(vovworld)- ຢູ່ ຫວຽດນາມ ພວມດຳເນີນການເຄື່ອນໄຫວຫລາຍຢ່າງເພື່ອມຸ່ງໄປສູ່ການສະເຫລີມສະຫລອງ 90 ປີ ແຫ່ງວັນສື່ມວນຊົນປະຕິວັດຫວຽດນາມ (21/6/1925-21/6/2015). ໃນຊຸມປີຜ່ານມາ, ສື່ມວນຊົນປະຕິວັດ ຫວຽດນາມ ໄດ້ພັດທະນາຢ່າງກ້າວກະໂດດ, ປະກອບສ່ວນຊຸກຍູ້ພາລະກິດປ່ຽນໃຫມ່, ເຊື່ອມໂຍງ ແລະ ພັດທະນາຂອງປະເທດຊາດ.ໃນລາຍການສະຖານະການການເມືອງພາກນີ້ ພວກເຮົາຂໍແນະນຳບົດທີ່ມີຫົວຂໍ້ວ່າ: ສື່ມວນຊົນປະຕິວັດຫວຽດນາມພັດທະນາພ້ອມກັບປະເທດຊາດ.
ພາບປະກອບ:edu.vn
|
ໃນຊຸມປີຜ່ານມາ, ສື່ມວນຊົນປະຕິວັດຫວຽດນາມ ໄດ້ມີການພັດທະນາຢ່າງວ່ອງໄວນັບທັງຈຳນວນ, ຮູບການ, ສິ່ງພິມ, ຖັນແຖວນັກຂ່າວ, ຜູ້ອ່ານຜູ້ຊົມ, ພື້ນຖານທາງດ້ານວັດຖຸເຕັກນິກ, ເຕັກໂນໂລຊີ, ກຳລັງຄວາມສາມາດດ້ານການເງິນ. ຄຽງຄູ່ກັນນັ້ນ, ການກະທົບ ແລະ ຜົນສະທ້ອນຈາກສັງຄົມຂອງບັນດາອົງການ ສື່ມວນຊົນ, ສື່ສານ ລ້ວນແຕ່ເພີ່ມຂຶ້ນຢ່າງວ່ອງໄວ. ບັນດາກະຊວງ, ຂະແຫນງການຈາກສູນກາງລົງຮອດທ້ອງຖິ່ນ, ບັນດາສະມາຄົມວິຊາຊີບ, ເພດໄວ, ສາດສະຫນາໃຫຍ່, ບັນດາພາກສ່ວນໃນສັງຄົມລ້ວນແຕ່ມີສື່ມວນຊົນສະເພາະຂອງຕົນ.
ສື່ມວນຊົນປະຕິວັດຫວຽດນາມແມ່ນເວທີປາໄສປົກປ້ອງຜົນປະໂຫຍດ ແລະ ສິດເສລີຂອງປະຊາຊົນ
ມາຮອດປະຈຸບັນ, ທົ່ວປະເທດມີ ມີ 812 ອົງການຫນັງສືພິມ ດ້ວຍ 1.084 ສິ່ງພິມ, ໃນນັ້ນ 197 ອົງການມີຫນັງສືພິມ, 615 ອົງການມີວາລະສານ. ທົ່ວປະເທດມີ ວິທະຍຸກະຈາຍສຽງ ແລະ ໂທລະພາບສູນກາງ ແລະ ທ້ອງຖິ່ນ 67 ແຫ່ງ, ໃນນັ້ນ ວິທະຍຸກະຈາຍສຽງແຫ່ງຊາດ- ໂທລະພາບ 2 ແຫ່ງ, ໂທລະພາບດີຈີທອນ 1 ແຫ່ງ, ວິທະຍຸກະຈາຍສຽງ ແລະ ໂທລະພາບຂັ້ນແຂວງ 64 ແຫ່ງ, 172 ຊ່ອງລາຍການກະຈາຍສຽງ ແລະ ໂທລະພາບໂຄສະນາ. ໃນຂົງເຂດສື່ເອເລັກໂຕນິກ, ທົ່ວປະເທດມີ 74 ສື່ເອເລັກໂຕນິກ, ວາລະສານເອເລັກໂຕນິກ , 336 ສື່ສັງຄົມອອນລາຍ, 1.174 ສື່ເອເລັກໂຕນິກສັງລວມ. ມີສະມາຊິກສະມາຄົມນັກຂ່າວ 19.000 ຄົນ, ໃນນັ້ນ ນັກຂ່າວເກືອບ 17.000 ຄົນໄດ້ຮັບບັດຢັ້ງຢືນອາຊີບ, ຍາມໃດກໍໄດ້ຮັບການສົ່ງເສີມ ແລະ ສ້າງເງື່ອນໄຂສະດວກເພື່ອເຄືື່ອນໄຫວຢ່າງເສລີ, ມີຫົວຄິດປະດິດສ້າງໃນຂອບເຂດກົດໝາຍ.
ຢູ່ຫວຽດນາມ ສື່ມວນຊົນປະຕິວັດກາຍເປັນເວທີປາໄສຢ່າງແທ້ຈິງ ແລະ ແມ່ນເຄື່ອງມືສຳຄັນປົກປ້ອງສິດຜົນປະໂຫຍດ ແລະ ສິດເສລີຂອງປະຊາຊົນທຸກຊັ້ນວັນນະ. ປະຊາຊົນທຸກຄົນ ລ້ວນແຕ່ ມີສິດສະເຫນີຄວາມມຸ້ງມາດປາດຖະຫນາ, ກ່າວຄຳເຫັນ ແລະ ປະກອບຄຳເຫັນໃນທຸກຂົງເຂດຂອງຊີວິດສັງຄົມ ຜ່ານບັນດາພາຫະນະສື່ມວນຊົນ, ໃນນັ້ນ ມີສື່ມວນຊົນ. ພ້ອມກັນນັ້ນ ເມື່ອເຂົ້າຮ່ວມການດຳເນີນຊີວິດ, ການເຄື່ອນໄຫວຢູ່ບັນດາອົງການ, ອົງການຈັດຕັ້ງມະຫາຊົນ ເຂົາເຈົ້າຍັງມີບັນດາສື່ສິ່ງພິມຂອງບັນດາອົງການຈັດຕັ້ງມະຫາຊົນເຫລົ່ານັ້ນ, ເພື່ອຕອບສະຫອນງທຸກຄວາມຕ້ອງການ ແລະ ຮັບປະກັນສິດໄດ້ຮັບຂ່າວຂອງຕົນ.
ສື່ມວນຊົນໄດ້ສ້າງກອບກົດໝາຍເພື່ອພັດທະນາຢ່າງເສລີ
ນັບແຕ່ເມື່ອພັກກອມມູນິດຫວຽດນາມ ລິເລິ່ມ, ຊີ້ນຳກິດຈະການປ່ຽນແປງໃຫມ່ປະເທດຊາດ ແລະ ເຊື່ອມໂຍງເຂົ້າກັບສາກົນ, ລັດຫວຽດນາມ ນັບມື້ນັບຖືບັນຫາເສລີພາບ, ເປີດເຜີຍ, ໂປ່ງໃສ, ສື່ຂ່າວ ເປັນສຳຄັນ ແລະ ສ້າງເງື່ອນໄຂສະດວກທີ່ສຸດເພື່ອໃຫ້ບັນດາພາຫະນະສື່ມວນຊົນດດຳເນີນອາຊີບ. ຫນຶ່ງໃນບັນດາການເຄື່ອນໄຫວໄດ້ຮັບການຕີລາຄາສູງຈາກຫາງສຽງພາຍໃນປະເທດ ແລະ ສາກົນ ໃນຫລາຍປີຜ່ານມາ, ນັ້ນແມ່ນ ບັນດາສະຖານີວິທະຍຸ, ໂທລະພາບຖ່າຍທອດສົດບັນດາວາລະຊັກຖາມຂອງ ສະມາຊິກສະພາແຫ່ງຊາດ ຕໍ່ບັນດາສະມາຊິກລັດຖະບານ, ນັບທັງນາຍົກລັດຖະມົນຕີ. ບັນດາກອງປະຊຸມຫົວເລື່ອງສະເພາະຂອງຄະນະປະຈຳສະພາແຫ່ງຊາດ, ການຕອບຄຳຊັກຖາມທີ່ບັນດາສະໄຫມປະຊຸມຂອງສະພາປະຊາຊົນບັນດາແຂວງ, ນະຄອນໃນທົ່ວປະເທດ ກໍໄດ້ຮັບການຖ່າຍທອດສົດທາງພາຫະນະສື່ມວນຊົນ. ປະຕິບັດມະຕິກອງປະຊຸມຄັ້ງທີ 4 ຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ 11, ລັດຖະມົນຕີ ທັງໝົດ ລ້ວນແຕ່ເຂົ້າຮ່ວມເວທີປາໄສ “ປະຊາຊົນຖາມ ລັດຖະມົນຕີຕອບ” ຢ່າງເຂັ້ມງວດ ລ້ວນແຕ່ຖ່າຍທອດທາງພາຫະນະສື່ມວນຊົນເປັນປະຈຳ.
ຕອບສະຫນອງຄວາມຮຽກຮ້ອງຕ້ອງການໃຫມ່ຂອງປະຊາຊົນກ່ຽວກັບການເພີ່ມທະວີລັກສະນະເປີດເຜີຍ, ໂປ່ງໃສຂອງການສື່ຂ່າວ, ນາຍົກລັດຖະມົນຕີ ຍັງປະກາດໃຊ້ຂໍ້ກຳນົດກົນໄກລະອຽດກ່ຽວກັບການປາກເວົ້າ, ການສະຫນອງຂ່າວຄາວໃຫ້ສື່ມວນຊົນຂອງບັນດາກະຊວງ, ອົງການທຽບເທົ່າກະຊວງ, ອົງການຂຶ້ນກັບລັດຖະບານ, ຄະນະກຳມະການປະຊາຊົນບັນດາແຂວງ , ນະຄອນຂຶ້ນກັບສູນກາງ ຕາມບັນດາຂໍ້ກຳນົດຂອງກົດໝາຍ ແລະ ເຄື່ອນໄຫວສື່ມວນຊົນປະຈຸບັນ. ຕາມນັ້ນແລ້ວ, ຫ້ອງວ່າການລັດຖະບານ ຈັດຕັ້ງການສະຫອນງຂໍ້ມູນຂ່າວສານໃຫ້ສື່ມວນຊົນເປັນປະຈຳເດືອນ/ເທື່ອ ກ່ຽວກັບການເຄື່ອນໄຫວ, ຊີ້ນຳວຽກງານບໍລິຫານຂອງລັດຖະບານ. ບັນດາອົງການກະຊວງ, ອົງການທຽບເທົ່າກະຊວງ, ອົງການຂຶ້ນກັບລັດຖະບານ, ຄະນະກຳມະການປະຊາຊົນບັນດາແຂວງ, ນະຄອນ ຂຶ້ນກັບສູນກາງຈັດຕັ້ງການສະຫນອງຂໍ້ມູນຂ່າວໃຫ້ສື່ມວນຊົນກ່ຽວກັບການເຄື່ອນໄຫວຂອງອົງການຕົນໃນແຕ່ລະເດືອນ ແລະຈັດຕັ້ງການປະຊຸມຂ່າວຢ່າງຫນ້ອຍສຸດ 3 ເດືອນ/ເທື່ອຫນືຶ່ງ. ບັນດາອົງການນີ້ ກໍມີຄວາມຮັບຜິດຊອບສະຫນອງຂໍ້ມູນຂ່າວສານຢ່າງທັນການກ່ຽວກັບບັນດາສິ່ງທີ່ປະຊາຊົນສົນໃຈ ແລະ ຕອບຄຳຖາມຂອງປະຊາຊົນຜ່ານລາຍການ “ຄຳເຫັນຂອງຜູ້ອ່ານ” ຫລື “ຄຳເຫັນຂອງຜູ້ຟັງ” ຂອງວິທະຍຸ,ສື່ມວນຊົນຫລາຍແຫ່ງ.
ດ້ວຍບົດບາດສ່ອງແສງ ແລະ ເຂົ້າຮ່ວມການໄຈ້ແຍກສັງຄມ, ສື່ມວນຊົນປະຕິວັດ ຫວຽດນາມ ນັບມື້ນັບກາຍເປັນຊ່ອງຂໍ້ມູນຂ່າວສຳຄັນ ເພື່ອໃຫ້ບັນດາອົງການກ່ຽວຂ້ອງທາບທາມເພື່ອເພີ່ມເຕີມ, ປັບປຸງແນວທາງ, ແຜນນະໂຍບາຍຂອງພັກ, ນະໂຍບາຍກົດໝາຍຂອງລັດໃຫ້ສົມບູນແບບ ເຮັດແນວໃດໃຫ້ສອດຄອ່ງກວ່າໃນຊີວິດຂອງປະຊາຊົນ. ພ້ອມກັບການຄົ້ນພົບ, ຍ້ອງຍໍບຸກຄົນໃຫມ່, ແບບຢ່າງວຽກດີຄົນເດັ່ນ, ສື່ມວນຊົນກໍຕັ້ງຫນ້າເຂົ້າຮ່ວມການຕໍ່ສູ້ຢ່າງມີປະສິດທິຜົນໃນວຽກງານຕ້ານການສໍ້ລາດບັງຫລວງ, ອາດຍາສິດ ແລະບັນດາໄພສັງຄົມ ແລະ ໄດ້ຮັບຄວາມເຫັນດີເຫັນພ້ອມ, ສະຫນັບສະຫນູນຈາກປະຊາຊົນ.
ຄວາມຈິງໃນ 90 ປີແຫ່ງການພັດທະນາແມ່ນສະແດງໃຫ້ເຫັນວ່າ ສື່ມວນຊົນປະຕິວັດ ໄດ້ສ້າງກອບກົດໝາຍເພື່ອເຄື່ອນໄຫວຢ່າງເສລີ, ນັບມື້ນັບບັນລຸບັນດາຜົນງານໃຫຍ່ ແລະ ປະກອບສ່ວນຢ່າງຕັ້ງຫນ້າເຂົ້າໃນພາລະກິດສ້າງສາ ແລະ ພັດທະນາປະເທດຊາດ.