(ທ່ານນາຍົກລັດຖະມົນຕີ ຫງວຽນເຕີ໋ນຢຸງ)
ສັນຍາຄູ່ຮ່ວມມືຂ້າມປາຊີຟິກ (TPP) ເຊິ່ງ ຫວຽດນາມ ແລະ 11 ປະເທດຫາກໍ່ລົງນາມຢູ່ປະເທດ ນິວຊີແລນ. ນີ້ບໍ່ພຽງແຕ່ແມ່ນໝາກຜົນຂອງ 5 ປີແຫ່ງການເຈລະຈາຢ່າງເດັດຂາດຂອງ ຫວຽດນາມ, ຖືຜົນປະໂຫຍດຂອງຊາດເປັນຈຸດໝາຍສູງສຸດເທົ່ານັ້ນ ຫາກຍັງແມ່ນຜົນງານຂອງ 30 ປີແຫ່ງການປ່ຽນໃໝ່, ໃນນັ້ນການເຊື່ອມໂຍງດ້ານເສດຖະກິດເຂົ້າກັບສາກົນແມ່ນເນື້ອໃນສຳຄັນ, ນັບມື້ນັບໄດ້ຮັບການຢືນຢັນຢ່າງແຮງຜ່ານມະຕິຕ່າງໆຂອງພັກ. ເນື່ອງໃນໂອກາດນີ້, ທ່ານນາຍົກລັດຖະມົນຕີ ຫງວຽນເຕີນຢູ້ງ ມີບົດຂຽນດ້ວຍຫົວຂໍ້ວ່າ “ສັນຍາຄູ່ຮ່ວມມືຂ້າມປາຊີຟິກ, ກາລະໂອກາດ ແລະ ສິ່ງທ້າທາຍ - ການກະທຳຂອງພວກເຮົາ”. ຕໍ່ໄປນີ້, ບັນນາທິການວິທະຍຸກະຈາຍສຽງ ຫວຽດນາມ, ຂໍຄັດສະເໜີເນື້ອໃນຕົ້ນຕໍ່ຂອງບົດຂຽນນີ້.
ສັນຍາຄູ່ຮ່ວມມືຂ້າມປາຊີຟິກ (TPP), ມີຂອບຂະໜາດດ້ານເສດຖະກິດກວມ 40% GDP ແລະ 30% ດ້ານການຄ້າທົ່ວໂລກ. ນີ້ແມ່ນສັນຍາການຄ້າເສລີລຸ້ນໃໝ່ ທີ່ໄດ້ຮັບຄວາມຫວັງຈະກາຍເປັນແບບຢ່າງໃຫ້ແກ່ການພັດທະນາດ້ານການຄ້າໃນພາກພື້ນ ແລະ ສາກົນດ້ວຍຄວາມຮຽກຮ້ອງຕ້ອງການສູງກ່ວາ ໃນສະພາບກຳລັງການຜະລິດພັດທະນາໄວທີ່ສຸດ ແລະ ການເຊື່ອມໂຍງກັບສາກົນນັບມື້ນັບເລິກເຊິ່ງ, ກ້ວາງຂວາງ.
ເຂົ້າຮ່ວມ TPP ສະແດງຈິນຕະນາການແຫຼມຄົນ ແລະ ວິໄສທັດຍຸກສະໄໝ
ທ່ານນາຍົກລັດຖະມົນຕີ ຫງວຽນເຕີນຢູ້ງ ຢັ້ງຢືນວ່າ: TPP ແມ່ນໜຶ່ງໃນຈຳນວນສັນຍາການຄ້າເສລີລຸ້ນໃໝ່, ສຳພັດກັບຕະຫຼາດຢ່າງຮອບດ້ານ, ຮັບປະກັນການຫັນປ່ຽນເສລີຢູ່ໃນລະດັບສູງກ່ວາຂອງການຄ້າ, ການບໍລິການ, ທຶນຮອນ ແລະ ເຕັກໂນໂລຢີ, ສ້າງສະພາບແວດລ້ອມດຳເນີນທຸລະກິດສະເໝີພາບ, ສ້າງເງື່ອນໄຂສະດວກໃຫ້ແກ່ການຄ້າ ແລະ ການລົງທຶນ. TPP ຈະຊຸກຍູ້ການສ້າງຕັ້ງເຄືອຂ່າຍຜະລິດ ແລະ ລະບົບການສະໜອງໃໝ່ໃນຕະຫຼາດທີ່ມີ 12 ປະເທດສະມາຊິກ, ຊຸກຍູ້ການເຕີບໂຕ, ໜູນຊ່ວຍຄາດໝາຍສ້າງວຽກເຮັດງານທຳ, ເພີ່ມລາຍຮັບ ແລະ ປັບປຸງຊີວິດການເປັນຢູ່ຂອງປະຊາຊົນ. ສັນຍາຍັງມີບັນດາຂໍ້ກຳນົດຮັບປະກັນກາລະໂອກາດເພື່ອໃຫ້ບັນດາພື້ນຖານເສດຖະກິດສະມາຊິກມີລະດັບພັດທະນາທີ່ແຕກຕ່າງກັນ ແລະ ບັນດາວິສາຫະກິດດ້ວຍຂອບຂະໜາດແຕກຕ່າງກັນລ້ວນແຕ່ໄດ້ຮັບຜົນປະໂຫຍດ. TPP ເຄົາລົບລະບອບການເມືອງຂອງແຕ່ລະປະເທດ, ຮັບຮູ້ຄວາມຮຽກຮ້ອງຕ້ອງການປະຕິບັດກົດໝາຍແຫ່ງຊາດຢ່າງຄົບຖ້ວນ, ເໝາະສົມກັບບັນດາຄຳໝັ້ນສັນຍາສາກົນ.
ດັ່ງນັ້ນ, ຕາມທ່ານນາຍົກລັດຖະມົນຕີ ຫງວຽນເຕີນຢູ້ງ ແລ້ວ, ໃນເງື່ອນໄຂລະດັບພັດທະນາຂອງພື້ນຖານເສດຖະກິດຍັງຕຳ່ ແລະ ຍັງມີຄວາມຫຍຸ້ງຍາກຫຼາຍຢ່າງ, ເລື່ອງເປັນເຈົ້າການຕົກລົງເຂົ້າຮ່ວມບັນດາສັນຍາການຄ້າເສລີລຸ້ນໃໝ່, ພິເສດແມ່ນ TPP, ສະແດງໃຫ້ເຫັນຄຸນນະທາດດ້ານການເມືອງ, ຈິນຕະນາການແຫຼມຄົມ ແລະ ວິໄສທັດຍຸກສະໄໝຂອງພັກ ແລະ ລັດ ຫວຽດນາມ. ນີ້ຍັງແມ່ນການຢືນຢັນຄວາມໄວ້ເນື້ອເຊື່ອໃຈຕໍ່ເຈດຈຳນົງ, ຄວາມສາມາດ ແລະ ກຳລັງແຮງຂອງຊາວ ຫວຽດນາມ ແລະ ຂອງຊາດ ຫວຽດນາມ.
ກາລະໂອກາດຕິດພັນກັບການທ້າທາຍ
ກ່ຽວກັບຄວາມສະດວກ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ຖືວ່າ, ບັນດາສັນຍາການຄ້າເສລີລຸ້ນໃໝ່ນີ້ ຈະສ້າງກຳລັງໃໝ່ໃຫ້ແກ່ການພັດທະນາເສດຖະກິດ - ສັງຄົມ, ພິເສດແມ່ນໃນການດຶງດູດເງິນລົງທຶນ ແລະ ຊຸກຍູ້ການສົ່ງອອກກັບບັນດາພື້ນຖານເສດຖະກິດໃຫຍ່ທີ່ສຸດຂອງໂລກ, ໃນນັ້ນ ອີຢູ ດ້ວຍ GDP ແມ່ນກວ່າ 18.000 ຕື້ USD ແລະ TPP ປະຈຸບັນມີ 12 ປະເທດພາຄີ, ດ້ວຍ GDP ແມ່ນກວ່າ 20.000 ຕື້ USD. ນີ້ແມ່ນພາກພື້ນທີ່ມີແຫຼ່ງເຕັກໂນໂລຢີ, ຕະຫຼາດສົ່ງອອກ ແລະ ດຶງດູດການລົງທຶນໃຫຍ່ທີ່ສຸດຂອງ ຫວຽດນາມໃນຫຼາຍປີຜ່ານມາ. ການເພີ່ມອັດຕາສ່ວນນຳເຂົ້າ, ສົ່ງອອກກັບຕະຫຼາດນີ້ ກໍ່ເຮັດໃຫ້ການພົວພັນດ້ານການຄ້າກັບປະເທດຕ່າງໆມີຄວາມສົມດຸນກວ່າ. ບັນດາຄຳໝັ້ນສັນຍາໃນສັນຍາຕ່າງໆ ແມ່ນບັນດາມາດຕະຖານເພື່ອປະກອບສ່ວນປັບປຸງລະບອບເສດຖະກິດການຕະຫຼາດທີ່ທັນສະໄໝ ແລະ ຊຸກຍູ້ວິວັດແຫ່ງການສ້າງໂຄງປະກອບຄືນໃໝ່, ຫັນປ່ຽນຮູບແບບເຕີບໂຕ. ເຂົ້າຮ່ວມບັນດາສັນຍານີ້ ຍັງແມ່ນບາດກ້າວໃໝ່ໃນການປະຕິບັດແນວທາງການຕ່າງປະເທດສະເໝີຕົ້ນສະເໝີປາຍຂອງຫວຽດນາມ, ພິເສດແມ່ນຢູ່ພາກພື້ນທີ່ພວມມີການແກ່ງແຍ້ງຍຸດທະສາດນັບມື້ນັບຂ້ຽວຂາດ.
ກ່ຽວກັບຄວາມຫຍຸ້ງຍາກ, ຕາມທ່ານນາຍົກລັດຖະມົນຕີແລ້ວ, ປັດໃຈຕົ້ນຕໍແມ່ນການແກ່ງແຍ້ງຈະດຳເນີນໄປຢ່າງຂ້ຽວຂາດ, ບໍ່ພຽງແຕ່ຢູ່ຕະຫຼາດບັນດາປະເທດເຂົ້າຮ່ວມສັນຍາເທົ່ານັ້ນ, ຫາກໃນຕະຫຼາດພາຍໃນປະເທດອີກດ້ວຍ. ຕໍ່ໜ້າຄວາມດັນຈາກການແກ່ງແຍ້ງ, ບາງວິສາຫະກິດ, ພາຍຫຼັງການຫັນປ່ຽນ, ສ້າງໂຄງປະກອບຄືນໃໝ່, ຖ້າຫາກບໍ່ບືນຕົວຂຶ້ນໄດ້, ອາດຈະຖືກຍຸບເລີກ ຫຼືຖືກລົ້ນລະລາຍ, ຜູ້ອອກແຮງງານພາກສ່ວນໜຶ່ງຈະບໍ່ມີວຽກເຮັດງານທຳ; ກະສິກຳ ແລະ ຊາວກະສິກອນຖືກສ່ຽງໄພສູງກວ່າເພິ່ນ; ຄວາມຜິດໂຕນກັນລະຫວ່າງຄົນຮັ່ງມີກັບຄົນທຸກຍາກຈະເພີ່ມຂຶ້ນ ຖ້າຫາກ ຫວຽດນາມບໍ່ປະຕິບັດຍຸດທະສາດພັດທະນາໄວ ແລະ ໝັ້ນຄົງຢ່າງມີປະສິດທິຜົນ.
ນອກນັ້ນການທ້າທາຍກ່ຽວກັບການປະຕິບັດກໍ່ຫຼາຍທີ່ສຸດ, ນັບແຕ່ການປັບປຸງລະບົບກົດໝາຍຕະຫຼອດຮອດການກໍ່ສ້າງຊັບພະຍາກອນມະນຸດ, ຍົກສູງຄວາມສາມາດຂອງພະນັກງານ, ລັດຖະກອນ, ຜູ້ຊ່ຽວຊານດ້ານເຕັກນິກ ແລະ ກົດໝາຍ.
ການກະທຳຂອງຫວຽດນາມ
ເພື່ອໝູນໃຊ້ກາລະໂອກາດ, ຜ່ານຜ່າການທ້າທາຍ, ຕາມທ່ານນາຍົກລັດຖະມົນຕີແລ້ວ, ຄວາມຮຽກຮ້ອງຕ້ອງການອັນຮີບດ່ວນໃນປະຈຸບັນແມ່ນຕ້ອງຍົກສູງຄວາມສາມາດແກ່ງແຍ້ງຂອງທັງພື້ນຖານເສດຖະກິດ. ໃນນັ້ນ, ວິສາຫະກິດ, ເປັນເຈົ້າຂອງຕັດສິນກຳລັງແກ່ງແຍ້ງຈຸນລະພາບ, ຕ້ອງເປັນເຈົ້າການປະຕິບັດມາດຕະການຕ່າງໆຢ່າງຄົບຊຸດ, ຂ້ຽວຂາດ ເພື່ອຍົກສູງກຳລັງແກ່ງແຍ້ງຂອງສິນຄ້າ, ການບໍລິການໂດຍຕົນເອງສະໜອງ, ດ້ວຍຈີນຕະນາການ ບໍ່ພຽງແຕ່ຕະຫຼາດພາຍໃນປະເທດເທົ່ານັ້ນ, ຫາກຍັງບືນຕົວຂຶ້ນອອກສູ່ພາກພື້ນ ແລະ ໂລກ. ຢາກເຮັດໄດ້ຄືແນວນັ້ນ, ວິສາຫະກິດຕ້ອງມີການກະທຳໃນຂອບເຂດລະບອບ ແລະ ສະພາບແວດລ້ອມແຫ່ງການດຳເນີນທຸລະກິດທີ່ໄດ້ກຳນົດ.
ເພື່ອມີລະບອບທີ່ດີ ແລະ ຄຸນນະພາບສູງ, ລັດຕ້ອງປະຕິບັດບົດບາດໜ້າທີ່ກໍ່ສ້າງ, ພັດທະນາ, ພິເສດແມ່ນສະຖຽນລະພາບທາງເສດຖະກິດມະຫາພາກ; ສ້າງລະບົບກົດໝາຍ, ນະໂຍບາຍ, ຍຸດທະສາດ, ການວາງແຜນ ແລະ ການຈັດຕັ້ງກົງຈັກຄຸ້ມຄອງ ເພື່ອສ້າງສະພາບແວດລ້ອມແຫ່ງການດຳເນີນທຸລະກິດຢ່າງສະດວກສະບາຍ, ປອດໄສ, ຮັບປະກັນສິດເສລີໃນການດຳເນີນທຸລະກິດ ແລະ ການແກ່ງແຍ້ງຢ່າງຍຸຕິທຳ.
ທ່ານນາຍົກລັດຖະມົນຕີເນັ້ນໜັກວ່າ, ບົນພື້ນຖານຄວາມຮັບຮູ້ຢ່າງຖືກຕ້ອງກ່ຽວກັບບົດບາດຂອງບັນດາປັດໃຈດັ່ງກ່າວ, ຫວຽດນາມຕ້ອງສືບຕໍ່ປັບປຸງລະບອບ, ລະບົບກົດໝາຍຢ່າງຮີບດ່ວນ ເພື່ອຕອບສະໜອງຄວາມຮຽກຮ້ອງຕ້ອງການຂອງເສດຖະກິດການຕະຫຼາດທີ່ທັນສະໄໝ ແລະ ຄຳໝັ້ນສັນຍາໃນບັນດາສັນຍາ FTA, ດ້ວຍຈິດໃຈປ່ຽນໃໝ່ທັງດ້ານເສດຖະກິດ ແລະ ການເມືອງຢ່າງຮອບດ້ານ, ຄົບຊຸດ. ສຸມທຸກຄວາມມານະພະຍາຍາມກໍ່ສ້າງ, ປັບປຸງລັດແຫ່ງອຳນາດນິຕິບັນຢັດຂອງປະຊາຊົນ, ໂດຍປະຊາຊົນ, ເພື່ອປະຊາຊົນ ແລະ ເຄົາລົບກົດໝາຍ. ຕ້ອງສຸມໃສ່ການກໍ່ສ້າງຖັນແຖວພະນັກງານລັດຖະກອນທີ່ມີຄຸນນະທາດ, ມີຄວາມສາມາດ, ຮັບໃຊ້ປະຊາຊົນຢ່າງສຸດຈິດສຸດໃຈ. ຕ້ອງຍູ້ໄວວິວັດການສ້າງໂຄງປະກອບຄືນໃໝ່, ຍົກສູງປະສິດທິຜົນຂອງລັດວິສາຫະກິດ, ພ້ອມທັງສົ່ງເສີມການພັດທະນາວິສາຫະກິດຫວຽດນາມຢ່າງແຮງ, ພິເສດແມ່ນວິສາຫະກິດເອກະຊົນ, ເປັນກຳລັງໜູນເພື່ອຍົກສູງກຳລັງແກ່ງແຍ້ງ ແລະ ລັກສະນະເປັນເຈົ້າຂອງພື້ນຖານເສດຖະກິດ.
ມ້ວນທ້າຍບົດຂຽນ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ຮຽກຮ້ອງທົ່ວພັກ, ທົ່ວປວງຊົນ, ທົ່ວກອງທັບ ແລະ ປະຊາຄົມວິສາຫະກິດ ຍົກສູງຄວາມເອກອ້າງທະນົງໃຈແຫ່ງຊາດ, ຮ່ວມແຮງຮ່ວມໃຈ, ຜ່ານຜ່າຄວາມຫຍຸ້ງຍາກ, ການທ້າທາຍ, ສູ້ຊົນກໍ່ສ້າງລັດ ຫວຽດນາມສັງຄົມນິຍົມ, ກ້າວຂຶ້ນພ້ອມກັບຍຸກສະໄໝ, ທັດທຽມກັບບັນດາປະເທດມະຫາອຳນາດໃນທົ່ວໂລກ.