(vovworld) - ວັນທີ 8/8, ສະຫະສະມາຄົມບັນດາປະເທດອາຊີຕາເວັນອອກສ່ຽງໃຕ້ (ອາຊຽນ) ສະເຫຼີມສະຫຼອງວັນສ້າງຕັ້ງຄົບຮອບ 45 ປີ, ນີ້ແມ່ນເຫດການທີ່ມີຄວາມໝາຍສຳຄັນພິເສດສຳຫຼັບ 10 ປະເທດສະມາຊິກ ໃນນັ້ນມີ ຫວຽດນາມ. ໃນ 45 ປີຜ່ານມາ, ອາຊຽນໄດ້ມີບັນດາບາດກ້າວເດີນທີ່ຂັນແຂງ ໃນຂະບວນວິວັດແຫ່ງການສ້າງເປັນອົງການໜຶ່ງດຽວ, ເພື່ອແນໃສ່ຢັ້ງຢືນວ່າແມ່ນໜຶ່ງໃນບັນດາອົງການສາກົນພາກພື້ນທີ່ປະສົບຜົນສຳເລັດ, ປະກອບສ່ວນຮັບປະກັນ ສັນຕິພາບ, ຄວາມສະຫງົບປອດໄພ, ສ້າງເງື່ອນໄຂສະດວກໃຫ້ແກ່ການພັດທະນາຢູ່ໃນພາກພື້ນອາຊີ ແລະ ສ່ົງຜົນສະທ້ອນຢ່າງໃຫຍ່ຫຼວງອອກສູ່ທົ່ວໂລກ.
(ພາບ: .google.com.vn)
ໂດຍໄດ້ຮັບການສ້າງຕັ້ງຂຶ້ນເມື່ອວັນທີ 8/8/1967 ຢູ່ ບາງກອກ, ແຫ່ງປະເທດໄທ, ຈາກອົງການໜຶ່ງທີ່ມີ 5 ປະເທດສະມາຊິກ, ປະຈຸບັນ, ອາຊຽນໄດ້ມີ 10 ປະເທດສະມາຊິກ, ອັນໄດ້ນຳມາເຊິ່ງການປ່ຽນແປງທີ່ເປັນພື້ນຖານໃນສະຫະສະມາຄົມກໍ່ຄືໃນພາກພື້ນ. ອາຊຽນ -10 ໄດ້ສ້າງເປັນກຳລັງແຮງ, ຄວາມເຫັນດີເຫັນພ້ອມ ເພື່ອສ້າງການພົວພັນໃໝ່ບົນພື້ນຖານມິດຕະພາບ, ເຂົ້າອົກເຂົ້າໃຈ ແລະ ໄວ້ເນື້ອເຊື່ອໃຈເຊິ່ງກັນ ແລະ ກັນ, ຊ່ວຍອົງການນີ້ມີບັນດາບາດກ້າວບຸກທະລຸທາງດ້ານເສດຖະກິດ ແລະ ການເງິນ.
ຜົນສຳເລັດອັນໃຫຍ່ກວ່າໝູ່ຂອງອາຊຽນໃນ 45 ປີ ທີ່ຜ່ານມາ ນັ້ນແມ່ນໄດ້ຮັບຮອງເອົາກົດບັດອາຊຽນ, ຊິ່ງແມ່ນພື້ນຖານເພື່ອໃຫ້ອາຊຽນປະຕິບັດຄຳໝັ້ນສັນຍາສ້າງຕັ້ງປະຊາຄົມອາຊຽນດ້ວຍ 3 ເສົາຄ້ຳຕົ້ນຕໍຄື: ຄວາມໝັ້ນຄົງ, ການເມືອງ, ເສດຖະກິດ ແລະ ວັດທະນະທຳໃນປີ 2015. ໃນສະຖານະການໂລກພວມມີການຜັນແປຢ່າງສັບສົນ, ຄວາມໝັ້ນຄົງຖືກຂົ່ມຂູ່ນັ້ນ, ອາຊຽນຈຳເປັນຕ້ອງມີຄວາມຕັດສິນໃຈປະຕິບັດຄຳໝັ້ນສັນຍາຂອງຕົນ ແລະ ຖືວ່ານີ້ແມ່ນຂໍກຸນແຈເພື່ອແກ້ໄຂການພິພາດກັນທີ່ພວມເກີດຂຶ້ນ. ທ່ານ Pham Binh Minh ລັດຖະມົນຕີວ່າການກະຊວງການຕ່າງປະເທດຫວຽດນາມ ຢັ້ງຢືນວ່າ:
”ອາຊຽນໄດ້ເຫັນດີເປັນເອກະພາບນຳກັນວ່າຄວນຍູ້ໄວ, ຍູ້ແຮງວິວັດການສ້າງຕັ້ງປະຊາຄົມອາຊຽນໃນປີ 2015. ໃນນັ້ນເນັ້ນໜັກເຖິງການສ້າງຄວາມສາມັກຄີ, ເປັນອົງການໜຶ່ງທີ່ໝັ້ນຄົງ ແລະ ຜັນຂະຫຍາຍບັນດາໂຄງການເຊື່ອມຈອດກັບບັນດາປະເທດອາຊຽນ, ກໍ່ຄືການຮັດແຄບຊ່ອງຫວ່າງພັດທະນາລະຫວ່າງບັນດາປະເທດໃນກຸ່ມອາຊຽນ. ທີສອງແມ່ນ, ຄວນເພີ່ມທະວີບົດບາດເປັນສູນກາງຂອງອາຊຽນ; ເພີ່ມທະວີໂຄງສ້າງໃນພາກພື້ນ; ເສີມຂະຫຍາຍບົດບາດຂອງອາຊຽນກັບພາຍນອກ. ທີສາມແມ່ນຄວນເພີ່ມທະວີການປະກອບສ່ວນຂອງອາຊຽນໃນການຮັກສາສັນຕິພາບ, ສະຖຽນລະພາບໃນພາກພື້ນ ແລະ ເພີ່ມທະວີບັນດາກົນໄກປະພຶດຕໍ່ ກໍ່ຄື ກົດລະບຽບໄດ້ມີຢູ່ແລ້ວ. ນັ້ນແມ່ນສົນທິສັນຍາໄມຕີຈິດ - ຮ່ວມມື, ກໍ່ຄືຖະແຫຼງການກ່ຽວກັບບັນດາຂໍ້ກຳນົດການປະພຶດໃນເຂດທະເລຕາເວັນອອກ DOC ແລະ ກ້າວໄປເຖິງການສ້າງຕັ້ງປະມວນຂໍ້ກຳນົດການປະພຶດໃນເຂດທະເລຕາເວັນອອກ”
(ພາບ: .google.com.vn) ອາຊຽນມີຄວາມສາມາດເພື່ອບັນລຸໄດ້ຈຸດໝາຍທີ່ໄດ້ວາງອອກຖືກກັບກຳນົດເວລາ ອີງບົນພື້ນຖານເຫຼົ່ານັ້ນ. ກ່ອນອື່ນໝົດແມ່ນທາງດ້ານເສດຖະກິດ. ຕາມຂໍ້ສັງເກດຂອງບັນດາຜູ້ຊ່ຽວຊານແລ້ວ, ອາຊຽນໄດ້ຮັບຖືວ່າແມ່ນອົງການເຕີບໂຕເສດຖະກິດຢືນອັນດັບ 3, ຖັດຈາກຈີນ ແລະ ອິນເດຍ. ດ້ວຍລະດັບເຕີບໂຕ ຈີດີພີບັນລຸປະມານ 5,7 – 6,4%. ບໍ່ພຽງແຕ່ແມ່ນພາກພື້ນທີ່ພົ້ນເດັ່ນທາງດ້ານເສດຖະກິດເທົ່ານັ້ນ, ອາຊຽນພວມພົ້ນເດັ່ນຂຶ້ນ ດ້ວຍບົດບາດລິເລີ່ມ, ຈັດຕັ້ງເວທີປາໄສສາກົນສຳເລັດຜົນ ແລະ ສວມບົດບາດຕົ້ນຕໍໃນຫຼາຍກົນໄກຮ່ວມມືທີ່ສຳຄັນ.
ແຕ່ປະຈຸບັນ, ອາຊຽນພວມຕ້ອງປະເຊີນໜ້າກັບການທ້າທາຍຫຼາຍຢ່າງ. ສະພາບຄວາມໝັ້ນຄົງ, ການເມືອງຢູ່ບາງປະເທດສະມາຊິກມີສັນຍານຂາດສະຖຽນລະພາບ, ລະດັບເຕີບໂຕທາງດ້ານເສດຖະກິດຂອງໂລກຄາດວ່າຈະສືບຕໍ່ຫຼຸດລົງ, ລາຄາທັນຍາຫານ, ເຊື້ອເພິີງເພີ່ມຂຶ້ນສູງ. ພິເສດ, ອາຊຽນຍັງຕ້ອງປະເຊີນໜ້າກັບຊ່ອງຫວ່າງແຫ່ງການພັດທະນາໃນບັນດາປະເທດສະມາຊິກ. ສິ່ງດັ່ງກ່າວຮຽກຮ້ອງໃຫ້ອາຊຽນສືບຕໍ່ມີການປັບປຸງເພື່ອບືນຕົວຂຶ້ນ. ທ່ານ ສຸຮິນພິດສຸວັນ ເລຂາທິການໃຫຍ່ອາຊຽນ ໄດ້ຢືນຢັນວ່າ:
”ຊ່ອງຫວ່າງພັດທະນາລະຫວ່າງບັນດາປະເທດສະມາຊິກ, ແມ່ນການທ້າທາຍອັນໃຫຍ່ຫຼວງສຳຫຼັບພວກເຮົາ. ພວກເຮົາຈະຕ້ອງມີຄວາມມານະພະຍາຍາມກວ່າອີກ, ຕ້ອງຊຸກຍູ້ການຮ່ວມມືກວ່າອີກ ເພາະວ່າອາຊຽນໃນປະຈຸບັນ ບໍ່ພຽງແຕ່ພວມປະເຊີນໜ້າກັບການທ້າທາຍທີ່ມີຢູ່ແລ້ວຫາກຍັງຕ້ອງປະເຊີນໜ້າກັບການທ້າທາຍຄືໄພທຳມະຊາດ, ໂລກລະບາດ, ດິນເຊາະເຈື່ອນ, ຄື້ນຍັກ… ສິ່ງດັ່ງກ່າວກໍ່ເປັນການຂົ່ມຂູ່ເຖິງຄວາມມານະພະຍາຍາມຮັດແຄບຊ່ອງຫວ່າງພັດທະນາອີກດ້ວຍ”
ຄຽງຂ້າງນັ້ນ, ການພິພາດກ່ຽວກັບບັນຫາອະທິປະໄຕທະເລທີ່ເກີດຂຶ້ນຫວ່າງມໍ່ໆນີ້ລະຫວ່າງບາງປະເທດສະມາຊິກອາຊຽນນັ້ນ ທັງແມ່ນການທ້າທາຍຕໍ່ກັບອາຊຽນ, ທັງແມ່ນກາລະໂອກາດເພື່ອໃຫ້ອາຊຽນປັບປຸງອົງການຂອງຕົນໃຫ້ສົມບູນແບບ. ວິທີເຊິ່ງອາຊຽນພວມມານະພະຍາຍາມປະຕິບັດນັ້ນແມ່ນຖືຜົນປະໂຫຍດລວມຂອງກຸ່ມສູງກວ່າຜົນປະໂຫຍດຂອງແຕ່ລະປະເທດ. ມີຄວາມເຫັນດີເຫັນພ້ອມກ່ຽວກັບຜົນປະໂຫຍດ. ນັ້ນຈະແມ່ນມາດຕະການເພື່ອແກ້ໄຂສິ່ງທີ່ກີດຂວາງ, ເຮັດໃຫ້ອາຊຽນກາຍເປັນອົງການທີ່ມີຄວາມສາມັກຄີ ແລະ ເປັນເອກະພາບກັນກວ່າຕໍ່ໜ້າການທ້າທາຍທີ່ຈະເກີດຂື້ນໃນຂ້າງໜ້າ. ສຳຫຼັບຫວຽດນາມ, ໃນຖານະແມ່ນປະເທດສະມາຊິກທີ່ມີຄວາມຮັບຜິດຊອບ, ແລະ ພວມມີການປະກອບສ່ວນຢ່າງຕັ້ງໜ້າໃຫ້ແກ່ວິວັດແຫ່ງການກໍ່ສ້າງອາຊຽນແຫ່ງຄວາມສາມັກຄີ,ເອກະພາບນັ້ນ. ຫວຽດນາມຈະຮັບຕຳແໜ່ງເປັນເລຂາທິການໃຫຍ່ອາຊຽນໃນອາຍຸການຈະມາເຖິງ. ໃນໄລຍະທາງຕໍ່ໄປຂອງອາຊຽນ ຍາມໃດກໍ່ມີການປະກອບສ່ວນຂອງຫວຽດນາມ ພ້ອມກັບບັນດາປະເທດສະມາຊິກອື່ນໆ, ເພື່ອສ້າງເປັນອົງການອາຊຽນທີ່ຂະຫຍັນຂັນເຄື່ອນ, ພັດທະນາຢ່າງໝັ້ນຄົງ, ເປັນພື້ນຖານທີ່ໝັ້ນຄົງໃຫ້