ວັນທີ 31/12 ທີ່ຈະມາເຖິງ, ປະຊາຄົມອາຊຽນໄດ້ຮັບການສ້າງຕັ້ງຂຶ້ນຢ່າງເປັນທາງການ. ມາຮອດປະຈຸບັນ, ທຸກໆປະເທດສະມາຊິກອາຊຽນໄດ້ສຳເລັດວຽກງານກະກຽມໃຫ້ແກ່ການສ້າງຕັ້ງປະຊາຄົມອາຊຽນໃນຂັ້ນພື້ນຖານ ພ້ອມທັງໄດ້ມານະພະຍາຍາມຜັນຂະຫຍາຍບັນດາມາດຕະການຍົກສູງແຫຼ່ງຊັບພະຍາກອນມະນຸດ, ພັດທະນາພື້ນຖານໂຄງລ່າງ, ເພີ່ມທະວີການເຊື່ອມໂຍງ, ຮັດແຄບຄວາມແຕກໂຕນກັນໃນການພັດທະນາ, ສ້າງເງື່ອນໄຂສະດວກໃຫ້ແກ່ການຈໍລະຈອນສິນຄ້າ, ສ້າງກອບກົດໝາຍໃຫ້ສົມບູນແບບເພື່ອສອດຄ່ອງກັບບັນດາຄຳໝັ້ນສັນຍາໃນອາຊຽນ.
 |
ວັນທີ 22/11/2015 ຢູ່ກົວລາລຳເປີ ປະເທດມາເລເຊຍ ໄດ້ກາຍເປັນວັນປະຫວັດສາດ ຂະນະທີ່ການນຳ 10 ປະເທດອາຊຽນໄດ້ເຫັນດີເປັນເອກະສັນຮັບຮອງເອົາຖະແຫຼງການສ້າງຕັ້ງປະຊາຄົມອາຊຽນ, ອັນໄດ້ສິ້ນສຸດໄລຍະ 48 ປີແຫ່ງການສ້າງຕັ້ງ ແລະ ຂະຫຍາຍຕົວຂອງອາຊຽນ ແລະ ໄດ້ເປີດໄລຍະໃໝ່ໃຫ້ແກ່ອາຊຽນ. ດ້ວຍການສ້າງຕັ້ງຂຶ້ນຢ່າງເປັນທາງການນັ້ນ, ອາຊຽນໄດ້ກາຍເປັນອົງການລະດັບພາກພື້ນທີ 3 ໃນໂລກ, ຖັດຈາກປະຊາຄົມເສດຖະກິດເອີລົບ( ປະຈຸບັນແມ່ນສະຫະພາບເອີລົບ) ແລະ ອົງການທ້ອນໂຮມອາຟະລິກາເປັນເອກະພາບ(ປະຈຸບັນແມ່ນສະຫະພາບອາຟະລິກາ). ເປົ້າໝາຍໂດຍສັງເຂບຂອງປະຊາຄົມອາຊຽນແມ່ນສ້າງອາຊຽນກາຍເປັນອົງການຮ່ວມມືລະຫວ່າງລັດຖະບານຊຶ່ງມີການຮ່ວມສຳພັນຢ່າງເລິກເຊິ່ງກ້ວາງຂວາງກວ່າ ແລະ ຜູກຮັດກັນຫຼາຍກວ່າບົນພື້ນຖານດ້ານກົດໝາຍແມ່ນກົດບັດອາຊຽນ, ແລະ ຍັງຄົງເປີດກ້ວາງການຮ່ວມມືກັບພາຍນອກ.
ກາລະໂອກາດ ແລະ ສິ່ງທ້າທາຍ
ປະຊາຄົມອາຊຽນໄດ້ຮັບການສ້າງຕັ້ງຢ່າງເປັນທາງການນັ້ນ ຈະນຳມາເຊິ່ງຫຼາຍກາລະໂອກາດໃຫ້ແກ່ໃຫ້ແກ່ບັນດາປະເທດສະມາຊິກ, ກ່ອນອື່ນໝົດແມ່ນຂົງເຂດເສດຖະກິດ. ປະຊາຄົມອາຊຽນໄດ້ຮັບການສ້າງຕັ້ງຂຶ້ນດ້ວຍຄວາມຫວັງຫັນຕະຫຼາດທີ່ມີຈຳນວນປະຊາກອນກວ່າ 600 ລ້ານຄົນໃຫ້ກາຍເປັນຕະຫຼາດຮ່ວມ, ກາຍເປັນພື້ນຖານການຜະລິດຢ່າງເປັນເອກະພາບ ໃນນັ້ນສິນຄ້າ, ການບໍລິການ, ການລົງທຶນ, ທຶນ ແລະ ແຮງງານທີ່ມີສີມືການຊ່າງສູງຈະມີໂອກາດເຄື່ອນໄຫວຢ່າງເສລີ. ປະຊາຄົມອາຊຽນຈະຊ່ວຍຍູ້ແຮງການເຊື່ອນຈອດພາກພື້ນ ແລະ ເພີ່ມທະວີກຳລັງແກ່ງແຍ້ງເພື່ອປະເຊີນໜ້າກັບສິ່ງທ້າທາຍໃໝ່ໃນໂລກ, ພິເສດແມ່ນໃນພາກພື້ນທີ່ມີບັນດາພື້ນຖານເສດຖະກິດທີ່ຫາກໍພົ້ນເດັ່ນຂຶ້ນຄື: ຈີນ, ອີນເດຍ…ຕາມການສະຖີຕິໃນມໍ່ໆມານີ້, ໃນ 3 ປີຢ່າງຕໍ່ເນື່ອງ, ອາຊຽນໄດ້ດຶງດູດເງິນລົງທຶນໂດຍກົງຈາກຕ່າງປະເທດ FDI ເປັນຈຳນວນຫຼວງຫຼາຍ ໃນສະພາວະທີ່ກະແສທຶນ FDIໃນທົ່ວໂລກຫຼຸດລົງ ແລະ ການເຕີບໂຕເສດຖະກິດທົ່ວໂລກບໍ່ສະໝ່ຳສະເໝີ. ປະຈຸບັນ, ອາຊຽນໄດ້ກາຍເປັນພາກພື້ນດຶງດູດທຶນ FDI ຫຼາຍກວ່າໝູ່ໃນໂລກ. ການປົວແປງສະພາບແວດລ້ອມແຫ່ງການລົງທຶນຂອງພາກພື້ນ ກໍຄືວິວັດທະນາການເຊື່ອມໂຍງຂອງອາຊຽນເພື່ອກ້າວໄປເຖິງການສ້າງຕັ້ງເປັນປະຊາຄົມອາຊຽນໃນປະຈຸບັນໄດ້ປະກອບສ່ວນສ້າງຄວາມດູດດື່ມຂອງອາຊຽນທີ່ມີຕໍ່ທຶນ FDI .
ແຕ່ພ້ອມກັນນັ້ນ, ໃນປະຈຸບັນ, ອາຊຽນຍັງສະແດງໃຫ້ເຫັນສິ່ງທີ່ຍັງຄົງຄ້າງຫຼາຍຢ່າງ. ສິ່ງທີ່ຄົງຄ້າງຢ່າງໃຫຍ່ຫຼວງກວ່າໝູ່ແມ່ນຄວາມແຕກໂຕນທາງດ້ານຄວາມຮູ້ລະຫວ່າງ 2 ກຸ່ມປະເທດອາຊຽນ. ຕາມບັນດານັກໄຈ້ແຍກແລ້ວ, ສິ່ງນີ້ອາດຈະເຮັດໃຫ້ວິວັດການສ້າງຕັ້ງເຂດການຄ້າເສລີຂອງພາກພື້ນຊັກຊ້າລົງ ແລະ ຈະປະສົບກັບຄວາມຫຍຸ້ງຍາກຫຼາຍຢ່າງໃນການປະຕິບັດບັນດາຄຳໝັ້ນສັນຍາກັບບັນດາຄູ່ຮ່ວມມືພາຍນອກ. ນອກຈາກນັ້ນ, ການສົມທົບຢ່າງກົມກ່ຽວລະຫວ່າງຜົນປະໂຫຍດແຫ່ງຊາດກັບຜົນປະໂຫຍດລວມຂອງທັງກຸ່ມອາຊຽນ ກໍແມ່ນສິ່ງທີ່ຍັງຄົງຄ້າງບໍ່ໜ້ອຍ.
ກຽມພ້ອມເຊື່ອມໂຍງເຂົ້າກັບທົ່ວໂລກ
ໂດຍໄດ້ຮັບຮູ້ກ່ຽວກັບບັນດາສິ່ງທ້າທາຍພ້ອມກັບກາລະໂອກາດໃຫຍ່ຊຶ່ງປະຊາຄົມອາຊຽນນຳມາໃຫ້ນັ້ນ, ບັນດາປະເທດສະມາຊິກອາຊຽນ ກໍຍັງຜັນຂະຫຍາຍຫຼາຍມາດຕະການລະອຽດ, ເໝາະສົມກັບສະພາບການ ແລະ ເງື່ອນໄຂຂອງແຕ່ລະປະເທດເພື່ອສາມາດເສີມຂະຫຍາຍທ່າແຮງຂອງຕົນເມື່ອໄດ້ເຊື່ອມຕົວເຂົ້າກັບປະຊາຄົມທີ່ໃຫຍ່ກວ່າ. ຍົກຕົວຢ່າງຄື ສິງກະໂປເຊີດຊູບົດບາດຂອງສູນຄົ້ນຄ້ວາ, ປະຊາຄົມວິສາຫະກິດ, ມຽນມາ ແລະ ຟີລິບປິນເອົາໃຈໃສ່ໜູນຊ່ວຍວິສາຫະກິດຂະໜາດກາງ ແລະ ນ້ອຍ. ໃນຂະນະນັ້ນ, ໄທຍັງພວມຍູ້ແຮງການປະຕິຮູບລະບົບພື້ນຖານໂຄງລ່າງບໍລິການ, ການຄ້າ ແລະ ການລົງທຶນ, ປະຕິບັດໂຄງການ “ ປະຕູດຽວແຫ່ງຊາດ ”, “ປະຕູດຽວອາຊຽນ” ຢ່າງມີປະສິດທິຜົນ, ພັດທະນາຕາຫນ່າງໜູນຊ່ວຍສັງຄົມ. ສ່ວນກຳປູເຈຍ ກໍສຸມໃສ່ພັດທະນານະໂຍບາຍການຄ້າເປີດປະຕູເພື່ອດຶງດູດເງິນລົງທຶນ, ໂຍະຍານກົດໝາຍວ່າດ້ວຍການລົງທຶນ ແລະ ກົດໝາຍວ່າດ້ວຍກຳມະສິດ. ສຳລັບຫວຽດນາມນັ້ນ, ກໍເພີີ່ມທະວີສ້າງເງື່ອນໄຂອຳນວຍຄວາມສະດວກໃຫ້ການຄ້າໂດຍຜ່ານການຜັນຂະຫຍາຍລະບົບພາສີເອເລັກໂຕນິກ, ກົນໄກປະຕູດຽວ, ປະຕິຮູບລະບຽບການບໍລິຫານ, ເຮັດໃຫ້ລະບົບອອກໜັງສືອະນຸຍາດ, ໜັງສືຢັ້ງຢືນເປັນງ່າຍດາຍ, ມຸ່ງໄປສູ່ການສ້າງການບໍລິການເປັນເສລີ. ຫວຽດນາມກໍໄດ້ດຳເນີນການປັບປຸງກົດໝາຍບາງສະບັບທີ່ກ່ຽວຂ້ອງເຊັ່ນ: ກົດໝາຍວ່າດ້ວຍການລົງທຶນ, ກົດໝາຍວ່າດ້ວຍການຄ້າ, ກົດໝາຍວ່າດ້ວຍວິສາຫະກິດ ເພື່ອໃຫ້ສອດຄ່ອງກັບບັນດາຄຳໝັ້ນສັນຍາໃນອາຊຽນ.
ພ້ອມກັບຄວາມມານະພະຍາຍາມຂອງແຕ່ລະປະເທດສະມາຊິກ, ຄະນະເລຂາອາຊຽນໄດ້ສ້າງແຜນການລະອຽດໃຫ້ແກ່ ປະຊາຄົມເສດຖະກິດອາຊຽນ. ການກະກຽມທັງໝົດເຫຼົ່ານັ້ນແມ່ນເພື່ອຮັບປະກັນໃຫ້ປະຊາຄົມອາຊຽນເຄື່ອນໄຫວໄດ້ຕາມແຜນການ, ມີປະສິດທິຜົນ, ນຳມາເຊິ່ງບັນດາຜົນປະໂຫຍດອັນແທດຈິງໃຫ້ແກ່ທັງກຸ່ມອາຊຽນເວົ້າລວມ ແລະ ແຕ່ລະປະເທດສະມາຊິກເວົ້າສະເພາະ ພ້ອມນັ້ນນັ້ນກໍປະກອບສ່ວນເຂົ້າໃນການພັດທະນາ, ຄວາມວັດທະນາຖາວອນຂອງທົ່ວໂລກ.