ຫວຽດນາມແມ່ນໜຶ່ງໃນບັນດາປະເທດຖືກຜົນສະທ້ອນຢ່າງໜັກໜ່ວງຍ້ອນບັນຫາປ່ຽນແປງຂອງດິນຟ້າອາກາດ. ຍຸດທະສາດແຫ່ງຊາດກ່ຽວກັບ ຮັບມືກັບການປ່ຽນແປງຂອງດິນຟ້າອາກາດ ພວມ ມານະພະຍາຍາມຮຽກຮ້ອງ ການໜູນຊ່ວຍໄລຍະຍາວ ແລະ ແຂງແຮງຂອງບັນດານັກ ອຸປະຖຳສາກົນ ໃຫ້ແກ່ວຽກງານຄຸ້ມຄອງຊັບພະຍາກອນສິ່ງແວດລ້ອມ ແລະ ການຮັບມືກັບການ ປ່ຽນແປງຂອງດິນຟ້າອາກາດ.
ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ກ່າວຄຳເຫັນທີ່ກອງປະຊຸມຂັ້ນສູງກ່ຽວກັບການສົມທົບກັນໜູນຊ່ວຍພັດທະນາສັງລວມເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ
|
ໃນຊຸມປີມໍ່ມານີ້, ການປ່ຽນແປງຂອງດິນຟ້າອາກາດຍາມໃດກໍແມ່ນບັນຫາຮ້ອນເຮັ່ງບໍ່ພຽງແຕ່ຢູ່ຫວຽດນາມເທົ່ານັ້ນ, ຫາກຍັງຢູ່ຫຼາຍປະເທດໃນໂລກອີກດ້ວຍ. ບັນດາຄວາມເສຍຫາຍກ່ຽວກັບຊີວິດອີນຊີ ແລະ ຊັບສິນຍ້ອນການປ່ຽນແປງຂອງດິນຟ້າອາກາດກໍ່ຂຶ້ນນັ້ນ ໄດ້ເຮັດໃຫ້ລັດຖະບານປະເທດຕ່າງໆຕ້ອງມີບັນດານະໂຍບາຍນຳໜ້າໃນບັນຫານີ້. ຢູ່ຫວຽດນາມ, ລັດຖະບານໄດ້ອະນຸມັດຜ່ານໂຄງການຈຸດໝາຍແຫ່ງຊາດກ່ຽວກັບການຮັບມືກັບການປ່ຽນແປງຂອງດິນຟ້າອາກາດ, ສ້າງແຜນຮັບມືຕໍ່ການ ປ່ຽນແປງຂອງດິນຟ້າອາກາດ ແລະ ນ້ຳທະເລຂຶ້ນສູງໃຫ້ບັນດາເຂດຂອງຫວຽດນາມເຖິງປີ 2050 ແລະ ສ້າງແຜນການດຳເນີນງານແຫ່ງຊາດ. ບັນດານະໂຍບາຍຮັບມືກັບການປ່ຽນແປງຂອງດິນຟ້າອາກາດຂອງຫວຽດນາມ ໄດ້ມີການເຂົ້າຮ່ວມຢ່່າງແຂງແຮງຂອງບັນດານັກອຸປະຖຳ ແລະ ບັນດາປະເທດທີ່ມີທ່າແຮງໃນຂົງເຂດນີ້.
ໂຮນລັງ, ປະເທດທີ່ມີການຮ່ວມມືຫຼາຍຢ່າງກັບຫວຽດນາມເພື່ອຮັບມືກັບ ການປ່ຽນແປງຂອງດິນຟ້າອາກາດ
ໂຮນລັງ ແລະ ຫວຽດນາມໄດ້ມີສັນຍາຄູ່ຮ່ວມມືຍຸດທະສາດກ່ຽວກັບການດັດປັບໃຫ້ແທດເໝາະກັບການ ປ່ຽນແປງຂອງດິນຟ້າອາກາດ ແລະ ການຄຸ້ມຄອງນ້ຳ. ນັບແຕ່ເມື່ອສັນຍາໄດ້ຮັບການລົງນາມໃນການຢ້ຽມຢາມ ໂຮນລັງ ຂອງທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ເມື່ອປີ 2010 ມາຮອດປະຈຸບັນ, 2 ຝ່າຍໄດ້ຕັ້ງໜ້າຜັນຂະຫຍາຍປະຕິບັດສັນຍາ, ໃນນັ້ນໄດ້ສ້າງຕັ້ງຄະນະກຳມາທິການລະຫວ່າງລັດຖະບານຫວຽດນາມ- ໂຮນລັງ ແລະ ເປັນເອກະພາບກັນຜັນຂະຫຍາຍການຄົ້ນຄ້ວາກ່ຽວກັບ 8 ໝວດບັນຫາກ່ຽວກັບການຄຸ້ມຄອງນ້ຳຄື: ຕີລາຄາຊັບພະຍາກອນນ້ຳ, ນ້ຳຮັບໃຊ້ການຜະລິດສະບຽງອາຫານ, ໂຄງລ່າງຂະແໜງນ້ຳ.... ກອງປະຊຸມຄັ້ງທີ 1 ຂອງຄະນະກຳມາທິການລະຫວ່າງລັດຖະບານໄດ້ຖືກຈັດຂຶ້ນເມື່ອເດືອນ 3/2011 ໂດຍພາຍໃຕ້ການເປັນປະທານຮ່ວມຂອງທ່ານຮອງນາຍົກລັດຖະມົນຕີ ຮ່ວາງຈຸງຫາຍ ແລະ ອົງມົງກຸດລາຊະກຸມມານ ໂຮນລັງ Willem Alexander . 2 ຝ່າຍໄດ້ປຶກສາຫາລືບັນດາບັນຫາຮ່ວມມືເພີ່ມທະວີຄວາມສາມາດຄຸ້ມຄອງນ້ຳ, ດັດປັບໃຫ້ແທດເໝາະກັບການປ່ຽນແປງຂອງດິນຟ້າອາກາດ ແລະ ປົກປັກຮັກສາບັນດາລະບົບຊີວະພາບກະສີກຳທີ່ກ່ຽວຂ້ອງຢູ່ຫວຽດນາມ. ພິເສດ, ຍັງມີການຮ່ວມມືຜັນຂະຫຍາຍແຜນການເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ, ຍົກສູງຄວາມສາມາດໃນການວາງແຜນຜັງ ແລະ ພັດທະນາຕົວເມືອງ, ຊົນນະບົດ, ຄວບຄຸມໄພນ້ຳຖ້ວມ, ສະໜອງນ້ຳ, ກຳຈັດນ້ຳເສຍ ແລະ ສ້າງບັນດາລະບອບຄຸ້ມຄອງການເງິນທີ່ກ່ຽວຂ້ອງ. ບົນພື້ນຖານບັນດາເນື້ອໃນທີ່ໄດ້ເຕື້ອງເຖິງນັ້ນ, ບັນດາກອງປະຊຸມ ຄະນະກຳມາທິການຮ່ວມມື ຫວຽດນາມ- ໂຮນລັງ ຫຼັງຈາກນັ້ນໄດ້ປຶກສາຫາລື, ວາງບັນດາໜ້າທີ່ຄວນເລັ່ງໃສ່ປະຕິບັດຄື ສ້າງຕັ້ງບັນດາຄະນະປະສານງານລະຫວ່າງຂະແໜງ, ບັນດາກຸ່ມປະບັດງານ, ຊຸກຍູ້ການສົມທົບກັບຝ່າຍໂຮນລັງເພື່ອສ້າງແຜນການເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ, ບັນດາໂຄງການຮ່ວມມືໃນບັນດາຂົງເຂດປ່ຽນແປງຂອງດິນຟ້າອາກາດ, ຄຸ້ມຄອງນ້ຳ, ຄຸ້ມຄອງທີ່ດິນ, ນ້ຳທະເລຂຶ້ນສູງ... ໃນການຜັນແປຄັ້ງຫຼ້າສຸດ, ເມື່ອວັນທີ 17/6/2014 ຢູ່ຮ່າໂນ້ຍ, ໃນຂອບເຂດການຢ້ຽຢາມຫວຽດນາມຢ່າງເປັນທາງການ, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ແລະ ທ່ານນາຍົກລັດຖະມົນຕີ ໂຮນລັງ Mark Rutte ໄດ້ເປັນປະທານຮ່ວມກອງປະຊຸມຂັ້ນສູງກ່ຽວກັບການສົມທົບກັນໜູນຊ່ວຍພັດທະນາສັງລວມເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ, ຜັນຂະຫຍາຍຕື່ມອີກບາດກ້າວລະອຽດບາດກ້າວໜຶ່ງ ແນໃສ່ຫັນສັນຍາຄູ່ຮ່ວມມືຍຸດທະສາດກ່ຽວກັບການດັດປັບໃຫ້ແທດເໝາະກັບການ ປ່ຽນແປງຂອງດິນຟ້າອາກາດລະຫວ່າງ 2 ປະເທດໃຫ້ປະກົດຜົນເປັນຈິງ. ພ້ອມກັບການຮ່ວມມືໃນລະດັບຊາດ, ຫຼາຍທ້ອງຖິ່ນຂອງຫວຽດນາມກໍຍັງມີບັນດາການເຄື່ອນໄຫວຮ່ວມມືລະອຽດ, ຊຸກຍູ້ການຮັບມືກັບການປ່ຽນແປງຂອງດິນຟ້າອາກາດ ພ້ອມກັບບັນດາທ້ອງຖິ່ນຂອງໂຮນລັງ.
ຮ່ວມມືສາກົນເພື່ອຄຸ້ມຄອງຊັບພະຍາກອນ, ສິ່ງແວດລ້ອມ, ປູກປ່ານ້ຳເຄັມ
ເພື່ອຮັບມືກັບສະພາບການປ່ຽນແປງຂອງດິນຟ້າອາກາດໃຫ້ເປັນຢ່າງດີ, ຫວຽດນາມຍັງເພີ່ມທະວີການຮ່ວມມືສາກົນໃນການຄຸ້ມຄອງຊັບພະຍາກອນນ້ຳ, ພາຍາກອນອາກາດ ແລະ ຄຸ້ມຄອງທີ່ດິນ. ປະຈຸບັນ, ກະຊວງຊັບພະຍາກອນ ແລະ ສິ່ງແວດລ້ອມຫວຽດນາມພວມເປັນປະທານຮັບຜິດຊອບ 58 ໂຄງການໜູນຊ່ວຍຂອງຕ່າງປະເທດໃຫ່ແກ່ການຮັບມືກັບການປ່ຽນແປງຂອງດິນຟ້າອາກາດຂອງຫວຽດນາມ, ດ້ວຍຍອດຄ່າໃຊ້ຈາຍໝັ້ນໝາຍເກືອບ 430 ລ້ານ USD. ໃນປີ 2013, ກະຊວງຊັບພະຍາກອນ ແລະ ສິ່ງແວດລ້ອມຫວຽດນາມ ໄດ້ສົມທົບກັບບັນດາກະຊວງ, ຂະແໜງການ ແລະ ບາງທ້ອງຖິ່ນເພື່ອຜັນຂະຫຍາຍໂຄງການຟື້ນຟູປ່າຊາຍເລນເພື່ອ ຮັບມືກັບການປ່ຽນແປງຂອງດິນຟ້າອາກາດ. ແລະ ກໍໃນປີນີ້, ໂຄງການ ຮັບມືກັບການປ່ຽນແປງຂອງດິນຟ້າອາກາດໄດ້ຈາຍບ້ວງເງິນເກືອບ 250 ຕື້ດົງໃຫ້ແກ່ການເຄື່ອນໄຫວປູກປ່ານ້ຳເຄັມ. ກະຊວງກະສີກຳ ແລະ ພັດທະນາຊົນນະບົດຫວຽດນາມ ກໍໄດ້ສ້າງແຜນການຟື້ນຟູ ປ່າຊາຍເລນໃນທົ່ວປະເທດເຖິງປີ 2015, ດ້ວຍຍອດຄ່າໃຊ້ຈາຍຂຶ້ນເຖິງ 1900 ຕື້ດົງ. ດ້ວຍການໜູນຊ່ວຍແກ່ການຮັບມືກັບການປ່ຽນແປງຂອງດິນຟ້າອາກາດຂອງລັດຖະບານແດນໝາກ, ຫຼາຍທ້ອງຖິ່ນຂອງຫວຽດ ນາມໄດ້ຜັນຂະຫຍາຍບັນດາຮູບແບບທົດລອງກ່ຽວກັບການກໍ່ສ້າງບາງລະບົບຄັນຄູທະເລ ໄປຄຽງຄູ່ກັບການປູກໃໝ່, ຟື້ນຟູປ່າຊາຍເລນໃນເນື້ອທີ່ນັບຮ້ອຍແຮັກຕາ....
ໃນຍຸດທະສາດແຫ່ງຊາດກ່ຽວກັບ ປ່ຽນແປງຂອງດິນຟ້າອາກາດ, ຫວຽດນາມໄດ້ວາງ 4 ຈຸດໝາຍ, ໃນນັ້ນມີຈຸດໝາຍຮ່ວມມືກັບປະຊາຄົມໂລກເພື່ອຮັບມືກັບການປ່ຽນແປງຂອງດິນຟ້າອາກາດ. ພ້ອມກັບການເພີ່ມທະວີການຮ່ວມມືກັບບັນດາປະເທດໃນໂລກ, ຫວຽດນາມໄດ້ ແລະ ຈະສືບຕໍ່ຮ່ວມມືກັບທະນາຄານໂລກ, ທະນາຄານພັດທະນາອາຊີ, ອົງການສະຫະປະຊາຊາດ ແລະ ອົງການສາກົນອື່ນໆເພື່ອປະຕິບັດບັນດາຈຸດໝາຍໃນຍຸດທະສາດຂອງຕົນ.