(vovworld) - ພາຍໃຕ້ການຊີ້ນຳຂອງພັກກອມມູນິດຫວຽດນາມ, 86 ກວ່າປີທີ່ຜ່ານມາ, ຫວຽດນາມສາມາດຍາດໄດ້ຜົນງານຫຼາຍຢ່າງບົນເສັ້ນທາງສ້າງສາ ແລະ ປົກປັກຮັກສາປະເທດຊາດ. ໃນບັນດາຜົນງານດັ່ງກ່າວ, ມີຜົນງານຂອງ 30 ປີແຫ່ງການປ່ຽນໃໝ່ (1986 – 2016). ສືບຕໍ່ຜົນງານດັ່ງກ່າວ, ໃນປີ 2016 ແລະ ໃນຊຸມປີຕໍ່ໆໄປ, ພັກກອມມູນິດຫວຽດນາມສືບຕໍ່ຊີ້ນຳນຳພາປະເທດຊາດຕາມແນວທາງປ່ຽນໃໝ່ຢ່າງຮອບດ້ານ ແລະ ຄົບຊຸດກວ່າ ເພື່ອສ້າງທ່ວງທ່າ ແລະ ກຳລັງແຮງໃໝ່ໃຫ້ແກ່ ຫວຽດນາມ.
ທ່ານເລຂາທິການໃຫຍ່ ຫວຽນຟູ່ຈ້ອງ ກ່າວປາໄສທີ່ກອງປະຊຸມໃຫຍ່ຄັ້ງທີ 12 ຂອງພັກ
(ພາບ: ອິນເຕີແນດ)
30 ປີແຫ່ງການປ່ຽນໃໝ່, ຫວຽດນາມບັນລຸໄດ້ຜົນງານອັນໃຫຍ່ຫຼວງ ແລະ ມີຄວາມໝາຍປະຫວັດສາດຫຼາຍຢ່າງບົນເສັ້ນທາງກໍ່ສ້າງສັງຄົມນິຍົມ ແລະ ປົກປັກຮັກສາປະເທດຊາດ. ຜົນງານ 30 ປີແຫ່ງການປ່ຽນໃໝ່ໄດ້ຢືນຢັນໃຫ້ເຫັນວ່າ, ແນວທາງປ່ຽນໃໝ່ຂອງພັກກອມມູນິດຫວຽດນາມແມ່ນຖືກຕ້ອງ, ມີຫົວຄິດປະດິດສ້າງ; ເສັ້ນທາງກ້າວຂຶ້ນສັງຄົມນິຍົມຂອງຫວຽດນາມແມ່ນເໝາະສົມກັບພຶດຕິກຳຕົວຈິງຂອງປະເທດຊາດ ແລະ ທ່າອ່ຽງພັດທະນາຂອງປະຫວັດສາດ.
ຄວາມຈິງແລ້ວ, ວິວັດແຫ່ງການປ່ຽນໃໝ່ຍັງມີສິ່ງທີ່ຍັງຄົງຄ້າງຫຼາຍຢ່າງ, ບໍ່ທັນຄົບຊຸດ, ແລະ ຮອບດ້ານ, ມີຫຼາຍຄາດໝາຍ, ມາດຖານໃນຄາດໝາຍສູ້ຊົນເພື່ອຮອດປີ 2020 ຫວຽດນາມຈະກາຍເປັນປະເທດອຸດສາຫະກຳຕາມທິດທັນສະໄໝໂດຍພື້ນຖານແມ່ນບໍ່ທັນບັນລຸໄດ້.
ການປ່ຽນໃໝ່ຢ່າງຮອບດ້ານ ແລະ ຄົບຊຸດ
ຕາມຄາດຄະເນແລ້ວ, ສະພາບໂລກ ແລະ ພາກພື້ນໃນຊຸມປີຈະມາເຖິງຍັງມີການຜັນແປສັບສົນຫຼາຍຢ່າງທີ່ກະທົບໂດຍກົງເຖິງຫວຽດນາມ. ພັກກອມມູນິດ ຫວຽດນາ ກຳນົດຈະຊີ້ນຳນຳພາປະເທດໃຫ້ພັດທະນາຢ່າງຮອບດ້ານ, ຄົບຊຸດກວ່າ. ຮອງສາສະດາຈານ, ດຣ. ຫງວຽນວຽດທົງ, ເລຂາທິການໃຫຍ່ສະພາທິດສະດີສູນກາງ, ໄຈ້ແຍກວ່າ.
“ຮອບດ້ານແມ່ນນັບທັງດ້ານການເມືອງ, ເສດຖະກິດ, ວັດທະນະທຳສັງຄົມ, ການປ້ອງກັນຊາດປ້ອງກັນຄວາມສະຫງົບ, ການຕ່າງປະເທດ. ຄົບຊຸດແມ່ນໃນທຸກຂົງເຂດ, ຕ້ອງປ່ຽນໃໝ່ຈາກຂັ້ນສູນກາງລົງຂັ້ນຮາກຖານ, ໃນທຸກຂັ້ນ, ທຸກຂະແໜງ. ຕົວຢ່າງຄືໃນຂົງເຂດເສດຖະກິດ, ຕ້ອງເນັ້ນໜັກເຖິງການປ່ຽນໃໝ່ຮູບແບບເຕີບໂຕ, ສ້າງໂຄງປະກອບເສດຖະກິດຄືນໃໝ່, ປັບປຸງພື້ນຖານເສດຖະກິດການຕະຫຼາດຕາມກຳນົດທິດສັງຄົມນິຍົມ; ຍູ້ແຮງການຫັນເປັນອຸດສາຫະກຳ, ແລະທັນສະໄໝໃນສະພາບປະຈຸບັນ“.
ນຳໃຊ້ກາລະໂອກາດ, ຜ່ານຜ່າການທ້າທາຍ
ກ່ຽວກັບທາງດ້ານເສດຖະກິດ, ສະພາບການໃໝ່ໄດ້ສ້າງກາລະໂອກາດໃຫຍ່ຫຼາຍຢ່າງເມື່ອ ຫວຽດນາມເຂົ້າຮ່ວມປະຊາຄົມອາຊຽນ, ເຊິ່ງແມ່ນພາກພື້ນພັດທະນາຢ່າງຂະຫຍັນຂັນເຂື່ອນ, ເຂົ້າຮ່ວມບັນດາສັນຍາການຄ້າເສລີ (FTA) ລຸ້ນໃໝ່…, ແຕ່ການທ້າທາຍ, ຄວາມຫຍຸ້ງຍາກຍັງຫຼາຍທີ່ສຸດ. ຕີລາຄາ, ສະຫຼຸບ 30 ປີແຫ່ງການປ່ຽນໃໝ່, ພັກກອມມູນິດຫວຽດນາມໃຫ້ຂໍ້ສັງເກດວ່າ, ໄພຖອຍຫຼັງດ້ານເສດຖະກິດເມື່ອທຽບໃສ່ບັນດາປະເທດໃນພາກພື້ນ ແລະ ໂລກຍັງມີຢູ່. ເພື່ອໃຫ້ປະເທດຊາດພັດທະນາຢ່າງໄວແມ່ນຕ້ອງສຸມໃສ່ດ້ານເສດຖະກິດ. ແຕ່ຂອບຂະໜາດເສດຖະກິດຍັງໜ້ອຍຢູ່, ຄຸນນະພາບ, ປະສິດທິຜົນຍັງຕຳ່ ແລະ ຍັງອີງໃສ່ເສດຖະກິດຊັບພະຍາກອນ, ສະມັດຕະພາບແຮງງານຍັງຕຳ່ຢູ່. ດັ່ງນັ້ນພັກກອມມູນິດ ຫວຽດນາມກຳນົດວ່າຕ້ອງປ່ຽນໃໝ່ຮູບແບບເຕີບໂຕ ແລະ ສ້າງໂຄງປະກອບພື້ນຖານເສດຖະກິດຄືນໃໝ່ໃຫ້ເໝາະສົມກັບສະພາບການໃໝ່. ທ່ານ ເລຂາທິການໃຫຍ່ ຫງວຽນຟູ໋ຈ້ອງ ຊີ້ແຈ້ງວ່າ:
“ສືບຕໍ່ການປ່ຽນໃໝ່ ແລະ ມີຫົວຄິດປະດິດສ້າງໃນການຊີ້ນຳນຳພາ, ການຄຸ້ມຄອງ. ສຸມໃສ່ປັບປຸງລະບອບເສດຖະກິດການຕະຫຼາດຕາມກຳນົດທິດສັງຄົມນິຍົມ, ປະຕິບັດຢ່າງຄົບຖ້ວນ, ຄົບຊຸດ, ມີປະສິດທິຜົນຕາມກົດເກນເສດຖະກິດການຕະຫຼາດ. ຮັບປະກັນພັດທະນາຢ່າງໄວ, ໝັ້ນຄົງບົນພື້ນຖານຮັບປະກັນເສດຖະກິດມະຫາພາກເປັນປົກກະຕິ, ຍົກສູງສະມັດຕະພາບ, ຄຸນນະພາບ, ປະສິດທິຜົນ ແລະ ກຳລັງແກ່ງແຍ້ງຢ່າງບໍ່ຢຸດຢັ້ງ“.
ໄປຄຽງຄູ່ກັບການສືບຕໍ່ປ່ຽນໃໝ່ຮູບແບບເຕີບໂຕ, ສ້າງໂຄງປະກອບພື້ນຖານເສດຖະກິດຄືນໃໝ່, ຍູ້ແຮງການຫັນເປັນອຸດສາຫະກຳ ແລະ ທັນສະໄໝ. ພັກກອມມູນິດຫວຽດນາມກໍ່ເອົາໃຈໃສ່ເຖິງການພັດທະນາເສດຖະກິດຕິດພັນກັບບັນດາຂົງເຂດອື່ນໆ.
“ແກ້ໄຂຄາດໝາຍໃນຕໍ່ໜ້າ ແລະ ຍາວນານຢ່າງກົມກຽວ, ລະຫວ່າງການພັດທະນາເສດຖະກິດກັບການຮັບປະກັນປ້ອງກັນຊາດ, ປ້ອງກັນຄວາມສະຫງົບ; ລະຫວ່າງການເຕີບໂຕເສດຖະກິດ ແລະ ການພັດທະນາວັດທະນະທຳ, ການປະຕິບັດຄວາມກ້າວໜ້າ ແລະ ຄວາມຍຸຕິທຳໃນສັງຄົມ, ຮັກສາສິ່ງແວດລ້ອມ, ຍົກສູງຊີວິດທາງດ້ານວັດຖຸ ແລະ ຈິດໃຈຂອງປະຊາຊົນ; ກໍ່ສ້າງພື້ນຖານກະສິກຳຕາມທິດຜະລິດເປັນສິນຄ້າຂະໜາດໃຫຍ່, ນຳໃຊ້ເຕັກໂນໂລຢີສູງ; ຍົກສູງຄຸນນະພາບຜະລິດຕະພັນ; ສຸມໃສ່ພັດທະນາບາງຂະແໜງບໍລິການທີ່ມີທ່າສະດວກ, ນຳໃຊ້ພູມປັນຍາ ແລະ ເຕັກໂນໂລຢີສູງ“.
ພັກກອມມູນິດ ຫວຽດນາມກຳນົດສືບຕໍ່ປ່ຽນໃໝ່ບັນດາປັດໃຈພື້ນຖານຂອງການສຶກສາຢ່າງແຮງ, ຄົບຊຸດຕາມທິດຖືເປັນສຳຄັນການພັດທະນາຄຸນນະທາດ, ກຳລັງຄວາມສາມາດຂອງນັກຮຽນ; ເອົາໃຈໃສ່ພັດທະນາວິທະຍາສາດ, ເຕັກໂນໂລຢີຢ່າງແຮງ ເພື່ອໃຫ້ວິທະຍາສາດ, ເຕັກໂນໂລຢີກາຍເປັນກຳລັງໜູນສຳຄັນທີ່ສຸດໃຫ້ແກ່ການພັດທະນາກຳລັງຜະລິດທີ່ທັນສະໄໝຢ່າງແທ້ຈິງ.
“ສຸມໃສ່ການລົງທຶນພັດທະນາ, ນຳໃຊ້ວິທະຍາສາດ - ເຕັກໂນໂລຢີໄດ້ຮັບບຸລິມາສິດໃນການເຄື່ອນໄຫວຂອງທຸກຂະແໜງ, ທຸກຂັ້ນ. ສືບຕໍ່ການປ່ຽນໃໝ່ກົນໄກການຄຸ້ມຄອງ, ການຈັດຕັ້ງ, ການເຄື່ອນໄຫວວິທະຍາສາດ ແລະ ເຕັກໂນໂລຢີ, ໂດຍສະເພາະແມ່ນກົນໄກການຄຸ້ມຄອງ, ແບບວິທີລົງທຶນ, ກົນໄກການເງິນຢ່າງແຮງ ແລະ ຄົບຊຸດ ເພື່ອນຳຄວາມກ້າວໜ້າດ້ານວິທະຍາສາດ - ເຕັກໂນໂລຢີເຂົ້າໃນການເຄື່ອນໄຫວຕົວຈິງຢ່າງແຮງ. ສູ້ຊົນຮອດປີ 2020, ວິທະຍາສາດ ແລະ ເຕັກໂນໂລຢີຂອງ ຫວຽດນາມບັນລຸລະດັບພັດທະນາຂອງກຸ່ມບັນດາປະເທດນຳໜ້າອາຊຽນ; ແລະຮອດປີ 2030, ມີບາງຂົງເຂດບັນລຸລະດັບກ້າວໜ້າໃນໂລກ“.
ເພື່ອເຮັດໃຫ້ວິວັດແຫ່ງການປ່ຽນໃໝ່ຢ່າງຮອບດ້ານ ແລະ ຄົບຊຸດສຳເລັດຜົນ, ພັກກອມມູນິດ ຫວຽດນາມຢືນຢັນຖືເປັນສຳຄັນການເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນທັງຊາດ. ຕາມນັ້ນແລ້ວ, ພັກຈະເອົາໃຈໃສ່ເປັນພິເສດເຖິງການກໍ່ສ້າງ, ເສີມຂະຫຍາຍບົດບາດຂອງຊົນຊັ້ນກຳມະກອນ, ຊົນຊັ້ນຊາວນາ, ຖັນແຖວປັນຍາຊົນ, ຖັນແຖວນັກທຸລະກິດທີ່ຕອບສະໜອງຄວາມຮຽກຮ້ອງພັດທະນາປະເທດຊາດໃນໄລຍະໃໝ່; ປະຕິບັດກົດໝາຍ, ນະໂຍບາຍຊົນຊາດ, ສາສະໜາ, ນະໂຍບາຍສຳລັບຊາວຕ່າງປະເທດອາໄສຢູ່ ຫວຽດນາມເປັນຢ່າງດີ.
ການພັດທະນາຢ່າງຮອບດ້ານ ແລະ ຄົບຊຸດ ແມ່ນເສັ້ນທາງຕັດສິນຊີ້ຂາດ ເພື່ອໃຫ້ ຫວຽດນາມພັດທະນາຢ່າງໝັ້ນຄົງ. ດ້ວຍຄວາມຕັດສິນໃຈ, ເປັນຈິດໜຶ່ງໃຈດຽວຂອງທົ່ວປວງຊົນໃນໄລຍະປ່ຽນໃໝ່ຂອງລະດູບານໃໝ່ປີວອກນີ້, ດ້ວຍຄາດໝາຍນຳ ຫວຽດນາມກາຍເປັນປະເທດອຸດສາຫະກຳຕາມທິດທັນສະໄໝໃຫ້ປະກົດຜົນເປັນຈິງໂດຍໄວ.