(vovworld), - ກ່ອນນີ້ 40 ປີ, ວັນທີ 21/9/1973, ຫວຽດນາມ ແລະ ຍີ່ປຸ່ນ ໄດ້ສ້າງສາຍພົວພັນທາງການທຸດຢ່າງເປັນທາງການ. ໃນຕະຫລອດໄລຍະ 40 ປີ ນັ້ນ, ການພົວພັນລະຫວ່າງສອງປະເທດໄດ້ພັດທະນາຢ່າງບໍ່ຢຸດຢັ້ງ, ຫວຽດນາມ ແລະ ຍີ່ປຸ່ນໄດ້ກາຍເປັນຄູ່ຮ່ວມມືສຳຄັນຂອງກັນໃນທຸກຂົງເຂດ. ເນ່ືອງໃນໂອກາດສະເຫລີມສະຫລອງ 40 ປີແຫ່ງວັນສ້າງສາຍພົວພັນທາງການທູດລະຫວ່າງສອງປະເທດ, ທ່ານ ຟ້າມບີ່ງມີງ, ລັດຖະມົນຕີການຕ່າງປະເທດ ຫວຽດນາມ ໄດ້ແລກປ່ຽນກັບນັກຂ່າວກ່ຽວກັບໄລຍະທາງແຫ່ງການຮ່ວມມື ໃນ 40 ປີ ຜ່ານມາ ກໍຄືບັນດາແງ່ຫວັງແຫ່ງການຮ່ວມມືລະຫວ່າງ ຫວຽດນາມ ແລະ ຍີ່ປຸ່ນ ໃນໄລຍະຈະມາເຖິງ. ບັນນາທິການວິທະຍຸກະຈາຍສຽງຫວຽດນາມ ຂໍຄັດສະເຫນີເນື້ອໃນການແລກປ່ຽນດັ່ງກ່າວຜ່ານບົດຂຽນທີ່ມີຫົວຂໍ້ວ່າ: ຫວຽດນາມ - ຍີ່ປຸ່ນ: 40 ປີແຫ່ງໄລຍະທາງຮ່ວມມືຢ່າງມີປະສິດທິຜົນ.
.jpg)
ທ່ານນາຍົກລັດຖະມົນຕີ ຍີ່ປຸ່ນ Shinzo Abe ແລະ ທ່ານ
ປະທານປະເທດເຈືອງເຕີນຊາງ
|
ຕາມທ່ານລັດຖະມົນຕີການຕ່າງປະເທດ ຫວຽດນາມ ຟ້າມບີ່ງມີງ ແລ້ວ, ພາຍຫລັງ 40 ປີແຫ່ງການສ້າງສາຍພົວພັນທາງການທູດເມື່ອເດືອນ 9/1973, ການພົວພັນລະຫວ່າງຫວຽດນາມ ແລະ ຍີ່ປຸ່ນ ພວມຢູ່ໃນໄລຍະພັດທະນາຢ່າງແຂງແຮງ. ຫວຽດນາມ ແລະ ຍີ່ປຸ່ນ ໄດ້ກາຍເປັນຄູ່ຮ່ວມມືນັບມື້ນັບສຳຄັນຂອງກັນໃນທຸກຂົງເຂດເຊັ່ນ: ການເມືອງ, ການທູດ, ເສດຖະກິດ ການຄ້າ, ການລົງທຶນ, ການຊ່ວຍເຫລືອພັດທະນາຕະຫລອດຮອດການພັດທະນາແຫລ່ງຊັບພະຍາກອນມະນຸດ, ວິທະຍາສາດເຕັກໂນໂລຊີ, ວັດທະນະທຳ, ການພົບປະແລກປ່ຽນປະຊາຊົນ….ແຕ່ປີ 2009, ສອງປະເທດເຫັນດີຍົກການພົວພັນລະຫວ່າງສອງປະເທດຂຶ້ນລະດັບຄູ່ຮ່ວມມືຍຸດທະສາດ, ເພື່ອສັນຕິພາບ ສະຖຽນລະພາບຢູ່ອາຊີ. ທ່ານລັດຖະມົນຕີການຕ່າງປະເທດ ຫວຽດນາມ ຟ້າມບີ່ງມີງ ຊີ້ແຈ້ງວ່າ:
“ການນຳຂັ້ນສູງສອງປະເທດ ຮັກສາບັນດາການຢ້ຽມຢາມ, ພົບປະ ເປັນປະຈຳ, ປະກອບສ່ວນປັບປຸງຄວາມໄວ້ເນື້ອເຊື່ອໃຈດ້ານການເມືອງລະຫວ່າງສອງປະເທດ ແລະ ວາງອອກບັນດາການຊີ້ນຳນຳພາກ່ຽວກັບທິດທາງໃຫຍ່ກໍຄືບັນດາມາດຕະການລະອຽດ ເພື່ອຊຸກຍູ້ການຮ່ວມມືສອງຝ່າຍ. ພ້ອມກັບກົນໄກຄະນະກຳມະການຮ່ວມມື ຫວຽນດາມ - ຍີ່ປຸ່ນ, ບັນດາກົນໄກເຈລະຈາໃນທຸກຂົງເຂດຮ່ວມມືລະອຽດກໍໄດ້ວາງອອກ, ການຮ່ວມມືລະຫວ່າງບັນດາກະຊວງ, ຂະແຫນງການນັບມື້ນັບໄດ້ຮັບການເປີດກວ້າງ, ມີປະສິດທິຜົນຢ່າງແທດຈິງ. ສອງຝ່າຍຕັ້ງຫນ້າສົມທົບກັນຢູ່ບັນດາເວທີປາໄສ, ອົງການຈັດຕັ້ງສາກົນ ແລະ ພາກພື້ນ ຄື: ສປຊ, ອາຊຽນ, APEC, ການຮ່ວມມມືແມ່ຂອງ - ຍີ່ປຸ່ນ.”
ທ່ານລັດຖະມົນຕີການຕ່າງປະເທດ ຫວຽດນາມ ຟ້າມບີ່ງມີງ ເນັ້ນຫນັກວ່າ: ຍ້ອນການພົວພັນດ້ານການເມືອງອັນດີງາມໄດ້ສ້າງທ່ວງທ່າໃຫ້ແກ່ການຮ່ວມມືເສດຖະກິດລະຫວ່າງສອງປະເທດພັດທະນາຢ່າງແຂງແຮງ. ປະຈຸບັນ, ຍີ່ປຸ່ນ ແມ່ນຄູ່ຮ່ວມມືສຳຄັນຕົ້ນຕໍຂອງຫວຽດນາມ, ແມ່ນນັກລົງທຶນໃຫຍ່ສຸດ, ພ້ອມທັງກໍແມ່ນປະເທດສະຫນອງການຊ່ວຍເຫລືອທຶນ ODA ຢ່າງເປັນທາງການ ໃຫຍ່ສຸດໃຫ້ແກ່ຫວຽດນາມ. ນັບແຕ່ເມື່ອເຊື່ອມຕໍ່ ODA ໃນປີ 1992 ມາຮອດປະຈຸບັນ, ຍີ່ປຸ່ນ ໄດ້ສະຫງວນ ທຶນ ODA ໃຫ້ແກ່ຫວຽດນາມ ລວມມູນຄ່າກວ່າ 2.100 ຕື້ເຢັນ(ເທົ່າກັບ 21 ຕຶ້ USD), ກວມເອົາ 30% ທຶນ ODA ໝັ້ນໝາຍໃຫ້ແກ່ຫວຽດນາມຂອງປະຊາຄົມໂລກ. ກ່ຽວກັບດ້ານການຄ້າ, ຍີ່ປຸ່ນ ແມ່ນຄູ່ຮ່ວມມືສອງຝ່າຍໃຫຍ່ອັນດັບ 3 ຂອງຫວຽດນາມ ດ້ວຍວົງເງິນການຄ້າສອງສົ້ນບັນລຸ 24,7 ຕຶ້ USD ໃນປີ 2012. ສອງປະເທດໄດ້ລົງນາມໃນຂໍ້ຕົກລົງຫລາຍສະບັບ, ໃນນັ້ນ ມີສັນຍາຄູ່ຮ່ວມມືກ່ຽວກັບການຮ່ວມມືເສດຖະກິດ ຫວຽດນາມ - ຍີ່ປຸ່ນ ໄດ້ສ້າງເງື່ອນໄຂສະດວກ ແລະ ກອບກົດໝາຍໃຫ້ແກ່ການເຄື່ອນໄຫວຮ່ວມມືເສດຖະກິດ. ການຮ່ວມມືໃນບັນດາຂົງເຂດສຶກສາ, ວິທະຍາສາດ, ເຕັກໂນໂລຊີ, ວັດທະນະທຳ, ກິລາ, ການພົບປະແລກປ່ຽນລະຫວ່າງບັນດາທ້ອງຖິ່ນກໍໄດ້ດຳເນີນໄປຢ່າງຟົດຟື້ນ. ປີ 2012, ມີຊາວຍີ່ປຸ່ນກວ່າ 500.000 ເທື່ອຄົນໄດ້ມາຢ້ຽມຢາມ ຫວຽດນາມ ແລະ ປະຈຸບັນ ມີນັກຮຽນ, ນັກສຶກສາ, ຄົນງານຫວຽດນາມກວ່າ 20.000 ຄົນພວມຮຳ່ຮຽນ, ເຮັດວຽກຢູ່ ຍີ່ປຸ່ນ. ນີ້ແມ່ນໝາກຜົນແຫ່ງຄວາມມານະພະຍາຍາມຢ່າງບໍ່ຮູ້ອິດບໍ່ຮູ້ເມື່ອຍຂອງລັດຖະບານ ແລະ ປະຊາຊົນສອງປະເທດ ເພື່ອເພີ່ມພູນຄູນສ້າງການພັດທະນາການພົວພັນລະຫວ່າງສອງປະເທດໃນຕະຫລອດ 40 ປີ ຜ່ານມາ. ທ່ານລັດຖະມົນຕີການຕ່າງປະເທດຫວຽດນາມ ຟ້າມບີ່ງມີງ ຢືນຢັນວ່າ:
“ຂ້າພະເຈົ້າຖືວ່າ ການພົວພັນລະຫວ່າງ ຫວຽດນາມ ແລະ ຍີ່ປຸ່ນ ພວມຢູ່ໃນໄລຍະພັດທະນາຢ່າງແຂງແຮງ, ຊັບສົມບັດອັນລຳ້ຄ່າຂອງສອງປະເທດນັ້ນແມ່ນຄວາມໄວ້ເນື້ອເຊື່ອໃຈເຊິ່ງກັນ ແລະກັນ ແລະ ການຮ່ວມມືຮອບດ້ານ, ສະແດງໃຫ້ເຫັນຜ່ານເລື່ອງສອງປະເທດໄດ້ສ້າງສາຍພົວພັນຄູ່ຮ່ວມມືຍຸດທະສາດດ້ວຍຄວາມເຫັນດີສູງຂອງການນຳ ແລະ ການສະຫນັບສະຫນູນຢ່າງກວ້າງຂວາງຂອງປະຊາຊົນສອງປະເທດ. ນີ້ແມ່ນພື້ນຖານສຳຄັນເພ່ືອນຳການພົວພັນລະຫວ່າງ ຫວຽດນາມ ແລະ ຍີ່ປຸ່ນ ນັບມື້ນັບເຂົ້າສູ່ລວງເລິກ ແລະ ມີປະສິດທິຜົນໃນໄລຍະຈະມາເຖິງ. ”
ຕາມທ່ານລັດຖະມົນຕີການຕ່າງປະເທດຫວຽດນາມ ຟ້າມບິ່ງມີງແລ້ວ, ການພົວພັນລະຫວ່າງ ຫວຽດນາມ ແລະ ຍີ່ປຸ່ນ ບໍ່ພຽງແຕ່ເລີ່ມຕົ້ນກ່ອນນີ້ 40 ປີ ຫາກການພົວພັນແລກປ່ຽນລະຫວ່າງປະຊາຊົນຫວຽດນາມ ແລະ ຍີ່ປຸ່ນ ໄດ້ມີມາແຕ່ດົນນານແລ້ວ. ກ່ອນນີ້ 400 ປີ, ບັນດາກຳປັ່ນການຄ້າຂອງຍີ່ປຸ່ນ ໄດ້ເຂົ້າທຽບທ່າກຳປັ່ນ ໂຟຮຽນ(Pho Hien) ຢູ່ ພາກເຫນືອຫວຽດນາມ ແລະ ຄຸ້ມເມືອງເກົ່າໂຮ້ຍອານ ຢູ່ ພາກກາງ ຫວຽດນາມ ເພື່ອຄ້າຂາຍສິນຄ້າ ແລະ ປະຈຸບັນ ຢູ່ແຫ່ງນີ້ຍັງຄົງຮັກສາຮ່ອງຮອຍຂອງການພົວພັນແລກປ່ຽນວັດທະນະທຳ, ການຄ້າລະຫວ່າງສອງປະເທດ. ຂົວແຫ່ງຫນຶ່ງທີ່ຍີ່ປຸ່ນກໍ່ສ້າງຢູ່ຄຸ້ມເມືອງເກົ່າ ໂຮ້ຍອານ ແມ່ນຕົວຢ່າງໃຫ້ແກ່ການພົວພັນແລກປ່ຽນນີ້. ປະຈຸບັນ, ພ້ອມກັບບັນດາການຮ່ວມມືລະຫວ່າງສະພາແຫ່ງຊາດ, ລັດຖະບານ, ພັກການເມືອງສອງປະເທດ, ການຮ່ວມມືພົວພັນແລກປ່ຽນລະຫວ່າງບັນດາທ້ອງຖີ່ນ, ບັນດາອົງການຈັດຕັ້ງມິດຕະພາບລະຫວ່າງປະຊາຊົນສອງປະເທດກໍຊ່ວຍໃຫ້ການພົວພັນລະຫວ່າງ ຫວຽດນາມ ແລະ ຍີ່ປຸ່ນ ພັດທະນາຢ່າງເລິກເຊິ່ງ ແລະ ກວ້າງຂວາງ, ເປັນຫລາຍຮູບຫລາຍແບບ ແລະ ນັບມື້ນັບມີປະສິດທິຜົນ, ພິເສດ ແມ່ນໄວຫນຸ່ມນັບມື້ນັບລຶ້ງເຄີຍກັບດອກຊາກຸຣະ, ຊາຂອງຍີ່ປຸ່ນ. ການພົວພັນແລກປ່ຽນລະຫວ່າສອງປະເທດ ນັບມື້ນັບແຫນ້ນແຟ້ນ ພ້ອມກັບຈຸດທີ່ຄ້າຍຄືກັນກ່ຽວກັບຮີດຄອງປະເພນີວັດທະນະທຳ ໄດ້ຊ່ວຍໃຫ້ປະຊາຊົນສອງປະເທດໃກ້ຊິດຕິດແທດກວ່າ ແລະ ເຂົ້າໃຈເຊິ່ງກັນ ແລະກັນກວ່າ.
“ການທຸູດປະຊາຊົນໄດ້ປະກອບສວ່ນສຳຄັນເພື່ອປັບປຸງພື້ນຖານນ້ຳໃຈມິດຕະພາບ ແລະ ການພັດທະນາແບບຍືນຍົງຂອງການພົວພັນຄູ່ຮ່ວມມືຍຸດທະສາດລະຫວ່າງ ຫວຽດນາມ ແລະ ຍີ່ປຸ່ນ. ກົງກັນຂ້າມ ຄວາມມານະພະຍາຍາມຂອງລັດຖະບານສອງປະເທດ ໄດ້ສ້າງສະພາບແວດລ້ອມນັບມື້ນັບສະດວກເພື່ອເພີ່ມທະວີການພົບປະແລກປ່ຽນ, ເຂົ້າອົກເຂົ້າໃຈເຊິ່ງກັນ ແລະກັນລະຫວ່າງປະຊາຊົນສອງປະເທດ. ຂ້າພະເຈົ້າເຊື່ອໝັ້ນວ່າ ດ້ວຍຄວາມໄວ້ເນື້ອເຊື່ອໃຈ, ອາລົມຈິດສະຫນິດຕິດພັນລະຫວ່າງສອງປະເທດ ແລະ ປະຊາຊົນສອງຊາດ ການພົວພັນຄູ່ຮ່ວມມືຍຸດທະສາດຫວຽດນາມ - ຍີ່ປຸ່ນ ຈະສືບຕໍ່ພັດທະນາແບບຍືນຍົງ.”
ບົນພື້ນຖານການພົວພັນອັນດີງາມໃນ 40 ປີຜ່ານມາ, ທ່ານລັດຖະມົນຕີການຕ່າງປະເທດ ຟ້າມບີງມີງ ເຊື່ອໝັ້ນວ່າ ການພົວພັນລະຫວ່າງສອງປະເທດ ຫວຽດນາມ - ຍີ່ປຸ່ນ ຈະສືບຕໍ່ພັດທະນາຢ່າງແຂງແຮງກວ່າໃນໄລຍະຈະມາເຖິງຢ່າງ ແນ່ນອນວ່າ.