ທ່ານນາຍົກລັດຖະມົນຕີອິນເດຍ Narendra Modi ພວມທຳການຢ້ຽມຢາມເປັນເວລາ 5 ວັນຢູ່ 3 ປະເທດເກາະທີ່ມະຫາສະມຸດອິນເດຍ ນັ້ນແມ່ນ Seychelles, Mauritius ແລະ Sri Lanka. ການຢ້ຽມຢາມແມ່ນຖືກວົງການນັກສັງເກດການຕີລາຄາວ່າ ແມ່ນເພື່ອແນໃສ່ທັງສ້າງການສົ່ງຜົນສະທ້ອນຂອງຕົນຄືນໃໝ່ຢູ່ພາກພື້ນທີ່ເຄີຍຮັບຖືວ່າ ແມ່ນດ້ານຫຼັງຂອງນິວເດລີໃນຕະຫຼອດໄລຍະຍາວນານ, ທັງສະແດງໃຫ້ເຫັນທັດສະນະການຕ່າງປະເທດທີ່ແຂງແຮງຂອງອຳນາດການປົກຄອງຂອງນາຍົກລັດຖະມົນຕີຄົນໃໝ່ຂອງອິນເດຍ Narendra Modi ນັບແຕ່ຂຶ້ນກຳອຳນາດ, ແນໃສ່ສ້າງທີ່ຕັ້ງບົດບາດຂອງອິນເດຍໃນໂລກໃໝ່.
ທ່ານນາຍົກລັດຖະມົນຕີອິນເດຍ Narendra Modi ແລະ ທ່ານ
ປະທານາທິບໍດີ Seychelles James Michel (ພາບ:Seychelles News) |
ກ່ອນການຢ້ຽມຢາມ, ສື່ມວນຊົນອິນເດຍ ແລະ ສາກົນໄດ້ວິຈານຫຼາຍກ່ຽວກັບການເດີນທາງຢ້ຽມຢາມບັນດາປະເທດຢູ່ໃກ້ຄຽງທາງທະເລຂອງທ່ານນາຍົກລັດຖະມົນຕີອິນເດຍ Narendra Modi. ນັກຂ່າວເກືອບທັງໝົດຕ່າງກໍໃຫ້ຂໍ້ສັງເກດວ່າ ຈຸດປະສົງຕົ້ນຕໍຂອງການຢ້ຽມຢາມແມ່ນເພື່ອແນໃສ່ແກ່ດຶງບັນດາປະເທດໃນ ມະຫາສະມຸດອິນເດຍນີ້ຫຍັບມໍ່ເຂົ້າກັບອິນເດຍຫຼາຍກວ່າໂດຍຜ່ານບັນດາບ້ວງເງິນໜູນຊ່ວຍທາງດ້ານເສດຖະກິດ, ການທະຫານ. ໃນມໍ່ໆມານີ້, ຕໍ່ໜ້າການເພີ່ມທະວີການປະກົດຕົວຂອງຈີນຢູ່ບັນດາປະເທດໃນເຂດຄື ການກໍ່ສ້າງທາງຫຼວງ, ໂຮງງານໄຟຟ້າ ແລະ ບັນດາທ່າກຳປັ່ນນ້ອຍ… ນິວເດລີພວມຮູ້ສຶກວ່າ ນັບມື້ນັບຂາດຄວາມປອດໄພ ແລະ ຊອກຫາວິທີສ້າງການສົ່ງຜົນສະທ້ອນຂອງຕົນຄືນໃໝ່ຢູ່ພາກພື້ນ.
ສ້າງຄວາມສະໜິດຕິດພັນກັບປະເທດເພື່ອນບ້ານໃກ້ຄຽງ
ປະເທດທຳອິດໃນການເດີນທາງຂອງທ່ານນາຍົກລັດຖະມົນຕີອິນເດຍ Narendra Modi ແມ່ນ Seychelles ຊຶ່ງແມ່ນໝູ່ເກາະທີ່ມີປະຊາກອນ 90.000 ຄົນ, ແຕ່ພັດມີທີ່ຕັ້ງດ້ານພູມສາດຍຸດທະສາດທີ່ສຳຄັນທີ່ສຸດ, ໄດ້ຮັບຖືວ່າແມ່ນ 3 ລ່ຽມປ້ອງກັນຄວາມສະຫງົບຢູ່ພາກພື້ນ ມະຫາສະມຸດອິນເດຍ. ຢູ່ທີ່ນີ້, ທ່ານນາຍົກລັດຖະມົນຕີອິນເດຍ Narendra Modi ພ້ອມກັບປະທານາທິບໍດີ Seychelles ທ່ານ James Michel ໄດ້ລົງນາມໃນສົນທິສັນຍາສະບັບໜຶ່ງ ໃນນັ້ນກໍເປັນເອກະສັນກັນວ່າ ນິວເດລີສືບຕໍ່ແມ່ນຜູ້ສະໜອງດ້ານພາຫະນະອຸປະກອນການທະຫານຕົ້ນຕໍໃຫ້ Seychelles ເຊັ່ນ: ກຳປັ່ນລາດຕະເວນ, ລະບົບຣາດາຕິດຕາມ, ພິເສດແມ່ນການສ້າງແຜນທີ່ທະເລຂອງປະເທດເກາະນີ້. ນີ້ໄດ້ຮັບຖືວ່າ ແມ່ນຜົນສຳເລັດໃນເບື້ອງຕົ້ນຂອງ ທ່ານນາຍົກລັດຖະມົນຕີອິນເດຍ Narendra Modi ໂດຍຜ່ານການຍູ້ແຮງການໜູນຊ່ວຍດ້ານການທະຫານໃຫ່ແກ່ Seychelles, ໂດຍສະເພາະໃນມໍ່ໆມານີ້, ໄດ້ມີຂ່າວຄາວທີ່ຖືວ່າ ທັງຈີນ ແລະ ລັດເຊຍຕ່າງກໍພວມຊອກຫາຂໍ້ຕົກລົງກັນເພື່ອສ້າງຖານທີ່ໝັ້ນການທະຫານຢູ່ Seychelles .
ປະເທດທີ່ 2 ໃນການເດີນທາງຂອງທ່ານນາຍົກລັດຖະມົນຕີອິນເດຍ Narendra Modi ນັ້ນແມ່ນ Mauritius. ນີ້ແມ່ນເກາະແຫ່ງໜຶ່ງ ທີ່ມີປະຊາກອນ 1,2 ລ້ານຄົນ, ແມ່ນເຂດຮັບຜົນສະທ້ອນຈາກນິວເດລີ. ກ່ອນທີ່ດຳເນີນການຢ້ຽມຢາມ, ອົງການການທູດຂອງອິນເດຍເນັ້ນໜັກວ່າ ຈຸດສຸມຂອງການຢ້ຽມຢາມ ແມ່ນການເປີດກ້ວາງການພົວພັນດ້ານການທະຫານໃຫ້ດີຍິ່ງຂຶ້ນອີກ ດ້ວຍບັນດາຄຳໝັ້ນສັນຍາປະກອບໃຫ້ Mauritius ບັນດາກຳປັ່ນຮົບໂດຍອິນເດຍຜະລິດເພື່ອເພີ່ມທະວີການປ້ອງກັນຝັ່ງທະເລ ແລະ ເຂດເສດຖະກິດພິເສດ. Mauritius ມີແຜນການສັ່ງຊື້ ກຳປັ່ນລາດຕະເວນ Barracuda , ນອກຈາກນັ້ນ, ອິຍເດຍຍັງສະໜອງກຳປັນ່ຮົບອື່ນອີກ 13 ລຳໃຫ້ແກ່ Mauritius.
ປະເທດສຸດທ້າຍໃນການເດີນທາງຢ້ຽມຢາມແຕ່ວັນທີ 13 – 14/3 ຂອງທ່ານນາຍົກລັດຖະມົນຕີອິນເດຍ Narendra Modi ແລະ ກໍແມ່ນປະເທດທີ່ສຳຄັນກວ່າໝູ່, ນັ້ນແມ່ນປະເທດ Sri Lanka . ນີ້ແມ່ນການຢ້ຽມຢາມໃນຂອບເຂດພົວພັນ 2 ຝ່າຍຄັ້ງທຳອິດຂອງນາຍົກລັດຖະມົນຕີອິນເດຍໄປເຖິງປະເທດເພື່ອບ້ານໃກ້ຄຽງທາງທິດໃຕ້ພາຍຫຼັງ 28 ປີ. ອິນເດຍເຄີຍຖື Sri Lanka ແມ່ນດ້ານຫຼັງຂອງຕົນ, ແຕ່ຢູ່ໃຕ້ສະໄໝອະດີດປະທານາທິບໍດີ Sri Lanka ທ່ານ Rajapaksa ນັ້ນ, ການພົວພັນລະຫວ່າງປະເທດນີ້ກັບອິນເດຍໄດ້ແຕກແຫງຢ່າງຮ້າຍແຮງ, ກົງກັນຂ້າມ, ສຳລັບການພົວພັນກັບຈີນນັ້ນ, ປັກກິງ ໄດ້ກາຍເປັນນັກລົງທຶນຕ່າງປະເທດໃຫຍ່ກ່ວາໝູ່ຢູ່ Sri Lanka, ຊຶ່ງໄດ້ລົງນາມໃນສັນຍາຫຼາຍສະບັບກ່ຽວກັບການກໍ່ສ້າງພື້ນຖານໂຄງລ່າງໃຫຍ່. ໃນຂະນະນັ້ນ, ທາງດ້ານການທະຫານ, ບັນດາກຳປັ່ນຮົບຂອງຈີນໄດ້ເຂົ້າທຽບທ່າ Sri Lanka ຢ່າງລຽນຕິດ. ສິ່ງນີ້ໄດ້ເຮັດໃຫ້ນິວເດລີ ບໍ່ພໍໃຈທີ່ສຸດ. ເພາະສະນັ້ນ, ເລື່ອງປະທານາທິບໍດີຄົນໃໝ່ຂອງ Sri Lanka ຂຶ້ນກຳອຳນາດນັ້ນ, ກໍເປັນກາລະໂອກາດທີ່ດີທີ່ສຸດເພື່ອໃຫ້ອິນເດຍຊຸກຍູ້ການພົວພັນດ້ານການທະຫານ, ເປີດກ້ວາງການພົວພັນດ້ານເສດຖະກິດກັບ Sri Lanka, ຟື້ນຟູທີ່ຕັ້ງບົດບາດຢູ່ປະເທດເກາະຕັ້ງຢູ່ມໍ່ກັບຕົນເອງ. ນອກຈາກນັ້ນ, ການຢ້ຽມຢາມກໍຖືກດຳເນີນໃນຈຸດເວລາທີ່ການພົວພັນຈີນ- Sri Lanka ພວມປະສົບກັບສິ່ງກີດຂວາງ ຂະນະທີ່ Sri Lanka ຫາກໍໃຫ້ຢຸດການເຄື່ອນໄຫວສຳລັບໂຄງການອະສັງຫາລິມະຊັບຂອງຈີນທີ່ມີມຸນຄ່າ 1,5 ຕື້ USD ຢູ່ໂກລົມໂບຍ້ອນຖືກກ່າວຫາວ່າ ຂາດຄວາມກະຈ່າງແຈ້ງ ແລະ ບໍ່ສາມາດຕອບສະໜອງມາຖານດ້ານສິ່ງແວດລ້ອມ.
ຢັ້ງຢືນທີ່ຕັ້ງບົດບາດຂອງອິນເດຍໃນໂລກໃໝ່
ນັບແຕ່ຂຶ້ນກຳອຳນາດ, ທ່ານນາຍົກລັດຖະມົນຕີອິນເດຍ Narendra Modi ໄດ້ມີຫຼາຍແຜນນະໂຍບາຍ, ນະໂຍບາຍປ່ຽນແປງເມື່ອທຽບໃສ່ ນາຍົກລັດຖະມົນຕີອິນເດຍຜູ້ເກົ່າ. ຫວນຄືນຊຸມປີທີ່ຜ່ານມາ, ບັນດານະໂຍບາຍຂອງລັດຖະບານຊຸດກ່ອນ ແມ່ນໄດ້ຮັບຖືກວ່າແມ່ນອ່ອນດ້ວຍ ແລະ ຂາດຄວາມສາມາດຕັດສິນໃນນະໂຍບາຍການຕ່າງປະເທດ ແລະ ການປ້ອງກັນຄວາມສະຫງົບ, ພິເສດໃນການພົວພັນກັບຈີນ ແລະ ປາກິສະຖານ. ໂດຍໄດ້ຮັບຄວາມໄວ້ວາງໃຈ ແລະ ປາຖະໜານຳມາເຊິ່ງການປ່ຽນແປງທີ່ມີລັກສະນະຍຸດທະສາດຈາກຜູ້ມີສິດເລືອກຕັ້ງອິນເດຍ, ທ່ານນາຍົກລັດຖະມົນຕີອິນເດຍ Narendra Modi ພ້ອມກັບພັກຂອງທ່ານ ບໍ່ມີການເລືອກເຟັ້ນໃດໆອີກນອກເໜືອຈາກການຕ້ອງກະທຳເພື່ອຄ່ອຍຟື້ນຟູທີ່ຕັ້ງບົດບາດເປັນປະເທດມະຫາອຳນາດ ແລະ ຄຸນຄ່າດ້ານພູມສາດ, ການເມືອງຍຸດທະສາດຂອງຕົນ.
ເຖິງເວລາແລ້ວ ທີ່ອິນເດຍຕ້ອງພິຈາລະນາຢ່າງເຂັ້ມງວດກ່ຽວກັບທີ່ຕັ້ງບົດບາດຂອງຕົນໃນທົ່ວໂລກ. ຄວນສ້າງສຳພັນທະມິດ ລັດເຊຍ-ຈີນ-ອິນເດຍ ຫຼືຮ່ວມມືກັບຈີນເພື່ອຈຳກັດການຟື້ນຕົວຂອງຈີນ ກໍລ້ວນແຕ່ແມ່ນບັນຫາທີ່ ທ່ານນາຍົກລັດຖະມົນຕີອິນເດຍ Narendra Modi ຊັ່ງຊາເລືອກເຟັ້ນ. ພິເສດໃນການແຂ່ງຂັນຍາດເອົາການສົ່ງຜົນສະທ້ອນຢູ່ທັງອາຊີໃຕ້ ແລະ ອາຊີຕາເວັນອອກ, ອິນເດຍກໍບໍ່ຢາກແມ່ນຜູ້ຊັກຊ້າ. ເມື່ອສາບານຕົວຂຶ້ນດຳລົງຕຳແໜ່ງ, ທ່ານນາຍົກລັດຖະມົນຕີ Narendra Modi ໄດ້ເລືອກເອົາປະເທດຍີປຸ່ນແມ່ນປະເທດທຳອິດໃນການຢ້ຽມຢາມຕ່າງປະເທດ. ແລະ ປະຈຸບັນ, ການຢ້ຽມຢາມບັນດາປະເທດທີ່ເປັນດ້ານຫຼັງຂອງອິນເດຍນັ້ນ, ສ່ວນໃດສ່ວນໜຶ່ງກໍເປັນການໃຫ້ຄຳຕອບກ່ຽວກັບຍຸດທະສາດການທູດຂອງອຳນາດການປົກຄອງຂອງ ທ່ານນາຍົກລັດຖະມົນຕີອິນເດຍ Narendra Modi.