(vovworld)- ວັນທີ 25/8, ທ່ານ Jose Manuel Baroso, ປະທານຄະນະກຳມະການເອີລົບ (EC) ເລີ່ມຕົ້ນການຢ້ຽມຢາມຫວຽດນາມ ຢ່າງເປັນທາງການ ຕາມຄຳເຊີນຂອງທ່ານ ນາຍົກລັດຖະມົນຕີ ຫວຽດນາມ ຫງວຽນເຕີນຢູງ. ນີ້ແມ່ນການຢ້ຽມຢາມຫວຽດນາມ ຄັ້ງທີ 2 ຂອງທ່ານ Baroso ໃນຖານະເປັນປະທານ EC, ສະແດງໃຫ້ເຫັນສາຍພົວພັນລະຫວ່າງ ຫວຽດນາມ ແລະ ສະຫະພາບເອີລົບ (EU) ພວມນັບມື້ນັບພັດທະນາຢ່າງແຮງ. ເນື່ອງໃນໂອກາດນີ້ ບັນນາທິການວິທະຍຸກະຈາຍສຽງຫວຽດນາມ ມີບົດຂຽນທີ່ພາດຫົວຂໍ້ວ່າ: ຫວຽດນາມ ແລະ ເອີລົບ ພ້ອມກັນມູ່ງໄປສູ່ອະນາຄົດ.
ທ່ານເລຂາທິການໃຫຍ່ ຫງວຽນຟູຈ້ອງ ແລະ
ທ່ານJose Manuel Baroso, ປະທານຄະນະກຳມະການເອີລົບ
|
ສະຫະພາບເອີລົບ (EU) ລວມມີ 28 ປະເທດສະມາຊິກ, ແມ່ນກຸ່ມເສດຖະກິດ, ການເມືອງເປັນເອກະລັກສະເພາະ. ຫວຽດນາມ ແລະ ອີຢູ ສ້າງຕັ້ງການພົວພັນທາງການທູດຢ່າງເປັນທາງການເມື່ອເດືອນ 11/1990. ປີ 1996, ອີຢູ ແຕ່ຕັ້ງຄະນະຜູ້ຕາງຫນ້າປະຈຳ ຮ່າໂນ້ຍ ຢ່າງເປັນທາງການ. ນັບແຕ່ນັ້ນມາຮອດປະຈຸບັນ, ການພົວພັນລະຫວ່າງສອງຝ່າຍ ໄດ້ເຂົ້າສູ່ຂອບເຂດ, ພັດທະນາຢ່າງວ່ອງໄວນັບທັງລວງກວ້າງ ແລະ ລວງເລິກ. ຫວຽດນາມ ແລະ ອີຢູ ໄດ້ແລກປ່ຽນຄະນະຜູ້ແທນຂັ້ນສູງເປັນປະຈຳ. ປະຈຸບັນ ອີຢູ ໄດ້ກາຍເປັນຫນຶ່ງໃນບັນດາຄູ່ຮ່ວມມືສຳຄັນຕົ້ນຕໍຂອງຫວຽດນາມ ໃນຫລາຍຂົງເຂດ, ພິເສດແມ່ນເສດຖະກິດ, ການຄ້າ, ການລົງທຶນ, ປະກອບສ່ວນຢ່າງຕັ້ງຫນ້າເຂົ້າໃນວິວັດການພັດທະນາເສດຖະກິດ ສັງຄົມ ແລະ ເຊື່ອມໂຍງເຂົ້າກັບເສດຖະກິດສາກົນຂອງຫວຽດນາມ.
ບາດກ້າວບຸກທະລຸໃນການພົວພັນລະຫວ່າງ ຫວຽດນາມ ແລະ ອີຢູ
ນັບແຕ່ເມື່ອພາຍຫລັງ ອີຢູ ຮັບຮອງເອົາສົນທິສັນຍາ Lisbon ກ່ຽວກັບການປະຕິຮູບບັນດາລະບອບນະໂຍບາຍ, ອີຢູ ໄດ້ຜັນຂະຫຍາຍແນວທາງການຕ່າງປະເທດຕັ້ງຫນ້າ, ເປັນຫນ້າສົນໃຈ ນັ້ນແມ່ນມີຄວາມເອົາໃຈໃສ່ເຖິງ ອາຊີ ກວ່າ ແລະ ພິເສດ ແມ່ນ ອາຊຽນ, ໃນນັ້ນ ມີຫວຽດນາມ. ໃນສະພາບການນັ້ນ, ຫວຽດນາມໄດ້ ຊຸກຍູ້ການພົວພັນຫລາຍດ້ານກັບ ອີຢູ. ພິເສດ ປີ 2012 ເປັນຂີດໝາຍແຫ່ງບາດກ້າວບຸກທະລຸໃນການພົວພັນລະຫວ່າງ ຫວຽດນາມ ແລະ ອີຢູ ເມື່ອສອງຝ່າຍລົງນາມໃນສັນຍາແມ່ຄູ່ຮ່ວມມື ແລະ ການຮ່ວມມືຮອບດ້ານຢ່າງເປັນທາງການ(PCA) ແລະ ເລີ່ມການເຈລະຈາສັນຍາການຄ້າເສລີ ຫວຽດນາມ - ອີຢູ. ທ່ານ ຟ້າມແຊງເຈົາ, ເອກອັກຄະລັດຖະທູດ ຫວຽດນາມ ປະຈຳ ແບນຊີກ ແລະ ອີຢູ ຢືນຢັນວ່າ:
“ເປັນຄັ້ງທຳອິດ ພວກເຮົາໄດ້ລົງນາມໃນຂໍ້ຕົກລົງ ແລະ ໃຫ້ສັດຕະຍາບັນສັນຍາແມ່ຄູ່ຮ່ວມມື ແລະ ການຮ່ວມມືຮອບດ້ານ (PAC), ເປັນພື້ນຖານໃຫ້ແກ່ການຮ່ວມມື ຫວຽດນາມ ແລະ ອີຢູ ພັດທະນາຢ່າງຮອບດ້ານ. ເຫດການນີ້ ໄດ້ລ່ວງເກີນຂອບເຂດຂອງວຽກງານຮ່ວມມືທຳມະດາ, ຂອງປະເທດໄດ້ຮັບການຊ່ວຍເຫລືອ ແລະ ປະເທດຊ່ວຍເຫລືອ. ປະຈຸບັນ ພວມເຈລະຈາສັນຍາການຄ້າເສລີ FTA. ສັນຍານີ້ ຈະຊ່ວຍໃຫ້ສິນຄ້າຫວຽດນາມ ເຂົ້ າຕະຫລາດເອີລົບ ໂດຍບໍ່ເສຍຄ່າພາສີ.”
ອາດຈະຢືນຢັນໄດ້ວ່າ ດ້ານການຄ້າ, ການລົງທຶນ ແມ່ນເສົາຄ້ຳສຳຄັນໃນການພົວພັນລະຫວ່າງຫວຽດນາມ ແລະ ອີຢູ. ນັບແຕ່ປີ 2001 -2013, ວົງເງິນການຄ້າສອງສົ້ນ ໄດ້ເພີ່ມຂຶ້ນທົບ 7 ເທົ່າ, ຈາກລະດັບ 4,5 ຕື້ USD ໃນປີ 2001 ຂຶ້ນເຖິງ 33,7 ຕື້ USD ໃນປີ 2013. ປີ 2012, ອີຢູ ເປັນຄັ້ງທຳອິດໄດ້ລື່ນກາຍ ອາເມລິກາ ກາຍເປັນຕະຫລາດສົ່ງອອກໃຫຍ່ສຸດຂອງຫວຽດນາມ. ຈຸດພົ້ນເດັ່ນໃນການພົວພັນດ້ານການຄ້າສອງສົ້ນລະຫວ່າງ ຫວຽດນາມ ແລະ ອີຢູ ແມ່ນການເພີ່ມເຕີມໃຫ້ກັນສູງ, ຄວາມແກ້ງແຍ້ງຫນ້ອຍ ແລະ ຫວຽດນາມ ສົ່ງອອກເກີນດຸນໄປຍັງ ອີຢູ ຢ່າງລຽນຕິດ. ກ່ຽວກັບການລົງທຶນ, ໄລ່ມາຮອດເດືອນ 6/2014, ມີ 23/28 ປະເທດສະມາຊິກ ອີຢູ ໄດ້ລົງທຶນເຂົ້າຫວຽດນາມ ດ້ວຍ 1.471 ໂຄງການ ມີຍອດທຶນຈົດທະບຽນຂຶ້ນເຖິງ 18 ຕື້ USD. ບັນດາປະເທດອີຢູ ມີໂຄງການຢູ່ແຂວງ, ນະຄອນ ຂອງຫວຽດນາມເປັນສ່ວນຫລາຍ, ໂດຍສຸມໃສ່ເຂົ້າໃນບັນດາຂົງເຂດ
ອຸດສາຫະກຳປຸງແຕ່ງ, ປະດິດສ້າງ, ຜະລິດແຈກຢາຍໄຟຟ້າ, ນ້ຳ, ອາຍແກສ, ຖະຫລງຂ່າວ ສື່ສານ. ເພາະສະນັ້ນ ສັນຍາ FTA ລະຫວ່າງ ຫວຽດນາມ ແລະ ອີຢູ ພວມໄດ້ຮັບການຊຸກຍູ້ລະຫວ່າງສອງຝ່າຍຢ່າງວ່ອງໄວ, ເພື່ອຍາດແຍ່ງກາລະໂອກາດດ້ານການຄ້າ,ການລົງທຶນ. ໃນການຢ້ຽມຢາມຫວຽດນາມ ແຕ່ວັນທີ 11-12/8 ຜ່ານມາ, ທ່ານນາງ Catherine Ashton, ຮອງປະທານຄະນະກຳມະການເອີລົບ ໄດ້ເນັ້ນຫນັກວ່າ:
“ເມື່ອສັນຍາ FTA ລະຫວ່າງ ຫວຽດນາມ ແລະ ອີຢູ ສຳເລັດ ຈະເປີດກາລະໂອກາດອັນໃຫຍ່ຫລວງໃຫ້ແກ່ບັນດາວິສາຫະກິດສອງປະເທດ, ການພົວພັນດ້ານການຄ້າ 2 ສົ້ນ ຈະເພີ່ມຂຶ້ນຢ່າງແຮງ, ນຳມາເຊິ່ງຜົນປະໂຫຍດໃຫ້ແກ່ ອີຢູ ແລະ ຫວຽດນາມ, ຕອບສະຫນອງຄວາມມຸ່ງຫວັງຂອງສອງຝ່າຍ. ປະຈຸບັນ ວິວັດການເຈລະຈາ FTA ລະຫວ່າງຫວຽດນາມ ແລະ ອີຢູ ພວມດຳເນີນໄປຢ່າງຕັ້ງຫນ້າ ແລະ ພວກຂ້າພະເຈົ້າປາດຖະຫນາວ່າ ອາດຈະສຳເລັດການເຈລະຈາໂດຍໄວໃນທ້າຍປີນີ້.”
ບໍ່ພຽງແຕ່ແມ່ນຄູ່ຮ່ວມມືສຳຄັນກ່ຽວກັບດ້ານການຄ້າ ແລະ ການລົງທຶນ, ອີຢູ ແລະ ບັນດາປະເທດສະມາຊິກ ຍັງແມ່ນນັກອຸປະຖຳໃຫຍ່ກ່ຽວກັບແຫລ່ງທຶນຫນູນຊ່ວຍພັດທະນາຢ່າງເປັນທາງການ (ODA) ໃຫ້ແກ່ຫວຽດນາມ. ອີຢູ ໝັ້ນໝາຍເພີ່ມເງິນຊ່ວຍເຫລືອໃຫ້ແກ່ຫວຽດນາມ ປະມານ 400 ລ້ານເອີໂຣ ໃນໄລຍະ 2014-2020, ເພີ່ມຂຶ້ນ 30% ເມື່ອທຽບໃສ່ໄລຍະ 2007-2013.
ພ້ອມກັນຮ່ວມມືເພື່ອສັນຕິພາບ,ສະຖຽນລະພາບໃນພາກພື້ນ ແລະ ໃນໂລກ
ຄຽງຄູ່ກັບການພົວພັນ 2 ຝ່າຍ, ຫວຽດນາມ ແລະ ອີຢູ ພ້ອມກັນຮ່ວມມືຢູ່ບັນດາເວທີປາໄສຫຼາຍຝ່າຍ ແລະ ອົງການສາກົນ, ພິເສດແມ່ນໃນຂອບເຂດການຮ່ວມມື ອາຊຽນ - ອີຢູ, ຮ່ວມມື ອາຊີ - ເອີລົບ (ASEM) ແລະ ສະຫະປະຊາຊາດໃນຫຼາຍຂົງເຂດ... ປະຈຸບັນ, ຫວຽດນາມ ພວມແມ່ນປະເທດປະສານງານໃນການພົວພັນຄູ່ເຈລະຈາ ອາຊຽນ - ອີຢູ. ໃນເດືອນ 7 ຜ່ານມາ, ຫວຽດນາມ ແລະ ອີຢູ ໄດ້ເປັນປະທານຈັດກອງປະຊຸມລັດຖະມົນຕີການຕ່າງປະເທດ ອາຊຽນ - ອີຢູ ຄັ້ງທີ 20 ດ້ວຍຫົວຂໍ້ວ່າ “ມຸ່ງໄປເຖິງການພົວພັນຄູ່ຮ່ວມມືຍຸດທະສາດ ອາຊຽນ - ອີຢູ ເພື່ອສັນຕິພາບ, ສະຖຽນລະພາບ ແລະ ຄວາມວັດທະນາຖາວອນ”. ທ່ານເອກອັກຄະລັດຖະທູດ ຟ້າມແຊງເຈົາ, ໃຫ້ຮູ້ຕື່ມອີກວ່າ:
“ຈຸດໃຫມ່ທີ່ເປັນໜ້າສົນໃຈໃນການພົວພັນ ຫວຽດນາມ - ອີຢູ, ກ່ຽວຂ້ອງເຖິງບັນຫາຄວາມໝັ້ນຄົງຂອງ ຫວຽດນາມ, ນັ້ນແມ່ນ ອີຢູ ແມ່ນໜຶ່ງໃນຈຳນວນຫນ້ອຍຄູ່ຮ່ວມມືຕ່າງປະເທດມີການອະພິປາຍກ່ຽວກັບສະພາບການຢູ່ທະເລຕາເວັນອອກຢູ່ລັດຖະສະພາ ເອີລົບ. ລັດຖະສະພາ ເອີລົບ ກໍ່ຮັບຮອງເອົາມະຕິເພີ່ມທະວີການພົວພັນກັບບັນດາປະເທດ ອາຊຽນ ແຕ່ໃນນັ້ນໄດ້ເຕື້ອງເຖິງບັນດາຫຼັກໝັ້ນພື້ນຖານກ່ຽວກັບບັນຫາຮັກສາສັນຕິພາບຢູ່ທະເລຕາເວັນອອກ. ນັ້ນແມ່ນຈຸດທີ່ຕັ້ງໜ້າໃນການພົວພັນລະຫວ່າງ ຫວຽດນາມ - ອີຢູ”
ໃນ 2 ວັນຢູ່ຫວຽດນາມ ນັ້ນ, ທ່ານປະທານ ອີຊີ J. Manuel Baroso ໄດ້ແລກປ່ຽນກັບບັນດາການນຳ ຫວຽດນາມ ກ່ຽວກັບມາດຕະການເພື່ອແນໃສ່ຊຸກຍູ້ການພົວພັນ 2 ຝ່າຍ, ພິເສດແມ່ນກ່ຽວກັບເສດຖະກິດ, ການຄ້າ ແລະ ປຶກສາຫາລືບັນດາບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ. ການຢ້ຽມຢາມຂອງທ່ານ Manuel ມາ ຫວຽດນາມ ຄັ້ງນີ້ແນ່ນອນວ່າ ຈະເປີດແງ່ຫວັງໃໝ່ຫຼາຍຢ່າງໃນການພົວພັນຮ່ວມມືຫຼາຍດ້ານລະຫວ່າງ ຫວຽດນາມ ແລະ ອີຢູ. ສິ່ງດັ່ງກ່າວຈະນຳມາເຊິ່ງຜົນປະໂຫຍດອັນໃຫຍ່ຫຼວງໃຫ້ທັງ 2 ຝ່າຍ, ກໍ່ຄືສັນຕິພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ໂລກ.