(vovworld)- ວັນທີ 20/4, ກອງປະຊຸມ “ເພີ່ມທະວີການພົວພັນຄູ່ຮ່ວມມື ອາຊີ - ເອີລົບ ຮອບດ້ານໃນສັດຕະວັດທີ 21” ໂດຍຫວຽດນາມ ເປັນເຈົ້າພາບຈັດຕັ້ງໄດ້ດຳເນີນໄປຢູ່ ຮ່າໂນ້ຍ. ນີ້ແມ່ນຫນຶ່ງໃນບັນດາຄວາມມານະພະຍາຍາມຂອງຫວຽດນາມ ເພື່ອປະກອບສ່ວນຍົກລະດັບການຮ່ວມມືຂອງ ເວທີປາໄສການຮ່ວມມື ອາຊີ - ເອີລົບ (ASEM) ແລະ ຍົກສູງປະສິດທິຜົນການປະກອບສ່ວນຂອງຫວຽດນາມ ໃນ ASEM, ໃນສະພາບບັນດາສະມາຊິກ ອາຊີ - ເອີລົບ ພວມມຸ່ງໄປເຖິງກອງປະຊຸມຂັ້ນສູງສະເຫລີມສະຫລອງ 20 ປີ ແຫ່ງວັນສ້າງຕັ້ງເວທີປາໄສ.
(ທ່ານຮອງນາຍົກລັດຖະມົນຕີ ຟ້າມບີງມີງ
ກ່າວຄຳເຫັນຊີ້ນຳກອງປະຊຸມ)
ເວທີປາໄສການຮ່ວມມື ອາຊີ - ເອີລົບ (ASEM) ໄດ້ຮັບການສ້າງຕັ້ງເມື່ອເດືອນ 3/1996. ພາຍຫລັງ 20 ປີແຫ່ງການສ້າງຕັ້ງ ແລະ ພັດທະນາ, ASEM ຢັ້ງຢືນທີ່ຕັ້ງບົດບາດແມ່ນເວທີປາໄສການເຈລະຈາ ແລະ ການຮ່ວມມືສຳຄັນ ແລະ ມີຂອບຂະຫນາດໃຫຍ່ກວ່າໝູ່ ລະຫວ່າງ ອາຊີ ແລະ ເອີລົບ, ຊຸກຍູ້ທ່າອ່ຽງການຮ່ວມມື, ການຮ່ວມສຳພັນໃນພາກພື້ນ ແລະ ໂລກ.
ຂີດໝາຍ 2 ທົດສະວັດແຫ່ງການສ້າງຕັ້ງ ແລະ ພັດທະນາຂອງ ASEM
ໄລຍະທຳອິດ, ASEM ມີພຽງແຕ່ 26 ປະເທດສະມາຊິກເທົ່ານັ້ນ, ແຕ່ມາຮອດປະຈຸບັນ ASEM ໄດ້ພັດທະນາຢ່າງວ່ອງໄວ, ສະມາຊິກເພີ່ມຂຶ້ນທົບສອງເທົ່າກາຍເປັນມະຫາຄອບຄົວ ດ້ວຍ53 ປະເທດສະມາຊິກ , ໃນນັ້ນ ມີ 4 ປະເທດກຳມະການປະຈຳສະພາຄວາມໝັ້ນຄົງ ສປຊ, 12 ປະເທດເປັນສະມາຊິກຂອງ G 20, ຕາງຫນ້າໃຫ້ປະມານ 62% ຈຳນວນພົນລະເມືອງໂລກ, ກວມ 57% GDP ແລະ ປະມານ 68% ການຄ້າທົ່ວໂລກ. ໃນ 20 ປີຜ່ານມາ, ASEM ບັນລຸໄດ້ບັນດາຜົນງານເປັນຫນ້າຊື່ນຊົມໃນການຊຸກຍູ້ການພົວພັນຄູ່ຮ່ວມມືສະເຫມີພາບ, ຫລາຍດ້ານລະຫວ່າງສອງທະວີບ. ASEM ໄດ້ມີທັດສະນະຢ່າງທັນການສຳລັບບັນດາສາຍພົວພັນລວມຂອງພາກພື້ນ ແລະ ສາກົນ. ຜ່ານການເຈລະຈາມີລັກສະນະສ້າງສັນ, ບັນດາສະມາຊິກ ASEM ໄດ້ແບ່ງປັນຄວາມຮັບຮູ້ລວມກ່ຽວກັບການເພີ່ມທະວີການເຈລະຈາ ແລະ ການຮ່ວມມືບົນພື້ນຖານຄວາມເຂົ້າໃຈ ແລະ ໄວ້ເນື້ອເຊື່ອໃຈເຊິ່ງກັນ ແລະກັນ, ສະເຫມີພາບ, ຕ່າງຝ່າຍຕ່າງມີຜົນປະໂຫຍດ, ເຊີດຊູກົດໝາຍສາກົນ ແລະ ບັນດາຫລັກການການປະພຶດລວມເພື່ອຮັກສາສັນຕິພາບ, ຄວາມໝັ້ນຄົງ, ສະກັດກັ້ນການປະທະກັນ, ຮັບປະກັນ ສະຖຽນລະພາບ ແລະວັດທະນາຖາວອນຢູ່ພາກພື້ນ. ອາດຈະເວົ້າໄດ້ວ່າ ໄລຍະສອງທົດສະວັດແຫ່ງການພັດທະນາຜ່ານມາ ໄດ້ຢັ້ງຢືນໃຫ້ເຫັນບົດບາດ ແລະ ການປະກອບສ່ວນນັບມື້ນັບແທດຈິງ ຂອງ ASEM ເຂົ້າໃນການຮັກສາສັນຕິພາບ, ຄວາມໝັ້ນຄົງ, ສະຖຽນລະພາບ, ເພີ່ມທະວີການຮ່ວມມື ແລະ ການເຊື່ອມຕໍ່ລະຫວ່າງ ສອງທະວີບສຳຄັນ, ປະກອບສ່ວນເຂົ້າໃນຄວາມເອົາໃຈໃສ່ລວມຂອງປະຊາຄົມສາກົນ. ກ້າວເຂົ້າສູ່ທົດສະວັດທີ 3, ASEM ມີຄວາມເອົາໃຈໃສ່ເປັນພິເສດເຖິງການປ່ຽນໃຫມ່ ແລະ ຍົກລະດັບການເຄື່ອນໄຫວ, ນຳການຮ່ວມມື ອາຊີ ເອີລົບ ເຂົ້າສູ່ລວງເລິກ, ແທດຈິງ ແລະ ມີປະສິດທິຜົນ ເໝາະສົມກັບສະພາບການໃຫມ່. ບັນຫານີ້ ຈະຖືກຍົກອອກມາປຶກສາຫາລືຈາກບັນດາການນຳເມື່ອເຂົ້າຮ່ວມກອງປະຊຸມຂັ້ນສູງ ASEM ຄັ້ງທີ 11 ຊື່ງຈະຈັດຂຶ້ນຢູ່ ມົງໂກນ ໃນເດືອນ 7/2016 ຈະມາເຖິງ.
ຫວຽດນາມ ປະກອບສ່ວນຢ່າງຕັ້ງຫນ້າເຂົ້າໃນ ASEM
ການເຂົ້າຮ່ວມເວທີປາໄສ ASEM ດ້ວຍຖານະເປັນສະມາຊິກກໍ່ຕັ້ງເມື່ອປີ 1996, ເປັນຂີດໝາຍແຫ່ງບາດກ້າວຜັນຂະຫຍາຍທີ່ສຳຄັນໃນນະໂຍບາຍການຕ່າງປະເທດເປີດກວ້າງ, ຫລາຍຮູບຫລາຍແບບ ແລະ ຫລາຍຝ່າຍ ແລະ ເຊື່ອມໂຍງເຂົ້າກັບເສດຖະກິດສາກົນຂອງຫວຽດນາມ . ໃນ 20 ປີຜ່ານມາ, ຍາມໃດຫວຽດນາມ ກໍເປັນສະມາຊິກທີ່ຂະຫຍັນຂັນເຄື່ອນ ແລະມີຄວາມຮັບຜິດຊອບ, ສ້າງຂີດໝາຍສຳຄັນໃນໄລຍະທາງພັດທະນາຂອງ ASEM, ປະກອບສ່ວນຍົກສູງທີ່ຕັ້ງບົດບາດ ຂອງເວທີປາໄສ.
ການເຂົ້າຮ່ວມ ASEM ແມ່ນຕິດພັນກັບວິວັດການປ່ຽນແປງໃຫມ່, ເຊື່ອມໂຍງເຂົ້າກັບສາກົນ ຂອງຫວຽດນາມ. ການຮ່ວມມືຢ່າງແຫນ້ນແຟ້ນກັບບັນດາປະເທດສະມາຊິກ ແລະ ເຂົ້າຮ່ວມ ASEM ຢ່າງຕັ້ງຫນ້າ ໄດ້ນຳມາເຊິ່ງຜົນປະໂຫຍດແທດຈິງຫລາຍຢ່າງໃຫ້ແກ່ປະເທດຊາດ, ວິສາຫະກິດ ແລະ ປະຊາຊົນຫວຽດນາມ. ບັນດາສະມາຊິກ ASEM ລ້ວນແຕ່ແມ່ນບັນດາຄູ່ຮ່ວມມືເສດຖະກິດການຄ້າສຳຄັນແຖວຫນ້າ
(ທີ່ກອງປະຊຸມ)
ສຳລັບຫວຽດນາມ, ກວມປະມານ 70% ການລົງທຶນໂດຍກົງຂອງຕ່າງປະເທດ, 70% ຍອດມູນຄ່າດ້ານການຄ້າສາກົນ ແລະ 80% ຈຳນວນນັກທ່ອງທ່ຽວສາກົນ. 14 ໃນ 16 ສັນຍາການຄ້າເສລີ ຊື່ງຫວຽດນາມ ໄດ້ລົງນາມ ຫລືພວມເຈລະຈາ ແມ່ນກັບບັນດາຄູ່ຮ່ວມມື ASEM. ບັນດາຕົວເລກດັ່ງກ່າວໄດ້ສ່ອງແສງໃຫ້ເຫັນການຮ່ວມມືຢ່າງມີປະສິດທິຜົນລະຫວ່າງຫວຽດນາມ ແລະບັນດາປະເທດ ASEM. ຄຽງຄູ່ກັນນັ້ນ ໃນສະພາບແວດລ້ອມສັນຕິພາບ, ຄວາມໝັ້ນຄົງໃນໂລກ ແລະ ພາກພື້ນ ພວມຢືນຢູ່ຕໍ່ຫນ້າສິ່ງທ້າທາຍຫລາຍຢ່າງ, ການແກ້ງແຍ່ງທີ່ສັບສົນລະຫວ່າງບັນດາປະເທດໃຫຍ່, ຫວຽດນາມ ໄດ້ສົມທົບຢ່າງແຫນ້ນແຟ້ນກັບບັນດາປະເທດສະມາຊິກ ASEM ເພື່ອນັບມື້ນັບມີຫລາຍປະເທດສະມາຊິກເຊີດຊູຜົນປະໂຫຍດລວມໃນການຮັກສາສັນຕິພາບ, ຄວາມໝັ້ນຄົງ ແລະ ສະຖຽນລະພາບເພື່ອພັດທະນາ, ມີທັດສະນະສະຫນັບສະຫນູນຫລັກໝັ້ນອັນເປັນທຳຂອງຫວຽດນາມໃນການປົກປັກຮັກສາອະທິປະໄຕຜືນແຜ່ນດິນ, ຊຸກຍູ້ການແກ້ໄຂການຂັດແຍ້ງໂດຍສັນຕິວິທີ ບົນພື້ນຖານເຄົາລົບກົດໝາຍ ແລະ ຫລັກການ, ມາດຖານລວມ. ASEM ກໍແມ່ນເວທີປາໄສສຳຄັນເພື່ອໃຫ້ຫວຽດນາມຫັນບັນດາຄູ່ຮ່ວມມືເປັນຫລາຍຮູບຫລາຍແບບ ແລະເລິກເຊິ່ງກວ່າ. ແລະ ຜ່ານ ASEM, ຫວຽດນາມ ມີບົດຮຽນໃນການຮ່ວມມືຕື່ມອີກກ່ຽວກັບການຄຸ້ມຄອງ ແລະ ຫລຸດຜ່ອນຄວາມສ່ຽງໄພທຳມະຊາດ, ຊື່ງແມ່ນຂົງເຂດ ທີ່ຫວຽດນາມ ພວມມີຄວາມຈຳເປັນທີ່ສຸດ.
ສືບຕໍ່ຮ່ວມເດີນທາງພ້ອມກັບ ASEM
ຫວຽດນາມ ພວມກ້າວເຂົ້າສູ່ໄລຍະພັດທະນາໃຫມ່, ສືບຕໍ່ປ່ຽນໃຫມ່ຢ່າງເລິກເຊິ່ງກວ້າງຂວາງ, ສ້າງໂຄງປະກອບເສດຖະກິດຄືນໃຫມ່, ເປັນເຈົ້າການ ແລະ ຕັ້ງຫນ້າເຊື່ອມໂຍງເຂົ້າກັບສາກົນຮອບດ້ານ. ບັນດາຄູ່ຮ່ວມມື ອາຊີ ເອີລົບ ເວົ້າລວມ ແລະ ເວທີປາໄສ ASEM ເວົ້າສະເພາະ ຍິ່ງມີຄວາມໝາຍສຳຄັນ. ຫນຶ່ງໃນບັນດາການໃຫ້ບູລິມະສິດນະໂຍບາຍຂອງຫວຽດນາມ ໃນໄລຍະຈະມາເຖິງ ແມ່ນສືບຕໍ່ຮ່ວມເດີນທາງກັບບັນດາປະເທດສະມາຊິກຢ່າງມີປະສິດທິຜົນກວ່າ ແລະ ປະກອບສ່ວນຢ່າງເປັນເຈົ້າການ, ແທດຈິງກວ່າເຂົ້າໃນຄວາມມານະພະຍາຍາມລວມຂອງ ASEM ແລະ ທົ່ວໂລກ. ສຳລັບຫວຽດນາມ, ໃນການຜັນຂະຫຍາຍແຜນນະໂຍບາຍເປັນເຈົ້າການ ແລະ ຕັ້ງຫນ້າເຊື່ອມໂຍງເຂົ້າກັບສາກົນ ແລະ ຍົກສູງລະດັບການພົວພັນ ຫລາຍຝ່າຍຂອງຕົນ, ASEM ຈະສືບຕໍ່ແມ່ນຫນຶ່ງໃນບັນດາກົນໄກເຈລະຈາ, ການຮ່ວມມືລະຫວ່າງພາກພື້ນທີ່ສຳຄັນເພື່ອຍາດແຍ່ງການສະຫນັບສະຫນູນ ແລະ ແຫລ່ງກຳລັງຢ່າງແທດຈິງ ປະກອບສ່ວນຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບໃນພາກພື້ນ, ຮັບໃຊ້ພາລະກິດພັດທະນາເສດຖະກິດສັງຄົມຂອງປະເທດຊາດ.