(vovworld)- ເລື່ອງຈີນ ຕັ້ງຮ້ານເຈາະນ້ຳມັນໄຮຢ່າງ 981 ໃນເຂດເສດຖະກິດຈຳເພາະ ແລະ ເຂດໄຫລ່ທະວີບ ຂອງຫວຽດນາມ ກ່ອນນີ້ ກວ່າ 1 ເດືອນ ເຮັດໃຫ້ປະຊາຊົນຫວຽດນາມ ທຸກຊັ້ນວັນນະ ຂັດໃຈ. ໄດ້ເກີດການແຫ່ຂະບວນຄັດຄ້ານ ຈຳນວນຫນຶ່ງ ຖືກບັນດາກຸ່ມຄົນບໍ່ດີສວຍໃຊ້ເພື່ອປະຕິບັດການກະທຳທຳລາຍຊັບສິນຂອງບັນດາວິສາຫະກິດ, ທຳລາຍສະພາບແວດລ້ອມແຫ່ງການລົງທຶນຂອງຫວຽດນາມ. ດ້ວຍຄວາມມານະພະຍາຍາມຫລາຍຢ່າງຂອງລັດຖະບານ ແລະ ບັນດາທ້ອງຖິ່ນໄດ້ເຮັດໃຫ້ການຜະລິດຢູ່ບັນດາວິສາຫະກິດກັບຄືນສູ່ເຄື່ອນໄຫວເປັນປົກກະຕິ.
ພາບປະກອບ:internet
|
ພາຍຫລັງເກີດເຫດການດັ່ງກ່າວ, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ໄດ້ເປັນປະທານກອງປະຊຸມຫລາຍຄັ້ງກັບບັນດາກະຊວງ, ຂະແຫນງການ ແລະ ທ້ອງຖິ່ນກ່ຽວຂ້ອງ ເພື່ອຊີ້ນຳໂດຍກົງແກ້ໄຂເຫດການ. ມາຮອດປະຈຸບັນ, ທ່ານນາຍົກລັດຖະມົນຕີ ໄດ້ອອກ 4 ຄຳສັ່ງ ຮຽກຮ້ອງທຸກກະຊວງ, ຂະແຫນງການ ແລະ ທ້ອງຖິ່ນນຳໃຊ້ບັນດາມາດຕະການລະອຽດ, ຂ້ຽວຂາດ,ແກ້ໄຂກໍລະນີຢ່າງເຖິງຖອງ. ການນຳບັນດາກະຊວງ, ຂະແຫນງການ, ທ້ອງຖິ່ນກ່ຽວຂ້ອງຂອງຫວຽດນາມ ໄດ້ລົງສະຖານທີ່ເກີດເຫດເພື່ອຢື້ຢາມຖາມຂ່າວບັນດາວິສາຫະກິດ, ພາລະກອນຕ່າງປະເທດ ແລະ ຫວຽດນາມ ທ່ີຖືກເສຍຫາຍກໍຄືແລກປ່ຽນບັນດາມາດຕະການແກ້ໄຂຜົນຮ້າຍຢ້ອນຫລັງ, ຟື້ນຟູການຜະລິດ. ເມື່ອລົງຢ້ຽມຢາມ ແລະ ຊອກຮູ້ສະພາບການຢູ່ບັນດາວິສາຫະກິດມີເງິນລົງທຶນຂອງຕ່າງປະເທດ ທີ່ຂຶ້ນກັບເຂດອຸດສາຫະກຳ ຂອງແຂວງ ບິ່ງເຢືອງ, ຊື່ງຖືກເສຍຫາຍຢ່າງຫນັກຫນ່ວງກວ່າໝູ່ເມື່ອເກີດເຫດການດັ່ງກ່າວ,ທ່ານປະທານປະເທດ ຫວຽດນາມ ເຈືອງເຕີນຊາງ ໄດ້ຢືນຢັນແຜນນະໂຍບາຍສະເຫມີຕົ້ນສະຫມີປາຍຂອງພັກ, ລັດ ຫວຽດນາມ ແມ່ນຮັບປະກັນຄວາມປອດໄພໃຫ້ແກ່ບັນດານັກລົງທຶນ.
ບັນດາມາດຕະການຕົວຈິງ,ທັນການ.
ເພື່ອຊ່ວຍເຫລືອບັນດານັກລົງທຶນຕ່າງປະເທດຢ່າງແທດຈິງ,ລັດຖະບານຫວຽດນາມ ໝັ້ນໝາຍ ຍົກເວັ້ນ ແລະ ຫລຸດຜ່ອນພາສີ, ຄ່າເຊົ່າທີ່ດິນ ແລະ ຊ່ວຍເຫລືອເຂົາເຈົ້າກ່ຽວກັບບັນຫາແຮງງານ. ຕາມນັ້ນແລ້ວ, ກະຊວງການເງິນ ຈະສົ່ງຄືນເງິນເສຍພາສີອາກອນໃຫ້ແກ່ບັນດາວິສາຫະກິດທີ່ມີຜະລິດຕະພັນ, ບໍລິການຖືກເສຍຫາຍ ພ້ອມທັງຫລຸດຜ່ອນ ອາກອນຈຳຫນ່າຍສິນຄ້າພິເສດຕຳ່ສຸດ 30% ຊື່ງບັນດາວິສາຫະກິດຕ້ອງມອບໃນປີ 2014. ຄະນະກຳມະການປະຊາຊົນບັນດາແຂວງ,ນະຄອນ ກໍຍົກເວັ້ນ, ຫລຸດຜ່ອນຄ່າເຊົ່າທີ່ດິນສຳລັບບັນດາວິສາຫະກິດຖືກເສຍຫາຍ. ກະຊວງແຮງງານ,ທະຫານເສຍອົງຄະ ແລະ ສັງຄົມ ຕ້ອງຮັບຜິດຊອບແຫລ່ງຄົນງານທີ່ຂາດແຄນ ແລະ ກະຊວງຕຳຫລວດ ສ້າງເງື່ອນໄຂສະດວກເພື່ອອອກວິຊາ ເຂົ້າເມືອງໃຫ້ແກ່ນັກລົງທຶນ ແລະ ຄົນງານຕ່າງປະເທດເຂົ້າຫວຽດນາມ ສຳລັບບັນດາບໍລິສັດຖືກເສຍຫາຍຢ່າງວ່ອງໄວ. ລັດຖະບານຫວຽດນາມ ກໍສະເຫນີບັນດາທ້ອງຖິ່ນ ຕີລາຄາສະພາບການຖືກເສຍຫາຍຂອງບັນດາວິສາຫະກິດຕ່າງປະເທດ ເພື່ອແບ່ງເບົາຄວາມເສຍຫາຍຢ່າງທັນການ. ທ່ານ ໂດເຍີດຮ່ວາງ, ຫົວຫນ້າກົມລົງທຶນຕ່າງປະເທດ, ສັງກັດກະຊວງແຜນການ ແລະ ການລົງທຶນຫວຽດນາມ ຢືນຢັນວ່າ:
“ລັດຖະບານ ໄດ້ຊີ້ນຳບັນດາກະຊວງ, ຂະແຫນງການ ແລະ ທ້ອງຖິ່ນ ສົມທົບກັນຢ່າງແຫນ້ນແຟ້ນ ເພື່ອຕິດຕາມສະພາບການ ແລະ ປະຈຸບັນ ບັນດາທ້ອງຖິ່ນ ແລະ ອົງການກ່ຽວຂ້ອງ ພວມສົມທົບກັນເພື່ອຫນູນຊ່ວຍສິ່ງທີ່ຈຳເປັນໃຫ້ແກ່ບັນດາວິສາຫະກິດ, ບັນດານັກລົງທຶນເວົ້າລວມ ເພື່ອນຳການຜະລິດກັບຄືນສູ່ຄວາມເປັນປົກກະຕິໂດຍໄວ. ”
ສະພາບແວດລ້ອມແຫ່ງການລົງທຶນໄດ້ກັບຄືນສູ່ຄວາມເປັນປົກກະຕິ
ຢູ່ແຂວງ ບີ່ງເຢືອງ, ຊື່ງແມ່ນທ້ອງຖິ່ນ ມີວິສາຫະກິດຫລາຍແຫ່ງຖືກເສຍຫາຍກວ່າໝູ່ເມື່ອເຫດການເກີດຂຶ້ນ. ມາຮອດປະຈຸບັນ, ມີ 95% ຈຳນວນວິສາຫະກິດ ຟື້ນຟູການຜະລິດ, ໃນນັ້ນຢູ່ບັນດາເຂດອຸດສາຫະກຳ ມີ 85% ຈຳນວນວິສາຫະກິດໄດ້ກັບຄືນສູ່ການເຄື່ອນໄຫວເປັນປົກກະຕິ. ປະຈຸບັນ ໃນບັນດາຮາກຖານການຜະລິດດຳເນີນທຸລະກິດ, ບັນຍາກາດເຮັດວຽກແມ່ນຮີບເຮັ່ງ, ມີວິສາຫະກິດຫລາຍແຫ່ງ ຊັບຊ້ອນໃຫ້ພະນັກງານເພີ່ມຊົ່ວໂມງເຮັດວຽກ ເພື່ອສຳເລັດໃບຊັ່ງຊື້ສິນຄ້າສົ່ງອອກຊື່ງໄດ້ລົງນາມກັບຄູ່ຮ່ວມມື. ທ່ານ Lee Tong Hue, ປະທານ ສະຫະສະມາຄົມວິສາຫະກິດ ສເກົາຫລີ ຢູ່ ແຂວງ ບີງເຢືອງ ເວົ້າວ່າ:
“ຄະນະກຳມະການປະຊາຊົນແຂວງ ບີ່ງເຢືອງ ໄດ້ມີບັນດາມາດຕະການແກ້ໄຂຢ່າງວ່ອງໄວ, ຊ່ວຍໃຫ້ບັນດາວິສາຫະກິດ ສເກົາຫລີ ຖືກເສຍຫາຍ ກັບຄືນສູ່ການເຄື່ອນໄຫວເປັນປົກກະຕິໂດຍໄວ. ພວກຂ້າພະເຈົ້າຮູ້ສຶກຕື້ນຕັ້ນໃຈຕໍ່ການຊ່ວຍເຫລືອຢ່າງສຸດຈິດສຸດໃຈຂອງອຳນາດການປົກຄອງທ້ອງຖິ່ນ.”
ບັນດາວິສາຫະກິດກັບຄືສູ່ການຜະລິດດຳເນີນທຸລະກິດເປັນປົກກະຕິຢ່າງວ່ອງ ໄວ ແມ່ນການສະແດງໃຫ້ເຫັນການຮ່ວມມື, ສະຫນິດຕິດພັນ ລະຫວ່າງອຳນາດການປົກຄອງທອ້ງຖິ່ນ ກັບບັນດານັກລົງທຶນ, ວິສາຫະກິດ, ຢືນຢັນຄວາມໄວ້ເນື້ອເຊື່ອໃຈຂອງນັກລົງທຶນ,ວິສາຫະກິດ ກ່ຽວກັບນະໂຍບາຍຂອງລັດ, ກ່ຽວກັບສະພາບແວດລ້ອມແຫ່ງການລົງທຶນ. ທ່ານ ເລຮົ່ງຟວາ, ປະທານສະຫະສະມາຄົມຕຳ່ແຜ່ນຕັດຫຍິບ ບີ່ງເຢືອງ ໃຫ້ຮູ້ວ່າ:
“ຜ່ານເຫດການດັ່ງກ່າວ ຂ້າພະເຈົ້າເຫັນວ່າ ລັດຖະບານ ກໍຄືການນຳແຂວງ ແລະ ບັນດາພະແນກ, ຂະແຫນງການໄດ້ຮ່ວມແຮງຮ່ວມໃຈພ້ອມກັບວິສາຫະກິດຜ່ານຜ່າຄວາມຫຍຸ້ງຍາກ. ບັນດາວິສາຫະກິດ ໄດ້ຕີລາຄາສູງການຊ່ວຍເຫລືອດັ່ງກ່າວ, ຊ່ວຍໃຫ້ບັນດາວິສາຫະກິດຟື້ນຟູໂດຍໄວ.”
ສືບຕໍ່ຫນູນຊ່ວຍວິສາຫະກິດໃນອະນາຄົດ
ຮີບເຮັ່ງກຳນົດຢັ້ງຢືນຄວາມເສຍຫາຍເພື່ອຫນູນຊ່ວຍ, ຊ່ວຍເຫລືອບັນດາວິສາຫະກິດແກ້ໄຂຄວາມເສຍຫາຍ, ກັບຄືນສູ່ການຜະລິດດຳເນີນທຸລະກິດໂດຍໄວ ນັ້ນແມ່ນເນື້ອໃນໃນແຈ້ງການເລກທີ 207 ກ່ຽວກັບການສະຫລຸບຂອງນາຍົກລັດຖະມົນຕີ. ໂດຍປະຕິບັດແຜນນະໂຍບາຍນີ້, ຫລາຍທ້ອງຖິ່ນຢູ່ຫວຽດນາມ ພວມປະຕິບັດທຸກມາດຕະການໃຫ້ເໝາະສົມເພື່ອຊ່ວຍເຫລືອ, ຫນູນຊ່ວຍບັນດາວິສາຫະກິດ, ແກ້ໄຂບັນດາບັນຫາກ່ຽວຂ້ອງເຖິງລະບຽບການບໍລິຫານ, ເປັນຕົ້ນແມ່ນຫນູນຊ່ວຍຟື້ນຟູ, ກຳນົດ, ສະຫນອງເອກະສານ, ສຳເນົາຮັບໃຊ້ການກຳນົດຢັ້ງຢືນມູນຄ່າຊັບສິນຖືກເສຍຫາຍເພື່ອຊົດເຊີຍ. ກ່ຽວກັບບັນຫານີ້, ທ່ານຮອງນາຍົກລັດຖະມົນຕີ ຫວູວັນນີງ ໃຫ້ຮູ້ວ່າ:
“ບັນດາມາດຕະການຂອງລັດຖະບານຍົກອອກ, ໃນຕໍ່ຫນ້າໄດ້ແກ້ໄຂຄວາມຫຍຸ້ງຍາກ, ຂໍ້ຕິດຂັດຂອງບັນດານັກລົງທຶນໂດຍພື້ນຖານ. ປາດຖະຫນາວ່າ ບັນດາມາດຕະການນັ້ນ, ບັນດານັກລົງທຶນ ແລະ ວິສາຫະກິດ ສາມາດກັບຄືນສູ່ການຜະລິດເປັນປົກກະຕິ. ໃນວິວັດການຜັນຂະຫຍາຍປະຕິບັດ ຖ້າມີຄວາມຫຍຸ້ງຍາກເກີນຂອບເຂດສິດອຳນາດຂອງລັດຖະບານ ຈະພິຈາລະນາເພື່ອລາຍງານຕໍ່ສະພາແຫ່ງຊາດ.”
ວັນທີ 2/6, ທ່ານນາຍົກລັດຖະມົນຕີ ຫງວຽນເຕີນຢູງ ມີຄຳສັ່ງຮຽກຮ້ອງບັນດາຂະແຫນງ, ທ້ອງຖິ່ນຕ່າງໆ ຍູ້ໄວການປະຕິບັດບັນດາມາດຕະການ ແລະ ການແກ້ໄຂບັນດາລະບຽບການຫນູນຊ່ວຍ, ຊ່ວຍເຫລືອບັນດາວິສາຫະກິດຖືກເສຍຫາຍຢູ່ທ້ອງຖິ່ນຈຳນວນຫນຶ່ງ. ບັນດາວຽກງານທີ່ຮີບເຮັ່ງ ແລະ ມີຄວາມຮັບຜິດຊອບຂອງລັດຖະບານ, ທຸກຂັ້ນ, ພະແນກ, ຂະແຫນງການ ຂອງຫວຽດນາມ ສືບຕໍ່ສະແດງໃຫ້ເຫັນ ຄຳໝັ້ນໝາຍຂອງຫວຽດນາມ ກ່ຽວກັບການຮັບປະກັນສະພາບແວດລ້ອມແຫ່ງການລົງທຶນຢ່າງປອດໄພ, ປະສິດທິຜົນໃຫ້ແກ່ບັນດານັກລົງທຶນຕ່າງປະເທດ.