ຮອບເຈລະຈາທີ່ 4 ກ່ຽວກັບບັນຫານິເຄຼຍຂອງອີຣານ
ຢູ່ສ.ກາຊັກສະຖານ ຊຶ່ງຖືກຈັດຂຶ້ນເມື່ອ 26/2
(ພາບ: Reuters)
|
ກົງກັນຂ້າມກັບການຄາດຄະເນໃນເບື້ອງຕົ້ນຂອງວົງການນັກສັງເກດການ, ພານຫຼັງການເຈລະຈາ ເປັນເວລາ 2 ວັນຄືວັນທີ 25-26/2, ຢູ່ສ.ກາຊັກສະຖານ, ອີຣານ ແລະ ກຸ່ມ P5 + 1 (ລວມມີ 5 ປະເທດກຳມະການປະຈຳສະພາ ຄວາມໝັ້ນຄົງ ສ.ປ.ຊ ແລະ ເຢັຍລະມັນ) ໄດ້ບັນລຸບັນດາບາດກ້າວທີ່ຕັ້ງໜ້າກ່ຽວກັບໂຄງການນິວເຄຼຍຂອງອີຣານ. ໝາກຜົນດັ່ງກ່າວ, ເປັນການຕັ້ງຄວາມຫວັງໃຫ້ຝ່າຍຕ່າງໆແກ້ໄຂໄດ້ສະພາບບໍ່ມີທາງອອກກ່ຽວກັບບັນຫານິເຄຼຍຂອງອີຣານ. ພາຍຫຼັງສິ້ນສຸດການເຈລະຈາ, ຜູ້ຕາງໜ້າຂອງ ອີຣານ ແລະ ກຸ່ມ P5 + 1 ລ້ວນແຕ່ຢືນຢັນວ່າ ບັນດາການປຶກສາຫາລືໄດ້ດຳເນີນໄປຢ່າງຕັ້ງໜ້າ. ສິ່ງ ດັ່ງກ່າວໄດ້ສວະແດງໃຫ້ເຫັນຜ່ານເລື່ອງທັງ 2 ຝ່າຍໄດ້ເປັນເອກະສັນກັນຈັດຕັ້ງ ການເຈລະຈາຂັ້ນນັກວິຊາການໃນ 2 ວັນຄື 17 ແລະ 18/3 ຢູ່ຕວກກີ ແລະ ການເຈລະຈາຕໍ່ໄປລະຫວ່າງ ກຸ່ມ P5 + 1 ແລະ ອີຣານໃນວັນທີ 5 ແລະ ທີ່ 6/4 ຢູ່ ສ.ກາຊັກສະຖານ. ນອກຈາກນັ້ນ, ກຸ່ມ P5 + 1 ຍັງຜ່ອນສັ້ນຜ່ອນຍາວ ຂະນະທີ່ໄດ້ຍົກອອກຂໍ້ສະເໜີໂຍະຍານຄຳສັ່ງຂວ້າບາດກ່ຽວກັບຄຳ ແລະ ໂລຫະປະເສີດ ແທນທີ່ບັນດາຂໍ້ສະເໜີກ່ອນນີ້ ແມ່ນພຽງຍົກເລີກຄຳສັ່ງຂວ້າບາດ ທີ່ມີຕໍ່ເຄື່ອງອາໄລເຮືອບິນພົນລະເຮືອນເພື່ອແລກເອົາເລື່ອງອີຣານຢຸດການເຄືອ່ນໄຫວສ່ວນໜຶ່ງໃນໂຄງການນິວເຄຼຍຂອງຕົນ. ລະອຽດວ່າ 5 ປະເທດປະຈຳສະພາ ຄວາມໝັ້ນຄົງ ສ.ປ.ຊ ແລະ ເຢັຍລະມັນຈະໂຍະຍານບັນດາຄຳສັ່ງຂວ້າບາດທີ່ແນໃສ່ບັນດາແລກປ່ຽນຄ້າຂາຍຄຳ ແລະ ໂລຫະປະເສີດຂອງອີຣານ, ພ້ອມທັງຍົກເລີກການຈຳກັດຊຶ່ງເຄີຍໄດ້ຈັດວາງຕໍ່ການພົວພັນແລກປ່ຽນທາງທະນາຄານຂອງປະເທດສ.ອິດສະລາມນີ້. ແຕ່ສຳລັບອີຣານນັ້ນ, ແມ່ນຕ້ອງຢຸດຕິການເສີມທາດຢູເຣນຽມລະດັບ 20% ແລະ ຕ້ອງປິດປະຕູໂຮງງານ Fordow ຊຶ່ງແມ່ນແຫ່ງທີ່ຝ່າຍຕາເວັນຕົກສົງໄສວ່າ ພວມຜະລິດຢູເຣນຽມ, ພ້ອມກັນນັ້ນ, ຕ້ອງຍົກຍ້າຍສາງຢູເຣນຽມທັງໝົດ ຖ້າຫາກວ່າມັນບໍ່ຕ້ອງການນຳໃຊ້ແກ່ເປົ້າໝາຍການແພດ.
ສັງເກດກ່ຽວກັບບັນຫານີ້, ຫົວໜ້າຄະນະນັກເຈລະຈານິວເຄຼຍຂອງອີຣານ ທ່ານ Saeed Jalili ຖືວ່າ ບັນດາປະເທດມະຫາອຳນາດຝ່າຍຕາເວັນຕົກພວມນັບມື້ນັບເອົາໃຈໃສ່ເຖິງຄວາມຈິງກ່ວາໃນວິທີສຳພັດກັບບັນຫານິວເຄຼຍຂອງອີຣານ ແລະ ໃຫ້ຮູ້ວ່າ ບັນຫານີ້ອາດຈະຖືກນຳມາປຶກສາຫາລືໃນການເຈລະຈາຕໍ່ໄປດ້ວຍທັດສະນະສ້າງຄວາມເຊື່ອໝັ້ນ. ທ່ານລັດຖະມົນຕີການຕ່າງປະເທດອີຣານ Ali Akbar Salehi ໄດ້ສະແດງຄວາມປະເອີບໃຈກ່ຽວກັບບັນດາການເຈລະຈາໃນອະນາຄົດກັບກຸ່ມ P5 + 1 ພາຍຫຼັງການພົບປະທີ່ມີລັກສະນະປະຫວັດສາດຢູ່ສ.ກາຊັກສະຖານ. ທ່ານລັດຖະມົນຕີການຕ່າງປະເທດອີຣານ Ali Akbar Salehi ຖືວ່າ ໝາກຜົນນີ້, ແມ່ນເພື່ອຜົນປະໂຫຍດໃຫ້ແກ່ທັງ 2 ຝ່າຍ ແລະ ທຸກສິ່ງທຸກຢ່າງແມ່ນພວມຢູ່ໃນຈຸດເວລາເປັນບາດລ້ຽວ. ໃນຂະນະນັ້ນ, ຂ້າຫຼວງໃຫຍ່ສະຫະພາບເອີລົບຮັບຜິດຊອບນະໂຍບາຍປ້ອງກັນຄວາມສະຫງົບ ແລະ ການຕ່າງປະເທດ ທ່ານນາງ Catherine Ashton ສະແດງຄວາມປາຖະໜາ ຈະໄດ້ຮັບປະຕິກິລິຍາຢ່າງຕັ້ງໜ້າຈາກອີຣານທີ່ກ່ຽວຂ້ອງເຖິງຂໍ້ສະເໜີຂອງກຸ່ມ P5 + 1. ຕາມທ່ານນາງ Catherine Ashton ແລ້ວ, ຂໍ້ສະເໜີນີ້ໄດ້ຮັບການປຶກສາຫາລືຢ່າງລະອຽດ ໂດຍພາບໃຕ້ການມອບສິດຈາກສະພາ ຄວາມໝັ້ນຄົງ ສ.ປ.ຊ , ແນໃສ່ສ້າງຄວາມເຊື່ອໝັ້ນ ແລະ ຊຸຸກຍູ້ບັນດາການສົນທະນາ. ບັນດາປະເທດຝ່າຍຕາເວັນຕົກກໍຍອມຮັບວ່າ ການໂຍະຍານຄຳສັ່ງຂວ້າບາດກ່ຽວກັບການດຳເນີນທຸລະກິດຄ້າຂາຍຄຳ ແລະ ໂລຫະປະເສີດພຽງແຕ່ເປັນບາດກ້າວຖ່ອມຕົວພໍສົມຄວນ. ແຕ່ຄຳອາດຈະຖືກນຳໃຊ້ຄືເປັນພາຫະນະຕິດຕໍ່ພົວພັນຄ້າຂາຍ, ດັ່ງນັ້ນຈະຊ່ວຍໃຫ້ອີຣານຫຼຸດພົ້ນອອກຈາກບັນດາຄວາມຫຍຸ້ງຍາກຍ້ອນການລົງໂທດດ້ານການເງິນຂອງອາເມລິກາ ແລະ EU . ລັດເຊຍ ແລະ ຈີນ ກໍລ້ວນແຕ່ໃຫ້ຂໍ້ສັງເກດວ່າ ການເຈລະຈາຄັ້ງນີ້ແມ່ນກົງໄປກົງມາ, ມີຜົນປະໂຫຍດ ແລະ ມີລັກສະນະສ້າງສັນ. ທ່ານລັດຖະມົນຕີການຕ່າງປະເທດອາເມລິກາ John Kerry ພວມທຳການຢ້ຽມຢາມເອີລົບ ກໍໃຫ້ຂໍ້ສັງເກດວ່າ ການເຈລະຈານິວເຄຼຍລະຫວ່າງ ອີຣານ ແລະ ບັນດາປະເທດມະຫາອຳນາດ ເປັນເວລາ 2 ວັນ ແມ່ນມີຜົນປະໂຫຍດຢ່າງແທ້ຈິງ ແລະ ຄຳໝັ້ນສັນຍາຢ່າງເຂັ້ມງວດຂອງປະເທດນີ້ ແມ່ນ ອາດຈະນຳມາເຊິ່ງຂໍ້ຕົກລົງຮອບດ້ານ ແລະ ຍາວນານ. ນອກຈາກນັ້ນ, ທ່ານລັດຖະມົນຕີການຕ່າງປະເທດອາເມລິກາ John Kerry ຍັງລື້ມຄືນວ່າ ວໍຊິງຕັນ ພ້ອມແລ້ວດຳເນີນການເຈລະຈາ 2 ຝ່າຍກັບ ເຕເຣຣານ.
ເຖິງວ່າທັງ 2 ຝ່າຍລ້ວນແຕ່ສະແດງຄວາມປະເອີບໃຈກ່ຽວກັບໝາກຜົນການ ເຈລະຈາ, ແຕ່ ເພື່ອບັນລຸບັນດາຂໍ້ຕົກລົງລະອຽດ ຊຶ່ງເບິ່ງຄືວ່າຍັງມີຄວາມຫຍຸ້ງຍາກຫຼາຍຢ່າງນັ້ນ, ຈຳເປັນຮຽກຮ້ອງໃຫ້ທຸກຝ່າຍຄວນຜ່ອນສັ້ນຜ່ອນຍາວຫຼາຍກ່ວາອີກ. ແຕ່ຫົວໜ້າຄະນະນັກເຈລະຈານິວເຄຼຍຂອງອີຣານ ທ່ານ Saeed Jalili ຍັງຄົງຍຶດໝັ້ນສິດພັດທະນາໂຄງການນິວເຄຼຍຂອງອີຣານເພື່ອຈຸດໝາຍສັນຕິພາບ ແລະ ຖືວ່າ ໂຮງງານ Fordow ໃນປະຈຸບັນ ພວມຢູ່ໃຕ້ການຄວບຄຸມຂອງອົງການນິວເຄຼຍ ສ.ປ.ຊ, ດັ່ງນັ້ນ ຈະບໍ່ມີເຫດຜົນຫຍັງເພື່ອປິດປະຕູໂຮງງານແຫ່ງນີ້.
ການເຈລະຈາບັນຫານິວເຄຼຍຂອງອີຣານຢູ່ສ.ກາຊັກສະຖານ ເຖິງວ່າບໍ່ບັນລຸບາດກ້າວບຸກທະລຸກໍຕາມ,ແຕ່ເປັນທີ່ຈະແຈ້ງແລ້ວວ່າ ໄດ້ມີຄວາມກ້າວໜ້າ, ຊ່ວຍໃຫ້ບັນດາຝ່າຍທີ່ເຂົ້າຮ່ວມມີຄວາມຫວັງກ່ຽວກັບສິ່ງທີ່ຕັ້ງໜ້າໃນຮອບເຈລະຈາຕໍ່ໄປ. ສັນຍານທີ່ດີເປັນການບົ່ງບອກກ່ຽວກັບຄວາມສາມາດແກ້ໄຂສະພາບ ບໍ່ມີທາງອອກກ່ຽວກັບບັນຫານິວເຄຼຍຂອງອີຣານ.