(vovworld)-ບັນດາກະຊວງ, ຂະແຫນງການ ແລະ ທ້ອງຖິ່ນ ພວມຕັ້ງຫນ້າຜັນຂະຫຍາຍການຈັດຕັ້ງຮັບເອົາຄຳເຫັນປະກອບຂອງປະຊາຊົນໃສ່ຮ່າງປະມວນກົດໝາຍແພ່ງ(ສະບັບປັບປຸງ), ຊື່ງແມ່ນປະມວນກົດໝາຍພື້ນຖານໃນລະບົບກົດໝາຍຫວຽດນາມ, ໄດ້ກະທົບເຖິງກົດໝາຍອື່ນຫລາຍສະບັບໃນລະບົບກົດໝາຍ. ການໂຄສະນາ ແລະ ຈັດຕັ້ງການຮັບເອົາຄຳເຫັນປະກອບຂອງປະຊາຊົນໄດ້ຮັບການປະຕິບັດຜ່ານບັນດາຮູບການເໝາະສົມກັບແຕ່ລະເປົ້າໝາຍ, ພ້ອມທັງຮັບປະກັນຄຸນນະພາບ, ພາວະວິໄສ ແລະ ມີປະສິດທິຜົນ.
ການຮັບເອົາຄຳເຫັນປະກອບຂອງປະຊາຊົນໃສ່ປະມວນກົດໝາຍແພ່ງ (ສະບັບປັບປຸງ) ບັນລຸໝາກຜົນອັນດີງາມ, ມາຮອດປະຈຸບັນ ມີຫລາຍຂະແຫນງການ, ທ້ອງຖິ່ນຕ່າງໆ ໄດ້ປະກາດໃຊ້ບັນດາແຜນການຜັນຂະຫຍາຍຢ່າງລະອຽດ, ໃນນັ້ນ ມີການຈັດຕັ້ງບັນດາກອງປະຊຸມ, ສຳມະນາ, ບຳລຸງສ້າງແຫລ່ງຊັບພະຍາກອນມະນຸດ ເພື່ອຮັບໃຊ້ໃຫ້ຫນ້າທີ່ນີ້.
ພິທີປະກາດແຜນການຂອງລັດຖະບານກ່ຽວກັບການ
ຈັດຕັ້ງຮັບເອົາຄຳເຫັນປະກອບຂອງປະຊາຊົນໃສ່ຮ່າງ
ປະມວນກົດໝາຍແພ່ງ(ສະບັບປັບປຸງ)
ພາບ:vov
|
ຫນ້າທີ່ຈຸດສຸມຊື່ງບັນດາຂະແຫນງການ, ທ້ອງຖິ່ນບຸລິມະສິດຊີ້ນຳປະຕິບັດໃນໄຕມາດ1/2015
ຢູ່ຮ່າໂນ້ຍ, ພະແນກຍຸຕິທຳ ນະຄອນ ຮ່າໂນ້ຍ ໄດ້ເປັນເສນາທິການໃຫ້ແກ່ ຄະນະກຳມະການປະຊາຊົນນະຄອນ ປະກາດໃຊ້ແຜນການຜັນຂະຫຍາຍການຮັບເອົາຄຳເຫັນປະກອບຂອງປະຊາຊົນ. ໃນນັ້ນ ພ້ອມກັບ10 ເນື້ອໃນຈຸດສຸມໃນການຮັບເອົາຄຳເຫັນປະກອບຂອງປະຊາຊົນ, ພະແນກຍຸຕິທຳ ກໍໄດ້ເລືອກເຟັ້ນບາງຫົວເລື່ອງສະເພາະເພື່ອຈັດຕັ້ງກອງປະຊຸມ, ການສຳມະນາ ເພື່ອໃຫ້ບັນດາຜູ້ຊ່ຽວຊານ, ນັກວິທະຍາສາດ, ບັນດາວິສາຫະກິດປະກອບຄຳເຫັນ.
ປະມວນກົດໝາຍແພ່ງ ແມ່ນປະມວນກົດໝາຍສຳຄັນ ກວມລວມທຸກການພົວພັນດ້ານພົນລະເຮືອນ. ສະນັ້ນ ການໂຄສະນາ, ອະທິບາຍໃຫ້ແກ່ປະຊາຊົນເຂົ້າໃຈແຈ້ງບັນດາເນື້ອໃນຂອງຮ່າງປະມວນກົດໝາຍສະບັບນີ້ ແມ່ນວຽກງານທີ່ສຳຄັນ ແລະ ອີງຕາມຄວາມຮັບຮູ້ຂອງແຕ່ລະໝວດເປົ້າໝາຍ ເພື່ອມີວິທີໂຄສະນາໃຫ້ເໝາະສົມ. ທ່ານນາງ ຟານກີງຢາວ, ຮອງຫົວຫນ້າພະແນກຍຸຕິທຳ ນະຄອນເກີນເທີ, ໃຫ້ຮູ້ວ່າ:
“ກ່ອນອື່ນໝົດ, ພວກຂ້າພະເຈົ້າຈະຈັດຕັ້ງກອງປະຊຸມເພື່ອແນະນຳບັນດາເນື້ອໃນຂອງແຜນຮ່າງໃຫມ່ໃຫ້ແກ່ຖັນແຖວຜູ້ລາຍງານຂັ້ນນະຄອນ, ຂັ້ນແຂວງ, ຂັ້ນເມືອງ. ຫລັງຈາກນັ້ນ ຊີ້ນຳໃຫ້ບັນດາພະແນກ, ຄະນະ, ຂະແຫນງການ ຈັດຕັ້ງບັນດາກອງປະຊຸມໃນແຕ່ລະຂົງເຂດ, ແຕ່ລະຂະແຫນງການ ເພື່ອຮັບເອົາຄຳເຫັນປະກອບ. ສຳລັບປະຊາຊົນ, ພາຍຫລັງແນະນຳໃຫ້ເຂົາເຈົ້າບັນດາເນື້ອໃນໃຫມ່ຈະຈັດຕັ້ງການລົງຮັບເອົາຄຳເຫັນປະກອບຂອງປະຊາຊົນຢູ່ແຕ່ລະຄອບຄົວ.”
ພ້ອມກັບຂະແຫນງຕຸລາການ, ບັນດາພະແນກ, ຂະແຫນງການອື່ນ ກໍຕັ້ງຫນ້າຜັນຂະຫຍາຍຫນ້າທີ່ນີ້. ຢູ່ ແຂວງ ແຄງຮ່ວາ, ມີຜູ້ແທນກວ່າ 200 ຄົນທີ່ຕາງຫນ້າໃຫ້ແກ່ບັນດາພະແນກ, ຄະນະ, ຂະແຫນງການ, ຄະນະທະນາຍຄວາມ, ບັນດາເມືອງ, ເທດສະບານ, ນະຄອນ, ໂຮງຮຽນຈຳນວນຫນຶ່ງ, ຜູ້ເຜີຍແຜ່ດ້ານກົດໝາຍຂອງແຂວງ, ພະນັກງານຕຸລາການຢູ່ບັນດາອົງການ ໄດ້ເຂົ້າຮ່ວມກອງປະຊຸມຜັນຂະຫຍາຍການຮັບເອົາຄຳເຫັນປະກອບຂອງປະຊາຊົນ ໃສ່ປະມວນກົດໝາຍແພ່ງ ສະບັບປັບປຸງ. ຢູ່ແຂວງ ຮ່ານາມ, ທາງແຂວງ ໄດ້ມອບຫນ້າທີ່ລະອຽດໃຫ້ແກ່ບັນດາພະແນກ, ຄະນະ, ຂະແຫນງການກ່ຽວຂ້ອງ ຈັດຕັ້ງການຮັບເອົາຄຳເຫັນປະກອບໃສ່ປະມວນກົດໝາຍແພ່ງທັງໝົດ. ສະພາປະຊາຊົນ, ຄະນະກຳມະການປະຊາຊົນເມືອງ, ນະຄອນ ລວບລວມບັນດາຄຳເຫັນກ່ຽວກັບເນື້ອໃນກ່ຽວຂ້ອງເຖິງຈຸດພິເສດສະເພາະການພັດທະນາເສດຖະກິດ, ສັງຄົມ, ຮີດຄອງປະເພນີ ຢູ່ທ້ອງຖິ່ນ ແລະ ບັນດາບັນຫາຊື່ງທ້ອງຖິ່ນສົນໃຈ.
ໃນຂະນະນັ້ນ, ຢູ່ ແຂວງ ຮ່າຕີງ, ແຜນການຜັນຂະຫຍາຍການຮັບເອົາຄຳເຫັນປະກອບຂອງປະຊາຊົນໃສ່ຮ່າງປະມວນກົດໝາຍແພ່ງ(ສະບັບປັບປຸງ) ແມ່ນເນັ້ນຫນັກເປັນພິເສດເຖິງເປົ້າໝາຍປະກອບຄຳເຫັນ, ຕາມນັ້ນແລ້ວ ຄວນສຸມໃສ່ບັນດາເປົ້າໝາຍກ່ຽວຂ້ອງເຖິງປະມວນກົດໝາຍຄື: ທະນາຄານ, ວິສາຫະກິດ, ຄອບຄົວດຳເນີນທຸລະກິດ..
ຮັບປະກັນແຫລ່ງຊັບພະຍາກອນມະນຸດ, ພື້ນຖານທາງດ້ານວັດຖຸເພື່ອຜັນຂະຫຍາຍ
ບັນດາ ຜູ້ເຜີຍແຜ່ ດ້ານກົດໝາຍແມ່ນກຳລັງຫລັກແຫລ່ງເພື່ອຊ່ວຍໃຫ້ບັນດາກະຊວງ, ຂະແຫນງການສູນກາງ ແລະ ບັນດາແຂວງ, ນະຄອນ ຈັດຕັ້ງຜັນຂະຫຍາຍການຮັບເອົາຄຳເຫັນປະກອບຂອງປະຊາຊົນບັນລຸປະສິດທິຜົນ, ຄຸນນະພາບ. ບົນຈິດໃຈນັ້ນ, ກະຊວງຍຸຕິທຳ ໄດ້ຈັດຕັ້ງກອງປະຊຸມເຜີຍແຜ່, ແນະນຳບັນດາເນື້ອໃນກ່ຽວຂ້ອງເຖິງການຈັດຕັ້ງຮັບເອົາຄຳເຫັນປະກອບຂອງປະຊາຊົນໃສ່ຮ່າງປະມວນກົດໝາຍແພ່ງ(ສະບັບປັບປຸງ)ໃຫ້ແກ່ ຜູ້ເຜີຍແຜ່ດ້ານກົດໝາຍຂັ້ນສູນກາງ, ຂັ້ນແຂວງ, ນະຄອນ. ທ່ານ ດີງຈູງຕຸ້ງ, ລັດຖະມົນຕີຊ່ວຍວ່າການກະຊວງຍຸຕິທຳ ໃຫ້ຮູ້ວ່າ:
“ກອງປະຊຸມ ຜູ້ເຜີຍແຜ່ດ້ານກົດໝາຍແມ່ນແນໃສ່ສົ່ງຄວາມຮູ້, ບັນດາບັນຫາທີ່ກ່ຽວຂ້ອງເຖິງມາດຕາທີ່ຖືກປັບປຸງໃນປະມວນກົດໝາຍແພ່ງໃຫ້ແກ່ ຜູ້ເຜີຍແຜ່ດ້ານກົດໝາຍ ເພື່ອໃຫ້ເຂົາເຈົ້າຊ່ວຍໃຫ້ບັນດາກະຊວງ, ຂະແຫນງການ, ທ້ອງຖິ່ນ ຈັດຕັ້ງການຮັບເອົາຄຳເຫັນປະກອບຂອງປະຊາຊົນຢ່າງມີປະສິດທິຜົນ, ມີຄຸນນະພາບ ແລະ ປະຢັດ.”
ທ່ານ ຫງວຽນກົງແອງ, ຫົວຫນ້າຫ້ອງການເອກະສານິຕິກຳ, ພະແນກຍຸຕິທຳ ນະຄອນຮ່າໂນ້ຍ ໃຫ້ຮູ້ວ່າ: ປະຈຸບັນ ນະຄອນ ມີຜູ້ເຜີຍແຜ່ ດ້ານກົດໝາຍກວ່າ 300 ຄົນ ແລະ ເຂົາເຈົ້າແມ່ນກຳລັງຕົ້ນຕໍເພື່ອໂຄສະນາຢູ່ບັນດາເມືອງ, ຕາແສງ.
ພ້ອມກັບການກະກຽມບຸກຄະລາກອນ, ມີທອ້ງຖິ່ນຫລາຍແຫ່ງ ໄດ້ກຽມພ້ອມພື້ນຖານດ້ານວັດຖຸເພື່ອໃຫ້ການຮັບເອົາຄຳເຫັນປະກອບຂອງປະຊາຊົນສະດວກກວ່າ, ກວ້າງຂວາງກວ່າ ແລະ ມີວິທະຍາສາດ.
ຮ່າງປະມວນກົດໝາຍແພ່ງ (ສະບັບປັບປຸງ) ແມ່ນຫນຶ່ງໃນບັນດາຮ່າງກົດໝາຍມີຄວາມໝາຍສຳຄັນພິເສດໃນໂຄງການສ້າງກົດໝາຍ, ລັດຖະບັນຍັດຂອງສະພາແຫ່ງຊາດຫວຽດນາມ ຊຸດທີ 13. ເລື່ອງບັນດາຂະແຫນງການ, ທອ້ງຖິ່ນ ຈັດຕັ້ງການຮັບເອົາຄຳເຫັນປະກອບຂອງປະຊາຊົນກ່ຽວກັບເນື້ອໃນຂອງຮ່າງກົດໝາຍຢ່າງເຂັ້ມງວດ, ຮີບເຮັ່ງ ມີຄວາມໝາຍສຳຄັນໃຫຍ່ໃນການສ້າງບັນດາຂໍ້ກຳນົດຂອງກົດໝາຍກ່ຽວກັບການພົວພັນດ້ານພົນລະເຮືອນຢ່າງສົມບູນແບບ. ສິ່ງດັ່ງກ່າວກໍໝາຍຄວາມວ່າ ເລື່ອງຫວຽດນາມ ມີປະມວນກົດໝາຍທີ່ມີຄວາມເປັນໄປສູງ, ໄປທັນກັບການພັດທະນາຂອງປະເທດຊາດ.