(vovworld) - ກ່ອນທີ່ດຳເນີນການຢ້ຽມຢາມອາເມລິກາ ຢ່າງເປັນທາງການໃນລະຫວ່າງວັນທີ 6-10/7/2015. ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ, ຢືນຢັນຄວາມປາຖະໜາ ຕໍ່ບັນດາສຳນັກຂ່າວສານ, ສື່ມວນຊົນອາເມລິກາ ວ່າ, ຫວຽດນາມ ແລະ ອາເມລິກາຈະແບ່ງປັນວິໄສທັດ “ມຸ່ງໄປສູ່ອະນາຄົດ“, ຮ່ວມແຮງຮ່ວມໃຈສ້າງການພົວພັນມິດຕະພາບ, ການຮ່ວມມືສະຖຽນລະພາບຢ່າງຍາວນານ. ວິທະຍຸກະຈາຍສຽງຫວຽດນາມ ຂໍຄັດສະເໜີເນື້ອໃນສຳຄັນຂອງການສຳພາດນີ້.
ທ່ານເລຂາທິການໃຫຍ່ ຫງວຽນຟູ໋ຈ້ອງ ເລີ່ມຕົ້ນການຢ້ຽມຢາມອາເມລິກາ ຢ່າງເປັນທາງການ
(ພາບ: ອິນເຕີແນດ)
ເມື່ອຕອບຄຳຖາມຂອງບັນດານັກຂ່າວອາເມລິກາ ກ່ຽວກັບການພົວພັນຫວຽດນາມ - ອາເມລິກາ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຊີ້ແຈ້ງວ່າ: 40 ປີ ຫຼັງສົງຄາມ, 20 ປີແຫ່ງການສ້າງການພົວພັນເປັນປົກກະຕິ, ຈາກປະເທດ“ທີ່ເປັນປໍລະປັກ“, ຫວຽດນາມ ແລະ ອາເມລິກາ ໄດ້ກາຍເປັນ “ເພື່ອນ“ ແລະ ນັບແຕ່ປີ 2013 ມາຮອດປະຈຸບັນ “ເປັນຄູ່ຮ່ວມມືຮອບດ້ານ“ ນີ້ແມ່ນບາດກ້າວທີ່ຍາວໄກຢ່າງແທ້ຈິງ. ກ່ຽວກັບການທ້າທາຍທີ່ຍັງຄົງຄ້າງໃນການພົວພັນສອງປະເທດ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຖືວ່າ: ສຳລັບບັນດາສິ່ງທີ່ຍັງແຕກຕ່າງກັນ, ວິທີດີທີ່ສຸດ ແລະ ມີປະສິດທິຜົນທີ່ສຸດແມ່ນ ສອງຝ່າຍສືບຕໍ່ການເຈລະຈາຢ່າງກົງໄປກົງມາເພື່ອເຂົ້າໃຈກັນກວ່າ, ບໍ່ປະໃຫ້ຄວາມແຕກຕ່າງກັນນັ້ນກີດຂວາງການເພີ່ມທະວີສາຍພົວພັນລວມ
ພ້ອມກັນກໍ່ສ້າງອະນາຄົດ
ກ່ຽວກັບບັນດາຈຸດໝາຍຂອງການຢ້ຽມຢາມປະຫວັດສາດນີ້, ທ່ານເລຂາທິການໃຫຍ່ ຫງວຽນຟູ໋ຈ້ອງ: ຊີ້ແຈ້ງວ່າ, ນີ້ແມ່ນການຢ້ຽມຢາມອາເມລິກາຢ່າງເປັນທາງການຄັ້ງທຳອິດຂອງທ່ານເລຂາທິການໃຫຍ່ພັກກອມມູນິດຫວຽດນາມ ຕາມຄຳເຊີນຂອງອຳນາດການປົກຄອງອາເມລິກາ, ກົງກັບໂອກາດທີ່ສອງປະເທດພວມສະເຫຼີມສະຫຼອງ 20 ປີແຫ່ງວັນສ້າງຕັ້ງສາຍພົວພັນທາງການທູດ. ນີ້ແມ່ນຈຸດເວລາທີ່ດີເພື່ອຕີລາຄາຄືນໄລຍະທາງຜ່ານມາ ແລະ ແບ່ງປັນວິໄສທັດ “ມຸ່ງໄປສູ່ອະນາຄົດ”, ຮ່ວມແຮງຮ່ວມໃຈເພ່ື່ອສ້າງການພົວພັນມິດຕະພາບ, ການຮ່ວມມື, ສະຖຽນລະພາບອັນຍາວນານ, ບົນພື້ນຖານເຄົາລົບເຊິ່ງກັນ ແລະ ກັນ, ເຄົາລົບລະບອບການເມືອງຂອງກັນ, ເພື່ອຜົນປະໂຫຍດຂອງປະຊາຊົນ 2 ປະເທດ ແລະ ປະກອບສ່ວນເຂົ້າໃນການຮັກສາສັນຕິພາບ, ສະຖຽນລະພາບ, ການຮ່ວມມື, ວັດທະນາຖາວອນຢູ່ພາກພື້ນ ແລະ ຢູ່ໃນໂລກ. ຫວຽດນາມ ຍາມໃດກໍຖືການພົວພັນກັບ ອາເມລິກາ ເປັນສຳຄັນ, ຖືອາເມລິກາ ແມ່ນໜຶ່ງໃນບັນດາຄູ່ຮ່ວມມືສຳຄັນອັນດັບໜຶ່ງໃນນະໂຍບາຍການຕ່າງປະເທດຂອງຫວຽດນາມ. ການຢ້ຽມຢາມຄັ້ງນີ້ເຮັດໃຫ້ການພົວພັນຄູ່ຮ່ວມມືຮອບດ້ານລະຫວ່າງ 2 ປະເທດໃນທຸກໆຂົງເຂດເລິກເຊິ່ງກ່ວາອີກ. ຄຽງຂ້າງການຮ່ວມມື 2 ຝ່າຍແລ້ວ, ຫວຽດນາມ ແລະ ອາເມລິກາ ຈະແລກປ່ຽນວິໄສທັດໃນໄລຍະຍາວກ່ຽວກັບບັນດາບັນຫາພາກພື້ນ ແລະ ສາກົນທີ່ຕາງຝ່າຍຕາງມີຄວາມສົນໃຈ, ຄືສະພາບການຢູ່ພາກພື້ນອາຊີ - ປາຊີຟິກ, ສັນຍາຄູ່ຮ່ວມມືຂ້າມປາຊີຟິກ, ບັນຫາການປ່ຽນແປງຂອງດິນຟ້າອາກາດ, ບັນດາກົນໄກຮ່ວມມືດ້ານການເມືອງ, ເສດຖະກິດ ແລະ ຄວາມໝັ້ນຄົງໃນພາກພື້ນ, ຄວາມໝັ້ນຄົງ ແລະ ຄວາມປອດໄພໃນການເດີນທະເລ. ທ່ານເລຂາທິການໃຫຍ່ ຫວັງວ່າ, ນີ້ແມ່ນໂອກາດເພື່ອໃຫ້ 2 ຝ່າຍອາດສາມາດແລກປ່ຽນບັນຫາຕ່າງໆເຊິ່ງທັງ 2 ຝ່າຍຍັງມີຄວາມແຕກຕ່າງກັນຢ່າງກົງໄປກົງມາ, ເພື່ອແນໃສ່ປະກອບສ່ວນເຂົ້າໃນການເພີ່ມທະວີຄວາມເຂົ້າອົກເຂົ້າໃຈຫລຸດຜ່ອນຄວາມແຕກຕ່າງກັນ, ສ້າງຄວາມໄວ້ເນື້ອເຊື່ອໃຈລະຫວ່າງ 2 ຝ່າຍເທື່ອລະກ້າວ ເພື່ອແນໃສ່ເຮັດໃຫ້ການພົວພັນ ຫວຽດນາມ - ອາເມລິກາ ນັບມື້ນັບພັດທະນາ, ມີສະຖຽນລະພາບ ແລະ ແທດຈິງກ່ວາອີກ.
ຮັດແຄບຄວາມບໍ່ລົງລອຍກັນ ແລະ ເພີ່ມທະວີການຮ່ວມມືດ້ານເສດຖະກິດ
ເມື່ອຕອບຄຳຖາມຂອງບັນດານັກຂ່າວອາເມລິກາ ກ່ຽວກັບສະພາບການສິດທິມະນຸດ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຢັ້ງຢືນວ່າ: ສະພາບຕົວຈິງໄດ້ສະແດງໃຫ້ເຫັນວ່າ: ຜ່ານ 30 ປີແຫ່ງການປ່ຽນໃໝ່, ສິດຂອງຊາວຫວຽດນາມ ນັບມື້ນັບໄດ້ຮັບການຍົກສູງ ແລະ ຮັບປະກັນ. ສິ່ງດັ່ງກ່າວໄດ້ລະບຸໄວ້ໃນລັດຖະທຳມະນູນ, ກົດໝາຍ, ກໍ່ຄືໄດ້ກຳນົດຢ່າງລະອຽດດ້ວຍບັນດານະໂຍບາຍ, ມາດຕະການປະຕິບັດຢ່າງລະອຽດຈາກສູນກາງ ລົງຮອດທ້ອງຖິ່ນ. ຜ່ານບັນດາຄວາມມານະພະຍາຍາມນັ້ນ, ຫວຽດນາມ ບັນລຸໄດ້ຜົນງານຫຼາຍຢ່າງໃນການຮັບປະກັນສິດທິມະນຸດໃນທຸກໆຂົງເຂດພົນລະເຮືອນ, ການເມືອງ, ເສດຖະກິດ, ວັດທະນະທຳ, ສັງຄົມ… ໃນການພົວພັນລະຫວ່າງ ອາເມລິກາ ແລະ ຫວຽດນາມ ຍັງມີຄວາມເຂົ້າໃຈທີ່ແຕກຕ່າງກັນກ່ຽວກັບສິດທິມະນຸດ. ຫວຽດນາມ ແລະ ອາເມລິກາ ຄວນສືບຕໍ່ຮັກສາບັນດາຊ່ອງໂອ້ລົມສົນທະນາບົນຈິດໃຈເປີດເຜີຍ, ກົງໄປກົງມາ ແລະ ສ້າງສັນ ເພື່ອເພີ່ມທະວີຄວາມເຂົ້າອົກເຂົ້າໃຈເຊິ່ງກັນ ແລະ ກັນ, ຫຼຸດຜ່ອນຄວາມແຕກຕ່າງກັນ ແລະ ຂຸດຄົ້ນບັນດາຄວາມສາມາດບົ່ມຊ້ອນໃນການຮ່ວມມື, ພະຍາຍາມ, ບໍ່ປະໃຫ້ບັນດາຄວາມແຕກຕ່າງກັນນັ້ນກາຍເປັນສິ່ງກີດຂວາງການພົວພັນ 2 ຝ່າຍ.
ກ່ຽວກັບບັນດາສິ່ງທ້າທາຍໃຫຍ່ສຳລັບເສດຖະກິດຫວຽດນາມ ແລະ ເລື່ອງ ຫວຽດນາມ ເຂົ້າຮ່ວມສັນຍາຄູ່ຮ່ວມມືຂ້າມປາຊີຟິກ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຢັ້ງຢືນວ່າ: ສັນຍາຄູ່ຮ່ວມມືຂ້າມປາຊີຟິກ ມີຂອບຂະໜາດໃຫຍ່, ດ້ວຍການເຂົ້າຮ່ວມຂອງຫຼາຍພື້ນຖານເສດຖະກິດຫຼັກແຫຼ່ງໃນພາກພື້ນ ແລະ ໂລກ. ດ້ວຍການກະກຽມຢ່າງເຂັ້ມງວດ, ຫວຽດນາມ ມີຄວາມເຊື່ອໝັ້ນຢ່າງພຽງພໍ ແລະ ເຂົ້າຮ່ວມບັນດາວິວັດທະນາການສຳຄັນນີ້ສຳເລັດຜົນແລະບົນພຶດຕິກຳຕົວຈິງນັ້ນ, ຫວຽດນາມ ພວມພ້ອມກັບ ອາເມລິກາ ແລະ ບັນດາສະມາຊິກອື່ນໆມານະພະຍາຍາມເພື່ອສາມາດສິ້ນສຸດການເຈລະຈາໃນໄລຍະໄວທີ່ສຸດ.
ຊົມເຊີຍອາເມລິກາເພີ່ມທະວີບົດບາດຢູ່ພາກພື້ນອາຊີ - ປາຊີຟິກ
ກ່ຽວກັບບົດບາດຂອງອາເມລິກາ ຢູ່ພາກພື້ນອາຊີ - ປາຊີຟິກເວົ້າລວມ, ເຂດທະເລຕາເວັນອອກເວົ້າສະເພາະ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຖືວ່າ, ໂດຍແມ່ນປະເທດມະຫາອຳນາດແຖງໜ້າຂອງໂລກ, ທັງແມ່ນກຳມະການປະຈຳຂອງສະພາຄວາມໝັ້ນຄົງ ສະຫະປະຊາຊາດ, ອາເມລິກາ ມີຜົນປະໂຫຍດ, ທັງມີຄວາມຮັບຜິດຊອບໃຫຍ່ໃນການຮັກສາສັນຕິພາບ, ສະຖຽນລະພາບຢູ່ໂລກ, ໃນນັ້ນມີພາກພື້ນ ອາຊີ - ປາຊີຟິກ. ຫວຽດນາມ ຊົມເຊີຍອາເມລິກາ ເພີ່ມທະວີການຮ່ວມມື, ຖືເປັນສຳຄັນການພັດທະນາການພົວພັນຫຼາຍດ້ານກັບພາກພື້ນ ອາຊີ - ປາຊີຟິກ. ບົນພື້ນຖານຄວາມເຂົ້າອົກເຂົ້າໃຈ ແລະ ເຄົາລົບເຊິ່ງກັນ ແລະ ກັນ. ອາເມລິກາ ສາມາດຍູ້ແຮງການພົວພັນສອງຝ່າຍໃນຫຼາຍດ້ານກັບແຕ່ລະປະເທດໃນພາກພື້ນກວ່າອີກ. ກ່ຽວກັບບັນຫາທະເລຕາເວັນອອກ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຕີລາຄາສູງເລື່ອງລັດຖະບານອາເມລິກາ ມີບັນດາຄວາມເຫັນທີ່ຕັ້ງໜ້າ, ສະໜັບສະໜູນເລື່ອງແກ້ໄຂຄວາມຂັດແຍ້ງກັນ ດ້ວຍສັນຕິສິທີ ບົນພື້ນຖານເຄົາລົບກົດໝາຍສາກົນ. ສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລ (unclos) ປີ 1982, ປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ແລະ ສະໜັບສະໜູນເລື່ອງກ້າວໄປເຖິງການບັນລຸປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC); ຫວັງວ່າອາເມລິກາ ຈະສືບຕໍ່ມີທັດສະນະ ແລະ ການກະທຳທີ່ເໝາະສົມ, ປະກອບສ່ວນເຂົ້າໃນການແກ້ໄຂຄວາມຂັດແຍ້ງກັນບົນທະເລໂດຍສັນຕິ ຕາມກົດໝາຍສາກົນ, ປະກອບສ່ວນຮັບປະກັນສັນຕິພາບ, ສະຖຽນລະພາບຢູ່ ພາກພື້ນ ອາຊີ - ປາຊີຟິກ ກໍ່ຄືຢູ່ໃນໂລກ.