(lvovword) - ພື້ນຖານເສດຖະກິດໂລກພວມຟື້ນຕົວຄືນໃໝ່, ແຕ່ຍັງມີຄວາມສ່ຽງຫຼາຍຢ່າງ. ໃນສະພາບການນັ້ນ, ເສດຖະກິດຫວຽດນາມ ສືບຕໍ່ເຕີບໂຕ, ມີແງ່ຫວັງຢ່າງຕັ້ງໜ້າ, ແຕ່ກໍ່ຍັງມີສິ່ງທ້າທາຍຫຼາຍຢ່າງຢູ່. ວັນທີ 20/7, ທະນາຄານໂລກໄດ້ປະກາດບົດລາຍງານກ່ຽວກັບສະພາບການພັດທະນາເສດຖະກິດຂອງຫວຽດນາມ ໃນ 6 ເດືອນຕົ້ນປີ 2015 ດ້ວຍບັນດາສັນຍານດີພໍສົມຄວນ.
(ພາບປະກອບ) ຕາມບົດລາຍງານຂອງທະນາຄານໂລກແລ້ວ, ໃນເຄິ່ງຕົ້ນປີນີ້, ເສດຖະກິດຫວຽດນາມ ສືບຕໍ່ຟື້ນຕົວ, ດ້ວຍລະດັບຈີດີພີ ເພີ່ມຂຶ້ນ 6,28%. ນີ້ແມ່ນລະດັບເຕີບໂຕສູງສຸດເມື່ອທຽບໃສ່ໄລຍະດຽວກັນຂອງ 5 ປີ ຜ່ານມາ.
ເສດຖະກິດຫວຽດນາມ: ຟື້ນຕົວໄປຄຽງຄູ່ກັບການທ້າທາຍ
ເສດຖະກິດຫວຽດນາມ ໄດ້ຮັບການຟື້ນຕົວຄືໃນປະຈຸບັນ, ຕົ້ນຕໍ່ແມ່ນຍ້ອນອີງໃສ່ຜົນແຫ່ງການເຄື່ອນໄຫວຢ່າງຕັ້ງໜ້າໃນຂະແໜງອຸດສາຫະກຳປຸງແຕ່ງ, ປະດິດສ້າງ ແລະ ກໍ່ສ້າງ. ລະດັບສິນຄ້າຂາຍຍ່ອຍ ແລະ ລາຍຮັບການບໍລິການກໍ່ເພີ່ມຂຶ້ນຢ່າງແຮງ. ຄຽງຂ້າງນັ້ນ, ໃນສະພາບໄພເງິນເຟີ້ຢູ່ໃນລະດັບຕຳ່, ທະນາຄານແຫ່ງລັດຫວຽດນາມ ໄດ້ດຳເນີນການຜ່ອນຄາຍນະໂຍບາຍເງິນຕາ ເພື່ອໜູນຊ່ວຍໃຫ້ແກ່ການເຄື່ອນໄຫວດ້ານເສດຖະກິດ, ພ້ອມທັງດັດສົມອັດຕາແລກປ່ຽນເງິນຕາ ເພື່ອຮັບປະກັນລັກສະນະແກ່ງແຍ້ງຂອງພື້ນຖານເສດຖະກິດ. ດຣ. Sandeep Mahajan, ຫົວໜ້ານັກຊ່ຽວຊານດ້ານເສດຖະກິດຂອງທະນາຄານໂລກປະຈຳຫວຽດນາມ, ຖືວ່າ:
“ການປະຕິຮູບທະນາຄານໄດ້ມີຄວາມຄືບໜ້າຫຼາຍຢ່າງ, ພິເສດແມ່ນໃນຂົງເຂດຊື້ຂາຍ ແລະ ໂອນເອົາ. ບັນດາທະນາຄານການຄ້າໃຫຍ່ໄດ້ໂອນເອົາ ແລະ ຊື້ທະນາຄານນ້ອຍຄືນໃໝ່. ຫວຽດນາມ ຄວນເພີ່ມອັດຕາກຳມະສິດຂອງພາກສ່ວນເສດຖະກິດເອກະຊົນກັບການຫັນລັດວິສາຫະກິດເປັນຫຸ້ນສ່ວນ“.
ຄຽງຂ້າງແງ່ຫວັງທີ່ຕັ້ງໜ້າໃນໄລຍະກາງ, ເສດຖະກິດຫວຽດນາມ ຍັງມີຄວາມສ່ຽງ ແລະ ສິ່ງທ້າທາຍຫຼາຍຢ່າງ. ພື້ນຖານເສດຖະກິດພວມກ້າວເຂົ້າສູ່ໄລຍະເຕີບໂຕຄືນໃໝ່, ແຕ່ບັນດາບັນຫາກ່ຽວກັບໜີ້ຂອງລັດ ແລະ ການສ້າງໂຄງປະກອບລັດວິສາຫະກິດຄືນໃໝ່, ການລົງທຶນຂອງລັດຍັງຄົງເປັນສິ່ງທີ່ກີດຂວາງເຖິງການພັດທະນາຂອງພື້ນຖານເສດຖະກິດຢູ່. ຄາດວ່າ, ດຸນການຄ້າຈະຖືກຮັດແຄບພໍສົມຄວນໃນປີນີ້, ຍ້ອນການສົ່ງອອກເຕີບໂຕຢ່າງຊັກຊ້າ ໃນຂະນະທີ່ການນຳເຂົ້າພັດເພີ່ມຂຶ້ນ ເພື່ອຕອບສະໜອງຄວາມຕ້ອງການລົງທຶນ ແລະ ການເຄື່ອນໄຫວທາງດ້ານເສດຖະກິດພາຍໃນປະເທດ. ດຣ. Sebastian Eckardt, ນັກຊ່ຽວຊານດ້ານເສດຖະກິດຂັ້ນສູງຂອງທະນາຄານໂລກປະຈຳຫວຽດນາມ, ສະເໜີວ່າ:
“ຫວຽດນາມ ແມ່ນໜຶ່ງໃນບັນດາພື້ນຖານເສດຖະກິດທີ່ມີລະດັບເຕີບໂຕສູງສຸດໃນພາກພື້ນ ແລະ ໃນໂລກ, ຖ້າສືບຕໍ່ທ່າຟື້ນຕົວແມ່ນຈະລື່ນກາຍລະດັບ 6% ແລະ ໄພເງິນເຟີ້ສາມາດຄວບຄູບໄດ້. ເຖິງຢ່າງໃດກໍ່ຕາມ, ຄວນຕິດຕາມຢ່າງໃກ້ຊິດ, ພິເສດ, ໃນສະພາບສິນເຊື່ອພວມເຕີບໂຕ. ໜີ້ຂອງລັດຍັງຄົງມີທ່າອ່ຽງເພີ່ມຂຶ້ນ, ແຕ່ຢູ່ໃນລະດັບຕຳ່ກວ່າ 75% ຈີດີພີ. ດັ່ງນັ້ນ, ແຜນການປັບປຸງປີການເງິນທີ່ໜ້າໄວ້ເນື້ອເຊື່ອໃຈໃນໄລຍະກາງ ພ້ອມກັບບັນດາມາດຕະການປັບປຸງສະພາບການເງິນຂອງລັດວິສາຫະກິດ ແລະ ທະນາຄານ ຈະມີບົດບາດສຳຄັນໃນການເພີ່ມຄວາມໄວ້ເນືອເຊື່ອໃຈໃຫ້ພາກສ່ວນເສດຖະກິດເອກະຊົນ“.
ຄວາມສາມາດບົ່ມຊ້ອນເຕີບໂຕເສດຖະກິດໃນອະນາຄົດ
ບັນດານັກຊ່ຽວຊານຂອງທະນາຄານໂລກ ຄາດຄະເນວ່າ, ການເຕີບໂຕເສດຖະກິດຂອງຫວຽດນາມ ຈະຢູ່ໃນລະດັບ 6-6,2% ຍ້ອນຄວາມຕ້ອງການພາຍໃນປະເທດສືບຕໍ່ເພີ່ນຂຶ້ນ, ການລົງທຶນ ແລະ ການໃຊ້ສອຍສືບຕໍ່ໄດ້ຮັບການປັບປຸງ. ໃນຂະນະນັ້ນ, ຄາດວ່າໄພເງິນເຟີ້ຈະຢູ່ໃນລະດັບ 2,5% ແລະ ດຸນບັນຊີເຂົ້າອອກຂອງຫວຽດນາມ ຈະຢູ່ໃນລະດັບ 0,5% ຂອງຈີດີພີ, ການຂາດດຸນງົບປະມານຄາດວ່າຈະຮັບການປັບປຸງຜ່ານຄວາມມານະພະຍາຍາມຫຼຸດຜ່ອນການໃຊ້ຈ່າຍເພື່ອຫຼີກເວັ້ນບໍ່ໃຫ້ໜີ້ຂອງລັດເພີ່ມຂຶ້ນ. ດຣ. Sebastian Eckardt ໃຫ້ຮູ້ຕື່ມອີກວ່າ: ຫວຽດນາມ ສາມາດເພີ່ມການສົ່ງອອກຂຶ້ນຕື່ມ, ພິເສດແມ່ນບັນດາຂະແໜງທີ່ຫວຽດນາມ ມີທ່າແຮງໃນການແກ່ງແຍ້ງເຊັ່ນບັນດາຜະລິດຕະພັນອຸດສາຫະກຳປະດິດສ້າງ, ເອເລັກໂຕນິກ.
ພິເສດ, ປີ 2015 ແມ່ນປີກຸນແຈໃນວິວັດແຫ່ງການເຊື່ອມໂຍງຂອງຫວຽດນາມ, ດ້ວຍສັນຍາການຄ້າຫຼາຍສະບັບໄດ້ຮັບການລົງນາມ ແລະ ພວມຢູ່ໃນວິວັດແຫ່ງການເຈລະຈາ. ນີ້ແມ່ນຂີດໝາຍສຳຄັນຂອງຫວຽດນາມ ບົນເສັ້ນທາງເຊື່ອມໂຍງຢ່າງເລິກເຊິ່ງເຂົ້າກັບເສດຖະກິດໂລກ. ເມື່ອເຂົ້າຮ່ວມສັນຍາການຄ້າເສລີ ຈະສ້າງກຳລັງໜູນໃຫ້ພື້ນຖານເສດຖະກິດຫວຽດນາມ ແລະ ປະຊາຄົມວິສາຫະກິດພັດທະນາ, ເພາະເມື່ອຮົ້ວພາສີຖືກຍຸບເລີກ, ບັນດາວິສາຫະກິດຫວຽດນາມ ຈະມີເງື່ອນໄຂສຳຜັດກັບຕະຫຼາດທີ່ມີມູນຄ່າເພີ່ມສູງ. ຈາກນັ້ນເປີດກວ້າງຕະຫຼາດສົ່ງອອກຂອງຫວຽດນາມ. ຕາມການຄາດຄະເນແລ້ວ, ການສົ່ງອອກຂອງຫວຽດນາມອາດຈະເພີ່ມຂຶ້ນກວ່າ 20% ໃນຊຸມປີຕໍ່ໜ້າ. ທ່ານ ຫວູຕ໋ຽນໂລກ, ປະທານຫ້ອງການການຄ້າ ແລະ ອຸດສາຫະກຳຫວຽດນາມ (VCCI), ຖືວ່າ:
“ຄວາມເປັນເຈົ້າການຂອງວິສາຫະກິດລວມມີຫຼາຍວຽກຈະຕ້ອງເຮັດ ແລະ ຕ້ອງເລີ່ມເຮັດໃນທັນທີ, ຫາກບໍ່ໄດ້ລໍຖ້າບັນດາສັນຍານັ້ນມີຜົນສັກສິດຈຶ່ງເຮັດ. ການກະກຽມຂອງບັນດາວິສາຫະກິດກ່ອນອື່ນໝົດແມ່ນຕ້ອງເປັນເຈົ້າການໃນການສຳຜັດກັບຂໍ້ມູນຂ່າວ. ທີສອງແມ່ນຕ້ອງໄຈ້ແຍກການກະທົບເຖິງຂະແໜງສິນຄ້າຂອງຕົນ, ບົນພື້ນຖານນັ້ນ, ວາງອອກລາຍການດຳເນີນງານ, ຕ້ອງເປັນເຈົ້າການໃນການສຳຜັດກັບຂະແໜງສິນຄ້າ ແລະທິດທາງຂອງຂະແໜງສິນຄ້າຂອງຕົນໃນຕະຫຼາດທີ່ໄດ້ຮັບບຸລິມາສິດດ້ານພາສີ“.
ດ້ວຍບັນດາຜົນງານດ້ານເສດຖະກິດທີ່ຫວຽດນາມ ບັນລຸໄດ້ໃນ 6 ເດືອນຕົ້ນປີ 2015 ນັ້ນ, ທະນາຄານໂລກຖືວ່າ, ແງ່ຫວັງເຕີບໂຕດ້ານເສດຖະກິດຂອງຫວຽດນາມແມ່ນຕັ້ງໜ້າ. ພ້ອມນັ້ນຄາດວ່າການເຕີບໂຕທາງດ້ານເສດຖະກິດຢູ່ອາເມລິກາ, ເອີລົບ ແລະ ຍີ່ປຸ່ນ, ເຊິ່ງແມ່ນບັນດາຄູ່ຄ້າໃຫຍ່ຂອງຫວຽດນາມ ກໍ່ຈະມີຄວາມປະເອີບໃຈໃນປີ 2015, ສິ່ງດັ່ງກ່າວຈະສ້າງຄວາມສະດວກໃຫ້ແກ່ການສົ່ງອອກຂອງຫວຽດນາມ, ປະກອບສ່ວນ ເຮັດໃຫ້ເສດຖະກິດຫວຽດນາມ ຮັກສາໄດ້ລະດັບເຕີບໂຕດີພໍສົມຄວນຄືໃນປະຈຸບັນ.