(vovworld)- ການຢ້ຽມຢາມ ສ. ກູບາ ຢ່າງເປັນທາງການຂອງທ່ານປະທານປະເທດ ເຈືອງເຕີນຊາງ ແຕ່ວັນທີ 28 -30/9 ຕາມຄຳເຊີນຂອງທ່ານປະທານສະພາແຫ່ງລັດ ແລະ ສະພາລັດຖະມົນຕີ ກູບາ Raul Castro ເພື່ອສືບຕໍ່ເຮັດໃຫ້ການພົວພັນສາມັກຄີແບບພິເສດ, ການຮ່ວມມືຮອບດ້ານ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະກັນ ລະຫວ່າງພັກ, ລັດ ແລະ ປະຊາຊົນສອງປະເທດ ຫວຽດນາມແລະ ກູບາ ໃຫ້ເລິກເຊິ່ງກວ່າ.
ທ່ານ ປະທານປະເທດ ເຈືອງເຕີນຊາງ ແລະ ປະທານ Raul Castro
ພາບ:hanoitv.vn
|
ກ່ອນນີ້ 55 ປີ (2/12/1960), ກູບາ ແມ່ນປະເທດທຳອິດຢູ່ທາງທິດຕາເວັນຕົກເຄິ່ງຫນ້ວຍໂລກ ໄດ້ສ້າງຕັ້ງການພົວພັນທາງການທູດກັບຫວຽດນາມ ຢ່າງເປັນທາງການ. ນັບແຕ່ນັ້ນມາ, ການພົວພັນລະ ຫວ່າງຫວຽດນາມ ແລະ ກູບາ ຍາມໃດກໍໄດ້ຮັບການຮັກສາ, ພັດທະນາ.
ການພົວພັນແບບພິເສດ
ໃນປະຫວັດສາດໂລກຍຸກປະຈຸບັນ, ຍາກທີ່ຈະມີການພົວພັນໃດພິເສດຄືການພົວພັນລະຫວ່າງ 2 ພັກ, 2 ລັດຖະບານ ແລະ ປະຊາຊົນສອງປະເທດ ຫວຽດນາມ -ກູບາ. ການນຳ ແລະ ປະຊາຊົນ ຫວຽດນາມ -ກູບາ ຍາມໃດກໍຮັບຮູ້ກ່ຽວກັບຄວາມສຳຄັນຂອງການພົວພັນລະຫວ່າງສອງປະເທດ, ຍາມໃດກໍຖືນີ້ແມ່ນຊັບສົມບັດອັນລ້ຳຄ່າຂອງ ສອງຊາດ. ໂດຍໄດ້ຮັບການເພີ່ມພູນຄູນສ້າງຈາກ ປະທານໂຮ່ຈິມີນ ແລະ ປະທານ Fidel Castro, ການພົວພັນລະຫວ່າງ ຫວຽດນາມ -ກູບາ ນັບມື້ນັບພັດທະນາ ແມ່ນສາຍພົວພັນບໍລິສຸດຜຸດຜ່ອງ, ເປັນແບບຢ່າງ ຂອງການພົວພັນລະຫວ່າງ ສອງຊາດທີ່ມີອຸດົມຄະຕິການປະຕິວັດດຽວກັນ.
ຫ່າງໄກດ້ານພູມສາດ ແມ່ນບໍ່ມີຄວາມໝາຍອີກໃນການສ້າງຕັ້ງ ແລະ ພັດທະນາສາຍພົວພັນສະຫນິດຕິດພັນ, ບໍລິສຸດຜຸດຜ່ອງ ລະຫວ່າງຫວຽດນາມ ແລະ ກູບາ. ໃນຕະຫລອດກວ່າເຄິ່ງສັດຕະວັດຜ່ານມາ, ສອງປະເທດ ຍາມໃດກໍຮຽງບ່າຮຽງໄຫລ່ໃນການຕໍ່ສູ້ປົດປ່ອຍຊາດ. ໃນໄລຍະຫຍຸ້ງຍາກທີ່ສຸດຂອງການຕໍ່ສູ້ປົດປ່ອຍຊາດຂອງຫວຽດນາມ, ພັກ, ລັດ ແລະ ປະຊາຊົນ ກູບາ ຍາມໃດພ້ອມກັບຫວຽດນາມ ແລະສະຫງວນໃຫ້ ຫວຽດນາມ ການສະຫນັບສະຫນູນ ອັນລ້ຳຄ່າ ມີປະສິດທິຜົນ ນັບທັງທາງດ້ານຈິດໃຈ ແລະ ວັດຖຸ. ກູບາ ແມ່ນປະເທດນຳຫນ້າ ໃນຂະບວນການປະຊາຊົນໂລກ ສະຫນັບສະຫນູນການຕໍ່ສູ້ຍາດເອົາ ແລະ ປົກປັກຮັກສາເອກະລາດ, ເສລີພາບ, ສ້າງສາປະເທດຊາດຂອງຫວຽດນາມ; ເອົາໃຈໃສ່ຊຸກຍູ້ການພົວພັນທຸກດ້ານ ກັບຫວຽດນາມ ໃນທຸກຂົງເຂດ ມີທ່າແຮງ ຄື: ກໍ່ສ້າງ, ຄົມມະນາຄົມ, ການສຶກສາ ບຳລຸງສ້າງ.
ຜູ້ນຳ Fidel Castro ເຄີຍເວົ້າວ່າ: “ການພົວພັນ ລະຫວ່າງ ຫວຽດນາມ ແລະ ກູບາ ແມ່ນສາຍພົວພັນແບບພິເສດ, ບໍ່ເຄີຍມີມາກ່ອນ, ແມ່ນແບບຢ່າງຂອງການພົວພັນສາກົນ. ປະຊາຊົນ ຫວຽດນາມ ຍາມໃດກໍຈົດຈ່ຳອາລົມຈິດອັນເລິກເຊິ່ງ ຊື່ງປະຊາຊົນ ກູບາ ສະຫງວນໃຫ້ຕົນໃນໄລຍະສົງຄາມກໍຄື ໃນສັນຕິພາບ, ສ້າງສາປະເທດຊາດ.
ໃນຊຸມປີເດືອນ ທີ່ ກູບາ ຖືກ ອາເມລິກາ ຂວ້ຳບາດ, ຖືກໄພທຳມະຊາດທຳລາຍຢ່າງລຽນຕິດ, ປະເຊີນຫນ້າກັບຄວາມຫຍຸ້ງຍາກຫລາຍຢ່າງ, ພັກ, ລັດ ແລະ ປະຊາຊົນ ຫວຽດນາມ ໄດ້ສະຫງວນໃຫ້ ກູບາ ອ້າຍນ້ອງ ການສະຫນັບສະຫນູນຢ່າງສຸດຈິດສຸດໃຈ. ຫວຽດນາມ ຍາມໃດກໍເອົາໃຈໃສ່, ຕິດຕາມ ແລະ ມີຄວາມປິຕິຊົມຊື່ນຕໍ່ບັນດາຜົນງານຊື່ງ ປະຊາຊົນ ກູບາ ຍາດມາໄດ້ໃນວິວັດການປະຕິບັດແນວທາງແຫ່ງການ ອັບ ເດັດ ຮູບແບບພັດທະນາເສດຖະກິດ ສັງຄົມ ໂດຍກອງປະຊຸມໃຫຍ່ ຄັ້ງທີ 6 ຂອງພັກກອມມູນິດ ກູບາ ຮັບຮອງເອົາ ພ້ອມທັງ ສະແດງຄວາມເຊື່ອໝັ້ນວ່າ ພາຍໃຕ້ການຊີ້ນຳນຳພາອັນສະຫລາດສອ່ງໃສຂອງພັກກອມມູນິດ ກູບາ, ຜູ້ນຳ Fidel Castro, ປະທານ Raul Castro, ປະຊາຊົນ ກູບາ ຈະຜ່ານຜ່າທຸກຄວາມຫຍຸ້ງຍາກ, ສືບຕໍ່ພັດທະນາປະເທດຊາດ.
ສ້າງທ່າໃຫ້ການຮ່ວມມືເສດຖະກິດສອງຝ່າຍ
ການພົວພັນດ້ານການເມືອງອັນດີງາມ, ພິເສດ ຄວາມໄວ້ເນື້ອເຊື່ອໃຈຢ່າງສູງລະຫວ່າງ ຫວຽດນາມ ແລະ ກູບາ ໄດ້ສ້າງທ່ວງທ່າເພື່ອໃຫ້ການຮ່ວມມືດ້ານເສດຖະກິດ, ການຄ້າ ລະຫວ່າງສອງປະເທດພັດທະນາ. ການແລກປ່ຽນດ້ານເສດຖະກິດ ການຄ້າ ປີ 2012 ແມ່ນ 175 ລ້ານ USD, ປີ 2014 ເພີ່ມຂຶ້ນ 200 ລ້ານ USD. ບັນດາຜະລິດຕະພັນຫວຽດນາມ ສົ່ງອອກໄປຍັງ ກູບາ ສ່ວນຫລາຍແມ່ນ ເຂົ້າສານ, ເຄືື່ອງໃຊ້ສອຍ, ສ່ວນນຳເຂົ້າສິນຄ້າ ຈາກ ກູບາ ແມ່ນຜະລິດຕະພັນຊີວະສາດ, ຢາປົວພະຍາດ. ສອງຝ່າຍ ກໍເອົາໃຈໃສ່ພັດທະນາການຮ່ວມມືສຳຫລວດ ແລະ ຂຸດຄົ້ນນ້ຳມັນອາຍແກສ ຢູ່ ກູບາ, ຊຸກຍູ້ຄວາມສາມາດຮ່ວມມືລະຫວ່າງ ກຸ່ມບໍລິສັດໂທລະຄົມມະນາຄົມກອງທັບ Viettel ແລະ ບໍລິສັດໂທລະຄົມມະນາຄົມແຫ່ງລັດ ກູບາ ETECSA.
ມີເອກະສານ, ຂໍ້ຕົກລົງການຮ່ວມມືຫລາຍສະບັບ ກໍໄດ້ຮັບການລົງນາມ, ສ້າງພື້ນຖານຢ່າງເລິກເຊິ່ງ, ກວ້າງຂວາງ ແລະ ມີພະຍານຫລັກຖານດ້ານກົດໝາຍໃຫ້ການເຄື່ອນໄຫວຮ່ວມມືດຳເນີນທຸລະກິດຂອງບັນດາວິສາຫະກິດໃນຕໍ່ຫນ້າ ກໍຄື ຍາວນານ. ຫວຽດນາມ ແລະ ກູບາ ໄດ້ເປັນເຈົ້າການ ທັງສືບຕໍ່ຍູ້ແຮງການພົວພັນດ້ານເສດຖະກິດ ການຄ້າ, ທັງເພີ່ມເຕີມພັດທະນາເສດຖະກິດສອງຝ່າຍ ດ້ວຍເນື້ອໃນ, ກົນໄກ, ຮູບການໃຫມ່ເໝາະສົມກັບບັນດາການປະຕິຮູບເສດຖະກິດຂອງທັງສອງປະເທດ, ທັງເພີ່ມທະວີຄວາມສາມັກຄີ, ມິດຕະພາບທີ່ເປັນມູນເຊື້ອ, ທັງຍົກສູງລັກສະນະປະສິດທິຜົນຂອງບັນດາໂຄງການຮ່ວມມື.
ເຖິງຢ່າງໃດກໍຕາມ ຄວາມສາມາດບົ່ມຊ້ອນ, ທ່າໄດ້ປຽບການຮ່ວມມືລະຫວ່າງສອງປະເທດ ຍັງໃຫຍ່ຫລວງຢູ່, ເປັນຕົ້ນໃນສະພາບປະຈຸບັນ ເມື່ອ ກູບາ ພວມຍູ້ແຮງການປະຕິຮູບ, ອັບເດັດ ຮູບແບບການພັດທະນາ ພ້ອມທັງທຳລາຍການຂວ້ຳບາດໃນຫລາຍທົດສະວັດ. ສະນັ້ນ ການພົບປະຂັ້ນສູງ, ເພີ່ມທະວີການຢ້ຽມຢາມເຊິ່ງກັນ ແລະກັນ ແມ່ນສິ່ງຈຳເປັນທີ່ສຸດໃນໄລຍະປະຈຸບັນ.
ໃນສະພາບການນັ້ນ ການຢ້ຽມຢາມ ກູບາ ຢ່າງເປັນທາງການຂອງທ່ານປະທານປະເທດ ເຈືອງເຕີນຊາງ ບໍ່ພຽງແຕ່ຮັດແຫນ້ນສາຍພົວພັນແບບພິເສດເທົ່ານັ້ນ ຫາກຍັງເປີດວິວັດການຮ່ວມມືດ້ານເສດຖະກິດ ລະຫວ່າງ ຫວຽດນາມ ແລະ ກູບາ ໃນໄລຍະໃຫມ່ອີກດ້ວຍ. ປະຈຸບັນ ຫວຽດນາມ ພວມກະກຽມກອງປະຊຸມໃຫຍ່ຂອງພັກກອມມູນິດຫວຽດນາມ ຄັ້ງທີ 12 ແລະ ກູບາ ພວມຫັນປ່ຽນການປະຕິຮູບຢ່າງແຮງ, ການຢ້ຽມຢາມ ກູບາ ຂອງທ່ານປະທານປະເທດ ເຈືອງເຕີນຊາງ ຢ່າງເປັນທາງການ ແມ່ນໂອກາດເພື່ອໃຫ້ສອງຝ່າຍ ຊຸກຍູ້ບັນດາມາດຕະການຮ່ວມມືດ້ານເສດຖະກິດ ການຄ້າ, ເພື່ອເພີ່ມປະສິດທິຜົນ ແລະ ຍືນຍົງ, ເໝາະສົມກັບເງື່ອນໄຂໃຫມ່ ແລະ ຜົນປະໂຫຍດຂອງແຕ່ລະປະເທດ. ການຢ້ຽມຢາມ ກໍແມ່ນໂອກາດເພື່ອໃຫ້ສອງຝ່າຍ ພ້ອມກັນແລກປ່ຽນທັດສະນະກ່ຽວກັບເສັ້ນທາງຂອງແຕ່ລະປະເທດ, ປະກອບສ່ວນສ້າງພາລະກິດປະຕິວັດຢູ່ແຕ່ລະປະເທດສຳເລັດຜົນ.