(vovworld)-ທີ່ກອງປະຊຸມສະໄຫມສາມັນເທື່ອທີ 11 ສະພາແຫ່ງຊາດຊຸດທີ 13 ດຳເນີນໃນວັນທີ 22/3, ທ່ານນາຍົກລັດຖະມົນຕີ ຫງວຽນເຕີນຢູງ ສະເຫນີບົດລາຍງານວຽກງານອາຍຸການ 5 ປີ ຄືແຕ່ປີ 2011-2016. ບົດລາຍງານໄດ້ຮັບການຕີລາຄາຢ່າງຕັ້ງຫນ້າຈາກບັນດາສະມາຊິກສະພາແຫ່ງຊາດ(ສສຊ). ສສຊ ຫລາຍທ່ານໄດ້ຢືນຢັນວ່າ: ລັດຖະບານ ໄດ້ມານະພະຍາຍາມອັນໃຫຍ່ຫລວງ, ຮັບມືຢ່າງມີໄຫວພິບໃນການບໍລິຫານເສດຖະກິດ ສັງຄົມ, ປະກອບສ່ວນບັນລຸ ແລະ ລື່ນກາຍຫລາຍຄາດໝາຍຊື່ງສະພາແຫ່ງຊາດໄດ້ວາງອອກແຕ່ຕົ້ນອາຍຸການ. ນີ້ກໍແມ່ນປະຖົມປັດໄຈສຳຄັນສຳລັບລັດຖະບານອາຍຸການຈະມາເຖິງເພື່ອສູ້ຊົນເຮັດສຳເລັດຫນ້າທີ່ທີ່ໄດ້ຮັບການມອບຫມາຍເປັນຢ່າງດີ.
ກອງປະຊຸມສະໄຫມສາມັນເທື່ອທີ 11 ສະພາແຫ່ງຊາດຊຸດທີ 13
ພາບ:cpv.org
|
ບັນດາ ສສຊ ໄດ້ຕີລາຄາສູງການຊີ້ນຳນຳພາຂອງລັດຖະບານ, ນາຍົກລັດຖະມົນຕີ ເປັນຕົ້ນໃນການບໍລິຫານເສດຖະກິດມະຫາພາກ, ປະຕິບັດຫລາຍນະໂຍບາຍຮັບປະກັນຊີວິດສັງຄົມ.
ແກ້ໄຂຄວາມຫຍຸ້ງຍາກເປັນຢ່າງດີ, ສ້າງປະຖົມປັດໄຈໃຫ້ແກ່ອາຍຸການໃຫມ່
ທ່ານ ເຈີນງອກວີງ, ສສຊ ນະຄອນ ຫາຍຟ່ອງ ຕີລາຄາວ່າ ນັບແຕ່ຕົ້ນອາຍຸການ, ສະພາບການເສດຖະກິດໂລກ ແລະ ພາກພື້ນ ໄດ້ສົ່ງຜົນສະທ້ອນເຖິງຫວຽດນາມ. ລັດຖະບານ ໄດ້ມີບັນດາມາດຕະການທັນການ, ຊ່ວຍໃຫ້ການພັດທະນາເສດຖະກິດຂອງປະເທດຊາດໃນຊຸມປີທ້າຍອາຍຸການບັນລຸຄາດໝາຍ, ພິເສດໃນປີ 2015, GDP ຂອງຫວຽດນາມ ບັນລຸໄດ້ ແລະ ລື່ນກາຍຄາດໝາຍຊື່ງສະພາແຫ່ງຊາດໄດ້ວາງອອກ. ລັດຖະບານ ຍາມໃດກໍຢືດໝັ້ນໄປຕາມວິວັດການຄື: ຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ, ບົນພື້ນຖານນັ້ນ ຍາດແຍ່ງບັນດາແຫລ່ງລາຍຮັບ, ລາຍຈ່າຍໃຫ້ແກ່ປະຊາຊົນ, ຮັບປະກັນຊີວິດສັງຄົມ. ມີທັດສະນະເຊັນດຽວກັນ, ທ່ານ ເຈີນຮ່ວາງເງິນ, ສສຊ ນະຄອນ ໂຮ່ຈິມີນ ຖືວ່າ:
“ຂ້າພະເຈົ້າຕີລາຄາສູງ ເລື່ອງລັດຖະບານໄດ້ປະຕິບັດລັດຖະທຳມະນູນ, ກົດໝາຍ ແລະ ບັນດາມະຕິຂອງສະພາແຫ່ງຊາດ. ນັບແຕ່ຕົ້ນອາຍຸການ ສະພາແຫ່ງຊາດໄດ້ວາງອອກມະຕິກ່ຽວກັບການຮັບປະກັນຊີວິດສັງຄົມ ຕ້ອງປະຕິບັດການຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ ແລະ ການເຕີບໂຕເສດຖະກິດຢູ່ໃນລະດັບເໝາະສົມ. ໃນ 5 ປີຜ່ານມາ, ລັດຖະບານໄດ້ຜັນຂະຫຍາຍ ແລະ ປະຕິບັດສິ່ງດັ່ງກ່າວເປັນຢ່າງດີ. “
ຕາມທ່ານ ບຸ່ຍດືກທູ້, ສສຊ ແຂວງ ລາຍເຈົາ ແລ້ວ, ຈຸດໃຫມ່ ໃນການບໍລິຫານຂອງລັດຖະບານອາຍຸການຜ່ານມາ ນັ້ນແມ່ນເມື່ອສະພາບການມີການປ່ຽນແປງ, ໄດ້ສະເຫນີຕໍ່ສະພາແຫ່ງຊາດຢ່າງທັນການເພື່ອປັບປຸງກົນໄກ, ນະໂຍບາຍ. ຕົວຢ່າງຄື: ຫັນປ່ຽນຈາກແຜນນະໂຍບາຍເອົາໃຈໃສ່ເຖິງການເຕີບໂຕເສດຖະກິດໄປສູ່ຄາດໝາຍຮັກສາເສດຖະກິດມະຫາພາກເປັນປົກກະຕິ ແມ່ນຫນ້າທີ່ສຳຄັນຕົ້ນຕໍ, ດັດປັບບັນດາອົງປະກອບລາຍຮັບລາຍຈ່າຍງົບປະມານແຫ່ງລັດ, ບັນດາກົດໝາຍວ່າດ້ວຍພາສີອາກອນ ເພື່ອຫນູນຊ່ວຍການເຕີບໂຕ, ຟື້ນຟູເສດຖະກິດ, ປະຕິຮູບບໍລິຫານ.
“ກ່ຽວກັບວຽກງານຂອງລັດຖະບານ, ນອກຈາກການປ່ຽນໃຫມ່, ປະຕິຮູບໃນການຄຸ້ມຄອງບໍລິຫານເສດຖະກິດສັງຄົມ, ຈຸດພົ້ນເດັ່ນນັ້ນແມ່ນຍູ້ແຮງການປະຕິຮູບດ້ານບໍລິຫານ. ໃນອາຍຸການຜ່ານມາ, ລະບຽບການບໍລິຫານສຳລັບຂົງເຂດພາສີອາກອນ, ປະກັນສັງຄົມໄດ້ຮັບຄວາມເອົາໃຈໃສ່ຊີ້ນຳຢ່າງຂ້ຽວຂາດຈາກລັດຖະບານ. ໂດຍເສີມຂະຫຍາຍບັນດາຜົນງານນັ້ນ, ບັນຫາປະຕິຮູບບໍລິຫານ ຄວນໄດ້ຮັບການທະວີຄູນ, ເປີດກວ້າງ ແລະ ປະຕິບັດຢ່າງຂ້ຽວຂາດກວ່າໃນທຸກຂົງເຂດຂອງຊີວິດສັງຄົມ.”
ທ່ານ ເຢືອງຈູງກວກ, ສສຊ ແຂວງ ດົງນາຍ ຖືວ່າ: ບົດລາຍງານຂອງລັດຖະບານຕິດພັນກັບອາຍຸການ 5 ປີ, ຊ່ວຍໃຫ້ເຫັນຈຸດດີ, ຈຸດອ່ອນ ເພື່ອຖອດຖອນບົດຮຽນທີ່ມີປະໂຫຍດໃຫ້ແກ່ບັນດາຜູ້້ສືບທອດ. ໃນໄລຍະນັ້ນ, ຫວຽດນາມ ແກ້ໄຂຈຸດອ່ອນຫລາຍຢ່າງຂອງພື້ນຖານເສດຖະກິດ, ຫາກບໍ່ທັນເວົ້າເຖິງບັນດາປັດໄຈກ່ຽວຂ້ອງເຖິງບັນຫາທະເລຕາເວັນອອກ, ກາຍເປັນການພົວພັນຂອງທັງສັງຄົມ.
ສ້າງນະໂຍບາຍຫນູນຊ່ວຍສັງຄົມ
ສສຊ ຫລາຍທ່ານ ກໍຕີລາຄາສູງຕໍ່ການບໍລິຫານປະຕິບັດມະຕິຂອງສະພາແຫ່ງຊາດ, ຂອງລັດຖະບານ ແລະ ທ່ານນາຍົກລັດຖະມົນຕີ ໃນການຮັບປະກັນຊີວິດສັງຄົມ. ຂົງເຂດຄຸ້ມຄອງສັງຄົມຂອງລັດຖະບານ ໄດ້ສ້າງຂີດໝາຍຫລາຍຢ່າງເພື່ອກ້າວໄປເຖິງບັນດານະໂຍບາຍສັງຄົມໃຫ້ດີກວ່າ. ຈຸດພົ້ນເດັ່ນຫນຶ່ງອີກ ນັ້ນແມ່ນ ລັດຖະບານ ຍາມໃດກໍບ້ເດີນຕາມ ແລະ ສ້າງນະໂຍບາຍຫນູນຊ່ວຍສັງຄົມໃຫ້ສົມບູນແບບ, ນັ້ນແມ່ນ: ສະພາບຫລຸດຜ່ອນຄວາມທຸກຍາກໃນປີ 2015 ມີບາດກ້າວຫັນປ່ຽນຢ່າງສິ້ນເຊິງ, ມາດຖານທຸກຍາກແມ່ນຕາມການຕີລາຄາຈາກຫລາຍສົ້ນ ຫາກບໍ່ຕີລາຄາສະເພາະລາຍຮັບ.
ປະຖົມປັດໄຈສະດວກໃຫ້ອາຍຸການລັດຖະບານ 2016-2021
ເມື່ອເຕື້ອງເຖິງຂໍ້ຈຳກັດ, ບົດຮຽນ ຊື່ງນາຍົກລັດຖະມົນຕີຊີ້ແຈ້ງ ໃນບົດລາຍງານ, ມີ ສສຊ ຫລາຍທ່ານຖືວ່າ ສິ່ງນີ້ຈະຊ່ວຍໃຫ້ລັດຖະບານຊຸດໃຫມ່ ຮັບຮູ້, ເສີມຂະຫຍາຍບັນດາຜົນງານທີ່ບັນລຸໄດ້, ແກ້ໄຂຂໍ້ຄົງຄ້າງຂອງອາຍຸການຜ່ານມາ, ບົນພື້ນຖານນັ້ນ ວາງອອກບັນດມາດຕະການຕັ້ງຫນ້າກວ່າ, ແທດຈິງກວ່າ ເພື່ອນຳພື້ນຖານເສດຖະກິດຫວຽດນາມ ພັດທະນາຕາມຄວາມຮຽກຮ້ອງຕ້ອງການຄື: ປີຫນ້າສູງກວ່າປີກ່ອນ. ບົນພື້ນຖານນັ້ນ ຮັບປະກັນຊີວິດສັງຄົມ, ມີເງື່ອນໄຂປົກປັກຮັກສາອະທິປະໄຕເອກະລາດ, ຫນູນຊ່ວຍສັງຄົມ, ຮັບປະກັນຄວາມເປັນລະບຽບຮຽບຮ້ອຍທາງສັງຄົມໃຫ້ດີກວ່າ. ທ່ານ ທ່າວຊວນຊຸ່ງ, ສສຊ ແຂວງ ເຊີນລາ ຖືວ່າ:
“ຂ້າພະເຈົ້າປາດຖະຫນາວ່າ ຈາກບົດລາຍງານນີ້, ລັດຖະບານຊຸດໃຫມ່ ຈະຖອດຖອນບົດຮຽນອັນລ້ຳຄ່າໄດ້ຫລາຍຢ່າງໃຫ້ແກ່ວຽກງານບໍລິຫານ, ເຮັດແນວໃດເພື່ອໃກ້ຊິດຕິດແທດກັບປະຊາຊົນກວ່າ. ນີ້ແມ່ນຂອດຫັນແນວທາງຂອງພັກ, ມະຕິຂອງສະພາແຫ່ງຊາດກາຍເປັນບັນດາມາດຕະການລະອຽດໃນຊີວິດເພື່ອໃຫ້ນະໂຍບາຍມີປະສິດທິຜົນ ແລະ ຄົບຊຸດ.”
ບັນດາຜົນງານຂອງລັດຖະບານ, ນາຍົກລັດຖະມົນຕີ ບັນລຸໄດ້ໃນອາຍຸການ 5 ປີຜ່ານມາ 2011- 2016 ໄດ້ສ້າງຂີດໝາຍຈະແຈ້ງໃນວິວັດການພັດທະນາຂອງປະເທດຊາດ. ບັນດາໝາກຜົນນີ້ແມ່ນກຳລັງຫນູນສຳຄັນເພື່ອໃຫ້ລັດຖະບານອາຍຸການຈະມາເຖິງເສີມຂະຫຍາຍ, ນຳຫວຽດນາມ ພັດທະນາແບບຍືນຍົງ.