(vovworld)- ວັນທີ 29/5, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ເດີນທາງໄປຢ້ຽມຢາມ ສາທາລະນະລັດ ກາຢັກສະຖານ, ເຂົ້າຮ່ວມພິທີລົງນາມໃນສັນຍາການຄ້າເສລີ ລະຫວ່າງຫວຽດນາມ ແລະ ພັນທະມິດເສດຖະກິດ ອາຊີ -ເອີລົບ ຢ່າງເປັນທາງການ. ຫວຽດນາມ ແມ່ນປະເທດທຳອິດ ເຊັນສັນຍາ FTA ກັບພັນທະມິດດັ່ງກ່າວ ແລະ ນີ້ຈະແມ່ນກອບກົດໝາຍສະດວກສະບາຍ ແລະ ເປັນປົກກະຕິເພື່ອພັດທະນາການພົວພັນທາງດ້ານເສດຖະກິດລະຫວ່າງ ຫວຽດນາມ ກັບບັນດາປະເທດສະມາຊິກຂອງພັນທະມິດ.
ພາບປະກອບ:internet
|
ພັນທະມິດເສດຖະກິດ ອາຊີ -ເອີລົບ (EAEC) ລວມມີ 5 ປະເທດ ນັ້ນແມ່ນ ລັດເຊຍ, ກາຢັກສະຖານ, ເບລາຣຸດ, ອາເມນິອາ ແລະ ກຽກກີສະຖານ. ດ້ວຍພົນລະເມືອງກວ່າ 170 ລ້ານຄົນ ແລະ GDP ປະມານ 4000 ຕື້ USD, EAEC ແມ່ນຕະຫລາດເຕັມໄປດ້ວຍຄວາມສາມາດບົ່ມຊ້ອນສຳລັບບັນດາວິສາຫະກິດຫວຽດນາມ.
ສົມດູນຜົນສະໂຫຍດ
ເດືອນ 5/2014 ຢູ່ ນະຄອນຫລວງ Astana, ປະເທດ ກາຢັກສະຖານ, ປະທານາທິບໍດີ 3 ປະເທດຄື: ລັດເຊຍ, ກາຢັກສະຖານ ແລະ ເບລາຣຸດ ໄດ້ລົງນາມໃນສົນທິສັນຍາສ້າງຕັ້ງ ພັນທະມິດເສດຖະກິດ ອາຊີ -ເອີລົບ(EEU) ແລະ ມີຜົນສັກສິດນັບແຕ່ວັນທີ 1/1/2015 ເປັນຕົ້ນໄປ. ວັນທີ 1/1/2015, ພັນທະມິດດັ່ງກ່າວ ໄດ້ຫັນປ່ຽນເປັນພັນທະມິດ ເສດຖະກິດ ອາຊີ -ເອີລົບ ລວມມີ ລັດເຊຍ, ກາຢັກສະຖານ, ເບລາຣຸດ, ອາເມນິອາ ແລະ ກຽກກີສະຖານ. ພາຍຫລັງກວ່າ 2 ປີ, ການເຈລະຈາສັນຍາການຄ້າເສລີ ລະຫວ່າງ ຫວຽດນາມ ແລະ ພັນທະມິດເສດຖະກິດ ອາຊີ -ເອີລົບ ໄດ້ສິ້ນສຸດຢ່າງເປັນທາງການ. ເມື່ອແລກປ່ຽນກັບນັກຂ່າວວິທະຍຸກະຈາຍສຽງຫວຽດນາມ ຢູ່ ສະຫະພັນລັດເຊຍ, ທ່ານ ດັ້ງຮ່ວາງຫາຍ, ຫົວຫນ້າກົມຕະຫລາດ ເອີລົບ, ກະຊວງອຸດສາຫະກຳ ການຄ້າ, ຫົວຫນ້າຄະນະເຈລະຈາສັນຍາ FTA ຂັ້ນເຕັກນິກ ຂອງຫວຽດນາມ ຖືວ່າ: ສັນຍານີ້ມີຈຸດພິເສດສະເພາະ ນັ້ນແມ່ນບັນດາປະເທດສະມາຊິກ ພັນທະມິດເສດຖະກິດ ອາຊີ -ເອີລົບ ຊື່ງຫວຽດນາມ ດຳເນີນການເຈລະຈາ ລ້ວນແຕ່ແມ່ນບັນດາປະເທດມີການພົວພັນມິດຕະພາບທີ່ເປັນມູນເຊື້ອອັນດີງາມກັບຫວຽດນາມ.
“ຍ້ອນນ້ຳໃຈມິດຕະພາບ ສະນັ້ນ ມີຄວາມເຂົ້າອົກເຂົ້າໃຈເຊິ່ງກັນ ແລະກັນຢ່າງສູງ ແລະ ສອງຝ່າຍເຄົາລົບຜົນປະໂຫຍດຂອງແຕ່ລະຝ່າຍ, ລັກສະນະພິເສດສະເພາະຂອງແຕ່ລະປະເທດ ແລະ ລ້ວນແຕ່ກ້າວໄປເຖິງຈຸດປະສົງ ຕ້ອງສົມດູນຜົນປະໂຫຍດລະຫວ່າງສອງຝ່າຍໃນວິວັດການເຈລະຈາ. ມາຮອດປະຈຸບັນ, ເມື່ອວິວັດການເຈລະຈາໄດ້ສິ້ນສຸດ ພວກຂ້າພະເຈົ້າເຫັນວ່າ ຈຸດປະສົງນັ້ນບັນລຸໄດ້ແລ້ວ. ເລື່ອງລົງນາມໃນສັນຍາ FTA ແມ່ນຮັບປະກັນຜົນປະໂຫຍດຂອງແຕ່ລະປະເທດໃນ ພັນທະມິດເສດຖະກິດ ອາຊີ -ເອີລົບ ກໍຄື ຂອງຫວຽດນາມ ແລະ ຮັບປະກັນຄວາມສົມດູນຜົນປະໂຫຍດຂອງທັງສອງຝ່າຍ.”
ກົນໄກພາສີເສລີສະດວກສະບາຍ
ເລື່ອງລົງນາມໃນສັນຍາການຄ້າເສລີ ລະຫວ່າງຫວຽດນາມ ແລະ ພັນທະມິດເສດຖະກິດ ອາຊີ -ເອີລົບ ຈະສ້າງກອບກົດໝາຍຢ່າງສະດວກສະບາຍ ແລະ ເປັນປົກກະຕິ ເພື່ອພັດທະນາການພົວພັນດ້ານເສດຖະກິດລະຫວ່າງຫວຽດນາມ ກັບບັນດາປະເທດສະມາຊິກຂອງ ພັນທະມິດເສດຖະກິດ ອາຊີ -ເອີລົບ, ຈາກນັ້ນ ເພີ່ມທະວີການພົວພັນສອງຝ່າຍ ແລະ ແລກປ່ຽນບັນດາມາດຕະການ ເພື່ອຜັນຂະຫຍາຍສັນຍາກັບແຕ່ລະປະເທດຢ່າງລະອຽດ.
ຕາມການຕີລາຄາຂອງຜູ້ຊ່ຽວຊານຫລາຍທ່ານແລ້ວ, ສັນຍານີ້ໄດ້ຮັບການຕີລາຄາວ່າແມ່ນເປີດອົກເປີດໃຈໃນບັນຫາພາສີເສລີ, ໂດຍລະອຽດແມ່ນເລື່ອງແລກປ່ຽນການຄ້າລະຫວ່າງບັນດາປະເທດສະມາຊິກ EAEC ກັບຫວຽດນາມ. ຄຽງຄູ່ກັນນັ້ນ ການຫລຸດຜ່ອນຫລືຍົກເວັ້ນພາສີນຳເຂົ້າ ສຳລັບປະເພດສິນຄ້າສ່ວນຫລາຍໃນບັນຊີລາຍຊື່ປະເພດສິນຄ້າເຂົ້າຮ່ວມສັນຍາ, ບັນດາຝ່າຍຍັງສາມາດຮັກສາອາລັກຂາດ້ານພາສີສຳລັບປະເພດສິນຄ້າສະດຸ້ງໄວຈຳນວນຫນຶ່ງ. ສຳລັບ ຫວຽດນາມ, ສັນຍາດັ່ງກ່າວບັນລຸໄດ້ຈຸດໝາຍພື້ນຖານ ຊື່ງຫວຽດນາມ ໄດ້ວາງອອກ. ນັ້ນແມ່ນ ບັນດາປະເພດສິນຄ້ານອນໃນຄວາມເອົາໃຈໃສ່ບຸລິມະສິດສູງແມ່ນບັນລຸໄດ້ບັນດາເງື່ອນໄຂສະດວກ. ທ່ານ ດັ້ງຮ່ວາງຫາຍ, ຫົວຫນ້າຄະນະເຈລະຈາສັນຍາ FTA ຂັ້ນເຕັກນິກ ຂອງຫວຽດນາມ ຖືວ່າ:
“ຕົວຢ່າງຄື ສິນໃນນ້ຳ, ພວກເຮົາບັນລຸໄດ້ 100% ປະລິມານບັນດາປະເພດສິນຄ້າເຊິ່ງພວກເຮົາພວມສົ່ງໄປຂາຍຢູ່ປະເທດຕ່າງໆໃນໂລກ ດ້ວຍອັດຕາພາສີ 0%. 80% ເຄື່ອງຕ່ຳແຜ່ນຕັດຫຍິບຂອງພວກເຮົາ ກໍ່ໄດ້ຍົກເວັ້ນພາສີ. ເກີບຫນັງກໍເຊັ່ນດຽວກັນ, ເລື່ອງຫລຸດຜ່ອນອັດຕາພາສີ 0%, ເກີບຫນັງຂອງຫວຽດນາມສົ່ງໄປຂາຍຢູ່ບັນດາຕະຫລາດດັ່ງກ່າວຈະມີຜົນປະໂຫຍດທີ່ສຸດ.”
ບັນດາປະເພດສິນຄ້າ ຊື່ງສຳລັບບັນດາປະເທດພັນທະມິດໃຫ້ບຸລິມະສິດສູງ ຄື: ເຫລັກກ້າ, ສິນຄ້າອຸດສາຫະກຳ, ກະສິກຳຈຳນວນຫນຶ່ງ, ຫວຽດນາມ ກໍພ້ອມແລ້ວເປີດປະຕູ, ຍົກເວັ້ນພາສີ. ຜະລິດຕະພັນກະເສດປະເພດອື່ນຈຳນວນຫນຶ່ງ ແມ່ນເປີດປະຕູຕາມວິວັດການ. ສະນັ້ນ ສັນຍາໄດ້ສະແດງບັນດາຜົນປະໂຫຍດຂອງທັງສອງຝ່າຍເປັນຢ່າງດີ ແລະ ເອົາໃຈໃສ່ເຖິງບັນດາປະເພດສິນຄ້າຊື່ງທັງສອງຝ່າຍລ້ວນແຕ່ເອົາໃຈໃສ່ບຸລິມະສິດ.
ກາລະໂອກາດຊຸກຍູ້ການຮ່ວມມືດ້ານການຄ້າ
ຄາດວ່າ ສັນຍາ FTA ກັບ EAEC ພາຍຫລັງໄດ້ຮັບການລົງນາມ, ຮອດປີ 2020 ປະລິມານການຄ້າລະຫວ່າງບັນດາປະເທດສະມາຊິກ ແລະ ຫວຽດນາມ ອາດຈະເພີ່ມຂຶ້ນທົບຫລາຍເທົ່າເມື່ອທຽບໃສ່ລະດັບປະຈຸບັນ. ລັດເຊຍ ແລະ ບັນດາປະເທດອື່ນໃນພັນທະມິດ ສາມາດເປີດກວ້າງການຫນູນຊ່ວຍຫວຽດນາມ ຫລາຍສົມຄວນ ໃນວິວັດການປະຕິບັດແຜນການພັດທະນາເສດຖະກິດ. ພິເສດ ໃນຂົງເຂດພະລັງງານ, ກໍ່ສ້າງພື້ນຖານໂຄງລ່າງ, ຄົມມະນາຄົມຂົນສົ່ງ, ຂຸດຄົ້ນບັນດາແຫລ່ງຊັບພະຍາກອນທຳມະຊາດ. ສິ່ງສຳຄັນ ພື້ນຖານເສດຖະກິດຂອງຫວຽດນາມ ແລະ EAEC ບໍ່ແກ້ງແຍ້ງນຳກັນຫາກເພີ່ມເຕີມໃຫ້ກັນ.
ໂດຍແມ່ນປະເທດທຳອິດລົງນາມໃນສັນຍາ FTA ກັບ EAEC, ເຖິງວ່າ ຫວຽດນາມ ມີການພົວພັນຍາວນານ, ແຕ່ ປະຈຸບັນ ການພົວພັນດ້ານການຄ້າ ລະຫວ່າງຫວຽດນາມກັບພັນທະມິດ ຍັງຈຳກັດຢູ່. ແຕ່ລະປີ, ຕາມຕົວເລກສະຖິຕິລ້າສຸດ ມີພຽງກວ່າ 3 ຕື້ USD. ສັນຍາ FTA ຈະແມ່ນກຳລັງຫນູນຮອບດ້ານ ເພື່ອຍູ້ແຮງການຮ່ວມມືດ້ານເສດຖະກິດ ແລະ ການຄ້າລະຫວ່າງ ຫວຽດນາມ ແລະ ພັນທະມິດເສດຖະກິດ ອາຊີ ເອີລົບ. ບັນດາປະເທດເພື່ອນມິດກໍຕີລາຄາວ່າ ຫວຽດນາມ ມີບົດບາດຕັ້ງຫນ້າໃນອາຊຽນ ແລະ ຫວຽດນາມ ຈະແມ່ນປະຕູເພື່ອໃຫ້ ພັນທະມິດເສດຖະກິດ ອາຊີ ເອີລົບ ເຂົ້າອາຊຽນ ແລະ ພາກພື້ນ ອາຊີ.
ເລື່ອງທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ເດີນທາງເຖິງ ກາຢັກສະຖານ ເຂົ້າຮ່ວມພິທີລົງນາມສັນຍາການຄ້າເສລີລະຫວ່າງ ຫວຽດນາມ ແລະ ພັນທະມິດເສດຖະກິດ ອາຊີ ເອີລົບ ຢ່າງເປັນທາງການ ແມ່ນເຫດການມີຄວາມໝາຍສຳຄັນໃນວິວັດການເຊື່ອມໂຍງເຂົ້າກັບສາກົນຂອງຫວຽດນາມ. ການຢ້ຽມຢາມກໍເພື່ອແນໃສ່ແລກປ່ຽນບັນດາຂອບເຂດການຮ່ວມມືໃຫມ່, ດຶງດູດວິສາຫະກິດຂອງບັນດາປະເທດດຳເນີນທຸລະກິດ ແລະ ລົງທຶນຢູ່ ຫວຽດນາມ ພ້ອມທັງແລກປ່ຽນບັນດາມາດຕະການເພື່ອຊຸກຍູ້ການຮ່ວມມືສອງຝ່າຍ ລະຫວ່າງຫວຽດນາມ ແລະ ບັນດາປະເທດເຫລົ່ານັ້ນ ບັນລຸປະສິດທິຜົນ ແລະ ໝັ້ນຄົງກວ່າ