ທ່ານນາຍົກລັດຖະມົນຕີຫວຽດນາມ Nguyen Tan Dung ເຂົ້າຮ່ວມກອງປະຊຸມສຸດຍອດແມ່ຂອງ-ຍີປຸ່ນ ຄັ້ງທີ່ 3 ຊຶ່ງຖືກຈັດຂຶ້ນຢູ່ Bali, Indonesia
(ພາບ: nguyentandung.vn )
|
ໂດຍຮັບຄຳເຊີນຈາກທ່ານນາຍົກລັດຖະມົນຕີຍີປຸ່ນ Noda Yoshiko, ທ່ານນາຍົກລັດຖະມົນຕີຫວຽດນາມ Nguyen Tan Dung ໄດ້ນຳໜ້າຄະນະຜູ້ແທນເຂົ້າຮ່ວມກອງປະຊຸມສຸດຍອດແມ່ຂອງ-ຍີປຸ່ນ ຄັ້ງທີ່ 4 ຊຶ່ງຖືກຈັດຂຶ້ນຢູ່ Tokyo ໃນວັນທີ 20 ແລະ 21 ເມສາ. ໃນການເຂົ້າຮ່ວມກອງປະຊຸມຄັ້ງນີ້, ຫວຽດນາມຢາກຢືກຢັນຄວາມຕັດສິນໃຈພ້ອມກັບບັນດາປະເທດອະນຸພາກພື້ນແມ່ນ້ຳຂອງ ແລະ ຍີປຸ່ນ ຊຸກຍູ້ການຮ່ວມມືເພື່ອຄວາມວັດທະນາຖາວອນ ແລະ ສະຖຽນລະພາບ, ການພັດທະນາແບບຍືນຍົງໃນພາກພື້ນແມ່ນ້ຳຂອງເວົ້າສະເພາະ ແລະ ອາຊີຕາເວັນອອກເວົ້າລວມ, ພ້ອມກັນນັ້ນກໍແມ່ນໂອກາດເພື່ອຊຸກຍູ້ການພົວພັນຄູ່ຮ່ວມມືຍຸດທະສາດກັບຍີປຸ່ນເຂົ້າສູ່ຕົວຈິງ ແລະ ມີປະສິດທິຜົນກ່ວາ.
ເຂົ້າຮ່ວມ ຮ່ວມກອງປະຊຸມສຸດຍອດແມ່ຂອງ-ຍີປຸ່ນ ຄັ້ງທີ່ 4, ທ່ານນາຍົກ ລັດຖະມົນຕີຫວຽດນາມ Nguyen Tan Dung ພ້ອມກັບ ນາຍົກ ລັດຖະມົນຕີຍີປຸ່ນ, ນາຍົກລັດຖະມົນຕີ ກຳປູເຈຍ, ນາຍົກລັດຖະມົນຕີ ລາວ, ນາຍົກລັດຖະມົນຕີ ມຽນມາ ແລະ ນາຍົກລັດຖະມົນຕີໄທ ຢືນຢັນຄວາມຕັດສິນໃຈຂອງບັນດາປະເທດອະນຸພາກພື້ນແມ່ນ້ຳຂອງ ແລະ ຍີປຸ່ນ ໃນການຊຸກຍູ້ການຮ່ວມມືເພື່ອຄວາມວັດທະນາຖາວອນ ແລະ ສະຖຽນລະພາບ, ການພັດທະນາແບບຍືນຍົງໃນພາກພື້ນແມ່ນ້ຳຂອງເວົ້າສະເພາະ ແລະ ອາຊີຕາເວັນອອກເວົ້າລວມ. ຄາດຄະເນວ່າ ມີ 3 ເນື້ອໃນຖືກນຳມາແລກປ່ຽນທີ່ກອງປະຊຸມຄັ້ງນີ້ ຊຶ່ງລວມມີການສຳຫຼວດກວດຄືນການປະຕິບັດໂຄງການດຳເນີນງານ 63, ຂໍ້ລິເລີ່ີມຮ່ວມມືເສດຖະກິດ - ອຸດສາຫະກຳ ແລະ ຂໍ້ລິເລີ່ມທົດສະວັດແມ່ຂອງຂຽວ. ກອງປະຊຸມຍັງປຶກສາຫາລືບັນດາທິດທາງ ແລະ ມາດຕະການຊຸກຍູ້ການຮ່ວມມືແມ່ຂອງ-ຍີປຸ່ນໃຫ້ແກ່ໄລຍະ 2013-2015. ທີ່ກອງປະຊຸມ, ຄາດວ່າ ບັນດາການນຳຈະຮັບຮອງເອົາຍຸດທະສາດ Tokyo ເພື່ອເປັນພື້ນຖານໃຫ້ແກ່ການພົວພັນ ແມ່ຂອງ-ຍີປຸ່ນ ໄລຍະໃໝ່ ດ້ວຍຈຸດໃຈກາງແມ່ນຊຸກຍູ້ລັກສະນະເຊື່ອມຕໍ່ກັນໃນອະນຸພາກພື້ນແມ່ນ້ຳຂອງ, ຮ່ວມມືເພື່ອພ້ອມກັນພັດທະນາລະຫວ່າງບັນດາປະເທດແມ່ນ້ຳຂອງ ແລະ ຍີປຸ່ນ, ຮ່ວມມືເພື່ອຮັບປະກັນຄວາມປອດໄພຂອງມະນຸດ ແລະ ປົກປັກຮັກສາສິ່ງແວດລ້ອມ, ປຶກສາຫາລືບັນດາບັນຫາພາກພື້ນ ແລະ ສາກົນ.
ໂດຍມີການເຂົ້າຮ່ວມຢ່າງຕັ້ງໜ້າໃນການເຄື່ອນໄຫວຂອງກົນໄກຮ່ວມມື ແມ່ຂອງ-ຍີປຸ່ນນັບຕັ້ງແຕ່ກົນໄກນີ້ໄດ້ຮັບການສ້າງຂຶ້ນມື້ທຳອິດປີ 2007, ຫວຽດນາມໄດ້ມີການປະກອບສ່ວນຫຼາຍຢ່າງທີ່ສຳຄັນ. ມີຫຼາຍໂຄງການໄດ້ຮັບການຜັນຂະຫຍາຍໃນຂອບເຂດຮ່ວມມື ແມ່ຂອງ-ຍີປຸ່ນ, ຊຶ່ງພົ້ນເດັ່ນແມ່ນໂຄງການກໍ່ສ້າງທ່າກຳປັ່ນນ້ຳເລິກ Lach Huyen – Hai phong , ໂຄງການກໍ່ສ້າງສູນບຳລຸງສ້າງວິຊາຊີບ ແມ່ຂອງ-ຍີປຸ່ນ, ໂຄງການສ້າງຕັ້ງສູນບຳລຸງສ້າງ Logistics ອະນຸພາກພື້ນຢູ່ຫວຽດນາມ, ໂຄງການຮ່ວມມືພາກພື້ນກ່ຽວກັບການຄຸ້ມຄອງຄວາມສ່ຽງໃນຂົງເຂດພາສີພາກພື້ນແມ່ນ້ຳຂອງ, ໂຄງການກໍ່ສ້າງບາງເສັ້ນທາງຄວາມໄວສູງ. ຫວຽດນາມຍັງແຕ່ງຕັ້ງພະນັກງານໜຸ່ມຫຼາຍຄົນເຂົ້າຮ່ວມລາຍການພົບປະແລກປ່ຽນປະຊາຊົນຢູ່ຍີປຸ່ນ, ປະກອບສ່ວນເພີ່ມທະວີຄວາມເຂົ້າອົກເຂົ້າໃຈຊຶ່ງກັນ ແລະ ກັນລະຫວ່າງຫວຽດນາມ ແລະ ຍີປຸ່ນ ແລະ ບັນດາປະເທດແມ່ນ້ຳຂອງອື່ນໆ. ໂດຍສືບຕໍ່ປະກອບສ່ວນຢ່າງຕັ້ງໜ້າໃຫ້ແກ່ກົນໄກຮ່ວມມື ແມ່ຂອງ-ຍີປຸ່ນ, ທີ່ກອງປະຊຸມຄັ້ງນີ້, ທ່ານນາຍົກລັດຖະມົນຕີຫວຽດນາມ Nguyen Tan Dung ຈະກ່າວປາໄສກ່ຽວກັບບັນດາທິດທາງຮ່ວມມື ແມ່ຂອງ-ຍີປຸ່ນໃນໄລຍະທີ່ຈະມາເຖິງກໍຄືຊີ້ໃຫ້ເຫັນບັນດາບຸລິມະສິດຂອງຫວຽດນາມໃນຂອບເຂດຮ່ວມມື ແມ່ຂອງ-ຍີປຸ່ນ, ໃນນັ້ນມີບັນຫາຄຸ້ມຄອງ ແລະ ນຳໃຊ້ແຫຼ່ງນ້ຳໃນແມ່ນ້ຳຂອງແບບຍືນຍົງ.
ເພື່ອແນໃສ່ເພີ່ມທະວີການການເຊື່ອມຕໍ່ໃນພາກພື້ນແມ່ນ້ຳຂອງຍິ່ງກ່ວາອີກນັ້ນ, ຄາດຄະເນວ່າ ທ່ານນາຍົກລັດຖະມົນຕີຫວຽດນາມ Nguyen Tan Dung ຈະຍົກອອກຂໍ່ລິເລີ່ມໃໝ່ກ່ຽວກັບການພັດທະນາລະບົບຂົນສົ່ງຫຼາຍຮູບແບບເພື່ອນຳໃຊ້ຕານ່າງແມ່ນ້ຳລຳເຊ, ປະສານສົມທົບ ແລະ ໜູນຊ່ວຍໃຫ້ແກ່ການຂົນສົ່ງທາງບົກ ແລະ ທາງທະເລ. ຂໍ້ລິເລີ່ມຈະນຳມາເຊິ່ງຫຼາຍຜົນປະໂຫຍດທີ່ສຳຄັນໃຫ້ແກ່ພາກພື້ນຄື: ຊ່ວຍຂຸດຄົ້ນລະບົບທາງບົກ, ແລວຄົມມະນາຄົມຢ່າງມີປະສິດທິຜົນກ່ວາເກົ່າ ແລະ ຫຼຸດຜ່ອນບັນດາຍານພາຫະນະຢູ່ຕາມເສັ້ນທາງຄົມມະນາຄົມຕົ້ນຕໍ່, ສ້າງເງື່ອນໄຂສະດວກແກ່ການທ່ອງທ່ຽວ, ການແລກປ່ຽນຄ້າຂາຍຈໍລະຈອນສິນຄ້າດ້ວຍການຫຼຸດຄ່າໃຊ້ຈາຍ ແລະ ເວລາຂົນສົ່ງ, ປະກອບສ່ວນປົກປັກຮັກສາສິ່ງແວດລ້ອມໂດຍຜ່ານການຫຼຸດຜ່ອນອາຍພິດຂອງຍານພາຫະນະໃນການສັນຈອນໄປມາ.
ເຂົ້າຮ່ວມກອງປະຊຸມຄັ້ງນີ້, ນອກຈາກຈຸດປະສົງສືບຕໍ່ຍູ້ແຮງການຮ່ວມມືແມ່ຂອງ-ຍີປຸ່ນ, ຢືນຢັນບົດບາດຂອງຫວຽດນາມໃນພາກພື້ນ ແລະ ໃນຂອບເຂດການຮ່ວມມືແມ່ຂອງ-ຍີປຸ່ນ, ປັບປຸງການພົວພັນກັບບັນດາປະເທດອະນຸພາກພື້ນແມ່ນ້ຳຂອງນັ້ນ, ຈຸດໝາຍຂອງຄະນະຜູ້ແທນຫວຽດ ນາມ ຍັງເພື່ອແນໃສ່ເພີ່ມທະວີການພົວພັນຄູ່ຮ່ວມມືຍຸດທະສາດ ຫວຽດນາມ-ຍີປຸ່ນ, ຊຸກຍູ້ຜັນຂະຫຍາຍບັນດາຂໍ້ຕົກລົງຂັ້ນສູງ ທີ່ໄດ້ບັນລຸມາໄດ້ລະຫວ່າງ 2 ປະເທດ. ໃນໄລຍະເຮັດວຽກຢູ່ຍີປຸ່ນ, ຄາດວ່າ ທ່ານນາຍົກລັດຖະມົນຕີຫວຽດນາມ Nguyen Tan Dung ຈະມີການເຈລະຈາ 2 ຝ່າຍກັບ ທ່ານນາຍົກລັດຖະມົນຕີຍີປຸ່ນ Noda Yoshiko, ກ່າວປາໄສຢູ່ສະໂມສອນສື່ມວນຊົນແຫ່ງຊາດຍີປຸ່ນ, ເຂົ້າຮ່ວມການເຄື່ອນໄຫວໂດຍພະບໍລົມວົງສານຸວົງ ຍີປຸ່ນຈັດຂຶ້ນ, ພົບປະກັບຜູ້ຕາງໜ້າ ສະຫະພັນເສດຖະກິດຍີປຸ່ນ ແລະ ຫ້ອງການການຄ້າ ແລະ ອຸດສາຫະກຳຍີປຸ່ນ ແລະ ອື່ນໆ.
ໂດຍຖືກດຳເນີນໃນສະພາວະແຫ່ງການພົວພັນຄູ່ຮ່ວມມືຍຸດທະສາດ ຫວຽດນາມ- ຍີປຸ່ນ, ການພົວພັນລະຫວ່າງຫວຽດນາມກັບບັນດາປະເທດໃນອະນຸພາກພື້ນແມ່ນ້ຳຂອງສືບຕໍ່ພັດທະນາຢ່າງເລິກເຊິ່ງກ້ວາງຂວາງ, ການເຂົ້າຮ່ວມກອງປະຊຸມຄັ້ງນີ້ ແມ່ນໂອກາດເພື່ອໃຫ້ຫວຽດນາມສະແດງໃຫ້ເຫັນບົດບາດເປັນສະມາຊິກທີ່ຕັ້ງໜ້າໃນກົນໄກຮ່ວມມື ແມ່ຂອງ-ຍີປຸ່ນ, ຍູ້ແຮງການພົວພັນກັບຍີປຸ່ນ ແລະ ບັນດາປະເທດໃນອະນຸພາກພື້ນແມ່ນ້ຳຂອງໃຫ້ຍິ່ງຂຶ້ນອີກ ເພື່ອຜົນປະໂຫຍດຂອງແຕ່ລະປະເທດ ແລະ ຂອງພາກພື້ນ.