(vovworld)- ວັນທີ 5/5, ທ່ານນາຍົກລັດຖະມົນຕີແຫ່ງລັດ ຄູເວດ Sheikh Jaber Mubarak Al Hamad Al Sabad ເລີ່ມຕົ້ນການຢ້ຽມຢາມຫວຽດນາມ ຢ່າງເປັນທາງການໃນເວລາ 3 ວັນ. ການຢ້ຽມຢາມ ແນໃສ່ຊຸກຍູ້ການພົວພັນຮ່ວມມືມິດຕະພາບລະຫວ່າງສອງປະເທດໃນຫລາຍຂົງເຂດ, ພິເສດແມ່ນດ້ານການຄ້າ, ນ້ຳມັນອາຍແກສ, ແຮງງານ, ກະສິກຳ, ການທ່ອງທ່ຽວ.
ທ່ານນາຍົກລັດຖະມົນຕີແຫ່ງລັດ ຄູເວດ Sheikh Jaber Mubarak Al Hamad Al Sabad
ພາບ:TTXVN
|
ກ່ອນນີ້ ກວ່າ 40 ປີ, ວັນທີ 10/1/1976, ຫວຽດນາມ ແລະ ຄູເວດ ໄດ້ສ້າງຕັ້ງການພົວພັນທາງການທູດ. ຄູເວດ ແມ່ນຫນຶ່ງໃນບັນດາປະເທດທຳອິດຢູ່ ຕາເວັນອອກກາງ ສ້າງຕັ້ງການພົວພັນທາງການທູດກັບຫວຽດນາມ, ພາຍຫລັງຫວຽດນາມທ້ອນໂຮມປະເທດຊາດເປັນເອກະພາບ. ຄູເວດ ກໍແມ່ນປະເທດທຳອິດໃນຈຳນວນບັນດາປະເທດສະພາຮ່ວມມືເຂດອ່າວ (GCC) ເປີດສະຖານທູດຢູ່ຮ່າໂນ້ຍ ແລະ ສະຖານກົງສູນຢູ່ ນະຄອນໂຮ່ຈິມີນ ເມື່ອປີ 2007.
ການພົວພັນຮ່ວມມືຢ່າງມີປະສິດທິຜົນ
ຫວຽດນາມ ແລະ ຄູເວດ ມີຈຸດທີ່ຄ້າຍຄືກັນ, ນັ້ນແມ່ນ ຄວາມມຸ້ງຫວັງກ່ຽວກັບເອກະລາດ,ເສລີພາບ ແລະ ສັນຕິພາບ. ປະຊາຊົນສອງປະເທດລ້ວນແຕ່ໄດ້ຜ່ານຜ່າການຕໍ່ສູ້ອັນຫຍຸ້ງຍາກລຳບາກເພື່ອບັນລຸຈຸດປະສົງອັນສູງສົ່ງຂອງຕົນ. ໃນໄລຍະຫຍູ້ງຍາກ, ລຳບາກນັ້ນ, ປະຊາຊົນຫວຽດນາມ ຍາມໃດກໍໄດ້ຮັບການຊ່ວຍເຫລືອອັນລ້ຳຄ່າ ແລະ ຄວາມສາມັກຄີຢ່າງແຮງຈາກລັດຖະບານ ແລະ ປະຊາຊົນ ຄູເວດ. ປະຊາຊົນຫວຽດນາມ ຍາມໃດກໍຈົດຈຳການຊ່ວຍເຫລືອ ແລະ ອາລົມຈິດນັ້ນ. ປະຈຸບັນ, ການພົວພັມມິດຕະພາບທີ່ເປັນມູນເຊື້ອລະຫວ່າງສອງປະເທດສືບຕໍ່ໄດ້ຮັບການພັດທະນາຢ່າງແຮງໃນຫລາຍຂົງເຂດ. ການນຳສອງປະເທດ ໄດ້ດຳເນີນບັນດາການຢ້ຽມຢາມສັນຖະວະໄມຕີເຊິ່ງກັນ ແລະກັນໃນຫລາຍປີຜ່ານມາ. ພິເສດ ການຢ້ຽມຢາມຫວຽດນາມຢ່າງເປັນທາງການຂອງທ່ານນາຍົກລັດຖະມົນຕີ ຄູເວດ Sheikh Nasser Al Mohammed Al Jaber Al Sabah ເມື່ອເດືອນ 5/2007 ແລະ ການຢ້ຽມຢາມ ຄູເວດ ຢ່າງເປັນທາງການຂອງທ່ານນາຍົກລັດຖະມົນຕີ ຫງວຽນເຕີນຢູງ ເມື່ອເດືອນ 3/2009 ເປັນຂີດໝາຍໃຫມ່ໃນປະຫວັດສາດແຫ່ງການພົວພັນລະຫວ່າງສອງປະເທດ.
ກ່ຽວກັບດ້ານເສດຖະກິດ, ສອງປະເທດໄດ້ມີບັນດາບາດກ້າວພັດທະນາຢ່າງຕັ້ງຫນ້າ. ກອງທຶນ ຄູເວດ ພັດທະນາເສດຖະກິດ ອາຣັບ ໄດ້ສະຫນອງແຫລ່ງທຶນໃຫ້ຫລາຍໂຄງການພັດທະນາຢູ່ຫວຽດນາມ ນັບແຕ່ປີ 1979. ຜ່ານກອງທຶນພັດທະນາເສດຖະກິດ ອາຣັບ (KFEAD), ມາຮອດປະຈຸບັນ ຄູເວດ ມີ 16 ໂຄງການ ODA ອຸປະຖຳບັນດາໂຄງການພັດທະນາກ່ຽວກັບຄົມມະນາຄົມ, ສາທາລະນະສຸກ, ການສຶກສາ, ຊົນລະປະທານ… ຢູ່ບັນດາເຂດຊົນນະບົດຂອງຫວຽດນາມ, ປະກອບສ່ວນປັບປຸງເງື່ອນໄຂດຳເນີນຊີວິດ, ການຜະລິດຂອງຊຸມຊົນຢູ່ເຂດໂຄງການຫລາຍສົມຄວນ. ໃນຊຸມປີຜ່ານມາ, ວົງເງິນສົ່ງອອກຂອງຫວຽດນາມ ເຂົ້າຕະຫລາດ ຄູເວດ ລ້ວນແຕ່ເພີ່ມຂຶ້ນ, ປີ 2015 ເພີ່ມຂຶ້ນ 20% ເມື່ອທຽບໃສ່ປີ 2014. ຫວຽດນາມ ຍາມໃດກໍໃນນອນຈຳນວນ 10 ປະເທດສົ່ງອອກຫລາຍສຸດເຂົ້າຕະຫລາດ ຄູເວດ. ສັນຍາກໍ່ສ້າງໂຮງງານກັ່ນນ້ຳມັນ ງີເຊີນ ໄດ້ຮັບການລົງນາມເມື່ອປີ 2008 ລະຫວ່າງ Petro Viet Nam, ກຸ່ມບໍລິສັດນ້ຳມັນອາຍແກສສາກົນ ຄູເວດ ແລະ ສອງຄູ່ຮ່ວມມືຂອງຍີ່ປຸ່ນ. ໂຮງງານປະສົມນ້ຳມັນແຫ່ງນີ້ໄດ້ຮັບການກໍ່ສ້າງຢູ່ ງີເຊີນ ແຂວງ ແທງຮວາ, ມີເງິນລົງທຶນປະມານ 10 ຕື້ USD. ໂຄງການດັ່ງກ່າວເລີ່ມລົງມືກໍ່ສ້າງເມື່ອເດືອນ 10/2013 ແລະ ຄາດວ່າຈະນຳເຂົ້າໃຊ້ການໃນທ້າຍປີ 2017. ເດືອນ 3/2016, ພະແນກແຜນການ ແລະ ການລົງທຶນນະຄອນ ຮ່າໂນ້ຍ ໄດ້ອອກຫນັງສືອະນຸຍາດລົງທຶນໃຫ້ໂຄງການຮ່ວມທຸລະກິດແຈກຢາຍຜະລິດຕະພັນລະຫວ່າງບໍລິສັດນ້ຳມັນອາຍແກສ ສາກົນ ຄູເວດ (KPI) ແລະ ບໍລິສັດ Idemitsu Kosan ຂອງຍີ່ປຸ່ນ ເພື່ອແຈກຢາຍບັນດາຜະລິດຕະພັນນ້ຳມັນອາຍແກສ ຢູ່ ຕະຫລາດ ຫວຽດນາມ.
ກ່ຽວກັບດ້ານການຄ້າ, ຫວຽດນາມ ສົ່ງອອກໄປຍັງຕະຫລາດ ຄູເວດ ບັນດາຜະລິດຕະພັນຄື: ເກີບ, ໂສ້ງເສື້ອ, ສິນໃນນ້ຳ, ຄອມພິວເຕີ, ເຄື່ອງເຟີນີເຈີ, ກາເຟ, ຊາ…. ຫວຽດນາມ ນຳເຂົ້າປະເພດສິນຄ້າຈາກ ຄູເວດ ນັ້ນແມ່ນ: ນ້ຳມັນ, ກະຊວນ, ເຄມີ, ຟຸ່ນເຄມີ, ອຸປະກອບຫນັງ… ພ້ອມກັບ ຜົນສຳເລັດໃນການຮ່ວມມືດ້ານເສດຖະກິດ, ການພັດທະນາຢ່າງຕັ້ງຫນ້າຈຳນວນຫນຶ່ງກໍໄດ້ຮັບການຮັບຮູ້ໃນການພົວພັນລະຫວ່າງສອງປະເທດ. ແຕ່ປີ 1996, ຫວຽດນາມ ເລີ່ມຕົ້ນສົ່ງຄົນງານໄປເຮັດວຽກຢູ່ ຄູເວດ. ປະຈຸບັນ ມີຄົນງານຫວຽດນາມ ປະມານ 600 ຄົນ ເຮັດວຽກໃນບັນດາຂົງເຂດຄື: ກໍ່ສ້າງ, ນ້ຳມັນອາຍແກສ. ກ່ຽວກັບການສຶກສາບຳລຸງສ້າງ, ແຕ່ລະປີ, ຄູເວດ ໄດ້ສະຫນອງທຶນສຶກສາດ້ານພາສາ ແລະ ທຶນສຶກສາຂະແຫນງອາຍແກສໃຫ້ຫວຽດນາມ. ມາຮອດປະຈຸບັນ, ມີ ນັກສຶກສາຫວຽດນາມ 16 ຄົນໄດ້ຮັບທຶນສຶກສາຮຽນພາສາ ອາຣັບ ຢູ່ ຄູເວດ.
ກ່ຽວກັບຂົງເຂດການທ່ອງທ່ຽວ, ນັບມື້ນັບມີນັກທ່ອງທ່ຽວ ຄູເວດ ຫລາຍຄົນ ໄດ້ມາຢ້ຽມຢາມ ຫວຽດນາມ ໃນໂອກາດວັນພັກການ ຫລືທ່ອງທ່ຽວທຸກປີ ແລະ ຖືຫວຽດນາມ ແມ່ນຈຸດນັດພົບທີ່ເຂົາເຈົ້ານິຍົມ. ຫວຽດນາມ ແມ່ນປະເທດທີ 37 ທີ່ພົນລະເມືອງສາມາດຮັບວິຊາຢູ່ສະຫນາມບິນສາກົນ ຄູເວດ. ສອງຝ່າຍກໍໄດ້ລົງນາມ ໃນສັນຍາ, ຂໍ້ຕົກລົງບາງສະບັບຄື: ສັນຍາແມ່ການຮ່ວມມືດ້ານເສດຖະກິດ, ວິທະຍາສາດ, ເຕັກນິກ; ສັນຍາການຄ້າ, ສັນຍາຂົນສົ່ງທາງອາກາດ, ອະນຸສັນຍາ ການຮ່ວມມືລະຫວ່າງສອງກະຊວງການຕ່າງປະເທດ, ອະນຸສັນຍາກ່ຽວກັບການສ້າງຕັ້ງຄະນະກຳມະການປະສົມ, ສັນຍາສົ່ງເສີມ ແລະ ອາລັກຂາການລົງທຶນ, ສັນຍາການຮ່ວມມືລະຫວ່າງສອງຫ້ອງການການຄ້າ ແລະ ອຸດສາຫະກຳ, ສັນຍາຫລີກລ້ຽງການເສຍພາສີຊ້ອນ, ສັນຍາຍົກເວັ້ນວິຊາໃຫ້ຜູ້ຖືຫນັງສືຜ່ານແດນການທູດ ແລະ ລັດຖະການ. ເປັນຫນ້າສົນໃຈ, ເດືອນ 2/2016, ລັດຖະບານ ຄູເວດ ໄດ້ຮັບຮອງພື້ນຖານເສດຖະກິດການຕະຫລາດຂອງຫວຽດນາມ ຢ່າງເປັນທາງການ.
ຊຸກຍູ້ການພົວພັນມິດຕະພາບທີ່ເປັນມູນເຊື້ອ
ໃນໄລຍະກວ່າ 40 ປີຜ່ານມາ, ຫວຽດນາມ ແລະ ຄູເວດ ຍາມໃດກໍສະຫນັບສະຫນູນເຊິ່ງກັນ ແລະກັນໃນບັນດາເວທີປາໄສສາກົນ ແລະ ພາກພື້ນ. ການຢ້ຽມຢາມຫວຽດນາມ ຄັ້ງນີ້ ຂອງ ທ່ານນາຍົກລັດຖະມົນຕີແຫ່ງລັດ ຄູເວດ Sheikh Jaber Mubarak Al Hamad Al Sabad ແມ່ນໂອກາດເພື່ອໃຫ້ສອງຝ່າຍແລກປ່ຽນກ່ຽວກັບບັນດາບັນຫາສາກົນ ແລະ ພາກພື້ນ ຊື່ງຕ່າງຝ່າຍຕ່າງມີຄວາມສົນໃຈ. ຕ້ອນຮັບ ທ່ານນາຍົກລັດຖະມົນຕີແຫ່ງລັດ ຄູເວດ Sheikh Jaber Mubarak Al Hamad Al Sabad ກໍແມ່ນໂອກາດເພື່ອໃຫ້ຫວຽດນາມ ສະແດງໃຫ້ເຫັນຄວາມຖືເປັນສຳຄັນບົດບາດ, ທີ່ຕັ້ງຂອງຄູເວດໃນການພົວພັນມິດຕະພາບການຮ່ວມມືຂອງຫວຽດນາມ ຢູ່ ຕາເວັນອອກກາງ ແລະ ເຂດອ່າວ. ການຢ້ຽມຢາມຈະແມ່ນຂີດໝາຍເປີດບາດກ້າວພັດທະນາໃຫມ່ໃນການພົວພັນຮ່ວມມືມິດຕະພາບລະຫວ່າງສອງປະເທດ.