ວັນທີ 17/9, ທ່ານນາງປະນາທານິບໍດີ ບຣາຊິນ Dilama Rousseff ໄດ້ລົບລ້າງການຢ້ຽມຢາມທາງລັດຖະກິດອາເມລິກາ ຊຶ່ງຄາດວ່າຈະດຳເນີນໃນເດືອນ 10 ທີ່ຈະມາເຖິງ. ການຕັດສິນດັ່ງກ່າວໄດ້ພາໃຫ້ການພົວພັນທາງການທູດລະຫວ່າງອາເມລິກາ-ບຣາຊິນຢືນຢູ່ຕໍ່ໜ້າສິ່ງທ້າທາຍຢ່າງໃຫຍ່ຫຼວງ, ພ້ອມກັນນັ້ນ ກໍແມ່ນການໂມງບາດຄ້ອນບັດຕາຍໃສ່ຄວາມມານະພະຍາຍາມຂອງປະທານາທິບໍດີອາເມລິກາ Barak Obama ໃນການປົວແປງການພົວພັນກັບ ບຣາຊິນ .
ກຸ່ມບໍລິສັດນ້ຳມັນອາຍແກັສແຫ່ງຊາດ Petrobras ຂອງບຣາຊິນ ຖືກຖືວ່າແມ່ນໜຶ່ງໃນບັນດາເປົ້າໝາຍສອດແນມຂອງNSA
|
ວຽກງານທຸກຢ່າງແມ່ນເລີ່ມມາຈາກເລື່ອງ ອົງການປ້ອງກັນຄວາມສະຫງົບອາເມລິກາ (NSA) ຖືກກ່າວຫາໃນ 2-3 ປີຜ່ານມາວ່າ ໄດ້ດຳເນີນການຕິດຕາມຈົດໝາຍເອເລັກໂຕນິກຂອງ ປະນາທານິບໍດີ ບຣາຊິນ Dilama Rousseff ກັບຂັ້ນລຸ່ມ ກໍຄືຕິດຕາມກວດກາການເຄື່ອນໄຫວຂອງກຸ່ມບໍລິສັດນ້ຳມັນອາຍແກັສແຫ່ງຊາດ Petrobras , ຊຶ່ງແມ່ນ ກຸ່ມບໍລິສັດໃຫຍ່ອັນດັບ 4 ໃນໂລກຂອງ ບຣາຊິນ.
ຕາມຊອງໂທລະພາບ Globo ຂອງ ບຣາຊິນແລ້ວ, NSA ໄດ້ຕິດຕາມບັນດາ ຈົດໝາຍເອເລັກໂຕນິກ, ການໂອ້ລົມທາງໂທລະສັບ, ການສົ່ງຂໍ້ຄວາມຜ່ານລະບົບໂທລະຄົມຊຶ່ງປະນາທານິບໍດີ ບຣາຊິນ Dilama Rousseff ໄດ້ແລກປ່ຽນກັບບັນດາເຈົ້າໜ້າທີ່ຂັ້ນລຸ່ມຂອງຕົນ. ບໍ່ພຽງແຕ່ເຊັ່ນນັ້ນ, NSA ຍັງເກັບກຳບັນດາຂໍ້ມູນຂ່າວສານໃນຂົງເຂດເສດຖະກິດ-ການຄ້າ. ເປົ້າໝາຍຮັບເຄາະຮ້າຍຄັ້ງນີ້ ແມ່ນ ກຸ່ມບໍລິສັດນ້ຳມັນອາຍແກັສແຫ່ງຊາດ Petrobras ຂອງບຣາຊິນ, ຊຶ່ງແມ່ນ ກຸ່ມບໍລິສັດໃຫຍ່ກ່ວາໝູ່ໃນ ບຣາຊິນ ດ້ວຍຈຳນວນພາລະກອນ 85.000 ຄົນ ແລະ ລາຍຮັບໃນແຕ່ລະປີຂຶ້ນເຖິງປະມານ 120 ຕື້ USD . ຕາມບັນດານັກໄຈ້ແຍກແລ້ວ, ເລື່ອງອາເມລິກາຕິດຕາມກຸ່ມບໍລິສັດນ້ຳມັນອາຍແກັສແຫ່ງຊາດ Petrobras ແມ່ນເພື່ອແນໃສ່ຈຸດປະສົງກຳແໜ້ນກ່ຽວກັບບໍລິມາດນ້ຳມັນຢູ່ມະຫາສະມຸດອາດລັງຕິກໃຕ້.
ຕໍ່ໜ້າເຫດການທີ່ຮ້າຍແຮງດັ່ງກ່າວ, ປະນາທານິບໍດີ ບຣາຊິນ Dilama Rousseff ໄດ້ຮຽກໂຮມກອງປະຊຸມດ່ວນຢູ່ທຳນຽບ Planalto ຊຶ່ງມີການເຂົ້າຮ່ວມຂອງບັນດາສະມາຊິກຂອງກະຊວງປ້ອງກັນຊາດ, ກະຊວງຍຸຕິທຳ, ກະຊວງສື່ສານ ແລະ ການຕ່າງປະເທດ. ເອກອັກຄະລັດຖະທູດອາເມລິກາ ກໍຖືກຮຽກຕົວມາເພື່ອເຮັດໃຫ້ບັນຫາເປັນທີ່ຈະແຈ້ງ. ລັດຖະບານ ບຣາຊິນ ໄດ້ອອກແຈ້ງການຢືນຢັນວ່າ ບັນດາການເຄື່ອນໄຫວຕິດຕາມຢ່າງຜິດກົດໝາຍດ້ວຍການຂັດຂວາງການຕິດຕໍ່ສື່ສານ ແລະ ການສົ່ງຂໍ້ມູນຂອງພົນລະເມືອງ, ບໍລິສັດ ແລະ ບັນດາສະມາຊິກລັດຖະບານ ບຣາຊິນ ແມ່ນການກະທຳລະເມີດອະທິປະໄຕແຫ່ງຊາດ ແລະ ບໍ່ສອດຄ່ອງກັບການຮ່ວມມືໂດຍປະຊາທິປະໄຕລະຫວ່າງບັນດາປະເທດທີ່ສະໜິດ ສະໜົມຕໍ່ກັນ. ລັດຖະມົນຕີການຕ່າງປະເທດ ບຣາຊິນ Luiz Alberto Figueiredo Machado ຖືວ່າ ນີ້ແມ່ນການກະທຳລະເມີດກົດໝາຍທີ່ບໍ່ອາດຮັບຮູ້ໄດ້. ໃນຂະນະນັ້ນ, ເຈົ້າໜ້າທີ່ຫຼາຍທ່ານຊອງ ບຣາຊິນ ໃຫ້ຮູ້ວ່າ ຈະສ້າງຄະນະກຳມະການພິເສດເພື່ອສືບສວນກໍລະນີດັ່ງກ່າວ.
ບໍ່ພຽງແຕ່ສົ່ງສານຕ່າງໆເພື່ອຄັດຄ້ານການກະທຳຂອງ NSA ເທົ່ານັ້ນ, ບຣາຊິນ ຍັງເລີ່ມຜັນຂະຫຍາຍບັນດາການເຄື່ອນໄຫວແນໃສ່ຫຼຸດຜ່ອນການສ່ົງຜົນສະທ້ອນຂອງອາເມລິກາລົງໃນລະດັບຕ່ຳສຸດ. ປະນາທານິບໍດີບຣາຊິນ Dilama Rousseff ໄດ້ອອກຄຳສັ່ງ ໃຫ້ນຳໃຊ້ບັນດາມາດຕະການແນໃສ່ຮັບປະກັນຄວາມເປັນເອກະລາດຂອງ ບຣາຊິນ ໃນບັນດາລະບົບເຄື່ອຂ່າຍອິນເຕິເນັດ. ລັດຖະບານ ບຣາຊິນ ຈະສົ່ງດາວທຽມໂທລະຄົມຂຶ້ນວົງໂຄຈອນໃນປີ 2016 ແລະ ຕິດຕັ້ງລະບົບສາຍໄຍແກ້ວຕ່າງຫາກໃຕ້ພື້ນທະເລ ກັບທະວີບເອີລົບ ແລະ ບັນດາປະເທດອາເມລິກາໃຕ້ໂດຍກົງ ເພື່ອຫຼີກລ່ຽງການສືບສອດແນມຂອງອາເມລິກາ. ທ່ານນາງປະນາທານິບໍດີ ບຣາຊິນ Dilama Rousseff ກໍພວມກະຕຸກຊຸກຍູ້ສະພາແຫ່ງຊາດຈົ່ງຮັບຮອງເອົາຮ່າງກົດໝາຍສະບັບໜຶ່ງທີ່ບັງຄັບໃຫ້ Facebook, Google ແລະ ບັນດາບໍລິສັດບໍລິການອິນເຕິເນັດອື່ນໆ ຕ້ອງສ້າງສຳເນົາບັນດາຂໍ້ມູນໂດຍຊາວ ບຣາຊິນ ໄດ້ສ້າງໃຫ້ມີໃນບັນດາເຄື່ອງຄອມພິວເຕີແມ່ ຊຶ່ງຕັ້ງຢູ່ໃນອານາເຂດຂອງ ບຣາຊິນ. ດ້ວຍແຜນການນີ້, ບຣາຊິນ ສາມາດ ສ້າງປະຖົມປັດໄຈເພື່ອໃຫ້ປະເທດອື່ນໆເຮັດຕາມ , ຊຶ່ງເປັນການລົບລ້າງສິດຜູກຂາດທີ່ມີຢູ່ຂອງອາເມລິກາໃນລະບົບອິນເຕິເນັດ.
ເປັນທີ່ຈະແຈ້ງແລ້ວວ່າ ກໍລະນີລັກຟັງຂອງ NSA ໄດ້ເຮັດໃຫ້ການພົວພັນລະຫວ່າງ ອາເມລິກາ-ບຣາຊິນ ປະສົບກັບຄວາມຫຍຸ້ງຍາກ, ໂດຍສະເພາະແມ່ນໃນຂະນະທີ່ການຢ້ຽມຢາມອາເມລິກາຂອງປະນາທານິບໍດີ ບຣາຊິນ Dilama Rousseff ຖືກຕີລາຄາວ່າ ແມ່ນການຢ້ຽມຢາມທີ່ສຳຄັນ ເພື່ອປຶກສາຫາລືກ່ຽວກັບສັຍຍາຊື້ເຮືອບິນສູ້ຮົບ, ແຜນການຮ່ວມມືດ້ານນ້ຳມັນ ແລະ ເຕັກໂນໂລຢີເຊື້ອໄຟຊີວະສາດ ກໍຄືບັນດາສັນຍາການຄ້າອື່ນໆ. ນັ້ນແມ່ນຍັງບໍ່ທັນກ່າວເຖິງເລື່ອງອາເມລິກາ ແມ່ນໜຶ່ງໃນບັນດາຄູ່ຮ່ວມມືການຄ້າລາຍໃຫຍ່ຂອງ ບຣາຊິນ ດ້ວຍການແລກປ່ຽນການຄ້າ 2 ສົ້ນໃນປີ 2012 ບັນລຸກ່ວາ 59 ຕື້ USD. ອາເມລິກາ ຍາມໃດກໍຖື ບຣາຊິນ ແມ່ນປະເທດໜຶ່ງທີ່ມີຜົນສະທ້ອນໃນພາກພື້ນຍ້ອນກຳລັງແຮງດ້ານເສດຖະກິດ, ບົດບາດນຳພາຢູ່ອາເມລິກາໃຕ້ ແລະ ສຽງເວົ້າມີອິດທິພົນໃນບັນດາເວທີ່ປາໄສຫຼາຍຝ່າຍ.
ການພົວພັນ ອາເມລິກາ-ບຣາຊິນ ກໍເຄີຍມີໄລຍະສະໜິດຕິດພັນນັບຕັ້ງແຕ່ທ່ານນາງ Dilama Rousseff ຂຶ້ນກຳອຳນາດເມື່ອປີ 2011 ແຕ່ປະຈຸບັນ, ການພົວພັນນີ້ ພວມຢືນຢູ່ຕໍ່ໜ້າສິ່ງທ້າທາຍໃຫຍ່ຫຼາຍຢ່າງ. ເຖິງວ່າອຳນາດການປົກຄອງຂອງ ປະທານາທິບໍດີອາເມລິກາ Barak Obama ໝັ້ນໝາຍ ຈະສືບສວນຢ່າງຈະແຈ້ງກ່ຽວກັບຂໍ້ກ່່າວຫາທີ່ກ່ຽວຂ້ອງເຖິງສືບສອດແນມທາງເຄືອຂ່າຍອິນເຕິເນັດທີ່ມີຕໍ່ ປະນາທານິບໍດີ ບຣາຊິນ ແລະ ພ້ອມທັງໃຫ້ການຮ່ວມມືໃນບັນຫາຄວາມປອດໄພທາງ ເຄືອຂ່າຍອິນເຕິເນັດ ກໍຕາມ, ແຕ່ເບິ່ງຄືວ່າ ການພົວພັນ ອາເມລິກາ-ບຣາຊິນ ແມ່ນຍາກທີ່ຈະກັບຄືນສູ່ສະພາບເດີມໄດ້.