(vovworld)- ເຖິງວ່າພື້ນຖານເສດຖະກິດຍັງປະສົບກັບຄວາມຫຍຸ້ງຍາກ, ຄົງຄ້າງ ແຕ່ບໍ່ສາມາດປະຕິເສດໄດ້ວ່າ ໃນ 9 ເດືອນຜ່ານມາ, ພື້ນຖານເສດຖະກິດຫວຽດນາມບັນລຸໄດ້ບັນດາຜົນງານທີ່ຕັ້ງຫນ້າໃນຫລາຍຂົງເຂດ. ນີ້ແມ່ນພື້ນຖານສຳຄັນ, ຊ່ວຍໃຫ້ ຫວຽດນາມສາມາດສຳເລັດບັນດາຄາດໝາຍການເຕີບໂຕເສດຖະກິດຢູ່ໃນລະດັບ 5,8% ໃນປີ 2014 ຄືດັ່ງສະພາແຫ່ງຊາດໄດ້ວາງອອກ. ເພື່ອບັນລຸໄດ້ໝາກຜົນດັ່ງກ່າວແມ່ນ ຍ້ອນມີຄວາມມານະພະຍາຍາມໃນການບໍລິຫານຂອງລັດຖະບານ, ບັນດາກະຊວງ, ຂະແຫນງການ, ຄວາມມານະພະຍາຍາມຂອງປະຊາຄົມວິສາຫະກິດ ແລະ ປະຊາຊົນ.
ພາບປະກອບ:internet
|
ຕີລາຄາສັງລວມກ່ຽວກັບສະພາບພື້ນຖານເສດຖະກິດໃນ 9 ເດືອນຜ່ານມາ, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ຢືນຢັນ: ສະພາບການເສດຖະກິດ ສັງຄົມ ນັບແຕ່ຕົ້ນປີມາຮອດປະຈຸບັນ ສືບຕໍ່ມີການຫັນປ່ຽນຢ່າງຕັ້ງຫນ້າ. ທ່າເຕີບໂຕ ເຫັນໄດ້ຊັດ ແລະ ສະໝ່ຳສະເຫມີກວ່າ. ບັນດາຄາດໝາຍຂອງແຜນການທີ່ວາງອອກລ້ວນແຕ່ບັນລຸໝາກຜົນຕັ້ງຫນ້າ. ຕາມນັ້ນແລ້ວ, ໃນ 15 ຄາດໝາຍໂດຍສະພາແຫ່ງຊາດມອບໃຫ້ ມີ 13 ຄາດໝາຍສາມາດບັນລຸໄດ້ ແລະ ລື່ນກາຍ, ໃນນັ້ນ ມີຄາດໝາຍຫນຶ່ງເກືອບບັນລຸໄດ້ ນັ້ນແມ່ນຄາດໝາຍແກ້ໄຂວຽກເຮັດງານທຳໃຫ້ແກ່ຄົນງານ 1,6 ລ້ານຄົນ ແລະ ອີກຄາດໝາຍຫນຶ່ງບໍ່ທັນບັນລຸໄດ້ ນັ້ນແມ່ນອັດຕາຄົນງານຜ່ານການບຳລຸງສ້າງ.
ບັນດາຂະແຫນງການ, ຂົງເຂດສ່ວນຫລາຍໃນພື້ນຖານເສດຖະກິດບັນລຸການເຕີບໂຕຢ່າງແຮງ
ພື້ນຖານເສດຖະກິດຫວຽດນາມ ສືບຕໍ່ຟື້ນຕົວໃນທຸກຂົງເຂດ, ຂະແຫນງຕົ້ນຕໍ. ການຈະເລີນເຕີບໂຕເສດຖະກິດໃນໄຕມາດ III ສູງກວ່າ 2 ໄຕມາດກ່ອນ ແລະ GDP ໃນ 9 ເດືອນຄາດວ່າບັນລຸ 5,62%, ສູງກວ່າໄລຍະດຽວກັນຂອງ 2 ປີຜ່ານມາ. ການຜະລິດອຸດສາຫະກຳ, ເປັນຕົ້ນແມ່ນອຸດສາຫະກຳປຸງແຕ່ງ, ການປະດິດສ້າງບັນລຸການເຕີບໂຕໃນລະດັບສູງກວ່າຫລາຍເມື່ອທຽບໃສ່ໄລຍະດຽວກັນຂອງປີກາຍ. ນັບແຕ່ຕົ້ນປີມາຮອດປະຈຸບັນ, ການຜະລິດອຸດສາຫະກຳເພີ່ມຂຶ້ນ 6,7%. ຄາດວ່າ ຕົວເລກນີ້ຈະບັນລຸ 7-7,2% ໃນໄລຍະຈະມາເຖິງ. ຂົງເຂດກະສິກຳແກ້ໄຂໄດ້ບັນດາການກະທົບຢ່າງຫຍໍ້ທໍ້ໂດຍໄພທຳມະຊາດ, ໂລກລະບານກໍ່ຂຶ້ນ ແລະ ບັນລຸລະດັບເຕີບໂຕສູງ. ຂົງເຂດບໍລິການສືບຕໍ່ພັດທະນາດີພໍສົມຄວນ. ໄພເງິນເຟີ້ໄດ້ຮັບການຄວບຄຸມ, ດັດຊະນີລາຄາໃຊ້ສອຍເພີ່ມຂຶ້ນຢູ່ໃນລະດັບຕ່ຳ, ລາຄາສິນຄ້າຢູ່ໃນທ້ອງຕະຫລາດເປັນປົກກະຕິ. ການຜະລິດດຳເນີນທຸລະກິດ ເຖິງວ່າຍັງປະສົບກັບຄວາມຫຍຸ້ງຍາກກໍຕາມ ແຕ່ຈຳນວນວິສາຫະກິດມີກຳໄລໄດ້ເພີ່ມຂຶ້ນຫລາຍ. ຈຳນວນວິສາຫະກິດ ຈົດທະບຽນສ້າງຕັ້ງໃຫມ່ ເຖິງວ່າຫລຸດລົງກໍຕາມ ແຕ່ທຶນຈົດທະບຽນພັດເພີ່ມຂຶ້ນ.
ການເຄື່ອນໄຫວດ້ານການຄ້າກໍເພີ່ມຂຶ້ນັບທັງຂອບຂະຫນາດ ແລະ ລະດັບການເຕີບໂຕ. ຕາມນັ້ນແລ້ວ, ຍອດວົງເງິນສົ່ງອອກສິນຄ້າໃນ 9 ເດືອນຜ່ານມາ ບັນລຸລະດັບເຕີບໂຕສູງກວ່າເມື່ອທຽບໃສ່ການນຳເຂົ້າ, ບັນລຸເກືອບ 110 ຕື້ USD, ເພີ່ມຂຶ້ນກວ່າ 14% ເມື່ອທຽບໃສ່ໄລຍະດຽວກັນຂອງປີກາຍ ແລະ ທັງປະເທດມີ 21ປະເພດສິນຄ້າສົ່ງອອກບັນລຸກວ່າ 1 ຕື້USD. ໃນຈຳນວນໝວດສິນຄ້າສົ່ງອອກ, ອຸດສາຫະກຳຜະລິດປຸງແຕ່ງກວມອັດຕາສ່ວນຫລາຍຂອງສິນຄ້າສົ່ງອອກໃນ 9 ເດືອນຜ່ານມາ. ໝາກຜົນນີ້ໄດ້ປະກອບສ່ວນສ້າງຄວາມດຸນດ່ຽງໃນການນຳເຂົ້າສົ່ງອອກສິນຄ້າ, ເພີ່ມລະດັບສະສົມເງິນຕາຕ່າງປະເທດຂອງຊາດ. ທ່ານນາຍົກລັດຖະມົນຕີ ຫງວຽນເຕີນຢູງ ຕີລາຄາວ່າ:
“ເສດຖະກິດພັດທະນາຢ່າງຈະແຈ້ງ, ນັບທັງຂົງເຂດກະສິກຳ, ອຸດສາຫະກຳ, ບໍລິການ ລ້ວນແຕ່ພັດທະນາຢ່າງສະໝ່ຳສະເຫມີ. ບັນດາກະຊວງ, ຂະແຫນງການ ລ້ວນແຕ່ໃຫ້ຂໍ້ສັງເກດວ່າ ຫວຽດນາມ ສາມາດບັນລຸລະດັບເຕີບໂຕ GDP 5,8% ໃນປີນີ້ມີ ໄດ້. ໃນທ່າພັດທະນານັ້ນ, ພວກເຮົາບໍ່ຢຸດຢູ່ນັ້ນ ຫາກຈະສືບຕໍ່ພະຍາຍາມ, ຖ້າບັນລຸໄດ້ການຈະເລີນເຕີບໂຕຢູ່ໃນລະດັບ 6% ພື້ນຖານເສດຖະກິດມະຫາພາກຈະໝັ້ນທ່ຽງ.”
ນອກນັ້ນ, ໃນ 9 ເດືອນຜ່ານມາ ມີລັດວິສາຫະກິດກວ່າ 90 ແຫ່ງໄດ້ຮັບການສັບຊ້ອນຄືນໃຫມ່, ເກືອບເທົ່າກັບທັງປີກາຍ. ຄາດວ່າ ຮອດທ້າຍປີ 2014 ຈະມີວິສາຫະກິດ 200 ແຫ່ງ ໄດ້ຮັບການເຊັນອະນຸມັດວິທີການຫັນເປັນຫຸ້ນສ່ວນ. ຄວາມຄືບຫນ້າໃນການຖອນແຫລ່ງທຶນຂອງບັນດາກຸ່ມບໍລິສັດ ແລະ ບໍລິສັດໃຫຍ່ແຫ່ງລັດ ກໍສູງກວ່າທົບ 4 ເທົ່າ ເມື່ອທຽບໃສ່ປີກາຍ.
ຕັ້ງຫນ້າແກ້ໄຂຫນີ້ເສຍ
ພ້ອມກັບບັນດາມາດຕະການແກ້ໄຂຫນີ້ເສຍຜ່ານບັນດາບໍລິສັດຄຸ້ມຄອງຊັບສົມບັດບັນດາອົງການສິນເຊື່ອຫວຽດນາມ (VAMC) ຫວຽດນາມ ພວມຜັນຂະຫຍາຍຫລາຍວິທີເພື່ອຍູ້ແຮງການແກ້ໄຂຫນີ້ເສຍ. ສ່ວນບັນດາອົງການສິນເຊື່ອໄດ້ເປັນເຈົ້າການ, ຕັ້ງຫນ້າເຂົ້າຮ່ວມການແກ້ໄຂຫນີ້ເສຍ, ສ້າງແຫລ່ງກຳລັງແກ້ໄຂຫນີ້ເສຍ ດ້ວຍວິທີເພີ່ມທະວີການຫັກເງິນເພື່ອສ້າງກອງທຶນຮັບມືກັບຄວາມສ່ຽງ. ນັບແຕ່ຕົ້ນປີມາຮອດເດືອນ 7/2014, ຈຳນວນເງິນສະສົມຊື່ງລະບົບທະນາຄານຫັກມາສ້າງກອງທຶນແມ່ນ 78.000 ຕື້ດົ່ງ. ບໍລິສັດ VAMC ຊື້ ຫນີ້ເສຍ ໄດ້ 47.000 ຕື້ດົ່ງຈາກ, ຄາດວ່າ ປີນີ້ ບໍລິສັດດັ່ງກ່າວຈະຊື້ ຫນີ້ເສຍ ໄດ້ 70.000 ຕື້ດົ່ງ.
ເຖິງວ່າ ພື້ນຖານເສດຖະກິດມີສັນຍານດີຂຶ້ນກໍຕາມ ແຕ່ເບິ່ງລວມແລ້ວ ຍັງມີບາງຂໍ້ຄົງຄ້າງຄວນປະຕິບັດໃຫ້ດີກວ່າໃນໄລຍະຈະມາເຖິງ ນັ້ນແມ່ນ ຄວາມຕ້ອງການຍັງຢູ່ໃນລະດັບຕ່ຳ, ການຜະລິດດຳເນີນທຸລະກິດຍັງປະສົບກັບຄວາມຫຍຸ້ງຍາກ, ຫນີ້ເສຍຍັງໃຫຍ່ຫລວງຢູ່, ບ້ວງຫນີ້ຂອງລັດເພີ່ມຂຶ້ນໄວ, ສະມັດຕະພາບການຜະລິດ, ກຳລັງແກ້ງແຍ້ງຂອງພື້ນຖານເສດຖະກິດບໍ່ທັນໄດ້ຮັບການຍົກຂຶ້ນສູງ. ສະນັ້ນ ໃນໄລຍະຈະມາເຖິງ, ຫວຽດນາມ ສືບຕໍ່ປະຕິບັດການສ້າງໂຄງປະກອບການລົງທຶນຂອງລັດ, ລັດວິສາຫະກິດ, ລະບົບທະນາຄານ ແລະ ກະສິກຳຄືນໃຫມ່ຢ່າງເປັນຈຸດສຸມ, ມີປະສິດທິຜົນ. ຕິດພັນກັບການກໍ່ສ້າງຊົນນະບົດໃຫມ່ ກ່ຽວກັບການສ້າງກົນໄກນະໂຍບາຍເພື່ອດຶງດູດແຫລ່ງເງິນລົງທຶນເຂົ້າໃນການຜະລິດດຳເນີນທຸລະກິດ, ທ່ານນາຍົກລັດຖະມົນຕີ ຫງວຽນເຕີນຢູງ ຢືນຢັນວ່າ:
“ປະຈຸບັນ ພວກເຮົາຊອກຫາທຸກວິທີເພື່ອດຶງດູດແຫລ່ງເງິນລົງທຶນ ແຫລ່ງກຳລັງພາຍໃນປະເທດ ແລະຕ່າງປະເທດ ເພ່ືອລົງທຶນເຂົ້າບໍລິການ, ອຸດສາຫະກຳ, ກະສິກຳ, ພື້ນຖານໂຄງລ່າງ. ກຳລັງຄວາມສາມາດຍັງໃຫຍ່ຫລວງຢູ່. ປະຈຸບັນ ຢາກພັດທະນາອຸດສາຫະກຳ, ກະສິກຳ ຂ້າພະເຈົ້າສະເຫນີບັນດາທ່ານຮອງນາຍົກລັດຖະມົນຕີ, ບັນດາລັດຖະມົນຕີ ຕ້ອງສ້າງກົນໄກ, ນະໂຍບາຍເພື່ອດຶງດູດແຫລ່ງກຳລັງ.”
ເລື່ອງພື້ນຖານເສດຖະກິດມີບັນດາສັນຍານຕັ້ງຫນ້າໃນ 9 ເດືອນຜ່ານມາ ແມ່ນການພິສູດໃຫ້ເຫັນປະສິດທິຜົນການບໍລິຫານຂອງລັດຖະບານຢ່າງຈະແຈ້ງກໍຄືບັນດາຄວາມມານະພະຍາຍາມຂອງປະຊາຄົມວິສາຫະກິດ ແລະ ປະຊາຊົນ. ພ້ອມກັບບັນດາສັນຍານດີພໍສົມຄວນດັ່ງ່ກາວ, ເລື່ອງລັດຖະບານຫວຽດນາມສຸມໃສ່ມານະພະຍາຍາມຜ່ານຜ່າທຸກຄວາມຫຍຸ້ງຍາກທີ່ຍັງຄົງຄ້າງນັບແຕ່ນີ້ເຖິງທ້າຍປີ ຈະປະກອບສ່ວນຮັບປະກັນໃຫ້ແກ່ການພັດທະນາພື້ນຖານເສດຖະກິດແບບຍືນຍົງ.