົມນິຍົມຫວຽດນາມໃຫ້ສົມບູນແບບ; ຕີລາຄາສະພາບການກໍ່ສ້າງພັກໄລຍະ 5 ປີທີ່ຜ່ານມາ, ທິດທາງການກໍ່ສ້າງພັກ, ປ່ຽນໃໝ່ແບບວິທີນຳພາ ແລະ ຍົກສູງກຳລັງຕໍ່ສູ້ຂອງພັກ; ເນື້ອໃນໜ້າທີ່ຈຸດສຸມ 6 ປະການ ຄວນໄດ້ຮັບການສຸມໃສ່ປະຕິບັດເປັນຢ່າງດີໃນອາຍຸການກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ.
ພາຍຫຼັງທີ່ບັນດາຮ່າງເອກະສານທັງໝົດທີ່ກະກຽມຍື່ນສະເໜີຕໍ່ກອງປະຊຸມໃຫຍ່ ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ຖືກປະກາດນັ້ນ, ປະຊາຊົນໃນທົ່ວປະເທດຖືວ່າ ເນື້ອໃນຂອງບັນດາຮ່າງເອກະສານແມ່ນຄົບຖ້ວນ ແລະ ອຸດົມສົມບູນ. ທ່ານພົນຈັດຕະວາ ເຈີນມິນຮຸ່ງ ພະນັກງານໄດ້ອອກພັກກິນເບ້ຍບຳນານຢູ່ແຂວງກວາງນາມໃຫ້ຮູ້ວ່າ :
“ ຂ້າພະເຈົ້າຖືວ່າ ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ແມ່ນກິດຈະກຳວິທະຍາສາດ ແລະ ມີຄຸນນະພາບ. ເນື້ອໃນກະທັດລັດ ແລະ ຄົບຖ້ວນ, ການໃຊ້ຄຳສັບແມ່ນສາມາດເຂົ້າໃຈງ່າຍ. ໝາຍຄວາມວ່າ ເຮັດໄດ້ເທົ່າໃດ ກໍແນະນຳເທົ່ານັ້ນ. ບັນດາແຜນນະໂຍບາຍ, ແລ້ວກໍຮອດຜົນສຳເລັດຂອງອາຍຸການກອງປະຊຸມໃຫຍ່ສະໄໝກ່ອນໆ ແລະ ບັນດາກຳນົດທິດແຜນນະໂຍບາຍ, ວິທີການແກ້ໄຂໃຫ້ອາຍຸການທີ່ຈະມາເຖິງ ກໍລ້ວນແຕ່ຄົບຖ້ວນ. ບັນດາສະຫາຍມີການກະກຽມລອບຄອບຖີ່ຖ້ວນເຊັ່ນນັ້ນ ແມ່ນຖືກຕ້ອງ ແລະ ດີຫຼາຍ ”
ການເຄື່ອນໄຫວທີ່ມີຄວາມໝາຍອັນຍິ່ງໃຫຍ່
ນັກຄົ້ນຄ້ວາ ຫງວຽນດິງອານ ອະດີດປະທານຄະນະກຳມະການສູນກາງແນວໂຮມປະເທດຊາດຫວຽດນາມນະຄອນ ດານັ້ງ ຖືວ່າ ເລື່ອງຄະນະບໍລິຫານງານສູນກາງພັກປະກາດຮ່າງບັນດາເອກະສານທັງໝົດທີ່ຈະຍື່ນສະເໜີຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ແມ່ນມີຄວາມໝາຍທີ່ຍິ່ງໃຫຍ່ໃນການເຕົ້າໂຮມພູມປັນຍາ, ເສີມຂະຫຍາຍນ້ຳໃຈປະຊາທິປະໄຕ, ຄວາມຮັບຜິດຊອບຂອງພະນັກງານ, ສະມາຊິກພັກ, ປະຊາຊົນທຸກຊັ້ນວັນນະ, ປະຊາຄົມຊາວຫວຽດນາມອາໄສຢູ່ຕ່າງປະເທດ ປະກອບສ່ວນສ້າງເນື້ອໃນເອກະສານຂອງພັກ. ນັກຄົ້ນຄ້ວາ ຫງວຽນດິງອານ ເນັ້ນໜັກວ່າ :
“ ຢາກພັດທະນາປະເທດຊາດ, ຕ້ອງມີກຳລັງແຮງຂອງທົ່ວປວງຊົນ, ດັ່ງນັ້ນປະຊາຊົນຕ້ອງເຂົ້າຮ່ວມປະກອບຄຳເຫັນ. ເອກະສານບໍ່ແມ່ນຂອງພັກ, ຫາກແມ່ນຂອງທົ່ວປວງຊົນ, ຕັດສິນບັນດາບັນຫາໃນການດຳລົງຊີວິດຂອງປະຊາຊົນ, ດັ່ງນັ້ນປະຊາຊົນຕ້ອງເຂົ້າຮ່ວມ. ຕໍ່ມາຈຶ່ງມີມະຕິ, ແລະຈາກມະຕິນັ້ນ ຈຶ່ງມີໂຄງການດຳເນີນງານ ຊຶ່ງໄດ້ຮັບການຜັນຂະຫຍາຍປະຕິບັດຈາກບັນດາຂະແໜງການ, ຂັ້ນຕ່າງໆ, ປະຊາຊົນກໍຕ້ອງເຂົ້າຮ່ວມ. ວຽກງານຂອງປະເທດຊາດ ແມ່ນສັບສົນທີ່ສຸດ, ຕ້ອງມີການປະກອບຄຳເຫັນຢ່າງຫຼວງຫຼາຍ ແລະ ມີການສັງເກດຕີລາຄາຈຶ່ງຈະໄປສູ່ສັດຈະທຳໄດ້ ”
ປະຊາຊົນທຸກຊັ້ນວັນນະໃນທົ່ວປະເທດໄດ້ເລີ່ມຈັດຕັ້ງບັ້ນດຳເນີນຊີວິດ, ປະກອບຄຳເຫັນໃສ່ບັນດາເນື້ອໃນລະອຽດໃນຮ່າງເອກະສານກອງປະຊຸມໃຫຍ່. ຈິດໃຈປະຊາທິປະໄຕ, ຄວາມຮັບຜິດຊອບຂອງພັກນັກງານ, ສະມາຊິກພັກ, ປະຊາຊົນທຸກຊັ້ນວັນນະ, ປະຊາຄົມຊາວຫວຽດນາມອາໄສຢູ່ຕ່າງປະເທດໃນການປະກອບຄຳເຫັນສ້າງເອກະສານກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ ບໍ່ພຽງແຕ່ສ້າງຄວາມເປັນເອກະພາບທາງດ້ານຄວາມຮັບຮູ້, ການກະທຳໃນການຮ່ຳຮຽນ, ຊາບຊຶມ, ຜັນຂະຫຍາຍມະຕິ ແລະ ບັນດາເອກະສານກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມເຂົ້າສູ່ຊີວິດຕົວຈິງໃນໄລຍະຕໍ່ໄປເທົ່ານັ້ນ, ຫາກຍັງປະກອບສ່ວນສ້າງບັນດາລັດຖະນະໂຍບາຍທີ່ແທດເໝາະກັບຈິດໃຈຂອງປະຊາຊົນ ແລະ ແຜນນະໂຍບາຍຂອງພັກອີກດ້ວຍ.