(ການຢ້ຽມຢາມເພື່ອແນໃສ່ປັບປຸງສາຍພົວພັນທີ່ໄວ້ເນື້ອເຊື່ອໃຈ
ເຊິ່ງກັນ ແລະ ກັນລະຫວ່າງການນຳຫວຽດນາມ ກັບກະສັດ ໂນໂຣດົມ ສີຫະໂມນີ)
(vovworld) - ວັນທີ 23/12, ທ່ານປະທານປະເທດ ເຈືອງເຕິ໋ນຊາງ ນຳໜ້າຄະນະຜູ້ແທນຂັ້ນສູງຫວຽດນາມ ໄປຢ້ຽມຢາມທາງລັດຖະກິດເຖິງກຳປູເຈຍ ໃນລະຫວ່າງວັນທີ 23 ແລະ 24/12, ຕາມຄຳເຊີນຂອງພະບາດສົມເດັດ ພະບໍລົມມະນຽດ ສີຫະໂມນີ, ກະສັດແຫ່ງລາຊະນາຈັກກຳປູເຈຍ. ການຢ້ຽມຢາມເພື່ອແນໃສ່ປັບປຸງສາຍພົວພັນທີ່ໄວ້ເນື້ອເຊື່ອໃຈເຊິ່ງກັນ ແລະ ກັນລະຫວ່າງການນຳຫວຽດນາມ ກັບກະສັດ ໂນໂຣດົມ ສີຫະໂມນີ, ແມ່ນກຳລັງໜູນເພື່ອເຮັດໃຫ້ການພົວພັນມິດຕະພາບ, ການຮ່ວມມືໃນທຸກຂົງເຂດລະຫວ່າງສອງປະເທດມີບາດກ້າວພັດທະນາໃໝ່, ຮັບໃຊ້ການພັດທະນາຂອງແຕ່ລະປະເທດຢ່າງມີປະສິດທິຜົນ.
ຫວຽດນາມ ແລະ ກຳປູເຈຍ ແມ່ນສອງປະເທດບ້ານໃກ້ເຮືອນຄຽງ, ເຊິ່ງໄດ້ສ້າງຕັ້ງການພົວພັນທາງການທູດນັບແຕ່ວັນທີ 24/6/1967. ໃນປະຫວັດສາດ, ປະຊາຊົນສອງປະເທດໄດ້ພ້ອມກັນຜ່ານຜ່າຄວາມຫຍຸ້ງຍາກທຸກຢ່າງ, ເພື່ອເອກະລາດແຫ່ງຊາດ ແລະ ອິດສະຫລະພາບຂອງແຕ່ລະປະເທດ. ການພົວພັນທີ່ເປັນມູນເຊື້ອອັນດີງາມນີ້ ແມ່ນຄວາມເອກອ້າງທະນົງໃຈອັນລຳ້ຄ່າ, ທີ່ໄດ້ ແລະ ຈະປະກອບສ່ວນຮັກສາ, ກໍ່ຄືສືບທອດໃຫ້ລຸ້ນຕໍ່ໆໄປ.
ການພົວພັນລະຫວ່າງສອງປະເທດໄດ້ຮັບການພັດທະນາຕາມການເວລາ
ບົນພື້ນຖານຄວາມໄວ້ເນື້ອເຊື່ອໃຈ ແລະ ເຂົ້າອົກເຂົ້າໃນເຊິ່ງກັນ ແລະ ກັນ, ສາຍພົວພັນທາງດ້ານການເມືອງ - ການຕ່າງປະເທດລະຫວ່າງສອງປະເທດນັບມື້ນັບໄດ້ຮັບການປັບປຸງຢ່າງເລິກເຊິ່ງ. ສອງຝ່າຍຮັກສາການແລກປ່ຽນຄະນະຜູ້ແທນທຸກຂັ້ນ, ການພົບປະຂັ້ນສູງ ແລະ ບັນດາກົນໄກຮ່ວມມືທີ່ມີຢູ່ແລ້ວລະຫວ່າງສອງປະເທດເປັນປະຈຳ. ໃນຊຸມປີຜ່ານມາ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ໄດ້ໄປຢ້ຽມຢາມກຳປູເຈຍ. ສ່ວນທາງຝ່າຍ ກຳປູເຈຍ, ກະສັດໂນໂຣດົມ ສີຫະໂມນີ, ທ່ານນາຍົກລັດຖະມົນຕີ ຮຸນແຊນ, ທ່ານປະທານສະພາແຫ່ງຊາດ ເຮັງຊຳຣີ ກໍ່ໄດ້ມາຢ້ຽມຢາມຫວຽດນາມ. ຜ່ານການຢ້ຽມຢາມເຫຼົ່ານັ້ນ, ການນຳສອງປະເທດລ້ວນແຕ່ສະແດງຄວາມຕັດສິນໃຈ ປັບປຸງ ແລະ ເພີ່ມທະວີສາຍພົວພັນມິດຕະພາບ ແລະ ການຮ່ວມມືຮອບດ້ານລະຫວ່າງສອງປະເທດ.
ການຮ່ວມມືໃນຂົງເຂດເສດຖະກິດ - ການຄ້າ, ການລົງທຶນ ແມ່ນຂົງເຂດທີ່ໄດ້ຮັບບຸລິມະສິດອັນດັບໜຶ່ງໃນການຮ່ວມມືລະຫວ່າງຫວຽດນາມຫວຽດນາມ - ກຳປູເຈຍ. ການພັດທະນາສາຍພົວພັນດ້ານການຄ້າສອງຝ່າຍ ໄດ້ຮັບການສະແດງອອກຜ່ານລະດັບການແລກປ່ຽນການຄ້າສືບຕໍ່ເພີ່ມຂຶ້ນໃນຊຸມປີຜ່ານມາ: ຈາກ 1.8 ຕື້ USD ໃນປີ 2010 ຂຶ້ນ 3,34 ຕື້ USD ໃນປີ 2013. ສອງປະເທດພວມພະຍາຍາມຊຸກຍູ້ວົງເງິນການຄ້າສອງຝ່າຍໃຫ້ບັນລຸ 5 ຕື້ກວ່າ USD ໃນປີ 2015. ກ່ຽວກັບການລົງທຶນ, ມາຮອດປະຈຸບັນ, ຫວຽດນາມ ພວມມີ 128 ໂຄງການລົງທຶນເຂົ້າກຳປູເຈຍ, ດ້ວຍຍອດຈຳນວນທຶນແມ່ນ 3,36 ຕື້ USD, ຢືນອັນດັບ 5 ໃນຈຳນວນປະເທດ ແລະ ເຂດແຄວ້ນທີ່ລົງທຶນເຂົ້າກຳປູເຈຍ. ບັນດາໂຄງການເຫຼົ່ານັ້ນ, ສ່ວນຫຼາຍແມ່ນຂົງເຂດທີ່ສຳຄັນໃນໂຄງການພັດທະນາຂອງກຳປູເຈຍ, ຕົວຢ່າງຄືການປູກຕົ້ນໄມ້ອຸດສາຫະກຳ, ໂທລະຄົມ, ການເງິນ, ທະນາຄານ, ຝຸ່ນ, ສາທາລະນະສຸກ… ຜູ້ຮັກສາການລັດຖະມົນຕີວ່າການກະຊວງການຄ້າກຳປູເຈຍ, ທ່ານ ກິມສີທອນ ຕີລາຄາວ່າ, ວົງເງິນການຄ້າສອງຝ່າຍ ໄດ້ປະກອບສ່ວນປະຕິບັດນະໂຍບາຍພັດທະນາຂອງແຕ່ລະປະເທດຢ່າງມີໄຊ.
“ກຳປູເຈຍ ຖືຫວຽດນາມ ແມ່ນຄູ່ຮ່ວມມືດ້ານການຄ້າສອງຝ່າຍທີ່ສຳຄັນໃນພາກພື້ນ. ໃນໄລຍະຜ່ານມາ, ການພົວພັນດ້ານການຄ້າລະຫວ່າງສອງປະເທດໄດ້ເພີ່ມຂຶ້ນຢ່າງບໍ່ຢຸດຢັ້ງ. ການເຕີບໂຕຢ່າງຕໍ່ເນື່ອງກ່ຽວກັບມູນຄ່າການຄ້າ,ໄດ້ສະແດງໃຫ້ເຫັນຄວາມໝັ້ນຄົງໃນການພົວພັນດ້ານກ້ານຄ້າ, ນຳ້ໃຈມິດຕະພາບອັນຍາວນານລະຫວ່າງກຳປູເຈຍ - ຫວຽດນາມ“.
ໃນຂົງເຂດປ້ອງກັນຊາດ - ປ້ອງກັນຄວາມສະຫງົບ, ກອງທັງ ແລະ ປະຊາຊົນສອງປະເທດສືບຕໍ່ຮ່ວມມືຊອກຫາ, ນຳອັດຖິນັກຮົບອາສາສະໝັກຫວຽດນາມ ທີ່ໄດ້ເສຍສະຫຼະຊີວິດໃນປາງສົງຄາມຢູ່ກຳປູເຈຍກັບເມືອປະເທດ. ການຮ່ວມມືລະຫວ່າງບັນດາກຳລັງປະກອບອາວຸດຫວຽດນາມ - ກຳປູເຈຍ ໄດ້ປະກອບສ່ວນສຳຄັນໃນການປົກປັກຮັກສາອະທິປະໄຕ, ຜືນແຜ່ນດິນຂອງແຕ່ລະປະເທດ ແລະ ຊີວິດສະຫງົບສຸກຂອງປະຊາຊົນ. ພົນຕີ ດັ້ງແອງຢຸງ, ຜູ້ບັນຊາການພົນລະພາກຫຼວງ 15, ແມ່ນໜຶ່ງໃນບັນດາກົມກອງທີ່ມີການເຄື່ອນໄຫວລົງທຶນພັດທະນາເສດຖະກິດ, ສັງຄົມຢ່າງຕັ້ງໜ້າຢູ່ເຂດຕາເວັນອອກສ່ຽງເໜືອກຳປູເຈຍ, ຕີລາຄາວ່າ:
“ສອງປະເທດຫວຽດນາມ ແລະ ກຳປູເຈຍ ກໍ່ຄືກອງທັບສອງປະເທດເຄີຍສະໜິດຕິດພັນເລືອດເນື້ອນຳກັນໃນພາລະກິດຕໍ່ສູ້ປົດປ່ອຍຊາດ, ຍາດເອົາເອກະລາດ, ອິດສະຫຼະພາບໃຫ້ແກ່ປະເທດຊາດ. ມີຜູ້ດີເດັ່ນນັບໝື່ນຄົນຂອງສອງປະເທດໄດ້ເສຍສະຫຼະຊີວິດເພື່ອພາລະກິດອັນຍິ່ງໃຫຍ່. ປະຈຸບັນ, ສອງປະເທດ, ພ້ອມກັບກອງທັບຂອງຕົນສືບຕໍ່ສະໜິດຕິດພັນດ້ວຍນຳ້ໃຈມິດຕະພາບ, ຈົ່ງຮັກພັກດີ, ຖານບ້ານໃກ້ເຮືອນຄຽງອັນດີງາມເພື່ອສ້າງສາ ແລະ ປົກປັກຮັກສາປະເທດຊາດໃຫ້ນັບມື້ນັບພັດທະນາວັດທະນາຖາວອນ“.
ກ່ຽວກັບການຮ່ວມມືໃນຂົງເຂດສຶກສາ - ບຳລຸງສ້າງ, ສາທາລະຍະສຸກ ກໍ່ໄດ້ຮັບການປ່ຽນໃໝ່ຢ່າງບໍ່ຢຸດຢັ້ງ, ນັບທັງດ້ານເນື້ອໃນ ແລະ ມາດຕະການປະຕິບັດ. ແຕ່ລະປີ, ລັດຖະບານສອງປະເທດໄດ້ມອບທຶນສຶກສາໃຫ້ນັກຮຽນ, ນັກສຶກສາ, ເຈົ້າໜ້າທີ່ນັບຮ້ອຍຄົນຢູ່ບັນດາອົງການ, ຂະແໜງການຂອງສອງປະເທດ. ຫວຽດນາມ ໄດ້ຈັດຫຼາຍຄະນະພະນັກງານການແພດໄປກວດພະຍາດ ແລະ ແຈກຢາຍຢາ ໂດຍບໍ່ເສຍຄ່າໃຫ້ຄົນເຈບຢູ່ກຳປູເຈຍ, ພິເສດແມ່ນຢູ່ບັນດາແຂວງຕິດກັບຊາຍແດນຫວຽດນາມ - ກຳປູເຈຍ.
ການພົວພັນສອງຝ່າຍນັບມື້ນັບໄດ້ຮັບການພັດທະນາຢ່າງມີປະສິດທິຜົນ
ການນຳສອງປະເທດກຳນົດວ່າໃນໄລຍະຈະມາເຖິງ, ສອງຝ່າຍສືບຕໍ່ແລກປ່ຽນບັນດາຄະນະຜູ້ແທນຂັ້ນສູງ, ເພື່ອແນໃສ່ຍຸກຍູ້ຄວາມເຂົ້າໃຈເຊິ່ງກັນ ແລະ ກັນກວ່າອີກ. ສອງປະເທດກໍ່ເພີ່ມທະວີການຮ່ວມມືໃນທຸກຂົງເຂດ, ພິເສດແມ່ນການທ່ອງທ່ຽວ, ໂທລະຄົມ, ທະນາຄານ, ນຳ້ມັນອາຍແກສ, ອຸດສາຫະກຳ, ກະສີກຳ. ກ່ອນອື່ນໝົດແມ່ນປັບປຸງລະບົບກົດໝາຍສ້າງກອບກົດໝາຍໃຫ້ແກ່ການເຄື່ອນໄຫວລົງທຶນ, ດຳເນີນທຸລະກິດ, ເຮັດໃຫ້ສົນທິສັນຍາສະບັບປັບປຸງຂອງສັນຍາກ່ຽວກັບການສົ່ງເສີມ ແລະ ອາລັກຂາແກ່ການລົງທຶນມີຜົນສັກສິດ, ດຳເນີນການເຈລະຈາ, ລົງນາມໃນສັນຍາຫຼີກລ້ຽງການເກັບພາສີຊ້ອນລະຫວ່າງສອງປະເທດໂດຍໄວ. ຫວຽດນາມ ແລະ ກຳປູເຈຍ ກໍ່ກຳນົດວຽກງານປັກຫຼັກໝາຍຊາຍແດນທາງບົກຕ້ອງໄດ້ຮັບການປະຕິບັດ ເພື່ອກໍ່ສ້າງເປັນເສັ້ນທາງສັນຕິພາບ, ມິດຕະພາບ, ຮ່ວມມື ແລະ ພັດທະນາ.
ຫວຽດນາມ ແລະ ກຳປູເຈຍ, ມີຄວາມສາມາດບົ່ມຊ້ອນຫຼາຍຢ່າງເພື່ອສາມາດຊ່ວຍເຫຼືອໃຫ້ກັນ. ບົນພືນຖານການພົວພັນທີ່ເປັນມູນເຊື້ອອັນດີງາມ, ດ້ວຍທ່າແຮງຂອງແຕ່ລະປະເທດ, ຄວາມຕັດສິນໃຈ ແລະ ຄວາມມານະພະຍາຍາມຂອງທັງສອງຝ່າຍ. ພິເສດແມ່ນການຢ້ຽມຢາມທາງລັດຖະກິດເຖິງກຳປູເຈຍຂອງທ່ານປະທານປະເທດ ເຈືອງເຕິ໋ນຊາງ ຄັ້ງນີ້, ຈະເຮັດໃຫ້ການພົວພັນມິດຕະພາບ, ການຮ່ວມມືຮອບດ້ານລະຫວ່າງສອງປະເທດມີບາດກ້າວພັດທະນາໃໝ່ຢ່າງແຮງກວ່າໃນໄລຍະຈະມາເຖິງ.