ພ້ອມກັບບັນດາປະເພດສິນຄ້າຕົ້ນຕໍນັ້ນ, ການສົ່ງອອກໝາກໄມ້ຫວຽດນາມໃນປີ 2016 ໄດ້ເປັນຂີດໝາຍການເຕີບໂຕສູງ ດ້ວຍວົງເງິນສົ່ງອອກບັນລຸປະມານ 2,6 ຕື້ USD. ພິເສດ ແມ່ນພາຍຫຼັງຫຼາຍປີ, ສິນຄ້າປະເພດໝາກໄມ້ໄດ້ແຊກຊຶມເຂົ້າຕະຫຼາດໃຫຍ່ບາງແຫ່ງ ແລະ ບືນຕົວຂຶ້ນກາຍເປັນສິນຄ້າປະເພດສົ່ງອອກທີ່ໜ້າປະທັບໃຈໃນປີ 2016, ອັນໄດ້ສ້າງກຳລັງຊຸກຍູ້ໃຫ້ແກ່ສິນຄ້າປະເພດນີ້ສາມາດຢຶດຄອງຕະຫຼາດດ້ວຍອັດຕາສູງກ່ວາໃນໄລຍະທີ່ຈະມາເຖິງ.
ໝາກໄມ້ຫວຽດນາມຖືກວາງຂາຍຢູ່ຕະຫຼາດ ສ.ເຊັກໂກ |
ປີ 2016, ໃນສະພາບເສດຖະກິດໂລກຍັງປະສົບກັບຄວາມຫຍຸ້ງຍາກຫຼາຍຢ່າງດ້ວຍການຜັນແປທີ່ຫຼຸດລົງແຮງ ນັບທັງການສະໜອງ ແລະ ຄວາມຕ້ອງການໃນຕະຫຼາດ, ແຕ່ວົງເງິນສົ່ງອອກເວົ້າລວມຂອງຫວຽດນາມຍັງຄົງສືບຕໍ່ຮັກສາທ່າອຽງເພີ່ມຂຶ້ນ, ໃນນັ້ນສິນຄ້າປະເພດໝາກໄມ້ແມ່ນໝວກສິນຄ້າມີການເຕີບໂຕດີທີ່ສຸດກ່ຽວກັບມູນຄ່າການສົ່ງອອກ.
ບາດກ້າວກະໂດດຂັ້ນທີ່ເປັນໜ້າປະທັບໃຈ
ເດືອນ 6/2016, ພາຍຫຼັງດຳເນີນການເຈລະຈາເປັນເວລາ 12 ປີ, ໝາກລີ້ນຈີງວດທຳອິດຂອງຫວຽດນາມໄດ້ຮັບໜັງສືອະນຸຍາດສົ່ງອອກໄປຍັງຕະຫຼາດອົດສະຕາລີຢ່າງເປັນທາງການ. ໝາກລີ້ນຈີຫວຽດນາມ ບໍ່ພຽງແຕ່ດຶງດູດຜູ້ບໍລິໂພກຊາວຫວຽດນາມຢູ່ອົດສະຕາລີເທົ່ານັ້ນ, ຫາກຍັງດຶງດູດທັງຊາວອົດສະຕາລີອີກດ້ວຍ. ຕາມບົດລາຍງານຈາກທູດການຄ້າອົດສະຕາລີແລ້ວ, ໃນຮອບເວລາ 1 ຊົ່ວໂມງທຳອິດທີ່ປະກົດຕົວຢູ່ແມນເບີນ, ໄດ້ມີໝາກລີ້ນຈີກວ່າ 300 ກິໂລກຣາມໄດ້ຖືກຂາຍດ້ວຍລາຄາ 14,99 ໂດລາອົດສະຕາລີ/ກິໂລກຣາມ, ເທົ່າກັບ 220.000 ດົງ (ສະກຸນເງິນຫວຽດນາມ). ແລະ ໃນຊຸມປີຕໍ່ໆໄປ, ໄດ້ມີໝາກລີ້ນຈີ 30 ໂຕນຂອງຫວຽດນາມຖືກສົ່ງອອກຂາຍຢູ່ແມນເບີນ, ຊິດນີ ແລະ ຫຼາຍຕົວເມືອງອື່ນໆຂອງອົດສະຕາລີ. ທ່ານ ເລືອງແທງງິ ເອກອັກຄະລັດຖະທູດຫວຽດນາມ ປະຈຳອົດສະຕາລີເວົ້າວ່າ :
“ ຕະຫຼາດອົດສະຕາລີແມ່ນຕະຫຼາດທີ່ຕ້ອງການນຳເຂົ້າສິນຄ້າທີ່ມີຄຸນນະພາບ ສູງດ້ວຍບັນດາມາດຕະຖານສູງທີ່ສຸດ. ເມື່ອສິນຄ້າຂອງຫວຽດນາມໄດ້ແຊກຊຶມເຂົ້າຕະຫຼາດອົດສະຕາລີແລ້ວ, ກໍແມ່ນກຳລັງຊຸກຍູ້ເພື່ອເປີດກ້ວາງຕະຫຼາດຈຳໜ່າຍສິນຄ້າ, ເປັນຕົ້ນແມ່ນຜະລິດຕະພັນກະເສດ ”
ໂດຍສືບຕໍ່ຜົນສຳເລັດຈາກການຢຶດຄອງຕະຫຼາດອົດສະຕາລີຂອງໝາກລີ້ນຈີແຂວງບັກຢາງນັ້ນ, ໝາກນ້ຳນົມຂອງຫວຽດນາມກໍໄດ້ຮັບໜັງສືອະນຸຍາດນຳເຂົ້າຈາກອາເມລິການັບແຕ່ໄຕມາດທີ 4/2016 ເປັນຕົ້ນໄປ. ບໍ່ພຽງແຕ່ເຊັ່ນນັ້ນ, ຖັດຈາກໝາກມັງກອນ, ໝາກເງາະ, ໝາກລຳໄຍ, ໝາກລີ້ນຈີ ແລະ ໝາກນ້ຳນົມນັ້ນ, ຄາດວ່າ ໝາກມ່ວງຈະສືບຕໍ່ປະກົດຕົວຢູ່ຕະຫຼາດອາເມລິກາອີກດ້ວຍ. ສິ່ງທີ່ໜ້າພາກພູມໃຈກວ່າໝູ່, ນັ້ນແມ່ນບໍ່ພຽງແຕ່ສຳລັບຕະຫຼາດອາເມລິກາເທ່ົານັ້ນ, ຫາກນັບທັງຕະຫຼາດອື່ນໆອີກ, ໝາກໄມ້ຫວຽດນາມກໍເລີ່ມສາມາດຢຶດຄອງ ແລະ ແຊກຊຶມຢ່າງກ້ວາງເລິກເຂົ້າບັນດາຕະຫຼາດຄື ນິວຊີແລນ, ຈີນ, ຍີປຸ່ນ, ລັດເຊຍ, ສ.ເກົາຫຼີ, ມາເລເຊຍ…
ທ່ານເອກອັກຄະລັດຖະທູດຫວຽດນາມປະຈຳມາເລເຊຍ ຝ້າມກາວຟອງ ໃຫ້ຮູ້ວ່າ : ມາເລເຊຍແມ່ນຕະຫຼາດທີ່ມີຈຳນວນຊາວຫວຽດນາມພວມອອກແຮງານ, ຮ່ຳຮຽນ ແລະ ດຳລັງຊີວິດຢູ່ປະເທດນີ້ຢ່າງຫຼວງຫຼາຍ, ແຕ່ການແຊກຊຶມເຂົ້າຕະຫຼາດມາເລເຊຍຂອງໝາກໄມ້ຂອງຫວຽດນາມ ກໍບໍ່ແມ່ນງ່າຍ. ຍ້ອນແມ່ນຕະຫຼາດປະເທດອິດສະລາມ, ດັ່ງນັ້ນ ບັນດາມາດຕະຖານຄວາມປອດໄພ, ຫຼັກອະນາໄມຄວາມປອດໄພດ້ານສະບຽງອາຫານສຳລັບບັນດາຜູ້ເຊື່ອຖືສາສາໜາອິດສະລາມກໍເຄັ່ງຄັດທີ່ສຸດ. ນອກຈາກນັ້ນ, ຊາວມາເລເຊຍ ກໍບໍ່ແມ່ນບັນດາຜູ້ເປີດອົກເປີດໃຈສຳລັບບັນດາຜະລິດຕະພັນທີ່ບໍ່ແມ່ນຂອງເຂົາເຈົ້າ. ທ່ານເອກອັກຄະລັດຖະທູດຫວຽດນາມປະຈຳມາເລເຊຍ ຝ້າມກາວຟອງ ໃຫ້ຮູ້ວ່າ :
“ໝາກລີ້ນຈີຂອງພວກເຮົາແຊບກວ່າ, ຫວານກ່ວາ, ນີ້ແມ່ນບັນດາຈຸດດີເພື່ອໃຫ້ພວກເຮົາສົມທຽບກັບໝາກໄມ້ຊະນິດອື່ນໆຂອງເຂົ້າເຈົ້າໃນທ້ອງຕະຫຼາດ. ພວກເຮົາເອົາໝາກລີ້ນຈີໃຫ້ເຂົາເຈົ້າເປັນຂອງຕ້ອນ, ໃຫ້ເຂົາເຈົ້າລອງກິນເບິ່ງເປັນແນວໃດ, ເມື່ອເຂົາເຈົ້າຕິດໃຈແລ້ວ , ພວກເຮົາກໍບໍ່ຄວນເວົ້າຫຍັງຫຼາຍອີກ ແລະ ເຂົາເຈົ້າຈະຮັບບໍລິໂພກໝາກລີ້ນຈີຂອງພວກເຮົາຢ່າງງ່າຍດາຍ ”
ສ້າງເຄື່ອງໝາຍການຄ້າຍາວນານ.
ເພື່ອສ້າງເຄື່ອງໝາຍການຄ້າ ແລະ ຈຸດຢືນຍາວນານຢູ່ບັນດາຕະຫຼາດທີ່ຕ້ອງການຄຸນນະພາບສູງສຳລັບໝາກໄມ້ຫວຽດນາມນັ້ນ, ໄລຍະທີ່ຜ່ານມາ, ໄດ້ມີການສົມທົບ, ຮ່ວມສຳພັນຢ່າງແໜ້ນແຟ້ນລະຫວ່າງບັນດາອົງການທີ່ມີໜ້າທີ່ຮັບຜິດຊອບ, ທ້ອງຖິ່ນ, ວິສາຫະກິດ ແລະຊາວສວນໃນການວາງແຜນຜັງເຂດປູກຕົ້ນໄມ້ກິນໝາກ, ສ້າງພື້ນຖານຮັກສາ, ຫຸ້ມຫໍ່, ຂົນສົ່ງ...ແນໃສ່ຍົກສູງກຳລັງແກ່ງແຍ້ງ, ເປັນຕົ້ນແມ່ນທາງດ້ານລາຄາ ແລະ ຄຸນນະພາບ, ຮັບປະກັນຜົນປະໂຫຍດສູງສດໃຫ້ແກ່ຊາວສວນ ແລະ ວິສາຫະກິດ. ທ່ານ ຮວ່າງຮີແຄ້ງ, ສັງກັດບໍລິສັດ ດາລາດ Import, ຫົວໜ່ວຍສົ່ງອອກໝາກໄມ້ຈາກຫວຽດນາມໄປຍັງ ອົດສະຕາລີຖືວ່າ :
“ ເພື່ອໃຫ້ໝາກລີ້ນຈີເວົ້າສະເພາະ, ຜະລິດຕະພັນກະເສດຂອງຫວຽດນາມເວົ້າລວມສາມາດແຊກຊຶມເຂົ້າບັນດາຕະຫຼາດທີ່ຕ້ອງການຄຸນະພາບສູງ, ພວກເຮົາຄວນເອົາໃຈໃສ່ເຖິງທັງວິວັດການ, ຈາກຊາວກະສີກອນຕະຫຼອດຮອດກະຊວງກະສີກຳ ແລະ ພັດທະນາຊົນນະບົດ ໃຫ້ຖືກຕາມບັນດາຂັ້ນຕອນ. ບັນດາຜູ້ສົ່ງອອກ ກໍຕ້ອງເອົາໃຈໃສ່ເຖິງມາດຕະຖານຜະລິດຕະພັນຂອງປະເທດນຳເຂົ້າ”
ພາຍຫຼັງດຳເນີນການເຈລະຈາເປັນເວລາຫຼາຍປີ, ສຸດທ້າຍ, ໝາກລີ້ນຈີ, ໝາກມ່ວງຂອງຫວຽດນາມສາມາດແຊກຊຶມຕະຫຼາດທີ່ຕ້ອງການຄຸນນະພາບສູງ ແລະ ໄດ້ຮັບບໍລິໂພກເປັນຈຳນວນຫຼາຍ. ເມື່ອຝ່າຍຄູ່ຮ່ວມໄດ້ຮັບບໍລິໂພກນັ້ນ, ໝາກລີ້ນຈີ, ໝາກມ່ວງຫຼືໝາກມັງກອນ ກໍລ້ວນແຕ່ກາຍເປັນສິ່ງເຊື່ອມຕໍ່ລະຫວ່າງຫວຽດນາມກັບໂລກພາຍນອກ, ເຊື່ອມຕໍ່ຫວຽດນາມກັບຊາວຫວຽດນາມອາໄສຢູ່ຕ່າງປະເທດ. ໝາກຜົນນີ້ ໄດ້ສ້າງກຳລັງໜູນໃໝ່ເພື່ອໃຫ້ຫວຽດນາມສືບຕໍ່ບັນລຸເປົ້າໝາຍການເຕີບໂຕສົ່ງອອກໃນປີ 2017 ແລະ ໃນຊຸມປີຕໍ່ໆໄປ.