(vovworl) - ກອງປະຊຸມສະໄຫມສາມັນເທື່ອທີ 9 ສະພາແຫ່ງຊາດຫວຽດນາມ ຊຸດທີ 13 ໄດ້ສຸມໃສ່ປຶກສາຫາລືບັນດາຫນ້າທີ່, ມາດຕະການຕົ້ນຕໍ ເພື່ອປະຕິບັດຫນ້າທີ່ເສດຖະກິດ ສັງຄົມທີ່ໄດ້ວາງອອກ ໃນປີ 2015. ຄຽງຄູ່ກັບບັນດາໝາກຜົນ ແລະ ການຫັນປ່ຽນຕັ້ງຫນ້າ, ປະເທດຊາດ ຍັງຄົງປະເຊີນຫນ້າກັບຄວາມຫຍຸ້ງຍາກສິ່ງທ້າທາຍຫລາຍຢ່າງ. ຫນ້າທີ່ວາງອອກ ໄດ້ຮຽກຮ້ອງໃຫ້ທົ່ວພັກ, ທົ່ວປວງຊົນ, ທົ່ວກອງທັບ ແລະ ທັງລະບົບການເມືອງ ສາມັກຄີກັນເຫັນດີເປັນເອກະພາບຕັດສິນໃຈ ປະຕິບັດສຳເລັດຫນ້າທີ່ແຜນການເສດຖະກິດ ສັງຄົມປີ 2015 ຢ່າງມີໄຊ.
ກອງປະຊຸມສະໄຫມສາມັນເທື່ອທີ 9 ສະພາແຫ່ງຊາດຫວຽດນາມ ຊຸດທີ 13
ພາບ:chinhphu.vn
|
ຕາມບົດລາຍງານຂອງລັດຖະບານຕໍ່ສະພາແຫ່ງຊາດ, ສະພາບການເສດຖະກິດສັງຄົມ ໃນຊຸມເດືອນຕົ້ນປີ 2015 ສືບຕໍ່ຫັນປ່ຽນຢ່າງຕັ້ງຫນ້າ ແລະ ບັນລຸໝາກຜົນໃນທຸກຂົງເຂດ. ດັດຊະນີລາຄາໃຊ້ສອຍໃນ 4 ເດືອນ ເພີ່ມຂຶ້ນ 0,04% ເຊິ່ງແມ່ນລະດັບຕ່ຳສຸດໃນຫລາຍປີຜ່ານມາ. ຍອດວົງເງິນສົ່ງອອກເພີ່ມຂຶ້ນ 8,2%. ເງິນລົງທຶນໂດຍກົງຂອງຕ່າງປະເທດເພີ່ມຂຶ້ນ 5%, ບັນລຸ 4,2 ຕື້ USD. ຍອດຜະລິດຕະພັນພາຍໃນ GDP ໃນໄຕມາດ 1 ເພີ່ມຂຶ້ນ 6,03%, ນີ້ແມ່ນລະດັບສູງສຸດໃນ 5 ປີຜ່ານມາ.
ກ່ຽວກັບຂົງເຂດເສດຖະກິດການຕ່າງປະເທດ, ຫວຽດນາມ ໄດ້ລົງນາມໃນສັນຍາການຄ້າເສລີ (FTA) ກັບ ສເກົາຫລີ, ພ້ອມທັງ ກະກຽມລົງນາມກັບ ພັນທະມິດເສດຖະກິດ ອາຊີ ເອີລົບ ແລະ ສືບຕໍ່ຍູ້ແຮງການເຈລະຈາ FTA ກັບບັນດາຄູ່ຮ່ວມມືໃຫຍ່ອື່ນ.
ປັບປຸງສະພາບແວດລ້ອມແຫ່ງການລົງທຶນ, ແກ້ໄຂຄວາມຫຍຸ້ງຍາກໃຫ້ການຜະລິດ, ດຳເນີນທຸລະກິດ
ປັບປຸງສະພາບແວດລ້ອມແຫ່ງການລົງທຶນ, ແກ້ໄຂຄວາມຫຍຸ້ງຍາກໃຫ້ການຜະລິດ, ດຳເນີນທຸລະກິດ, ຊຸກຍູ້ການເຕີບໂຕ ແມ່ນຫນຶ່ງໃນບັນດາຫນ້າທີ່ຊື່ງສະພາແຫ່ງຊາດມອບໃຫ້ລັດຖະບານບຸລິມະສິດຊີ້ນຳ, ບໍລິຫານ ນັບແຕ່ນີ້ຮອດທ້າຍປີ. ຕາມນັ້ນແລ້ວ, ລັດຖະບານ ເປັນເຈົ້າການບໍລິຫານຢ່າງມີໄຫວພິບ, ມີປະສິດທິຜົນ ແລະ ສົມທົບກັນຢ່າງແຫນ້ນແຟ້ນລະຫວ່າງນະໂຍບາຍເງິນຕາ, ນະໂຍບາຍງົບປະມານ ແລະ ບັນດານະໂຍບາຍອື່ນ, ຮັບປະກັນຮັກສາເສດຖະກິດມະຫາພາກເປັນປົກກະຕິ, ຮັກສາຄວາມດຸ່ນດ່ຽງໃຫຍ່ຂອງພື້ນຖານເສດຖະກິດ ແລະ ບັນລຸຄາດໝາຍການເຕີບໂຕທີ່ໄດ້ວາງອອກ. ປະຕິບັດບັນດາມາດຕະການເປີດກວ້າງຕະຫລາດຢ່າງຄົບຊຸດ, ຍູ້ແຮງການສົ່ງອອກ, ຍູ້ໄວການແກ້ໄຂຫນີ້ເສຍ. ພ້ອມທັງພັດທະນາຕະຫລາດພາຍໃນປະເທດຢ່າງແຮງ ຕິດພັນກັບການປະຕິບັດການຂົນຂວາຍ “ຊາວຫວຽດນາມ ບຸລິມະສິດຊົມໃຊ້ສິນຄ້າຫວຽດນາມ” ຢ່າງມີປະສິດທິຜົນ. ທ່ານ ຮ່ວາງງອກຢູງ, ສະມາຊິກສະພາແຫ່ງຊາດ ແຂວງ ເຊີນລາ ໃຫ້ຮູ້ວ່າ:
“ຂ້າພະເຈົ້າປາດຖະຫນາວ່າ: ໃນໄລຍະຈະມາເຖິງ ລັດຖະບານ ຈະມີບັນດາມາດຕະການຕັ້ງຫນ້າໃນການປ້ອງກັນ, ຕ້ານການສໍ້ລາດບັງຫລວງ, ການຟຸມເຟືອຍ. ລັດຖະບານລົງທຶນໃຫ້ຂົງເຂດກະສິກຳພັດທະນາຊົນນະບົດ ແລະ ຊາວກະສິກອນຫລາຍກວ່າອີກ. ພິເສດແມ່ນລົງທຶນໃຫ້ບັນດາເຂດຫ່າງໄກສອກຫລີກ, ເຂດຊົນເຜົ່າ.”
ຍູ້ແຮງການສ້າງໂຄງປະກອບເສດຖະກິດຄືນໃຫມ່ຕິດພັນກັບຮູບແບບເຕີບໂຕ
ສ້າງໂຄງປະກອບເສດຖະກິດຄືນໃຫມ່ ຕິດພັນກັບຮູບແບບເຕີບໂຕ ກໍແມ່ນມາດຕະການໄດ້ຮັບຖືເປັນສຳຄັນ. ໃນບົດລາຍງານທີ່ສະພາແຫ່ງຊາດ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ຊີ້ແຈ້ງວ່າ: ລັດຖະບານ ສືບຕໍ່ປະຕິບັດຢ່າງຄົບຊຸດ, ຂ້ຽວຂາດ, ມີປະສິດທິຜົນເພື່ອຊຸກຍູ້ການເຕີບໂຕ, ຍູ້ແຮງການສ້າງໂຄງປະກອບເສດຖະກິດຄືນໃຫມ່ ຕິດພັນກັບການປ່ຽນໃຫມ່ຮູບແບບເຕີບໂຕ, ຍົກສູງຊີວິດການເປັນຢູ່ທາງດ້ານວັດຖຸ, ຈິດໃຈຂອງປະຊາຊົນ, ຍູ້ແຮງການປະຕິຮູບດ້ານບໍລິຫານ, ຕັ້ງຫນ້າປ້ອງກັນ, ຕ້ານການສໍ້ລາດບັງຫລວງ, ການຟຸມເຟືອຍ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ຊີ້ແຈ້ງວ່າ:
“ລັດຖະບານ ສືບຕໍ່ປະຕິບັດແຜນຮ່າງສັງລວມກ່ຽວກັບການສ້າງໂຄງປະກອບພື້ນຖານເສດຖະກິດຄືນໃຫມ່ ແລະ ບັນດາແຜນຮ່າງສ້າງໂຄງປະກອບຂະແຫນງ, ຂົງເຂດຄືນໃຫມ່ຢ່າງຄົບຊຸດ, ມີປະສິດທິຜົນ. ສູ້ຊົນສຳເລັດແຜນການຫັນລັດວິສາຫະກິດ 289 ແຫ່ງເປັນຫຸ້ນສ່ວນ. ສືບຕໍ່ກວດກາຄືນ, ເພີ່ມເຕີມວິສາຫະກິດຄວນຫັນເປັນຫຸ້ນສ່ວນ, ຂາຍຫຸ້ນຂອງລັດ. ຫນູນຊ່ວຍພັດທະນາວິສາຫະກິດຂະຫນາດກາງ ແລະ ນ້ອຍ, ເສດຖະກິດຄອບຄົວ, ສົ່ງເສີມການສ້າງຕັ້ງວິສາຫະກິດຂະຫນາດໃຫຍ່, ເຄື່ອງໝາຍການຄ້າ, ມີຄວາມສາມາດແກ້ງແຍ້ງຢູ່ພາຍໃນ ແລະ ພາກພື້ນ. “
ບັນດາສະມາຊິກສະພາແຫ່ງຊາດ ເຫັນດີເຫັນພ້ອມສູງຕໍ່ລັດຖະນະໂຍບາຍຂອງລັດຖະບານ. ທ່ານ ຫງວຽນດືກກຽນ, ຮອງຫົວຫນ້າກຳມາທິການເສດຖະກິດຂອງສະພາແຫ່ງຊາດ ຖືວ່າ:
ການປ່ຽນໃຫມ່ຮູບແບບການເຕີບໂຕ, ສ້າງໂຄງປະກອບພື້ນຖານເສດຖະກິດຄືນໃຫມ່ ແມ່ນບາດກ້າວຕັດສິນຊີ້ຂາດ ເພາະວ່າ ມັນມີລັກສະນະເຊື່ອມຕໍ່ຊຸມປີຕໍ່ໄປ. ຕາມຂ້າພະເຈົ້າແລ້ວ, ມາດຕະການສຳຄັນທີ່ສຸດໃນໄລຍະ 3 ປີຈະມາເຖິງ, ລັດຖະບານ ຄວນເດັດດ່ຽວປ່ຽນໃຫມ່ຮູບແບບເຕີບໂຕຕິດພັນກັບການສ້າງໂຄງປະກອບພື້ນຖານເສດຖະກິດຄືນໃຫມ່, ໃນນັ້ນ ໃນຕໍ່ຫນ້າຕ້ອງປະຕິບັດການສ້າງໂຄງປະກອບລັດວິສາຫະກິດຄືນໃຫມ່ ແລະ ສ້າງໂຄງປະກອບການລົງທຶນຂອງລັດຄືນໃຫມ່ຢ່າງຂ້ຽວຂາດ. ພ້ອມກັນນັ້ນ ແມ່ນບັນດາກົນໄກ, ນະໂຍບາຍ, ເອກະສານນິຕິກຳ.”
ຜັນຂະຫຍາຍມະຕິຂອງສະພາແຫ່ງຊາດ, ລັດຖະບານ ໄດ້ປະກາດໃຊ້ ແລະ ຊີ້ນຳປະຕິບັດມະຕິເລກທີ 01 ຂອງລັດຖະບານກ່ຽວກັບບັນດາຫນ້າທີ່, ມາດຕະການຕົ້ນຕໍປະຕິບັດແຜນການພັດທະນາເສດຖະກິດສັງຄົມປີ 2015 ຢ່າງຂ້ຽວຂາດ. ໃນນັ້ນ ສູ້ຊົນບັນລຸລະດັບເຕີບໂຕຍອດຜະລິດຕະພັນພາຍໃນ GDP ແມ່ນ 6,2%, ຍອດວົງເງິນສົ່ງອອກແມ່ນ 10%, ສ້າງວຽກເຮັດງານທຳໃຫ້ແກ່ຄົນງານປະມານ 1,6 ລ້ານຄົນ.
ໃນສະພາບການປະຈຸບັນ, ພື້ນຖານເສດຖະກິດຫວຽດນາມ ໄດ້ຜ່ານຜ່າໄລຍະວິກິດການ ແລະ ພວມຄ່ອຍໆຟື້ນຕົວ. ບັນດາຄຳເຫັນຂອງສະມາຊິກສະພາແຫ່ງຊາດ ທີ່ກອງປະຊຸມສະໄຫມສາມັນເທື່ອທີ 9, ສະພາແຫ່ງຊາດຊຸດທີ 13 ໄດ້ປະກອບສ່ວນສຳຄັນເພື່ອໃຫ້ສະພາແຫ່ງຊາດວາງອອກມະຕິ ປະຕິບັດບັນດາຫນ້າທີ່ເສດຖະກິດສັງຄົມປີ 2015 ຢ່າງມີໄຊ, ສ້າງປະຖົມປັດໄຈໃນແຜນການພັດທະນາເສດຖະກິດສັງຄົມໄລຍະ 5 ປີຕໍ່ໄປ. ນີ້ກໍແມ່ນຄວາມມຸ່ງມາດປາດຖະຫນາຂອງປະຊາຊົນ, ຜູ້ມີສິດເລືອກຕັ້ງໃນທົ່ວປະເທດ.