(vovworld) – ໂດຍສືບຕໍ່ການຢ້ຽມຢາມ, ແລະ ເຮັດວຽກຢູ່ສະຫະພາບ ເອລົບ (EU) ແລະ ບາງປະເທດຢູ່ເອີລົບຕາເວັນຕົກ, ວັນທີ 22/1, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ່ຈ້ອງ ໄດ້ດຳເນີນການຢ້ຽມຢາມທາງລັດຖະກິດເຖິງລາຊະອານາຈັກອັງກິດ ແລະ ອາຍແລນເໜືອ ຕາມຄຳເຊື້ອເຊີນຂອງທ່ານນາຍົກລັດຖະມົນຕີ ອັງກິດ David Cameron. ນີ້ແມ່ນເທື່ອທຳອິດທີ່ລັດຖະບານອັງກິດ ເຊື້ອເຊີນເລຂາທິການໃຫຍ່ຂອງພັກການເມືອງຕ່າງປະເທດມາຢ້ຽມຢາມອັງກິດ ຢ່າງເປັນທາງການ. ດ້ວຍທີ່ຕັ້ງບົດບາດຂອງອັງກິດ ໃນ EU ແລະ ຢູ່ໃນໂລກ, ການຢ້ຽມຢາມຂອງທ່ານເລຂາທິການໃຫຍ່ ຫງວຽນຟູ່ຈ້ອງ ຄັ້ງນີ້ ຈະຊຸກຍູ້ການພົວພັນທາງດ້ານການເມືອງ, ເພີ່ມທະວີຄວາມໄວ້ເນື້ອເຊື່ອໃຈ ແລະ ຄວາມເຂົ້າອົກເຂົ້າໃຈເຊິ່ງກັນ ແລະ ກັນລະຫວ່າງຫວຽດນາມ ແລະ ລາຊະອານາຈັກອັງກິດ, ຫັນການພົວພັນຄູ່ຮ່ວມມືຍຸດທະສາດລະຫວ່າງສອງປະເທດໃຫ້ປະກົດຜົນເປັນຈິງ.
ທ່ານເລຂາທິການໃຫຍ່ ຫງວຽນຟູ່ຈ້ອງ
(ພາບ :ອິນເຕີແນດ)
ຫວຽດນາມ ແລະ ອັງກິດໄດ້ສ້າງຕັ້ງການພົວພັນທາງການທູດນັບແຕ່ວັນທີ 11/9/1973. ໃນ EU, ອັງກິດ ແມ່ນໜຶ່ງໃນບັນດາປະເທດທີ່ມີການພົວພັນຮ່ວມມືທາງດ້ານເສດຖະກິດ - ການຄ້າ - ການລົງທຶນກັບຫວຽດນາມ ພັດທະນາທີ່ສຸດ. ຍາມໃດອັງກິດ ກໍ່ບຸລິມາສິດແກ່ການສະໜອງທຶນ ODA ໃຫ້ຫວຽດນາມ, ທັງແມ່ນປະເທດອຸປະຖຳສອງຝ່າຍທຳອິດຢູ່ໃນໂລກ ທີ່ໃຫ້ຄຳໝັ້ນສັນຍາສະຫງວນທຶນ ODA ໃຫ້ແກ່ຫວຽດນາມ ເຖິງປີ 2015, ໂດຍສຸມໃສ່ບັນດາຂົງເຂດເຊິ່ງຫວຽດນາມມີຄວາມຕ້ອງການຄື: ລົບລ້າງຄວາມອຶດຫີວ, ຫຼຸດຜ່ອນຄວາມທຸກຍາກ, ຮັບມືກັບການປ່ຽນແປງຂອງດິນຟ້າອາກາດ, ການສຶກສາບຳລຸງສ້າງ, ຕ້ານການສໍ້ລາດບັງຫຼວງ. ເດືອນ 9/2010, ສອງປະເທດສ້າງຕັ້ງການພົວພັນຄູ່ຮ່ວມມືຍຸດທະສາດຢ່າງເປັນທາງການ ແລະ ໃນ 3 ປີ ຜ່ານມາ, ການຮ່ວມມືລະຫວ່າງສອງປະເທດໄດ້ຮັບການຜັນຂະຫຍາຍຢ່າງຕັ້ງໜ້າ ໂດຍຜ່ານບັນດາກົນໄກຄູ່ເຈລະຈາຍຸດທະສາດ ແລະ ຄະນະກຳມະການປະສົມທາງດ້ານເສດຖະກິດ - ການຄ້າ, ກໍ່ສ້າງ ແລະ ປະຕິບັດແຜນການເຄື່ອນໄຫວປະຈຳປີ. ສອງຝ່າຍກໍ່ເຫັນດີເປັນເອກະພາບ ເພີ່ມທະວີຄະນະຜູ້ແທນທຸກຂັ້ນ, ມີການພົບປະເປັນປະຈຳລະຫວ່າງການນຳຂັ້ນສູງສອງປະເທດ, ເພີ່ມທະວີການພົວພັນຮ່ວມມືລະຫວ່າງສະພາແຫ່ງຊາດ, ບັນດາກະຊວງ, ຂະແໜງການ, ທ້ອງຖີ່ນ; ຍູ້ແຮງການເພີ່ມທະວີການຮ່ວມມືຢູ່ບັນດາເວທີປາໄສຫຼາຍຝ່າຍ ແລະ ບັນດາອົງການຈັດຕັ້ງສາກົນໃຫຍ່, ພິເສດແມ່ນສະຫະປະຊາຊາດ, ເວທີປາໄສຮ່ວມມືອາຊີ - ເອີລົບ (asem).
ໃນຍຸດທະສາດຫັນຈຸດສຸມໄປສູ່ພາກພື້ນອາຊີຕາເວັນອອກສ່ຽງໃຕ້, ຍາມໃດອັງກິດ ກໍ່ຖືຫວຽດນາມ ແມ່ນຄູ່ຮ່ວມມືທີ່ສຳຄັນ ແລະ ມີຄວາມສາມາດບົ່ມຊ້ອນ. ຍ້ອນເຫດນັ້ນ, ເດືອນ 4/2012, ທ່ານລັດຖະມົນຕີການຕ່າງປະເທດອັງກິດ William Hague ໄດ້ມາຢ້ຽມຢາມຫວຽດນາມ. ນີ້ແມ່ນເທື່ອທຳອິດໃນໄລຍະ 17 ປີຜ່ານມາ ທີ່ມີລັດຖະມົນຕີການຕ່າງປະເທດອັງກິດ ມາຢ້ຽມຢາມຫວຽດນາມ. ກ່າວຄວາມເຫັນໃນການຢ້ຽມຢາມຄັ້ງນີ້, ທ່ານ William Hague ຢືນຢັນວ່າ: ”ຫວຽດນາມ ແມ່ນປະເທດທີ່ມີຄວາມສາມາດບົ່ມຊ້ອນຢ່າງໃຫຍ່ຫຼວງ ທັງແມ່ນເພື່ອນທີ່ມີຄວາມສຳຄັນຂອງອັງກິດ ຢູ່ອາຊີຕາເວັນອອກສ່ຽງໃຕ້” ແຈ້ງການໜັງສືພິມຂອງກະຊວງການຕ່າງປະເທດອັງກິດໃນໂອກາດນີ້ກໍ່ໄດ້ຂຽນວ່າ: ”ການພົວພັນຄູ່ຮ່ວມມືຍຸດທະສາດ ເຊິ່ງທັງສອງຝ່າຍໄດ້ລົງນາມເມື່ອປີ 2010 ສະແດງໃຫ້ເຫັນຄຳໝັ້ນສັນຍາຂອງອັງກິດ ທີ່ຮ່ວມມືສອງຝ່າຍກັບຫວຽດນາມ, ເພາະວ່າຫວຽດນາມ ນັບມື້ນັບມີບົດບາດສຳຄັນຢູ່ໃນໂລກ”. ດັ່ງນັ້ນ, ການຢ້ຽມຢາມຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ເຖິງອັງກິດໃນຄັ້ງນີ້ ຈະເປັນຂີດໝາຍສຳຄັນເພື່ອໃຫ້ການພົວພັນລະຫວ່າງສອງປະເທດກ້າວເຂົ້າສູ່ໄລຍະໃໝ່. ຕີລາຄາກ່ຽວກັບຄວາມສຳຄັນຂອງການຢ້ຽມຢາມຄັ້ງນີ້. ທ່ານເອກອັກຄະລັດຖະທູດອັງກິດ ປະຈຳຫວຽດນາມ Antony Stokes, ໄດ້ຢືນຢັນວ່າ:
”ທ່ານເລຂາທິການໃຫຍ່ ຫງວຽນຟູ໋ຈ້ອງ ແມ່ນແຂກຜູ້ມີກຽດຂອງລັດຖະບານອັງກິດ. ດັ່ງນັ້ນນີ້ບໍ່ແມ່ນການປ້ຽມຢາມລະຫວ່າງສອງພັກ, ຫາກແມ່ນການຢ້ຽມຢາມທາງການຂອງການນຳຂັ້ນສູງສຸດ. ພວກຂ້າພະເຈົ້າພວມວາງແຜນການທີ່ສຳຄັນຕ່າງໆໃນປີ 2013. ທ້າຍເດືອນ 1 ນີ້. ທ່ານລັດຖະມົນຕີຊ່ວຍວ່າການກະຊວງປ້ອງກັນປະເທດອັງກິດ Astor ຈະມາຢ້ຽມຢາມຫວຽດນາມ. ນີ້ແມ່ນເທື່ອທຳອິດທີ່ມີລັດຖະມົນຕີຊ່ວຍວ່າການກະຊວງປ້ອງກັນປະເທດອັງກິດ ມາຢ້ຽມຢາມຫວຽດນາມ ໃນໄລຍະ 40 ປີ ແຫ່ງການພົວພັນລະຫວ່າງສອງປະເທດ ”.
ທ່ານລັດຖະມົນຕີການຕ່າງປະເທດຫວຽດນາມ ຟ້າມບິ່ນມິນ ແລະ ທ່ານເອກອັກຄະລັດຖະທູດອັງກິດ ປະຈຳຫວຽດນາມ Antony Stokes ອວຍພອນຜົນສຳເລັດຂອງສາຍພົວພັນຫວຽດນາມ - ອັງກິດ
(ພາບ :ອິນເຕີແນດ)
ໃນລາຍການເຮັດວຽກຂອງການຢ້ຽມຢາມຄັ້ງນີ້, ນອກຈາກການປຶກສາຫາລືບັນດາເນື້ອໃນທີ່ກ່ຽວຂ້ອງເຖິງການຄ້າ, ການລົງທຶນ, ດຳເນີນທຸລະກິດ. ທ່ານເລຂາທິການໃຫຍ່ ຫງວຽນຟູ໋ຈ້ອງ ພ້ອມກັບການນຳອັງກິດ ຍັງປຶກສາຫາລີບັນດາມາດຕະການຊຸກຍູ້ການຮ່ວມມືໃນຂົງເຂດຄູ່ຮ່ວມມືພາກລັດ - ພາກເອກະຊົນ, ຍູ້ໄວຄວາມຄືບໜ້າໃນການກໍ່ສ້າງມະຫາວິທະຍາໄລສາກົນຢູ່ ດ່ານັ້ງ, ເພີ່ມທະວີການຮ່ວມມືໃນການປ້ອງກັນ ຕ້ານການສໍ້ລາດບັງຫຼວງ. ກ່ຽວກັບການປ້ອງກັນປະເທດ, ສອງຝ່າຍປຶກສາຫາລືວິທີການຊຸກຍູ້ການຮ່ວມມືໃນ 3 ຂົງເຂດ: ທີ່ໜຶ່ງແມ່ນຜ່ານການເຈລະຈາຢ່າງເປັນທາງການ, ທີສອງແມ່ນຊື້ຂາຍອາວຸດ, ທີສາມແມ່ນຮ່ວມມືຜ່ານບັນດາສະພາມະຫາບັນດິດ, ການຄົ້ນຄ້ວາ… ທ່ານເອກອັກຄະລັດຖະທູດອັງກິດ ປະຈຳຫວຽດນາມ Antony Stokes, ໃຫ້ຮູ້ວ່າ:
”ການຢ້ຽມຢາມອັງກິດເປັນຂີດໝາຍໄລຍະທາງ 20 ປີ ແຫ່ງການພົວພັນລະຫວ່າງອັງກິດ ແລະ ຫວຽດນາມ, 20 ປີ ແຫ່ງການເຄື່ອນໄຫວຂອງສະພາອັງກິດ ຢູ່ຫວຽດນາມ ແລະ 20 ປີ ທີ່ກະຊວງພັດທະນາສາກົນອັງກິດ ໜູນຊ່ວຍດ້ານເຕັກນິກໃຫ້ແກ່ຫວຽດນາມ ແລະ 3 ປີ ແຫ່ງການປະຕິບັດສັນຍາຄູ່ຮ່ວມມືຍຸດທະສາດ ລະຫວ່າງສອງປະເທດ. ປີນີ້ແມ່ນປີທີ່ການພົວພັນລະຫວ່າງສອງປະເທດພັດທະນາໃນທຸກຂົງເຂດ ແລະ ກ້າວເຂົ້າສູ່ໄລຍະຮ່ວມມືໃໝ່ທີ່ມີຄວາມໝາຍ ແລະ ເລິກເຊິ່ງກວ່າຢ່າງແນ່ນອນ”
ການຢ້ຽມຢາມລາຊະອານາຈັກອັງກິດ ແລະ ອາຍແລນເໜືອ ຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ເພື່ອແນໃສ່ສືບຕໍ່ຜັນຂະຫຍາຍແນວທາງການຕ່າງປະເທດຂອງຫວຽດນາມ ຢ່າງຄົບຊຸດ ແລະ ຮອບດ້ານ. ການຢ້ຽມຢາມຈະເປັນຂີດໝາຍສຳຄັນໃນການພົວພັນລະຫວ່າງຫວຽດນາມ - ອັງກິດ, ຊຸກຍູ້ ແລະ ເປີດກວ້າງການຮ່ວມມືຫຼາຍດ້ານກັບອັງກິດ - ເຊິ່ງແມ່ນຄູ່ຮ່ວມມືທີ່ສຳຄັນຂອງ EU ໃນສະພາບການໃໝ່