ໃນວັນທີ 22 ມີນາ, ທ່ານເລຂາທິການໃຫຍ່ ພັກກອມມູນິດຫວຽດນາມ ຫງວຽນຟູຈ໋ອງ ໄດ້ເຊັນປະກາດໃຊ້ຄຳສັ່ງ “ກ່ຽວກັບການຮ່ຳຮຽນ, ຊາບຊຶມ, ໂຄສະນາ, ຜັນຂະຫຍາຍປະຕິບັດ ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 12 ຂອງພັກ”. ນີ້ແມ່ນບັ້ນດຳເນີນຊີວິດການເມືອງທີ່ກ້ວາງເລິກ, ມີຄວາມໝາຍ, ຄວາມສຳຄັນພິເສດ, ແນໃສ່ສ້າງການຫັນປ່ຽນກ່ຽວກັບຄວາມຮັບຮູ້, ເປັນເອກະພາບທາງດ້ານເຈດຈຳນົງ ແລະ ການກະທຳໃນພັກ ແລະ ການເຫັນດີເຫັນພ້ອມໃນໝູ່ປະຊາຊົນ, ສ້າງກຳລັງແຮງດ້ານວັດຖຸຂອງທັງຊາດ ໃນພາລະກິດສ້າງສາ ແລະ ປົກປັກຮັກສາປະເທດຊາດ.
ບັນດາຜູ້ແທນໄດ້ລົງຄະແນນສຽງຮັບຮອງເອົາມະຕິກອງປະຊຸມໃຫຍ່ ຄັ້ງທີ 12 ຂອງພັກ (baolaodong) |
ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 12 ຂອງພັກ ດຳເນີນໄປໃນລະຫວ່າງວັນທີ 20-28 ມັງກອນ ປີ 2016, ຢູ່ ຮ່າໂນ້ຍ. ບັນດາເອກະສານ ແລະ ມະຕິກອງປະຊຸມໃຫຍ່ຄັ້ງທີ 12 ທີ່ໄດ້ຮັບຮອງເອົາ ສືບຕໍ່ຢັ້ງຢືນ, ສ້າງທັດສະນະ, ແນວທາງປ່ຽນແປງໃໝ່ ຂອງພັກກອມມູນິດຫວຽດນາມໃຫ້ສົມບູນແບບ.
ເຫັນດີເປັນເອກະພາບ ກ່ຽວກັບຄວາມຮັບຮູ້
ກົມການເມືອງ ໄດ້ກຳນົດການຮ່ຳຮຽນ, ຊາບຊຶມ, ໂຄສະນາ, ຜັນຂະຫຍາຍປະຕິບັດ ມະຕິກອງປະຊຸມໃຫຍ່ຄັ້ງທີ 12 ຂອງພັກ ແມ່ນໜ້າທີ່ຈຸດສຸມ ໃນປີ 2016, ຈຳເປັນຕ້ອງໄດ້ ຮັບການຈັດຕັ້ງແບບແທດຈິງ, ມີປະສິດທິຜົນ; ຮັບປະກັນເພື່ອໃຫ້ພະນັກງານ, ສະມາຊິກພັກແຕ່ລະຄົນ, ເປັນຕົ້ນແມ່ນພະນັກງານຫຼັກແຫຼ່ງຂັ້ນຕ່າງໆ ກຳແໜ້ນ ແລະ ປະຕິບັດ ມະຕິຊຶ່ງກອງປະຊຸມໃຫຍ່ຄັ້ງທີ 12 ຂອງພັກ, ຢ່າງຖືກຕ້ອງ ແລະ ມີຫົວຄິດປະດິດສ້າງ ສອດຄ່ອງກັບ ສະພາບການ ແລະ ເງື່ອນໄຂຕົວຈິງ ຂອງທ້ອງຖິ່ນ, ອົງການ, ຫົວໜ່ວຍ.
ການຈັດຕັ້ງການຮ່ຳຮຽນ, ຊາບຊຶມ, ໂຄສະນາ, ຜັນຂະຫຍາຍປະຕິບັດ ມະຕິກອງປະຊຸມໃຫຍ່ ໄດ້ດຳເນີນຢ່າງເຂັ້ມງວດ, ກ້ວາງເລິກ, ແທ້ຈິງ, ປະກອບສ່ວນສຳຄັນເຂົ້າໃນການຍົກສູງລະດັບຄວາມຮັບຮູ້ທາງດ້ານການເມືອງ, ແນວຄິດໃຫ້ພະນັກງານ, ສະມາຊິກພັກ ແລະ ປະຊາຊົນທຸກຊັ້ນວັນນະ; ຕໍ່ສູ້ຕ້ານບັນດາຖ້ອຍທຳນອງທີ່ເປັນປໍລະປັກ, ຜິດພາດຢ່າງມີປະສິດທິຜົນ, ປົກປ້ອງທັດສະນະ, ແຜນນະໂຍບາຍ, ແນວທາງປ່ຽນແປງໃໝ່ຢ່າງຖືກຕ້ອງ, ມີວິທະຍາສາດ ແລະ ປະຕິວັດຂອງພັກ.
ເພື່ອຮ່ຳຮຽນ, ຊາບຊຶມ, ຜັນຂະຫຍາຍປະຕິບັດມະຕິກອງປະຊຸມໃຫຍ່ຄັ້ງທີ 12 ຂອງພັກຢ່າງມີປະສິດທິຜົນ, ມີຄຸນນະພາບສູງນັ້ນ, ກ່ອນອື່ນໝົດຄະນະພັກຂັ້ນຕ່າງໆຕ້ອງກຳແໜ້ນບັນດາເນື້ອໃນຈຸດສຸມ, ຫຼັກແຫຼ່ງໄດ້ຖືກກຳນົດໃນເອກະສານ ແລະ ມະຕິ. ນີ້ແມ່ນພື້ນຖານ, ແມ່ນເງື່ອນໄຂເພື່ອໃຫ້ຄະນະພັກຂັ້ນຕ່າງໆຈັດຕັ້ງຮ່ຳຮຽນ, ຊາບຊຶມ, ຜັນຂະຫຍາຍປະຕິບັດໃຫ້ສອດຄ່ອງກັບສະພາບການຕົວຈິງຢູ່ແຕ່ລະທ້ອງຖິ່ນ, ຫົວໜ່ວຍ.
ໃນການຈັດຕັ້ງຜັນຂະຫຍາຍປະຕິບັດມະຕິກອງປະຊຸມໃຫຍ່ຄັ້ງທີ 12 ຂອງພັກຢ່າງມີໄຊນັ້ນ, ໜ້າທີ່ເປັນຂໍ້ກຸນແຈແມ່ນມີຄວາມໝາຍຕັດສິນຊີ້ຂາດ ແມ່ນເພີີ່ມທະວີການເບິ່ງແຍງວຽກງານກໍ່ສ້າງພັກໃຫ້ໂປ່ງໃສ, ໝັ້ນຄົງເຂັ້ມແຂງ, ສະກັດກັ້ນຍູ້ຖອຍສະພາບເຊື່ອມທາດຂາດຄຸນທາງດ້ານແນວຄິດການເມືອງ, ຄຸນສົມບັດ, ວິຖີຊີວິດ, ຜູດພັນຢ່າງສະໜິດແໜ້ນກັບປະຊາຊົນ. ຕາມນັ້ນແລ້ວ, ການຜັນຂະຫຍາຍມະຕິກອງປະຊຸມໃຫຍ່ຄັ້ງທີ 12 ຂອງພັກຕ້ອງຕິດພັນກັບການປະຕິບັດມະຕິສູນກາງພັກເທື່ອທີ 4 ຊຸດທີ 11ກ່ຽວກັບວຽກງານກໍ່ສ້າງພັກ ແລະ ຄຳສັ່ງ 03 ຂອງກົມການເມືອງຊຸດທີ 11 ກ່ຽວກັບການຍູ້ແຮງການຮ່ຳຮຽນ ແລະ ເຮັດຕາມແບບຢ່າງຄຸນສົມບັດຂອງປະທານໂຮ່ຈິມິນ. ປະຕິບັດເອກະສານ 2 ສະບັບນີ້ເປັນຢ່າງດີນັ້ນ ກໍເປັນການປະກອບສ່ວນປັບປຸງພື້ນຖານແນວຄິດໃຫ້ໝັ້ນຄົງໜັກແໜ້ນ, ຍົກສູງຄວາມຮັບຜິດຊອບຕໍ່ພັກ, ຕໍ່ປະຊາຊົນໃນພະນັກງານ, ສະມາຊິກພັກແຕ່ລະຄົນ, ສ້າງການແຜ່ຂະຫຍາຍຢ່າງກວ້າງເລິກໃນທົ່ວສັງຄົມ. ທ່ານບຸຍວັນຕີງ ກຳມະການສູນກາງພັກຊຸດທີ 12, ເລຂາຄະນະພັກແຂວງຮ່ວາບີງ ໃຫ້ຮູ້ວ່າ :
“ ພວກຂ້າພະເຈົ້າຈະສ້າງໂຄງການດຳເນີນງານ, ແຜນຮ່າງລະອຽດເພື່ອປະຕິບັດມະຕິກອງປະຊຸມໃຫຍ່ຄັ້ງທີ 12 ຂອງພັກກໍຄືມະຕິກອງປະຊຸມໃຫຍ່ຄັ້ງທີ 16 ຂອງອົງຄະນະພັກແຂວງ, ພິເສດແມ່ນເອົາໃຈໃສ່ວຽກງານກໍ່ສ້າງພັກ, ພັດທະນາເສດຖະກິດສັງຄົມ ”
ເຫັນດີເຫັນພ້ອມໃນການກະທຳ
ຈາກການຮັບຮູ້ຢ່າງຖືກຕ້ອງ, ກຳແໜ້ນເນື້ອໃນ ແລະ ລະບົບວິທີການແກ້ໄຂ, ຄະນະພັກຂັ້ນຕ່າງໆຄົ້ນຄ້ວາສ້າງແຜນການ, ໂຄງການດຳເນີນງານໃຫ້ສອດຄ່ອງກັບ ແລະ ຕິດແທດຕົວຈິງ. ຄະນະພັກແຕ່ລະຂັ້ນ ກຳນົດແຈ້ງກ່ຽວກັບເນື້ອໃນ, ຮູບການ, ບາດກ້າວເດີນທີ່ສອດຄ່ອງ, ເລືອກເຟັ້ນຂອດບຸກທະລຸ, ບັນຫາຈຸດສຸມ, ຫຼີກລ້ຽງກະແຈກກະຈາຍ. ນີ້ແມ່ນຄວາມຕ້ອງການຢ່າງສູງສຸດ, ຈຳເປັນຕ້ອງມີຄວາມສາມາດດ້ານຈີນຕະນາການ, ລະດັບຄວາມຮູ້ ແລະ ສະຕິປັນຍາຂອງຖັນແຖວກຳມະການໃນຄະນະພັກ, ໂດຍກົງແມ່ນເລຂາຄະນະພັກແຕ່ລະຂັ້ນ. ຈາກນັ້ນ ກໍສ້າງເປັນຂະບວນແຂ່ງຂັນຢ່າງຟົດຟື້ນໃນບັນດາຂະແໜງການຂັ້ນຕ່າງໆ, ສູ້ຊົນປະຕິບັດບັນດາເປົ້າໝາຍ, ໜ້າທີ່ທີ່ວາງອອກຢ່າງມີໄຊ, ໃນສະເພາະໜ້າຕ້ອງແກ້ໄຂບັນດາບັນຫາຮີບດ່ວນເປັນຢ່າງດີ, ເປັນຕົ້ນແມ່ນບັນຫາທີ່ແທດຈິງ ແລະ ສຳຄັນໃນຊີວິດການເປັນຢູ່ຂອງປະຊາຊົນ. ທ່ານ ຫງວຽນວັນຢູ ກຳມະການສູນກາງພັກ, ເລຂາຄະນະພັກແຂວງໆ ບັກກ້ານ ຢືນຢັນວ່າ :
“ ພວກຂ້າພະເຈົ້າມີໜ້າທີ່ຖ່າຍທອດເນື້ອໃນຈິດໃຈຂອງມະຕິກອງປະຊຸມໃຫຍ່ຄັ້ງທີ 12 ຂອງພັກໃຫ້ແກ່ອົງຄະນະພັກ, ປະຊາຊົນບັນດາເຜົ່າໃນແຂວງບັກກ້ານ ແລະ ສ້າງແຜນການຜັນຂະຫຍາຍເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງພັກໃຫ້ເປັນຢ່າງດີ. ປັບປຸງໂຄງການດຳເນີນງານຂອງອົງຄະນະພັກແຂວງໃຫ້ສອດຄ່ອງກັບເປົ້າໝາຍ, ວິທີການແກ້ໄຂຂອງມະຕິກອງປະຊຸມໃຫຍ່ຄັ້ງທີ 12 ຂອງພັກ, ພະຍາຍາມດ້ວຍຄວາມສຸດໃຈຂອງສ່ວນບຸກຄົນຈະສຸມກຳລັງພ້ອມກັບຄະນະບໍລິຫານງານສູນກາງພັກ ຊີ້ນຳນຳພາປະເທດຊາດພັດທະນາເສດຖະກິດສັງຄົມ ແລະ ຮັບປະກັນການປ້ອງກັນຊາດ, ປ້ອງກັນຄວາມສະຫງົບ”
ທ່ານ ເລດິງເຊີນ , ກຳມະການສູນກາງພັກ, ເລຂາຄະນະພັກແຂວງໆ ຮ່າຕິ້ງ ໃຫ້ຮູ້ວ່າ ຮ່າຕິ້ງຈະຍາດແຍ່ງບັນດາເງື່ອນໄຂສະດວກ, ຕັດສິນໃຈນັບແຕ່ຊຸມເດືອນຕົ້ນປີເພື່ອນຳມະຕິກອງປະຊຸມໃຫຍ່ຄັ້ງທີ 12 ຂອງພັກເຂົ້າສູ່ຊີວິດຕົວຈິງ. ທ່ານ ເລດິງເຊີນ , ກຳມະການສູນກາງພັກ, ເລຂາຄະນະພັກແຂວງໆ ຮ່າຕິ້ງ ໃຫ້ຮູ້ວ່າ :
“ ເອກະສານກອງປະຊຸມໃຫຍ່ຂອງພັກສະແດງໃຫ້ເຫັນຄວາມຕັດສິນໃຈຢ່າງສູງ ແລະ ປ່ຽນແປງໃໝ່ໃນອາຍຸການນີ້, ພິເສດມີໜ້າທີ່ສຳຄັນນຳຫວຽດນາມກາຍເປັນປະເທດອຸດສາຫະກຳຕາມທິດທັນສະໄໝ. ບົນພື້ນຖານນີ້, ຮ່າຕິ້ງສຸມກຳລັງຢ່າງສູງໃຫ້ແກ່ເປົ້າໝາຍຫັນເປັນອຸດສາຫະກຳ, ສູ້ຊົນຮອດປີ 2020 ຈະພັດທະນາໄວ ແລະ ໝັ້ນຄົງກວ່າ ”
ການປະຕິບັດມະຕິກອງປະຊຸມໃຫຍ່ຄັ້ງທີ 12 ຂອງພັກ ແມ່ນເງື່ອນໄຂຕັດສິນຊີ້ຂາດເພື່ອກໍ່ສ້າງພັກໃຫ້ໂປ່ງໃສ, ໝັ້ນຄົງເຂັ້ມແຂງ, ປະຕິບັດ 2 ໜ້າທີ່ຍຸດທະສາດຄື ກໍ່ສ້າງ ແລະ ປົກປັກຮັກສາປະເທດຊາດຫວຽດນາມສັງຄົມນິຍົມໃຫ້ໝັ້ນຄົງໜັກແໜ້ນ, ເພື່ອເປົ້າໝາຍ “ປະຊາຊົນຮັ່ງມີ, ປະເທດຊາດເຂັ້ມແຂງ, ປະຊາທິປະໄຕ, ຍຸດຕິທຳ ແລະ ສີວິໄລ”