(vovworld) – ວັນທີ 15/11, ທ່ານປະທານປະເທດ ຫວຽດນາມ ເຈີ່ນດ້າຍກວາງ ເລີ່ມຕົ້ນການຢ້ຽມຢາມທາງລັດຖະກິດ ກູບາ ເປັນເວລາ 3 ວັນ (ແຕ່ 15 – 17/11) ຕາມຄຳເຊື້ອເຊີນຂອງທ່ານ Raul Castro, ປະທານສະພາແຫ່ງລັດ ແລະ ສະພາລັດຖະມົນຕີ ກູບາ. ການຢ້ຽມຢາມເພື່ອແນໃສ່ສືບຕໍ່ເຮັດໃຫ້ການພົວພັນມິດຕະພາບແບບພິເສດ, ການຮ່ວມມືຮອບດ້ານ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນລະຫວ່າງພັກ, ລັດ ແລະ ປະຊາຊົນ 2 ປະເທດ ຫວຽດນາມ ແລະ ກູບາ ເລິກເຊິ່ງກ່ວາອີກ.
ການພົວພັນລະຫວ່າງ ຫວຽດນາມ - ກູບາ ໄດ້ຮັບການກໍ່ຕັ້ງ ແລະ ເພີ່ມພູນຄຸນສ້າງຈາກນ້ຳໃຈສາມັກຄີ, ມິດຕະພາບ ແລະ ສະໜັບສະໜູນເຊິ່ງກັນ ແລະ ກັນ ຖານອ້າຍນ້ອງ, ໄດ້ຜ່ານການທົດສອບນາໆປະການໃນໄລຍະທີ່ປະສົບກັບຄວາມຫຍຸ້ງຍາກຫຼາຍຢ່າງ, ກາຍເປັນຊັບສົມບັດອັນລ້ຳຄ່າ ແລະ ເປັນແຫຼ່ງລະດົມກຳລັງໃຈອັນໃຫຍ່ຫຼວງໃຫ້ແກ່ພາລະກິດ ປະຕິວັດຢູ່ແຕ່ລະປະເທດ.
ທ່ານ ເຈີ່ນດ້າຍກວາງ ພ້ອມກັບພັນລະຍາ ໃນເວລາດຳລົງຕຳແໜ່ງເປັນລັດຖະມົນຕີກະຊວງຕຳຫຼວດໄປຢ້ຽມຢາມ ກູບາ
(ພາບ: CAND)
|
ການພົວພັນພິເສດ
ໃນໄລຍະປະຫວັດສາດໂລກປະຈຸບັນ, ຍາກທີ່ຈະມີການພົວພັນໃດພິເສດຄືການພົວພັນລະຫວ່າງ 2 ພັກ, 2 ລັດຖະບານ ແລະ ປະຊາຊົນ 2 ປະເທດ ຫວຽດນາມ - ກູບາ. ການນຳ ແລະ ປະຊາຊົນ ຫວຽດນາມ - ກູບາ ຍາມໃດກໍ່ໄດ້ຮັບຮູ້ກ່ຽວກັບຄວາມສຳຄັນຂອງການພົວພັນ 2 ປະເທດ, ຍາມໃດກໍ່ຖືນີ້ແມ່ນຊັບສົມບັດອັນລ້ຳຄ່າຂອງ 2 ຊາດ. ເຖິງຊ່ອງຫວ່າງດ້ານພູມສາດທີ່ຫ່າງໄກກໍ່ຕາມ ແຕ່ບໍ່ສົ່ງຜົນສະທ້ອນເຖິງການສ້າງຕັ້ງ ແລະ ພັດທະນາການພົວພັນທີ່ສະໜິດຕິດພັນ, ບໍລິສຸດຜຸດຜ່ອງລະຫວ່າງ ຫວຽດນາມ - ກູບາ. ໃນຕະຫຼອດກ່ວາເຄິ່ງສະຕະວັດທີ່ຜ່ານມາ, ຍາມໃດ 2 ປະເທດກໍ່ຮຽງບ່າຮຽງໄຫຼ່ໃນການຕໍ່ສູ້ປົດປ່ອຍຊາດ. ໃນໄລຍະທີ່ປະສົບກັບຄວາມຫຍຸ້ງຍາກທີ່ສຸດຂອງການຕໍ່ສູ້ປົດປ່ອຍຊາດຂອງ ຫວຽດນາມ, ພັກ, ລັດ ແລະ ປະຊາຊົນ ກູບາ ຍາມໃດກໍ່ຮ່ວມເດີນທາງ ແລະ ສະຫງວນໃຫ້ແກ່ ຫວຽດນາມ ການສະໜັບສະໜູນອັນລຳ້ຄ່າທີ່ມີປະສິດທິຜົນນັບທັງທາງດ້ານຈິດໃຈ ແລະ ວັດຖຸ. ໃນຕະຫຼອດໄລຍະ ທີ່ກູບາ ຖືກຂວ້ຳບາດຈາກ ອາເມລິກາ, ຫຼືຖືກໄພພິບັດທຳລາຍຢ່າງຕໍ່ເນື່ອງ, ກໍ່ຄືຕ້ອງປະເຊີນໜ້າກັບຄວາມຫຍຸ້ງຍາກຫຼາຍຢ່າງ, ພັກ, ລັດ ແລະ ປະຊາຊົນ ຫວຽດນາມ ໄດ້ສະຫງວນໃຫ້ ອ້າຍນ້ອງ ກູບາ ການສະໜັບສະໜູນຢ່າງສຸດຈິດສຸດໃຈ. ຫວຽດນາມ ຍາມໃດກໍ່ເອົາໃຈໃສ່, ຕິດຕາມ ແລະ ມີຄວາມເບີກບານມ່ວນຊື່ນຕໍ່ບັນດາຜົນງານທີ່ປະຊາຊົນ ກູບາ ບັນລຸໄດ້ໃນວິວັດທະນາການປະຕິບັດແນວທາງອັບເດດຮູບແບບການພັດທະນາເສດຖະກິດ - ສັງຄົມ ຊຶ່ງກອງປະຊຸມໃຫຍ່ຄັ້ງທີ 6 ຂອງພັກກອມມູນິດ ກູບາ ຮັບຮອງເອົາ, ພ້ອມທັງສະແດງຄວາມເຊື່ອໝັ້ນວ່າ, ພາຍໃຕ້ການຊີ້ນຳ, ນຳພາທີ່ສະຫຼາດສ່ອງໄສຂອງພັກກອມມູນິດ ກູບາ, ການນຳ Fidel Castro, ປະທານ Raul Castro, ປະຊາຊົນ ກູບາ ຈະຜ່ານຜ່າທຸກໆຄວາມຫຍຸ້ງຍາກ, ສືບຕໍ່ພັດທະນາປະເທດຊາດ.
ສ້າງທ່າໃຫ້ແກ່ການຮ່ວມມືດ້ານເສດຖະກິດສອງຝ່າຍ
ເສີມຂະຫຍາຍມູນເຊື້ອພິເສດນັ້ນ, ການນຳ ແລະ ປະຊາຊົນ ຫວຽດນາມ - ກູບາ ໄດ້ມານະພະຍາຍາມເຮັດໃຫ້ການພົວພັນສອງຝ່າຍເລິກເຊິ່ງກວ່າອີກ, ສິ່ງດັ່ງກ່າວສະແດງອອກຜ່ານຜົນທີ່ບັນລຸໄດ້ໃນການຢ້ຽມຢາມເຊິ່ງກັນ ແລະ ກັນຂອງການນຳຂັ້ນສູງ ແລະ ທຸກຂັ້ນສອງປະເທດ. ສອງຝ່າຍກໍ່ດຳເນີນບັນດາກົນໄກຮ່ວມມືຂອງຄະນະກຳມະການລະຫວ່າງລັດຖະບານ, ກອງປະຊຸມສຳມະນາທິດສະດີລະຫວ່າງສອງພັກ, ທາບທາມດ້ານການເມືອງລະຫວ່າງສອງກະຊວງການຕ່າງປະເທດ, ການພົບປະເຈລະຈາກ່ຽວກັບການປ້ອງກັນຊາດ - ປ້ອງກັນຄວາມສະຫງົບເປັນປະຈຳ ແລະ ມີປະສິດທິຜົນ. ການຮ່ວມມືທາງດ້ານການຄ້າ ແລະ ການລົງທຶນມີການຫັນປ່ຽນຢ່າງຕັ້ງໜ້າ, ການແລກປ່ຽນດ້ານການຄ້າໃນໄລຍະຫວ່າງມໍ່ໆມານີ້ບັນລຸລະດັບຕຳ່ກວ່າ 200 ລ້ານ USD/ປີ. ໃນນັ້ນການສົ່ງອອກຂອງ ຫວຽດນາມ ແມ່ນເກີນດຸນການຄ້າ. ສິນຄ້າຂອງ ຫວຽດນາມ ທີ່ສົ່ງອອກ ກູບາ ສ່ວນຫຼາຍແມ່ນເຂົ້າ, ເຂົ້າສານ, ເຄື່ອງໃຊ້ສອຍ ແລະ ນຳເຂົ້າຈາກ ກູບາ ຜະລິດຕະພັນຊີວະສາດ, ຢາປິ່ນປົວພະຍາດ… ພິເສດ, ສອງປະເທດກໍ່ບັນລຸໄດ້ຜົນງານສຳຄັນພໍສົມຄວນໃນບັນດາໂຄງການຜະລິດເຂົ້າ, ໝາກຖົ່ວ, ການລ້ຽງປູກສິນໃນນ້ຳ, ການຜະລິດສົ່ງອອກຜະລິດຕະພັນຊີວະສາດ, ວັດທະນະທຳ, ກິລາ ແລະ ການທ່ອງທ່ຽວ, ການສຶກສາ ແລະ ບຳລຸງສ້າງມະຫາວິທະຍາໄລ ແລະ ເໜືອມະຫາວິທະຍາໄລ… ກ່ຽວກັບກະສິກຳ, ໂຄງການຮ່ວມມືໜູນຊ່ວຍ ກູບາ ພັດທະນາການຜະລິດເຂົ້າ, ເຂົ້າສານໄລຍະ 2011-2015 ບັນລຸຜົນງານທີ່ຕັ້ງໜ້າ. ບັນດາໂຄງການໜູນຊ່ວຍ ກູບາ ພັດທະນາການຜະລິດສາລີ, ໝາກຖົ່ວເຫຼືອງ ແລະ ລ້ຽງປູກສິນໃນນ້ຳໄດ້ສິ້ນສຸດໄລຍະ 1 ແລະ ປະຈຸບັນພວມສືບຕໍ່ປະຕິບັດໄລຍະ 2. ສອງຝ່າຍສືບຕໍ່ຄົ້ນຄ້ວາ ແລະ ຜັນຂະຫຍາຍບັນດາໂຄງການກະສິກຳ - ສິນໃນນ້ຳ ອື່ນໆໃນໄລຍະຈະມາເຖິງ.
ກ່ຽວກັບການລົງທຶນ, ໃນສະພາບການໃໝ່, ບັນດາວິສາຫະກິດ ຫວຽດນາມ ພວມຊຸກຍູ້ບັນດາໂຄງການລົງທຶນຢູ່ ກູບາ ກ່ຽວກັບການກໍ່ສ້າງໂຄງລ່າງທ່ອງທ່ຽວ, ວັດສະດຸກໍ່ສ້າງ, ຜະລິດສິນຄ້າໃຊ້ສອຍ. ກ່ຽວກັບການທູດຫຼາຍຝ່າຍ, ສອງຝ່າຍຮັກສາການພົວພັນຮ່ວມມື ແລະ ການສະໜັບສະໜູນເຊິ່ງກັນ ແລະ ກັນຢູ່ບັນດາອົງການຈັດຕັ້ງສາກົນ ແລະ ເວທີປາໄສຫຼາຍຝ່າຍ, ພິເສດແມ່ນຢູ່ສະຫະປະຊາຊາດ.
ໃນຊຸມປີຜ່ານມາ, ລັດຖະບານ ຫວຽດນາມ ຍາມໃດກໍ່ສົ່ງເສີມ, ສ້າງເງື່ອນໄຂສະດວກໃຫ້ປະຊາຄົມວິສາຫະກິດສອງຝ່າຍເປີດກວ້າງການຮ່ວມມືເພື່ອແນໃສ່ເຮັດໃຫ້ການພົວພັນດ້ານເສດຖະກິດ, ການຄ້າສົມກັບການພົວພັນດ້ານການເມືອງ, ການທູດມິດຕະພາບແບບພິເສດທີ່ເປັນມູນເຊື້ອລະຫວ່າງສອງປະເທດ. ນັບມື້ນັບມີວິສາຫະກິດ ຫວຽດນາມ ຫຼາຍແຫ່ງເອົາໃຈໃສ່ຊອກຮູ້ບັນດາໂອກາດດຳເນີນທຸລະກິດ ແລະ ພັດທະນາບັນດາໂຄງການລົງທຶນຢູ່ ກູບາ. ກ່ຽວກັບທາງຝ່າຍ ກູບາ ກໍ່ເປັນເຈົ້າການສະເໜີວິສາຫະກິດ ຫວຽດນາມ ເຂົ້າຮ່ວມການລົງທຶນເຂົ້າບັນດາຂົງເຂດທີ່ມີຄວາມສາມາດບົ່ມຊ້ອນຄື: ຜະລິດທັນຍາຫານ, ສຳຫຼວດ ແລະ ຂຸດຄົ້ນນ້ຳມັນອາຍແກສ, ອຸດສາຫະກຳ, ການທ່ອງທ່ຽວ, ເຕັກໂນໂລຢີຊີວະພາບ ແລະ ບັນດາຂົງເຂດບຸລິມາສິດພັດທະນາຢູ່ເຂດເສດຖະກິດພິເສດ Mariel.
ໃນສະພາບການນັ້ນ, ການຢ້ຽມຢາມທາງລັດຖະກິດ ກູບາ ຂອງທ່ານປະທານປະເທດ ເຈື່ນດ້າຍກວາງ ບໍ່ພຽງແຕ່ປະກອບສ່ວນຮັດແໜ້ນການພົວພັນແບບພິເສດເທົ່ານັ້ນ, ຫາກຍັງເປີດຂັ້ນຕອນການຮ່ວມມືດ້ານເສດຖະກິດລະຫວ່າງ ຫວຽດນາມ ແລະ ກູບາ ໃນໄລຍະໃໝ່ອີກດ້ວຍ. ນີ້ແມ່ນໂອກາດເພື່ອໃຫ້ສອງຝ່າຍຊຸກຍູ້ບັນດາມາດຕະການຮ່ວມມືດ້ານເສດຖະກິດ - ການຄ້າ, ເພື່ອແນໃສ່ເພີ່ມລັກສະນະປະສິດທິຜົນ ແລະ ຄວາມໝັ້ນຄົງ, ເໝາະສົມກັບເງື່ອນໄຂໃໝ່ ແລະ ຜົນປະໂຫຍດຂອງແຕ່ລະປະເທດ.