(vovworld) – ພາຍຫຼັງປະກາດໄດ້ຮັບໄຊຊະນະນະໃນການເລືອກຕັ້ງເມື່ອວັນທີ 11/5 ໜຶ່ງວັນ, ອະດີດນາຍົກລັດຖະມົນຕີ Nawaz Shaif ໄດ້ປຶກສາຫາລືກ່ຽວກັບການສ້າງຕັ້ງລັດຖະບານ ກັບສະມາຊິກສະພາແຫ່ງຊາດ (ສສຊ) ເອກະລາດຈຳນວນໜຶ່ງ ແລະ ພິຈາລະນາກ່ຽວກັບຕຳແໜ່ງລັດຖະມົນຕີສຳຄັນໃນລັດຖະບານ ປາກິສະຖານ. ທ່ານNawaz Shaif ມີການກະທຳຮີບເຮັ່ງຄືແນວນັ້ນ ເພາະວ່າ ບັນດາສິ່ງທ້າທາຍໃຫຍ່ພວມລໍຖ້າລັດຖະບານໃໝ່ແກ້ໄຂ, ໃນນັ້ນການທ້າທາຍອັນດັບໜຶ່ງນັ້ນແມ່ນການຟື້ນຟູເສດຖະກິດ, ໄປຄຽງຄູ່ກັນນັ້ນແມ່ນບັນຫາປ້ອງກັນຄວາມສະຫງົບ.
ອະດີດນາຍົກລັດຖະມົນຕີ Nawaz Shaif
(ພາບ: phunuonline)
ອະດີດນາຍົກລັດຖະມົນຕີ Nawaz Shaif ຍອມຮັບວ່າ, ທ່ານໄດ້ຮັບໜ້າທີ່ປົກຄອງປະເທດໃນສະພາບການສັບສົນທີ່ສຸດ. ໃນຕະຫຼອດໄລຍະຜ່ານມາ, ເສດຖະກິດຂອງປະເທດອາຊີໃຕ້ນີ້ຖືກຊຸດໂຊມຢ່າງຮ້າຍແຮງ, ອັດຕາຜູ້ຫວ່າງງານສູງ, ການຜະລິດຖືກຢຸດສະງັກ. ວິກິດການດ້ານພະລັງງານ ເຮັດໃຫ້ຫຼາຍເຂດຢູ່ ປາກິສະຖານຖືກຕັດໄຟຟ້າເຖິງ 20 ຊົ່ວໂມງ/ວັນ. ຕົວເລກສະຖິຕິກໍ່ສະແດງໃຫ້ເຫັນວ່າ, ໃນ 5 ປີຜ່ານມາ, ປະເທດ ອາຊີໃຕ້ ດ້ວຍພົນລະເມືອງປະມານ 190 ລ້ານຄົນນີ້ ຍາມໃດກໍ່ມີລະດັບເຕີບໂຕຕຳ່, ລະດັບເພີ່ມສະເລ່ຍບໍ່ທັນຮອດ 3%/ປີ. ແຕ່ລະປີຜູ້ອອກແຮງງານ 2 ລ້ານຄົນບໍ່ມີວຽກເຮັດງານທຳ. ນີ້ແມ່ນສາຍເຫດທີ່ພາໃຫ້ລັດຖະບານອາຍຸກ່ອນຖືກຕຳນິຕິຕຽນຢ່າງແຮງ. ຄຽງຂ້າງນັ້ນ, ປາກິສະຖານ ພວມຕ້ອງປະເຊີນໜ້າກັບວິກິດການດຸນຊຳລະ. ປີກາຍນີ້, ລະດັບເຕີບໂຕຍອດຜະລິດຕະພັນພາຍໃນ (ຈີດີພີ) ຂອງ ປາກິສະຖານ ໄດ້ຫຼຸດລົງເກືອບ 3% ໃນຂະນະທີ່ໄພເງິນເຟີ້ ໄດ້ເພີ່ມຂຶ້ນປະມານ 11%. ປະຈຸບັນ, ບັນດາການນຳປະເທດນີ້ຄາດຄະເນວ່າ ຈະຄວບຄຸມການຂາດດຸນງົບປະມານຢູ່ໃນລະດັບປະມານ 4,7% ຈີດີພີ ໃນປີການເງິນນີ້, ແຕ່ນັກໄຈ້ແຍກເກືອບທັງໝົດພັດຖືວ່າ ການຂາດດຸນງົບປະມານອາດຈະຢູ່ໃນລະດັບສູງກວ່ານີ້ຫຼາຍ. ເຂົາເຈົ້າກ່າວເຕືອນລັດຖະບານໃໝ່ ອາດຈະຕ້ອງການໄດ້ຮັບເງິນກູ້ຊ່ວຍນັບຕຶ້ໂດລາສະຫະລັດຂອງກອງທຶນເງິນຕາສາກົນ (IMF).
ນອກນັ້ນການໃຊ້ຄວາມຮຸນແຮງ ແລະ ລັດທິກໍ່ການຮ້າຍພວມເກີດຂຶ້ນປະຈຳວັນຢູ່ປະເທດອິດສະລາມນີ້. ໃນວັນດຳເນີນການເລືອກຕັ້ງ 11/5, ໄດ້ມີຜູ້ເສຍຊີວິດຢ່າງໜ້ອຍສຸດ 32 ຄົນ ແລະ ມີຜູ້ຖືກບາດເຈັບ 224 ຄົນ ໃນການບຸກໂຈມຕີກວ່າ 40 ຄັ້ງໃນທົ່ວປະເທດ ປາກິສະຖານ. ຖ້າຫາກນັບທັງ 22 ວັນດຳເນີນການຂົນຂວາຍຫາສຽງເລືອກຕັ້ງ, ຈຳນວນຜູ້ເສຍຊີວິດ ແລະ ຮັບບາດເຈັບຍັງຫຼາຍກວ່າຕົວເລກດັ່ງກ່າວອີກ, ດ້ວຍ 110 ກວ່າຄົນເສຍຊີວິດ, ໃນນັ້ນມີຜູ້ຮັບສະໝັກເລືອກຕັ້ງ 3 ທ່ານ ແລະ 350 ກວ່າຄົນຖືກບາດເຈບ ຍ້ອນການວາງລະເບີດ ແລະ ຍິງປືນຄັ້ງຕ່າງໆ.
ໂດຍແມ່ນຜູ້ທີ່ມີປະສົບການບົນເວທີການເມືອງ ປາກິສະຖານ ດ້ວຍການດຳລົງຕຳແໜ່ງນາຍົກລັດຖະມົນຕີກ່ອນນີ້ 2 ຄັ້ງ, ດັ່ງນັ້ນທ່ານ Nawaz Shaif ຈຶ່ງເຂົ້າໃຈແຈ້ງບັນດາບັນຫາຮີບດ່ວນໃນສັງຄົມ ປາກິສະຖານ. ຍ້ອນເຫດນັ້ນ, ອະດີດນາຍົກລັດຖະມົນຕີຜູ້ນີ້ຈຶ່ງຍົກອອກຄຳຂວັນທີ່ວ່າ “ພື້ນຖານເສດຖະກິດ - ປາກິສະຖານເຂັ້ມແຂງ“. ເພື່ອເຮັດສິ່ງດັ່ງກ່າວໃຫ້ໄດ້, ຄາດໝາຍຕົ້ນຕໍ່ຂອງລັດຖະບານໃໝ່ຢູ່ ປາກິສະຖານ ຈະແມ່ນການຊຸກຍູ້ເສດຖະກິດ, ຕໍ່ສູ້ຕ້ານສໍ້ລາດບັງຫຼວງ ແລະ ຊອກຫາມາດຕະການແກ້ໄຂວິກິດການດ້ານພະລັງງານໃນປະຈຸບັນ. ທ່ານ Nawaz Shaif ກໍ່ໃຫ້ຄຳໝັ້ນສັນຍາຈະຊຸກຍູ້ພື້ນຖານເສດຖະກິດການຕະຫຼາດຢ່າງເສລີ, ຮັກສານະໂຍບາຍຫັນເປັນເອກະຊົນ, ຫຼຸດຜ່ອນລາຄາໄຟຟ້າ.
ກ່າວຄວາມເຫັນຕໍ່ໜ້າບັນດາຜູ້ສະໜັບສະໜູນ ພາຍຫຼັງໄດ້ຮັບໄຊຊະນະ, ທ່ານ Nawaz Shaif ຮຽກຮ້ອງໃຫ້ພັກຝ່າຍຕ່າງໆເຂົ້າຮ່ວມການເຈລະຈາ ແລະ ແກ້ໄຂບັນດາບັນຫາຂອງປະເທດຊາດ. ກ່ອນໜ້ານັ້ນ, ທ່ານ Nawaz Shaif ໄດ້ຮຽກຮ້ອງໃຫ້ມີການໂອ້ລົມສົນທະນາກັບຝ່າຍ ຕາລີບານ, ເຊິ່ງແມ່ນຂະບວນການອິດສະລາມ ຫົວຮຸນແຮງ ທີ່ໄດ້ກໍ່ການໃຊ້ຄວາມຮຸນແຮງຕ່າງໆທີ່ກ່ຽວຂ້ອງເຖິງການເລືອກຕັ້ງ, ຖືວ່ານີ້ແມ່ນມາດຕະການເພື່ອຢຸດຕິສະພາບວຸ່ນວາຍທີ່ເຄີຍແກ່ຍາວມາເປັນເວລາເກືອບ 7 ປີຜ່ານມາຢູ່ ປາກິສະຖານ.
ບັນຍາກາດຢູ່ ປາກິສະຖານ ພາຍຫຼັງການເລືອກຕັ້ງ ມີຄວາມຟົດຟື້ນມ່ວນຊື່ນຄືງານບຸນ. ປະຊາຊົນສະແດງຄວາມເບີກບານມ່ວນຊື່ນຕໍ່ໜ້າກາລະໂອກາດປະເທດຊາດຈະມີການປ່ຽນແປງໃນໃກ້ໆນີ້. ແຕ່ການປ່ຽນແປງນັ້ນແມ່ນອີງໃສ່ຄວາມສາມາດຊີ້ນຳນຳພາຂອງທ່ານ Nawaz Shaif, ຜູ້ທີ່ເຄີຍເປັນນາຍົກລັດຖະມົນຕີ 2 ຄັ້ງ ຢູ່ປະເທດອິດສະລາມນີ້ໃນຊຸມປີ 90 ຂອງສະຕະວັດກ່ອນແລ້ວ.