(vovworld) - ວັນທີ 5/6,ປະທານນາທິບໍດີລັດເຊຍ Vladimir Putin ເລີ່ມຕົ້ນການຢ້ຽມຢາມຈີນເປັນເວລາ 3 ວັນ, ພ້ອມທັງເຂົ້າຮ່ວມກອງປະຊຸມສຸດຍອດບັນດາປະເທດສະມາຊິກອົງການຮ່ວມມືຊຽງໄຮ້ຢູ່ປັກກິ່ງ (SCO) ຄັ້ງທີ 12. ນີ້ແມ່ນການຢ້ຽມຢາມຈີນຄັ້ງທຳອິດໃນອະຍຸການເປັນປະທານາທິບໍດີເທື່ອທີ 3 ຂອງທ່ານ Putin, ນີ້ກໍ່ແມ່ນເຫດການສຳຄັນຍິ່ງໃນການພົວພັນລະຫວ່າງລັດເຊຍ - ຈີນ ໃນປີນີ້. ຄາດວ່າ, ສອງຝ່າຍຈະອອກຖະແຫຼງການຮ່ວມ ແລະ ລົງນາມໃນເອກະສານຮ່ວມມືຈຳນວນໜຶ່ງ.
ທ່ານປະທານປະເທດຈີນຫູຈິນເທົາ ແລະ ທ່ານປະທານາທິບໍດີລັດເຊຍ Vladimir Putin
(ພາບ: vietinfo.eu)
ໃນການຢ້ຽມຢາມ, ປະທານນາທິບໍດີລັດເຊຍ Vladimir Putin ຈະມີການພົບປະເຈລະຈາສອງຝ່າຍກັບທ່ານປະທານປະເທດຈີນ ຫູຈີນທ່າວ, ພົບປະກັບປະທານສະພາແຫ່ງຊາດ ອູປາງກົ້ວ, ທ່ານນາຍົກລັດຖະມົນຕີ ເວີນເຈຍປ້າວ ເພື່ອປຶກສາຫາລືຫຼາຍບັນຫາສາກົນອັນຮີບດ່ວນ, ໃນນັ້ນມີແງ່ຫວັງສົມທົບກັນເຄື່ອນໄຫວລະຫວ່າງລັດເຊຍ - ຈີນ ໃນຂອບເຂດສະຫະປະຊາຊາດ, ກຸ່ມບັນດາພື້ນຖານເສດຖະກິດພັດທະນາ ແລະ ຫາກໍ່ພົ້ນເດັ່ນຂຶ້ນ (G – 20), ເວທີປາໄສຮ່ວມມືເສດຖະກິດອາຊີ - ປາຊີຝິກ (APEC), ອົງການຮ່ວມມືຊຽງໄຮ້ (SCO), ແລກປ່ຽນຄວາມເຫັນກ່ຽວກັບສະພາບການຢູ່ແຫຼມເກົາຫຼີ ແລະ ຕາເວັນອອກກາງ ກໍ່ຄືໂຄງການນິວຄະເລຍຂອງອີຮານ. ກ່ອນການຢ້ຽມຢາມ, ທ່ານລັດຖະມົນຕີຊ່ວຍວ່າການກະຊວງການຕ່າງປະເທດຈີນ ເຈິງກົວຜິງ ໄດ້ສະແດງຄວາມຫວັງວ່າໃນການພົບປະເຈລະຈາສອງຝ່າຍ, ການນຳສອງປະເທດຈະບັນລຸໄດ້ຄວາມຮັບຮູ້ລວມກ່ຽວກັບການຮ່ວມມືໃນຂົງເຂດຕ່າງໆ, ໂດຍສະເພາະແມ່ນບາງຂົງເຂດໃຫຍ່ທີ່ມີຄວາມໝາຍຍຸດທະສາດ.
ນອກນັ້ນ, ຕາມບັນດານັກໄຈ້ແຍກແລ້ວ, ການຮ່ວມມືທາງດ້ານເສດຖະກິດກໍ່ແມ່ນໜຶ່ງໃນບັນດາແງ່ມູມທີ່ໄດ້ຮັບຄວາມເອົາໃຈໃສ່ເປັນພິເສດໃນການຢ້ຽມຢາມທີ່ແກ່ຍາວໃນເວລາ 3 ວັນ ຂອງປະທານາທິບໍດີ ລັດເຊຍ, ພິເສດແມ່ນຂົງເຂດພະລັງງານ ຂະນະທີ່ລັດເຊຍພວມຊອກຫາບັນດາຕະຫຼາດໃໝ່. ສ່ວນຈີນ ພັດຢາກມີບັນດາແຫຼ່ງຊັບພະຍາກອນທີ່ມີລາຄາຖືກ. ເບິ່ງຄືວ່າສອງຝ່າຍໄດ້ມີການກະກຽມລະອຽດພໍສົມຄວນເພື່ອສາມາດບັນລຸໄດ້ຂໍ້ຕົກລົງຮ່ວມມືໃນການຢ້ຽມຢາມເມື່ອວັນທີ 1/6, ທ່ານຮອງນາຍົກລັດຖະມົນຕີຈີນ ຫວາງຈີຊານ ແລະ ທ່ານຮອງນາຍົກລັດຖະມົນຕີ ລັດເຊຍ Dvorkovich ໄດ້ປຶກສາຫາລືກ່ຽວກັບບັນຫາກໍ່ສ້າງທໍ່ສົ່ງອາຍແກັດ. ກ່ອນໜ້ານັ້ນ, ການນຳບໍລິສັດພະລັງງານ Gazprom ຂອງລັດເຊຍ ໄດ້ມີການເຈລະຈາກັບຝ່າຍຈີນ ເພື່ອແນໃສ່ແກ້ໄຄຂຄວາມບໍ່ລົງລອຍກັນທີ່ກ່ຽວຂ້ອງເຖິງລາຄາອາຍແກັດລະຫວ່າງສອງຝ່າຍ. ນອກນັ້ນ, ບັນດາພາຫະນະສື່ມວນຊົນຂອງລັດເຊຍກໍ່ໃຫ້ຮູ້ວ່າ ສອງປະເທດພວມກະກຽມເລີ່ມຕົ້ນໂຄງການການບິນ ເພື່ອແນໃສ່ພັດທະນາເຮືອບິນຂົນສົ່ງຜູ້ໂດຍສານໄລຍະໄກ. ສອງຝ່າຍກໍ່ມີແຜນນະໂຍບາຍຊຸກຍູ້ການລົງທຶນແລະພັດທະນາການຮ່ວມມືຢ່າງຄົບຊຸດໃນບັນດາຂົງເຂດວິທະຍາສາດ - ເຕັກນິກ, ການປະດິດສ້າງ. ຕັດສິນໃຈເພີ່ມທະວີການພົວພັນຄູ່ຮ່ວມມືຍຸດທະສາດທີ່ໄວ້ເນື້ອເຊື່ອໃຈ ແລະ ຮອບດ້ານ ເຊິ່ງຄາດຄະເນວ່າ ສອງຝ່າຍຈະຫັນເປັນລະອຽດ ດ້ວຍຖະແຫຼງການຮ່ວມລັດເຊຍ - ຈີນ, ພ້ອມກັນນັ້ນແມ່ນ ເອກະສານຮ່ວມມືໃນຫຼາຍຂົງເຂດ 17 ສະບັບ. ອາດເວົ້າໄດ້ວ່າ, ການກະທຳທັງໝົດເຫຼົ່ານັ້ນ, ຈະຊ່ວຍໃຫ້ສອງຝ່າຍຍົກວົງເງິນແລກປ່ຽນສິນຄ້າ ເຊິ່ງປະຈຸບັນພວມຢູ່ໃນລະດັບ 80 ຕື້ USD/ປີ, ຂຶ້ນເຖິງ 100 ຕື້USD ໃນປີ 2015 ແລະ 200 ຕື້USDໃນປີ 2020.
ຄະນະຜູ້ແທນຂັ້ນສູງຈີນ ແລະ ລັດເຊຍພົບປະເຈລະຈານຳກັນ
|
ຕາມບັນດານັກໄຈ້ແຍກແລ້ວ, ເລື່ອງນຳຈີນ ເຂົ້າໃນບັນຊີລາຍຊື່ບັນດາປະເທດທຳອິດທີ່ທ່ານປະທານາທິບໍດີ Putin ມາຢ້ຽມຢາມ ພາຍຫຼັງໄດ້ຮັບຕຳ່ແໜ່ງນັ້ນ ໄດ້ເປັນການສະແດງໃຫ້ເຫັນວ່າລັດເຊຍຖືການພັດທະນາສາຍພົວພັນກັບຈີນເປັນສຳຄັນ, ພ້ອມທັງສະແດງໃຫ້ເຫັນຄວາມໝັ້ນຄົງໃນນະໂຍບາຍການຕ່າງປະເທດຂອງສະພະພັນລັດເຊຍ. ການຢ້ຽມຢາມຈີນຂອງປະທານາທິບໍດີ Putin ກໍ່ສອດຄ່ອງກັບບັນດາຖະແຫຼງ ການເຊິ່ງທ່ານໄດ້ຍົກອອກມາກ່ອນນັ້ນ. ໃນບົດໜັງສືພິມທີ່ລົງພິມເມື່ອເດືອນ 2 ຜ່ານມາດ້ວຍຫົວຂໍ້ວ່າ ”ລັດເຊຍ ແລະ ໂລກພວມມີການປ່ຽນແປງ”, ທ່ານປະທານິບໍດີ Putin ໄດ້ຈັດຈີນເປັນໜຶ່ງໃນບັນດາປະເທດຢູ່ພາກພື້ນອາຊີ - ປາຊີຝິກທີ່ໄດ້ຮັບບຸລິມະສິດໃນນະໂຍບາຍການຕ່າງປະເທດຂອງມົດສະກູ. ທ່ານຖືວ່າ ການພັດທະນາຂອງຈີນ ແມ່ນໂອກາດອັນໃຫຍ່ຫລວງ ສຳລັບລັດເຊຍ. ຍິ່ງກວ່ານັ້ນ, ລັດເຊຍກໍ່ພວມຕ້ອງການຈີນໃຫ້ການປະສານສົມທົບນຳກັນໃນເລື່ອງແກ້ໄຂບັນດາບັນຫາສາກົນ ກໍ່ຄືໃນຄວາມມານະພະຍາຍາມກໍ່ສ້າງໂລກຫຼາຍຂົ້ວ. ສ່ວນຕາມຜູ້ຊ່ຽວຊານກ່ຽວກັບຈີນ ສັງກັດສະຖາບັນ ວິທະຍາສາດລັດເຊຍ Georgy Kunadze ແລ້ວ, ການຢ້ຽມຢາມປັກກິ່ງຄັ້ງນີ້ໄດ້ສະແດງໃຫ້ເຫັນການກຳນົດທິດໃນນະໂຍບາຍການຕ່າງປະເທດຂອງ ມົດສະກູ.
ການພົວພັນລະຫວ່າງມົດສະກູ - ປັກກິ່ງໃນ 8 ປີ ທີ່ທ່ານ Putin ເປັນປະທານາທິບໍດີ ແລະ 4 ປີ ທີ່ເປັນນາຍົກໆ ຍັງສະໜິດຕິດພັນຢູ່. ແລະ ການຢ້ຽມຢາມຈີນຄັ້ງນີ້ຂອງປະທານາທິບໍດີ Putin ຈະສືບຕໍ່ສະແດງ ໃຫ້ເຫັນທ່າອ່ຽງນີ້ຢ່າງຈະແຈ້ງ, ເພື່ອແນໃສ່ເພີ່ມທະວີການພົວພັນຄູ່ຮ່ວມມື ຍຸດທະສາດທີ່ໄວ້ເນື້ອເຊື່ອໃຈ ແລະ ຮອບດ້ານລະຫວ່າງລັດເຊຍ - ຈີນ.