(vovworld)- ຕອນເຊົ້າວັນທີ 18/8, ໂດຍຮັບຄຳເຊີນຂອງທ່ານປະທານສະພາແຫ່ງຊາດຫວຽດນາມ ຫງວຽນຊີງຮຸ່ງ, ຄະນະຜູ້ແທນຂັ້ນສູງສະພາແຫ່ງຊາດ ລາຊະອານາຈັກ ກຳປູເຈຍ ໂດຍທ່ານ Heng Samrin, ປະທານສະພາແຫ່ງຊາດ ກຳປູເຈຍ ນຳຫນ້າ ເລີ່ມຕົ້ນການຢ້ຽມຢາມ ຫວຽດນາມ ຢ່າງເປັນທາງການ. ການຢ້ຽມຢາມຫວຽດນາມ ຄັ້ງນີ້ ແມ່ນເພື່ອຊຸກຍູ້ການພົວພັນຖານບ້ານໃກ້ເຮືອນຄຽງອັນດີງາມ, ການຮ່ວມມືຮອບດ້ານ ແລະ ໝັ້ນຄົງຍາວນານລະຫວ່າງສອງປະເທດ, ສອງສະພາແຫ່ງຊາດ, ສອງກຸ່ມສະມາຊິກສະພາແຫ່ງຊາດ ພ້ອມທັງແລກປ່ຽນບັນດາບັນຫາສາກົນ ຊື່ງສອງຝ່າຍຕ່າງມີຄວາມສົນໃຈ ກໍຄື ການສົມທົບກັນຢູ່ບັນດາເວທີປາໄສຫລາຍຝ່າຍໃນໄລຍະຈະມາເຖິງ.
ທ່ານ Heng Samrin, ປະທານສະພາແຫ່ງຊາດ ກຳປູເຈຍ
photo:TTXVN
|
ຫວຽດນາມ ແລະ ກຳປູເຈຍ ມີສາຍພົວພັນທີ່ເປັນມູນເຊື້ອມາແຕ່ດົນນານ. ວັນທີ 24/6/1967, ຫວຽດນາມ ແລະ ກຳປູເຈຍ ໄດ້ສ້າງຕັ້ງສາຍພົວພັນທາງການທູດຢ່າງເປັນທາງການ, ເປັນຂີດໝາຍຫນ້າປະຫວັດສາດໃຫມ່ໃນການພົວພັນລະຫວ່າງສອງປະເທດບ້ານໃກ້ເຮືອນຄຽງ. ນັບແຕ່ນັ້ນມາຮອດປະຈຸບັນ, ການພົວພັນລະຫວ່າງສອງປະເທດນັບມື້ນັບໄດ້ນັບການປັບປຸງ ແລະ ພັດທະນາໃນທຸກຂົງເຂດ.
ການພົວພັນຫວຽດນາມ -ກຳປູເຈຍ ພັດທະນາຢ່າງຮອບດ້ານ.
ໃນຂົງເຂດການເມືອງ, ບັນດາການຢ້ຽມຢາມຂອງການນຳຂັ້ນສູງສອງປະເທດແມ່ນດຳເນີນໄປເປັນປະຈຳ. ທ້າຍປີ 2013, ທ່ານນາຍົກລັດຖະມົນຕີ ກຳປູເຈຍ Samdech Hunsen ໄດ້ເລືອກເຟັ້ນຫວຽດນາມ ແມ່ນປະເທດທຳອິດມາຢ້ຽມຢາມ ພາຍຫລັງໄດ້ຮັບການເລືອກຕັ້ງເປັນນາຍົກລັດຖະມົນຕີ ກຳປູເຈຍ ອາຍຸການທີ 5 ຄືນໃຫມ່. ຕໍ່ຈາກນັ້ນ, ຕົ້ນປີ 2014, ທ່ານນາຍົກລັດຖະມົນຕີ ຫງວຽນເຕີນຢູງ ກໍໄດ້ໄປຢ້ຽມຢາມ ລາຊະອານາຈັກ ກຳປູເຈຍ ໃນການໄປຢ້ຽມຢາມຕ່າງປະເທດທຳອິດຂອງທ່ານ ໃນປີ 2014.
ຕົ້ນປີ 2014, ຫວຽດນາມ ແລະ ກຳປູເຈຍ ໄດ້ຈັດຕັ້ງການເຄື່ອນໄຫວສະເຫລີມສະຫລອງ 35 ປີແຫ່ງວັນຊະນະລະບອບດັບສູນເຊື້ອຊາດຢູ່ ກຳປູເຈຍ (7/1/1979-7/1/2014), ຊື່ງແມ່ນວັນທີ່ປະຊາຊົນສອງປະເທດ ພ້ອມກັນໂຄ່ນລົ້ມລະບອບດັບສູນເຊື້ອຊາດ Polpot, ກູ້ເອົາປະເທດຊາດ ແລະ ປະຊາຊົນກຳປູເຈຍ ໃຫ້ຫລຸດພົ້ນອອກຈາກວິນາດສະກຳດັບສູນເຊື້ອຊາດ.
ກ່ຽວກັບດ້ານເສດຖະກິດ, ການຮ່ວມມືເສດຖະກິດ, ການຄ້າ ແລະ ການລົງທຶນລະຫວ່າງສອງປະເທດ ສືບຕໍ່ພັດທະນາຢ່າງວ່ອງໄວ, ສະເພາະ ວົງເງິນການຄ້າສອງສົ້ນປີ 2013 ລະຫວ່າງສອງປະເທດບັນລຸປະມານ 3,5 ຕື້ USD. ຫວຽດນາມ ລົງທຶນເຂົ້າ ກຳປູເຈຍ ກວ່າ 100 ໂຄງການ, ສຸມໃສ່ບາງຂົງເຂດຄື: ປູກຕົ້ນໄມ້ອຸດສາຫະກຳ; ຂຸດຄົ້ນບໍ່ແຮ່; ຂຸດຄົ້ນ, ສຳຫລວດ, ຊອກຫາ ແລະ ດຳເນີນທຸລະກິດຜະລິດຕະພັນອາຍແກສ; ພັດທະນາແຫລ່ງໄຟຟ້າ; ໂທລະຄົມມະນາຄົມ; ການເງິນ, ທະນາຄານ.
ການຮ່ວມມືດ້ານປ້ອງກັນຄວາມສະຫງົບ, ປ້ອງກັນຊາດ ລະຫວ່າງສອງປະເທດ ກໍ່ໄດ້ຮັບການເພີ່ມທະວີ, ເປັນຕົ້ນ ແມ່ນສອງປະເທດໄດ້ສົມທົບກັນຢ່າງແຫນ້ນແຟ້ນ, ແລກປ່ຽນຂໍ້ມູນຂ່າວສານໃນການແກ້ໄຂບັນດາກໍລະນີທີ່ເກີດຂຶ້ນຢູ່ຊາຍແດນເປັນຢ່າງດີ ກໍຄືເພີ່ມທະວີການຮ່ວມມືບຳລຸງສ້າງ, ຮັກສາການລາດຕະເວັນຮ່ວມບົນທະເລ, ພ້ອມທັງຮ່ວມມືຢ່າງແຫນ້ນແຟ້ນໃນວຽກງານຊອກຫາ, ທອ້ນໂຮມ ແລະ ສົ່ງອັດຖິທະຫານອາສາສະໝັກຫວຽດນາມ ທີ່ເສຍສະຫລະຊີວິດໃນປາງສົງຄາມຢູ່ ກຳປູເຈຍ ກັບເມືອປະເທດ. ຫນຶ່ງໃນບັນດາຫນ້າທີ່ສຳຄັນ ນັ້ນແມ່ນວຽກງານຂີດຂັ້ນປັກຫລັກໝາຍຊາຍແດນ ຫວຽດນາມ -ກຳປູເຈຍ ສືບຕໍ່ໄດ້ຮັບການສົມທົບກັນຜັນຂະຫຍາຍຈາກສອງຝ່າຍຢ່າງຕັ້ງຫນ້າ ແລະ ພ້ອມກັນຢືນຢັນ ຄວາມຕັດສິນໃຈຍູ້ແຮງການຮ່ວມມືເພ່ືອສຳເລັດວຽກງານນີ້ໂດຍໄວ, ປະກອບສ່ວນສ້າງເສັ້ນຊາຍແດນສັນຕິພາບ, ມິດຕະພາບ, ສະຖຽນລະພາບ ແລະ ພັດທະນາ. ທ່ານປະທານ ສະພາແຫ່ງຊາດກຳປູເຈຍ Heng Samrin ຕີລາຄາວ່າ:
“ຍາມໃດ ຫວຽດນາມ -ກຳປູເຈຍ ກໍມານະພະຍາຍາມສ້າງສາຍພົວພັນອັນດີງາມ, ການຮ່ວມມືຮອບດ້ານ ແລະ ສະຫນັບສະຫນູນເຊິ່ງກັນ ແລະກັນໃນບັນດາເວທີປາໄສສາກົນ. ໃນອາຍຸການຊີ້ນຳນຳພາຂອງລັດຖະບານສອງປະເທດປະຈຸບັນ, ກຳປູເຈຍ ແລະ ຫວຽດນາມ ໄດ້ສຳເລັດການລົງນາມໃນສັນຍາສ້າງເສັ້ນຊາຍແດນທາງບົກ ແລະ ສ້າງການພົວພັນຮ່ວມມືເສດຖະກິດນັບມື້ນັບພັດທະນາ ບົນພື້ນຖານເຄົາລົບອະທິປະໄຕ ແລະ ຜືນແຜ່ນດິນອັນຄົບຖ້ວນຂອງກັນ.”
ການຮ່ວມມືລັດຖະສະພາແມ່ນຊ່ອງສຳຄັນໃນການພົວພັນລະຫວ່າງສອງປະເທດ
ໃນການພົວພັນຮ່ວມມືຮອບດ້ານ, ການແລກປ່ຽນຄະນະຜູ້ແທນຂັ້ນສູງລະຫວ່າງ 2 ພັກ ແລະ ລັດ, ສະພາແຫ່ງຊາດ, ອຳນາດການປົກຄອງທ້ອງຖິ່ນຂອງ ກຳປູເຈຍ ກັບ ຫວຽດນາມ ບັນລຸໄດ້ບາດກ້າວເປັນຫນ້າຈົດຈຳ. ສະພາແຫ່ງຊາດສອງປະເທດ ໄດ້ຈັດຕັ້ງຫລາຍກອງປະຊຸມສຸມໃສ່ບັນດາບັນຫາມີຄວາມໝາຍສຳຄັນສຳລັບສະພາແຫ່ງຊາດ ສອງປະເທດ ແລະ ລັດຖະສະພາພາກພື້ນ, ພິເສດ ການສະຫນັບສະຫນູນເຊິ່ງກັນ ແລະ ກັນເໝາະສົມກັບທັດສະນະ, ຫລັກໝັ້ນຂອງລັດຖະບານແຕ່ລະປະເທດ. ຍາມໃດສະພາແຫ່ງຊາດສອງປະເທດ ກໍກຳແຫນ້ນຫລັກການປັບປຸງນຳ້ໃຈມິດຕະພາບ, ການຮ່ວມມື ຜ່ານການເຂົ້າຮ່ວມກົນໄກເຈລະຈາເປັນປະຈຳ, ຕັ້ງຫນ້າ, ດ້ວຍຈິດໃຈຮັບຜິດຊອບສູງ ເພື່ອປັບປຸງ ແລະ ເປີດກວ້າງການພົວພັນຮ່ວມມືລະຫວ່າງບັນດາລັດຖະສະພາໃນພາກພື້ນ ອາຊີຕາເວັນອອກສ່ຽງໃຕ້, ຕອບສະຫນອງຄວາມມຸ້ງມາດປາດຖະຫນາ ແລະ ຜົນປະໂຫຍດສູງສຸດຂອງປະຊາຊົນສອງປະເທດ. ທ່ານປະທານ ສະພາແຫ່ງຊາດກຳປູເຈຍ Heng Samrin ໃຫ້ຮູ້ວ່າ :
“ສະພາແຫ່ງຊາດສອງປະເທດ ໄດ້ແລກປ່ຽນຄະນະຜູ້ແທນຂັ້ນສູງ, ການນຳບັນດາກຳມາທິການສະເພາະກິດ ແລະ ກຸ່ມສະມາຊິກສະພາແຫ່ງຊາດ ໄດ້ເປີດບັນດາກາລະໂອກາດໃຫ້ແກ່ສະພາແຫ່ງຊາດສອງຝ່າຍ ແລກປ່ຽນບົດຮຽນ, ຂໍ້ມູນຂ່າວສານເພື່ອຜົນປະໂຫຍດສູງສຸດໃຫ້ແກ່ປະເທດຊາດ ແລະ ປະຊາຊົນສອງປະເທດ ກຳປູເຈຍ - ຫວຽດນາມ. ໃນອາຍຸການຜ່ານມາ, ສະພາແຫ່ງຊາດສອງປະເທດ ໄດ້ເຫັນດີລົງນາມໃນຂໍ້ຕົກລົງການຮ່ວມມືລະຫວ່າງ ສະພາແຫ່ງຊາດລາຊະອານາຈັກ ກຳປູເຈຍ ແລະ ຫວຽດນາມ, ຂໍ້ຕົກລົງການຮ່ວມມືລະຫວ່າງ ຫ້ອງວ່າການສະພາແຫ່ງຊາດສອງປະເທດ. ນັ້ນແມ່ນບັນດາເອກະສານສຳຄັນເພື່ອໃຫ້ສອງຝ່າຍພ້ອມກັນມານະພະຍາຍາມ, ປັບປຸງ ແລະ ເປີດກວ້າງການພົວພັນມິດຕະພາບ, ຄວາມສາມັກຄີ, ການຮ່ວມມື ແລະ ພັດທະນາແບບຍືນຍົງ.”
ຜ່ານການຜັນແປຂອງປະຫວັດສາດ, ການພົວພັນມິດຕະພາບລະຫວ່າງ ຫວຽດນາມ ແລະ ກຳປູເຈຍ ພວມນັບມື້ນັບໄດ້ຮັບການປັບປຸງ. ການຢ້ຽມຢາມຫວຽດນາມ ຢ່າງເປັນທາງການຄັ້ງນີ້ຂອງທ່ານປະທານ ສະພາແຫ່ງຊາດກຳປູເຈຍ Heng Samrin ສືບຕໍ່ຢືນຢັນເຖິງການຖືການພົວພັນແບບພິເສດລະຫວ່າງ ຫວຽດນາມ ແລະ ກຳປູເຈຍ ເປັນສຳຄັນ, ຊຸກຍູ້ສາຍພົວພັນສາມັກຄີ, ມິດຕະພາບ ລະຫວ່າງສອງປະເທດສືບຕໍ່ພັດທະນາຢ່າງເລິກເຊິ່ງ, ກວ້າງຂວາງ ແລະ ໝັ້ນຄົງໃນໄລຍະຈະມາເຖິງ.