ທ່ານນາຍົກລັດຖະມົນຕີອັງກິດ David Cameron ພວມທຳການຢ້ຽມຢາມ 4 ປະເທດອາຊີຕາເວັນອອກສ່ຽງໃຕ້ເຊັ່ນ : ອິນໂດເນເຊຍ, ມາເລເຊຍ, ຫວຽດນາມ ແລະ ສິງກະໂປ. ນີ້ແມ່ນການຢ້ຽມຢາມຄັ້ງທຳອິດຢູ່ບໍລິເວນນອກພາກພື້ນເອີລົບ ຂອງ ທ່ານນາຍົກລັດຖະມົນຕີອັງກິດ David Cameron ນັບຕັ້ງແຕ່ໄດ້ຮັບການເລືອກຕັ້ງເປັນນາຍົກລັດຖະມົນຕີອັງກິດຄືນໃໝ່ເມື່ອເດືອນ 5 ທີ່ຜ່ານມາ. ການຢ້ຽມຢາມຄັ້ງນີ້, ນອກຈາກຈຸດປະສົງຊຸກຍູ້ການຮ່ວມມືດ້ານເສດຖະກິດການຄ້າກັບບັນດາປະເທດໃນພາກພື້ນ ອາຊີຕາເວັນອອກສ່ຽງໃຕ້ນັ້ນ, ອັງກິດຍັງມີຄວາມຫວັງຢາກຊອກຫາການຮ່ວມມືໃນຂົງເຂດຕ່າງໆຄື ຕ້ານກໍ່ການຮ້າຍ, ການເດີນທະເລ, ການບິນ…
ທ່ານນາຍົກລັດຖະມົນຕີຫງວຽນເຕີ້ຢຸງ ເປັນປະທານພິທີຕ້ອນຮັບ
ທ່ານນາຍົກລັດຖະມົນຕີອັງກິດ David Cameron |
ໂດຍສັງເກດໃນທຸກແງ່ມຸມແລ້ວ, ອາຊີຕາເວັນອອກສ່ຽງໃຕ້ໃນປະຈຸບັນ, ຍັງແມ່ນຄູ່ຮ່ວມມືການຄ້າ ແລະ ການລົງທຶນທີ່ສຳຄັນ ແລະ ມີຄວາມສາມາດບົ່ມຊ້ອນຫຼາຍອັນດັບໜຶ່ງໃນໂລກ. ໄລຍະມໍ່ໆມານີ້, ບັນດາປະເທດໃຫຍ່ ລ້ວນແຕ່ມີບັນດານະໂຍບາຍຍຸດທະສາດທີ່ຈະແຈ້ງໂດຍຫັນຈຸດສຸມໄປຍັງພາກພື້ນອາຊີ-ປາຊີຟິກ, ໃນນັ້ນ ໄດ້ເນັ້ນໜັກເປັນພິເສດເຖິງບົດບາດຂອງພາກພື້ນອາຊີຕາເວັນອອກສ່ຽງໃຕ້. ສຳລັບອາເມລິກາ ແມ່ນນະໂຍບາຍຫັນຈຸດສຸມ, ອິນເດຍ ແມ່ນນະໂຍບາຍມຸ່ງໄປສູ່ທິດຕາເວັນອອກ, ລັດເຊຍ ແມ່ນນະໂຍບາຍໃຫ້ບຸລິມະສິດແກ່ພາກພື້ນ, ສ່ວນສະຫະພາບເອີລົບ ແມ່ນນະໂຍບາຍແຊກແຊງດ້ວຍກຳລັງແຮງແບບອ່ອນໂຍນ. ເພາະສະນັ້ນ, ລັດຖະບານຂອງ ທ່ານນາຍົກລັດຖະມົນຕີອັງກິດ David Cameron ກໍບໍ່ຢາກຊັກຊ້າໃນການແຂ່ງຂັນຊອກຫາບັນດາໂອກາດຮ່ວມມືຢູ່ໜຶ່ງໃນບັນດາຕະຫຼາດທີ່ເຕັມໄປດ້ວຍຄວາມສາມາດບົ່ມຊ້ອນນີ້.
ຈຸດໝາຍເສດຖະກິດແມ່ນສຳຄັນກວ່າໝູ່
ປະຈຸບັນ, ການແລກປ່ຽນການຄ້າລະຫວ່າງອັງກິດກັບບັນດາປະເທດພາກພື້ນອາຊີຕາເວັນອອກສ່ຽງໃຕ້ພຽງບັນລຸໃນລະດັບບໍ່ສູງປານໃດ. ການສົ່ງອອກຂອງອັງກິດໄປຍັງພາກພື້ນນີ້ ພຽງຢຸດຢູ່ໃນລະດັບປະມານ 10 ຕື້ປອນ(ສະກຸນເງິນອັງກິດ) ເທົ່າກັບປະມານ 15 ຕຶ້ USD. ໃນສະພາວະທີ່ພື້ນຖານເສດຖະກິດເອີລົບໃນມໍ່ມານີ້ ໄດ້ປະສົບກັບຫລາຍບັນຫາທີ່ຈຳເປັນຕ້ອງແກ້ໄຂ, ເພື່ອຊຸກຍູ້ການເຕີບໂຕເສດຖະກິດຂອງຕົນ ແລະ ເຖິງເວລາແລ້ວ ທີ່ອັງກິດໄດ້ຮັບຮູ້ວ່າ ບໍ່ອາດເລັ່ງໃສ່ພຽງແຕ່ການຮ່ວມມືກັບບັນດາປະເທດເອີລົບເທົ່ານັ້ນ, ຫາກຍັງຕ້ອງຊອກຫາບັນດາຄູ່ຮ່ວມມືການຄ້າໃໝ່ໃນທົ່ວໂລກອີກດ້ວຍ. ດັ່ງນັ້ນ, ການເດີນທາງຢ້ຽມຢາມ 4 ປະເທດອາຊີຕາເວັນອອກສ່ຽງໃຕ້ຂອງ ທ່ານນາຍົກລັດຖະມົນຕີອັງກິດ David Cameron ໄດ້ສົ່ງສານຢ່າງຈະແຈ້ງວ່າ ອັງກິດຈະຫັນບັນດາການພົວພັນດ້ານເສດຖະກິດຂອງຕົນເປັນຫຼາຍຮູບຫຼາຍແບບ ແລະ ພ້ອມແລ້ວທີ່ຈະປ່ຽນແປງ. ການເປີດກ້ວາງການເຄື່ອນໄຫວການຄ້າໄປຍັງ ອາຊີຕາເວັນອອກສ່ຽງໃຕ້ ກໍເປັນການຊ່ວຍອັງກິດຫັນຄວາມພະຍາຍາມຍົກສູງມຸນຄ່າການສົ່ງອອກຂອງປະເທດອັງກິດຂຶ້ນເຖິງ 1000 ຕື້ປອນໃນປີ 2020 ໃຫ້ປະກົດຜົນເປັນຈິງ. ເພາະສະນັ້ນ, ບໍ່ມີຫຍັງທີ່ປະຫຼາດໃຈຕໍ່ເລື່ອງທ່ານນາຍົກລັດຖະມົນຕີອັງກິດ David Cameron ໄດ້ນຳພາວິສາຫະກິດອັນດັບໜຶ່ງກວ່າ 30 ແຫ່ງຂອງອັງກິດໄປຢ້ຽມຢາມອາຊີຕາເວັນອອກສ່ຽງໃຕ້ ແລະ ຄາດວ່າຈະເຊັນສັນຍາຫຼາຍສະບັບລວມມຸນຄ່າປະມານ 750 ລ້ານປອນ( ປະມານ 1,2 ຕື້ USD )
ຢູ່ປະເທດອິນໂດເນເຊຍຊຶ່ງແມ່ນປະເທດທຳອິດໃນການເດີນທາງນັ້ນ, ທ່ານນາຍົກລັດຖະມົນຕີອັງກິດ David Cameron ໄດ້ໝັ້ນໝາຍສະໜອງບັນດາບ້ວງເງິນກູ້ລວມມູນຄ່າເຖິງ 1ຕື້ປອນ( ປະມານ 1,5 ຕື້ USD ) ໃຫ້ແກ່ບັນດາໂຄງການກໍ່ສ້າງພື້ນຖານໂຄງລ່າງຢູ່ອິນໂດເນເຊຍ. ພ້ອມກັນນັ້ນ, 2 ປະເທດໄດ້ລົງນາມໃນສັນຍາຫຼາຍໆສະບັບກ່ຽວກັບຂົງເຂດການເດີນທະເລ, ຄົ້ນຄ້ວາ ແລະ ຂະແໜງອາວະກາດພົນລະເຮືອນ.
ຖັດຈາກອິນໂດເນເຊຍ, ແມ່ນການຢ້ຽມຢາມຫວຽດນາມ, ທ່ານນາຍົກລັດຖະມົນຕີອັງກິດ David Cameron ບໍ່ພຽງແຕ່ເຂົ້າຮ່ວມບັນດາການເຄື່ອນໄຫວຢູ່ຮ່າໂນ້ຍເທົ່ານັ້ນ, ຫາກຍັງສະຫງວນເວລາສ່ວນຫຼາຍເພື່ອພົບປະກັບປະຊາຄົມວິສາຫະກິດຂອງ 2 ປະເທດຢູ່ນະຄອນໂຮ່ຈິມິນ. ປະຈຸບັນ, ອັງກິດພວມຢືນອັນດັບທີ 3 ໃນຈຳນວນບັນດາປະເທດ EU ທີ່ລົງທຶນເຂົ້າຫວຽດນາມ, ດ້ວຍ 204 ໂຄງການທີ່ມີຍອດເງິນລົງທຶນເກືອບ 3,2 ຕື້ USD . ໂດຍຖືຫວຽດນາມແມ່ນຄູ່ຮ່ວມມືທີ່ສຳຄັນໃນພາກພື້ນ, ທ່ານນາຍົກລັດຖະມົນຕີອັງກິດ David Cameron ແລະ ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ໄດ້ເລັ່ງໃສ່ປຶກສາຫາລືການຊຸກຍູ້ການລົງນາມໃນສັນຍາການຄ້າເສລີລະຫວ່າງອາຊຽນ ແລະ EU ແລະ ຖ້າຫາກວ່າສັນຍານີ້ໄດ້ຮັບການລົງນາມ ກໍສາມາດນຳລາຍໄດ້ 4,5 ຕື້ USD ມາໃຫ້ອັງກິດໃນແຕ່ລະປີຈາກການສົ່ງອອກ.
ເຂົ້າຮ່ວມບັນດາບັນຫາຄວາມໝັ້ນຄົງພາກພື້ນ ແລະ ທົ່ວໂລກຫຼາຍຂຶ້ນ
ໃນການຢ້ຽມຢາມ 4 ປະເທດອາຊີຕາເວັນອອກສ່ຽງໃຕ້ນັ້ນ, ຫົວເລື່ອງຮ່ວມມືຕ້ານອົງການລັດອິດສະລາມ IS ໂດຍຂະໜານນາມເອງ ກໍຖືກທ່ານນາຍົກລັດຖະມົນຕີອັງກິດ David Cameron ເຕື້ອງເຖິງຢູ່ 2 ປະເທດອິດສະລາມທີ່ມີຈຳນວນປະຊາກອນຫຼາຍກ່ວາໝູ່ໃນໂລກ, ນັ້ນແມ່ນອິນໂດເນເຊຍ ແລະ ມາເລເຊຍ. ໃນສະພາວະໃນມໍ່ໆມານີ້, ຈຳນວນພົນລະເມືອງຂອງ 2 ປະເທດນີ້ໄດ້ຖືກ IS ດຶງດູດໄປຍັງຕາເວັນອອກກາງເພື່ອເຂົ້າຮ່ວມກຳລັງທຳສົງຄາມສັກສິດທີ່ນັບມື້ນັບເພີ່ມທະວີຂຶ້ນ, ທ່ານນາຍົກລັດຖະມົນຕີອັງກິດ David Cameron ໄດ້ໝັ້ນໝາຍຈະເພີ່ມທະວີການໜູນຊ່ວຍທັງທາງດ້ານການເມືອງ ແລະ ເຕັກໂນໂລຢີໃຫ້ແກ່ລັດຖະບານບັນດາປະເທດນີ້, ແນໃສ່ສະກັດກັ້ນການຄັດເລືອກຮັບສະໝັກສະມາຊິກຫົວຮຸນແຮງທາງເຄືອຂ່າຍອິນເຕີເນັດ.
ໃນການຢ້ຽມຢາມຄັ້ງນີ້, ທ່ານນາຍົກລັດຖະມົນຕີອັງກິດ David Cameron ອີກເທື່ອໜຶ່ງໄດ້ເນັ້ນໜັກເຖິງດ້ານຫຼັກໝັ້ນຂອງລັດຖະບານອັງກິດກ່ຽວກັບບັນຫາທະເລຕາເວັນອອກ. ທ່ານຢືນຢັນວ່າ ບັນດາຄວາມເຄັ່ງຕຶງຢູ່ ທະເລຕາເວັນອອກ ຕ້ອງໄດ້ຮັບການແກ້ໄຂບົນພື້ນຖານຂອງກົດໝາຍສາກົນ ແລະ ບໍ່ວ່າການກະທຳເກາະຜິດພຽງລຳພັງຝ່າຍດຽວໃດໆ ກໍອາດຈະເປັນໄພນາບຂູ່ຕໍ່ສະຖຽນລະພາບໃນພາກພື້ນ ກໍຄືວັດທະນາຖາວອນໃນທົ່ວໂລກ.
ດ້ວຍການເດີນທາງຢ້ຽມຢາມ 4 ປະເທດອາຊີຕາເວັນອອກສ່ຽງໃຕ້ຄັ້ງນີ້, ອັງກິດຫວັງຮ່ວມສຳພັນຢ່າງແໜ້ນແຟ້ນກວ່າກັບບັນດາຕະຫຼາດທີ່ມີການເຕີບໂຕສູງໃນພາກພື້ນ ເພື່ອຫັນຄວາມໃຝ່ຝັນກາຍເປັນພື້ນຖານເສດຖະກິດໃຫຍ່ກວ່າໝູ່ຢູ່ຝ່າຍຕາເວັນຕົກໃຫ້ປະກົດຜົນເປັນຈິງ.