(vovworld) - ດ້ວຍຈຳນວນເງິນ 29.000 ຕື້ດົ່ງ, 9 ເນື້ອໃນ ແລະ 22 ມາດຕະການຜັນຂະຫຍາຍການປະຕິບັດ, ມະຕິເລກທີ 13 ຂອງລັດຖະບານກ່ຽວກັບບາງມາດຕະການແກ້ໄຂຄວາມຫຍຸ້ງຍາກໃຫ້ແກ່ການຜະລິດດຳເນີນທຸລະກິດ, ຫນູນຊ່ວຍຕະຫລາດພວມໄດ້ຮັບການຜັນຂະຫຍາຍຢູ່ບັນດາຂະແຫນງການ, ຂັ້ນຕ່າງໆ ເພື່ອຫນູນຊ່ວຍໃຫ້ແກ່ວິສາຫະກິດໃນທ່ົວປະເທດ. ອັດຕາດອກເບ້ຍຄ່ອຍໆຫລຸດລົງ, ນະໂຍບາຍຫລຸດຜ່ອນ ແລະ ຕໍ່ກຳນົດເວລາເສຍອາກອນຂອງລັດ ໄດ້ປະກອບສ່ວນແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດ ນັ້ນແມ່ນບັນດາໝາກຜົນອັນຕັ້ງຫນ້າໄດ້ຮັບການຮັບຮູ້ຈາກບັນດາວິສາຫະກິດ ແລະ ຜູ້ຊ່ຽວຊານເສດຖະກິດຈາກການນຳໃຊ້ມະຕິເລກທີ 13 ຂອງລັດຖະບານ.
ມະຕິເລກທີ 13 ຂອງລັດຖະບານ ຈະແກ້ໄຂຄວາມຫຍຸ້ງຍາກໃຫ້ແກ່
ວິສາຫະກິດ
ພາບປະກອບ: internet
|
ໂດຍປະຕິບັດມະຕິຂອງລັດຖະບານ, ຂະແຫນງທະນາຄານໄດ້ປະກາດໃຊ້ຫລາຍກົນໄກ, ນະໂຍບາຍ ເພື່ອຫນູນຊ່ວຍວິສາຫະກິດ ແລະ ຕະຫລາດ. ໃນໄຕມາດ 2/2012, ທະນາຄານແຫ່ງລັດ ໄດ້ຕັດສິນດັດປັບອັດຕາດອກເບ້ຍເງິນຝາກຢ່າງຕໍ່ເນື່ອງໃຫ້ລົງເຫລືອພຽງ 9%/ປີ, ອັດຕາດອກເບ້ຍໃຫ້ກູ້ຢືມໄດ້ຮັບການດັດປັບຫລຸດລົງແຕ່ 15 - 16%/ປີ, ອາກອນລາຍຮັບວິສາຫະກິດສຳລັບວິສາຫະກິດຂະຫນາດກາງ ແລະ ນ້ອຍ ຍັງມີພຽງ 30%, ຄ່າເຊົ່າທີ່ດິນຂອງປີ 2012 ຫລຸດລົງ 50%. ຕາມທ່ານ Vu Nhu Thang ຫົວຫນ້າສະຖານບັນຍຸດທະສາດ ແລະ ນະໂຍບາຍການເງິນແລ້ວ, ບັນດາບ້ວງເງິນຫນູນຊ່ວຍແມ່ນສຸມໃສ່ເຂົ້າບັນຫາອາກອນຄື: ຍົກເວັ້ນ ແລະ ຫລຸດຜ່ອນອາກອນລາຍຮັບວິສາຫະກິດ, ຕໍ່ກຳນົດເວລາເສຍອາກອນມູນຄ່າເພີ່ມ, ຫລຸດຜ່ອນ 50% ຄ່າເຊົ່າທີ່ດິນໃຫ້ແກ່ວິສາຫະກິດ … ອັນໄດ້ສະແດງໃຫ້ເຫັນການປະສານສົມທົບຢ່າງຄົບຊຸດລະຫວ່າງບັນດານະໂຍບາຍເສດຖະກິດມະຫາພາກຂອງລັດ ແລະ ລັດຖະບານ, ພິເສດ ແມ່ນນະໂຍບາຍງົບປະມານ ແລະ ນະໂຍບາຍເງິນຕາ. ທ່ານ Vu Nhu Thang ຖືວ່າ: ຖ້າຫາກສືບຕໍ່ຮັກສາໄພເງິນເຟີ້ໃຫ້ຢູ່ໃນລະດັບຕຳ່ ແລະ ເປັນປົກກະຕິ, ໃນຊຸມເດືອນຈະມາເຖິງ, ອັດຕາດອກເບ້ຍອາດຈະສືບຕໍ່ຫລຸດລົງ, ສ້າງເງື່ອນໄຂສະດວກໃຫ້ແກ່ບັນດາວິສາຫະກິດໄດ້ກູ້ຢືມທຶນດ້ວຍອັດຕາດອກເບ້ຍຕຳ່, ຊ່ວຍຫລຸດຜ່ອນຄ່າໃຊ້ຈ່າຍໃນການຜະລິດ, ຍົກສູງປະສິດທິຜົນການຜະລິດດຳເນີນທຸລະກິດ ແລະ ຍົກສູງກຳລັງແກ້ງແຍ້ງຂອງບັນດາວິສາຫະກິດ. ບັນດາໝາກຜົນນີ້ ຖ້າປຽບທຽບກັບຈຸດເວລາກ່ອນນີ້ແມ່ນຍັງຕຳ່ຢູ່ ແຕ່ເມ່ືອທຽບກັບຄວາມຕ້ອງການໃນປະຈຸບັນຂອງບັນດາວິສາຫະກິດ ຍັງຄົງແມ່ນລະດັບສູງ ເພາະວ່າ ມີບາງວິສາຫະກິດຖືກລົ້ມລະລາຍຍ້ອນຂາດທຶນຮອນ, ຕິດຫນິ້ທະນາຄານ. ທີ່ການພົບປະສົນທະນາພາຍໃຕ້ຫົວຂໍ້ວ່າ: “ມະຕິເລກທີ 13 ແລະ ແຜນຮ່າງສ້າງໂຄງປະກອບພື້ນຖານເສດຖະກິດຄືນໃຫມ່ຂອງລັດຖະບານ - ບັນດາການກະທົບຫລາຍດ້ານ ແລະ ການກຳນົດທິດໃຫ້ແກ່ບັນດາວິສາຫະກິດໃນທ້າຍປີ 2012 ແລະ ຊຸມປີຕໍ່ໄປ” ຊຶ່ງດຳເນີນໃນວັນທີ 13/7, ທ່ານ Nguyen Trong Kien ຮອງຜູ້ອຳນວຍການໃຫຍ່ບໍລິສັດຫຸ້ນສ່ວນ Thach Ban ຖືວ່າ: ການສຸມໃສ່ບັນຫາຫລຸດຜ່ອນອາກອນລາຍຮັບວິສາຫະກິດ ຫລື ຕໍ່ກຳນົດເວລາເສຍອາກອນມູນຄ່າເພີ່ມ (VAT) ມີການກະທົບໂດຍກົງເຖິງແຕ່ລະວິສາຫະກິດບໍ່ທັນຫລາຍ, ແຕ່ເບິ່ງລວມແລ້ວ ສາມາດເຫັນໄດ້ຜົນສະທ້ອນເຖິງວິສາຫະກິດຫລາຍແຫ່ງກໍຄືພື້ນຖານເສດຖະກິດເວົ້າລວມ. ທ່ານ Nguyen Trong Kien ຊີ້ແຈງວ່າ:
“ພວກຂ້າພະເຈົ້າເອົາໃຈໃສ່ຫລາຍເຖິງບັນດາການຫນູນຊ່ວຍອື່ນທີ່ກ່ຽວຂ້ອງເຖິງນະໂຍບາຍ. ນັ້ນແມ່ນອາກອນລາຍຮັບວິສາຫະກິດ ຄວາມຈິງແລ້ວ ປະຈຸບັນ ບັນດາ ວິສາຫະກິດດຳເນີນທຸລະກິດບໍ່ມີກຳໄລ ສະນັ້ນ ນະໂຍບາຍນີ້ບໍ່ມີຄຸນຄ່າຫລາຍສຳລັບວິສາຫະກິດຜະລິດວັດສະດຸກໍ່ສ້າງຄືພວກຂ້າພະເຈົ້າ. ພວກຂ້າພະເຈົ້າພວມສົນໃຈຕໍ່ອັດຕາດອກເບ້ຍ ແລະ ໄລຍະຈະມາເຖິງ VAT ສາມາດຫລຸດລົງ 5% ຫລື ຜະລິດຕະພັນຈຳນວນຫນຶ່ງຈະລົງລະດັບ 0% ນັ້ນຈຶ່ງແມ່ນນະໂຍບາຍທີ່ແທດຈິງ.”
ໃນບ້ວງເງິນຫນູນຊ່ວຍໃຫ້ວິສາຫະກິດຂອງລັດຖະບານ, ເປັນຫນ້າສົນໃຈນັ້ນແມ່ນ ການຕໍ່ກຳນົດເວລາເສຍອາກອນມູນຄ່າເພີ່ມ ຊຶ່ງຖືກຖືວ່າ ວິສາຫະກິດກູ້ຢືມທຶນດ້ວຍອັດຕາດອກເບ້ຍ 0% ໃນເວລາ 6 ເດືອນ ເພື່ອມີທຶນສືບຕໍ່ການຜະລິດດຳເນີນທຸລະກິດ. ອາດຈະເວົ້າໄດ້ວ່າ ມາດຕະການຕໍ່ກຳນົດເວລາເສຍອາກອນມູນຄ່າເພີ່ມ ແລະ ການຕໍ່ກຳນົດເວລາເສຍອາກອນມູນຄ່າເພີ່ມອີກ 6 ເດືອນສຳລັບອາກອນຕ້ອງເສຍໃນເດືອນ 4,5,6 ປີ 2012 ສຳລັບສອງຮູບການວິສາຫະກິດ ພວມປະຕິບັດການເສຍ VAT ຕາມວິທີການຫັກອາກອນ ແມ່ນມາດຕະການຫນູນຊ່ວຍຢ່າງແທດຈິງທີ່ສຸດສຳລັບວິສາຫະກິດໃນໄລຍະປະຈຸບັນ. ທ່ານ Do Duc Oanh ເລຂາທິການໃຫຍ່ສະຫະສະມາຄົມ ຊີມັງ ຫວຽດນາມ ຖືວ່າ: ການປະຕິບັດມາດຕະການຂອງລັດຖະບານ ໄດ້ຊ່ວຍໃຫ້ບັນດາວິສາຫະກິດຊີມັງ ໄດ້ຮັບຜົນປະໂຫຍດ ເມື່ອໄດ້ກູ້ຢືມທຶນເພື່ອຜະລິດດຳເນີນທຸລະກິດດ້ວຍອັດຕາດອກເບ້ຍ 15% ແລະ ສ້າງໂຄງປະກອບຫນິ້ສິນຄືນໃຫມ່, ຕໍ່ກຳນົດເວລາຊຳລະຫນິ້ສິນແກ່ການລົງທຶນ, ເຮັດຄືແນວນັ້ນແມ່ນໄດ້ຊ່ວຍໃຫ້ວິສາຫະກິດຫລຸດຜ່ອນຄວາມຫຍຸ້ງຍາກກ່ຽວກັບດ້ານທຶນຮອນກໍຄືການຈຳຫນ່າຍຜະລິດຕະພັນ. ຕາມທ່ານ Nguyen Duc Kien ຮອງຫົວຫນ້າກຳມາທິການເສດຖະກິດຂອງສະພາແຫ່ງຊາດ ແລ້ວ, ປະຈຸບັນ ອັດຕາດອກເບ້ຍທະນາຄານ ພວມຢູ່ໃນທ່າຫລຸດລົງ, ບັນຫາທີ່ຍັງຄົງຄ້າງນັ້ນແມ່ນ ວິສາຫະກິດແຕ່ລະແຫ່ງຄວນສ້າງ ຍຸດທະສາດນຳໃຊ້ທຶນຮອນໃຫ້ຕົນເອງ.
“ວິສາຫະກິດແຕ່ລະແຫ່ງ ຄວນສ້າງຍຸດທະສາດນຳໃຊ້ທຶນຮອນ. ອົງການຄຸ້ມຄອງບໍ່ສາມາດເຮັດແທນໄດ້. ກົນໄກນະໂຍບາຍໄດ້ສ້າງຄວາມສະດວກຫລາຍແລ້ວ. ບັນຫາຄວນເອົາໃຈໃສ່ທີ່ສຸດໃນປະຈຸບັນ ນັ້ນແມ່ນ ວິສາຫະກິດຕ້ອງກຳນົດທິດການຕະຫລາດຂອງຕົນ ຕ້ອງສຳຫລວດຕະຫລາດຜະລິດຕະພັນ, ໂຄງປະກອບກົງຈັກຕ້ອງກະທັດລັດໃຫ້ເໝາະສົມກັບສະພາບການຜະລິດແບບຮັດແຄບ, ປະຢັດລາຍຈ່າຍ.”
ພາບປະກອບ:dvt.vn
|
ບົດລາຍງານຫວ່າງແລ້ວນີ້ຂອງບໍລິສັດລາຍງານ ແລະ ຕີລາຄາ ຫວຽດນາມ (Vietnam Report) ທີ່ສຳຫລວດພາກວິສາຫະກິດໄດ້ໃຫ້ຂໍ້ສັງເກດວ່າ 12 ໝວດມາດຕະການສ້າງໂຄງປະກອບພື້ນຖານເສດຖະກິດຄືນໃຫມ່ ເຊິ່ງລະບຸໄວ້ໃນແຜນຮ່າງສ້າງໂຄງປະກອບພື້ນຖານເສດຖະກິດ ຫວຽດນາມ ຄືນໃຫມ່ ໄດ້ຍື່ນສະເຫນີຕໍ່ສະພາແຫ່ງຊາດ ແລະ ພິເສດ ແມ່ນມະຕິເລກທີ 13 ຂອງລັດຖະບານ ກ່ຽວກັບ ບາງມາດຕະການແກ້ໄຂຄວາມຫຍຸ້ງຍາກໃຫ້ແກ່ການຜະລິດດຳເນີນທຸລະກິດ, ຫນູນຊ່ວຍຕະຫລາດແມ່ນມີຄວາມທີ່ຈຳເປັນທີ່ສຸດ ແລະ ຕອບສະຫນອງຄວາມຕ້ອງການສ້າງໂຄງປະກອບພື້ນຖານເສດຖະກິດປະຈຸບັນໂດຍພື້ນຖານ. ບັນດາການກະທົບໃນເບື້ອງຕົ້ນ ເຖິງວ່າຍັງຈຳກັດຢູ່ ແຕ່ສະແດງໃຫ້ເຫັນລັກສະນະໄຫວພິບ, ທັນການ, ມີຄວາມຮັບຜິດຊອບ, ມີການແບ່ງປັນ, ການປະສານສົມທົບໃນການຄຸ້ມຄອງລັດ ວິສາຫະກິດ, ຊ່ວຍໃຫ້ການຜະລິດດຳເນີນທຸລະກິດ ແລະ ຕະຫລາດຫລຸດຜ່ອນຄວາມຫຍຸ້ງຍາກດ້ານການເງິນ, ອັດຕາດອກເບ້ຍ, ລະບອບການເງິນເພື່ອສ້າງກຳລັງແຮງ ແລະ ກຳລັງຫນູນຕື່ມອີກແນໃສ່ຜ່ານຜ່າໄລຍະຫຍຸ້ງຍາກ ແລະ ພັດທະນາເປັນປົກກະຕິ ແລະ ໝັ້ນຄົງ./.