(vovworld)- ພ້ອມກັບການເຂົ້າຮ່ວມຢ່າງຕັ້ງຫນ້າເຂົ້າໃນຜົນສຳເລັດຂອງກອງປະຊຸມສຸດຍອດສົນທິສັນຍາແມ່ກ່ຽວກັບການປ່ຽນແປງຂອງດິນຟ້າອາກາດຂອງ ສປຊ (COP 21) ຫາກໍສິ້ນສຸດຢູ່ ປາຣີ ປະເທດ ຝລັ່ງ , ຫວຽດນາມ ໄດ້ ແລະ ພວມປະຕິບັດຫລາຍມາດຕະການ ເພື່ອຫລຸດຜ່ອນຜົນຮ້າຍຈາກການປ່ຽນແປງຂອງດິນຟ້າອາກາດ.
ດ້ວຍລະດັບເພີ່ມປະລິມານຂອງການປ່ອຍອາຍແກສເຮືອນແກ້ວຄືປະຈຸບັນ, ອຸນຫະພູມຫນ່ວຍໂລກອາດຈະເພີ່ມຂຶ້ນຕື່ມອີກ 3-5 ອົງສາ C ໃນປີ 2100, ກໍ່ໃຫ້ເກີດບັນດາຜົນຮ້າຍຢ່າງຮ້າຍແຮງຄື: ຫິມະເປື່ອຍ, ນ້ຳທະເລ ຂຶ້ນສູງ ຕື່ມອີກປະມານ 60 cm ແລະ ເພີ່ມທະວີປະກົດການດິນຟ້າອາກາດຮ້າຍແຮງ ຢູ່ຫລາຍເຂດໃນຫນ່ວຍໂລກ. ຕາມພະຍາກອນແລ້ວ, ຫວຽດນາມ ແມ່ນປະເທດທີ 3 ໃນຈຳນວນ 10 ປະເທດຖືກຜົນສະທ້ອນຢ່າງຫນັກຫນ່ວງກວ່າໝູ່ຈາກການປ່ຽນແປງຂອງດິນຟ້າອາກາດ. ຫວຽດນາມ ໄດ້ເປັນເຈົ້າການໃນການປ້ອງກັນ ແລະ ຕ້ານການປ່ຽນແປງຂອງດິນຟ້າອາກາດ, ບໍ່ພຽງແຕ່ ມີບັນດາຄຳໝັ້ນສັນຍາກັບປະຊາຄົມສາກົນໃນການຕ້ານການປ່ຽນແປງຂອງດິນຟ້າອາກາດເທົ່ານັ້ນ ຫາກຍັງຕັ້ງຫນ້າຜັນຂະຫຍາຍຍຸດທະສາດແຫ່ງຊາດກ່ຽວກັບການປ່ຽນແປງຂອງດິນຟ້າອາກາດອີກດ້ວຍ.
ຜົນສະທ້ອນຈາກການປ່ຽນແປງຂອງດິນຟ້າອາກາດ
ພາບປະກອບ:internet
|
ຄຳໝັ້ນສັນຍາຢ່າງແຮງໃນເງື່ອນໄຂປະສົບກັບຄວາມຫຍຸ້ງຍາກກ່ຽວກັບແຫລ່ງກຳລັງ
ຄວາມມານະພະຍາຍາມຢ່າງແຮງຂອງຫວຽດນາມ ສະແດງໃຫ້ເຫັນຜ່ານເລື່ອງ ທີ່ກອງປະຊຸມສຸດຍອດສົນທິສັນຍາແມ່ກ່ຽວກັບການປ່ຽນແປງຂອງດິນຟ້າອາກາດຂອງ ສປຊ (COP 21), ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ຢັ້ງຢືນວ່າ: ນັບແຕ່ນີ້ຮອດປີ 2020, ເຖິງວ່າແມ່ນປະເທດພວມພັດທະນາ, ປະສົບກັບຄວາມຫຍຸ້ງຍາກກ່ຽວກັບແຫລ່ງກຳລັງກໍຕາມ, ແຕ່ຫວຽດນາມ ຍັງຄົງໃຫ້ຄຳໝັ້ນສັນຍາຫລຸດຜ່ອນປະລິມານການປ່ອຍອາຍແກສເຮືອນແກ້ວລົງ 8% ໃນປີ 2030. ຫວຽດນາມ ອາດຈະຫລຸດຜ່ອນໄດ້ 25% ຖ້າຫາກໄດ້ຮັບການຫນູນຊ່ວຍຢ່າງມີປະສິດທິຜົນຈາກປະຊາຄົມສາກົນ ແລະ ຈະປະກອບ 1 ລ້ານ USD ເຂົ້າໃນກອງທຶນອາກາດຂຽວໄລຍະ 2016-2020. ກ່ຽວກັບສິ່ງດັ່ງກ່າວ, ທ່ານ ຫງວຽນງອກເຊີນ, ເອກອັກຄະລັດຖະທູດ ຫວຽດນາມ ປະຈຳ ຝລັ່ງ ຊີ້ແຈ້ງວ່າ:
“ທັດສະນະຂອງຫວຽດນາມ ນັ້ນແມ່ນບັນດາປະເທດຄວນເຄົາລົບສົນທິສັນຍາກ່ຽວກັບການປ່ຽນແປງຂອງດິນຟ້າອາກາດ ແລະ ເຄົາລົບຄວາມແຕກຕ່າງກ່ຽວກັບລະດັບການພັດທະນາຂອງບັນດາປະເທດຕ່າງກັນ,ໝາຍຄວາມວ່າ ບັນດາປະເທດພັດທະນາ, ບັນດາປະເທດຮັ່ງມີ, ບັນດາປະເທດປ່ອຍອາຍແກສເຮືອນແກ້ວຫລາຍ ຕ້ອງມີຄວາມຮັບຜິດຊອບໃຫຍ່ກວ່າເມື່ອທຽບໃສ່ບັນດາປະເທດທຸກຍາກ, ບັນດາປະເທດປ່ອຍອາຍແກສເຮືອນແກ້ວຫນ້ອຍ ຕ້ອງໄດ້ຮັບການຫນູນຊ່ວຍກ່ຽວກັບດ້ານການເງິນ ເພື່ອເຂົ້າຮ່ວມພາລະກິດລວມນີ້. ຕ້ອງເຄົາລົບຄວາມແຕກຕ່າງກັນລະຫວ່າງບັນດາປະເທດ.”
ຫວຽດນາມ ກໍເຕື້ອງເຖິງບັນຫາປ່ຽນແປງຂອງດິນຟ້າອາກາດຢູ່ ເຂດທົ່ງພຽງແມ່ນ້ຳຂອງ ທີ່ເວທີປາໄສສາກົນນີ້. ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ພ້ອມກັບທ່ານນາຍົກລັດຖະມົນຕີ ໂຮນລັງ Mark Rutte ແລະ ທ່ານນາງຮອງປະທານທະນາຄານໂລກ WB, Laura Tusk ໄດ້ເປັນປະທານຮ່ວມວາລະເຈລະຈາຂັ້ນສູງ “ຫວຽດນາມ ຮ່ວມແຮງຮ່ວມໃຈພ້ອມກັບບັນດາຄູ່ຮ່ວມມືສາກົນ ເພື່ອຮັບມືກັບບັນດາສິ່ງທ້າທາຍຈາກການປ່ຽນແປງຂອງດິນຟ້າອາກາດຢູ່ເຂດທົ່ງພຽງແມ່ນ້ຳຂອງ”.
ຄວາມມານະພະຍາຍາມຜັນຂະຫຍາຍບັນດາການເຄື່ອນໄຫວຮັບມືກັບການປ່ຽນແປງຂອງດິນຟ້າອາກາດ
ໃນຈຸດເວລາດຳເນີນ ກອງປະຊຸມ COP 21 ຢູ່ ຫວຽດນາມ ໄດ້ດຳເນີນກອງປະຊຸມທົ່ວໂລກ “ເສີມຂະຫຍາຍບົດບາດຂອງບັນດາສາດສະຫນາ ເຂົ້າຮ່ວມການປົກປັກຮັກສາສິ່ງແວດລ້ອມ ແລະ ການຮັບມືກັບການປ່ຽນແປງຂອງດິນຟ້າອາກາດ”. ກອງປະຊຸມ ໂດຍຄະນະກຳມະການສູນກາງແນວໂຮມປະເທດຊາດຫວຽດນາມ ສົມທົບກັບກະຊວງຊັບພະຍາກອນ ແລະ ສິ່ງແວດລ້ອມ, ອົງການເອີລົບເຫນືອ ຫນູນຊ່ວຍຫວຽດນາມ ຈັດຕັ້ງຂຶ້ນ, ນະທີ່ນີ້ ບັນດາສາສະຫນາ ຂອງຫວຽດນາມ ໄດ້ຍົກສານທີ່ສະແດງໃຫ້ເຫັນຄຳໝັ້ນສັນຍາພ້ອມກັບອຳນາດການປົກຄອງ, ອົງການຈັດຕັ້ງມະຫາຊົນທຸກຂັ້ນ ຮັບມືກັບການປ່ຽນແປງຂອງດິນຟ້າອາກາດ. ທ່ານ ຫງວຽນທ້ຽນເຍີນ, ປະທານຄະນະກຳມະການສູນກາງແນວໂຮມປະເທດຊາດຫວຽດນາມ ໃຫ້ຮູ້ວ່າ:
“ ພາຍຫລັງກອງປະຊຸມຄັ້ງນີ້ ອີງຕາມແຕ່ລະສາສະຫນາ ຈະມີແຜນການກະທຳຂອງຕົນ. ອົງການສາສະຫນາຢູ່ຂັ້ນສູນກາງ ຈະແນະນຳໃຫ້ສາສະຫນາຢູ່ທ້ອງຖິ່ນຕົນ ເພື່ອຜັນຂະຫຍາຍແຜນການກະທຳ. ສ່ວນບັນດາແຂວງ, ສາສະຫນາ ຈະມີການເຮັດວຽກກັບແນວໂຮມປະເທດຊາດ, ພະແນກຊັບພະຍາກອນ ສິ່ງແວດລ້ອມ ເພື່ອລົງນາມໃນໂຄງການຜັນຂະຫຍາຍຂໍ້ຕົກລົງຢູ່ຂັ້ນແຂວງ ແລະ ລົງຮອດຕາແສງ. ຫລັງຈາກນັ້ນ ແຂວງ ຈະຈັດການສະຫລຸບ2 ປີ ເທື່ອຫນຶ່ງ, 3 ປີ ຈະສະຫລຸບຢູ່ລະດັບຊາດ. ວຽກງານໂຄສະນາຈະໄດ້ຍູ້ແຮງເພື່ອຍົກສູງຄວາມຮັບຮູ້, ການກະທຳຂອງປະຊາຊົນຫວຽດນາມແຕ່ລະຄົນກ່ຽວກັບບັນຫານີ້.”
ໃນຫລາຍປີຜ່ານມາ, ທຸກຂັ້ນ, ຂະແຫນງການຕ່າງໆ, ອົງການຈັດຕັ້ງມະຫາຊົນຂອງຫວຽດນາມ ໄດ້ຜັນຂະຫຍາຍຍຸດທະສາດແຫ່ງຊາດກ່ຽວກັບການປ່ຽນແປງຂອງດິນຟ້າອາກາດ. ໃນຍຸດທະສາດນີ້, ເລື່ອງຫລຸດຜ່ອນບັນດາຜົນກະທົບທີ່ຫຍໍ້ທໍ້ຈາກການປ່ຽນແປງຂອງດິນຟ້າອາກາດໃນການຜະລິດກະສິກຳ, ພິເສດ ສຳລັບເຂດຜະລິດເຂົ້າສານໃຫຍ່ກວ່າໝູ່ ນັ້ນແມ່ນເຂດທົ່ງພຽງແມ່ນ້ຳຂອງໄດ້ຮັບຖືວ່າ ແມ່ນວຽກງານທີ່ຮີບດ່ວນຕົ້ນຕໍ. ກ່ຽວກັບສິ່ງນີ້, ທ່ານຮອງສາດສະດາຈານ, ດຣ ເລແອງຕວນ, ຮອງຫົວຫນ້າສະຖາບັນຄົ້ນຄ້ວາການປ່ຽນແປງຂອງດິນຟ້າອາກາດ ຫວຽດນາມ, ມະຫາວິທະຍາໄລ ເກີນເທີ ໃຫ້ຮູ້ວ່າ:
“ພວກເຮົາສາມາດຫັນປ່ຽນບັນດາຜົນລະປູກນຳໃຊ້ນ້ຳຫນ້ອຍກວ່າ ພ້ອມທັງຕ້ອງປະຢັດນ້ຳ. ຄຽງຄູ່ກັນນັ້ນ ພວກເຮົາຕ້ອງຊ່ວຍປະຊາຊົນຄິດເຖິງເລື່ອງປ່ຽນແປງອົງປະກອບການຜະລິດ. “
ດ້ວຍຈຸດໝາຍພັດທະນາພື້ນຖານເສດຖະກິດຕາມທ່າອ່ຽງເຕີບໂຕຂຽວ, ຍາດແຍ່ງບັນດາກາລະໂອກາດຈາກການປ່ຽນແປງຂອງດິນຟ້າອາກາດ ເພື່ອພັດທະນາເສດຖະກິດສັງຄົມ, ປະກອບສ່ວນຢ່າງຕັ້ງຫນ້າກັບປະຊາຄົມສາກົນ ໃນການຮັບມືກັບການປ່ຽນແປງຂອງດິນຟ້າອາກາດ. ຫວຽດນາມ ກໍໄດ້ສ້າງບັນດາແຜນພັດທະນາ, ກໍ່ສ້າງບັນດາກິດຈະກຳປ້ອງກັນ, ຕ້ານໄພທຳມະຊາດຈຸດສຸມແລະຮີບດ່ວນ, ຄົ້ນຄ້ວາ ແລະ ຜັນຂະຫຍາຍບັນດາມາດຕະການລະອຽດ ເພື່ອປ້ອງກັນ ແລະ ຕ້ານໄພທຳມະຊາດຢ່າງມີປະສິດທິຜົນ.