ວັນທີ 10/9/1955, ແນວໂຮມປະເທດຊາດຫວຽດນາມໄດ້ຮັບການສ້າງຕັ້ງຂຶ້ນດ້ວຍຈຸດປະສົງສາມັກຄີຊາດໃນການຕໍ່ສູ້ກູ້ຊາດ ແລະ ສ້າງສາປະເທດແຫ່ງສັນຕິພາບເອກະພາບ. ນັບແຕ່ນັ້ນເປັນຕົ້ນມາ, ແນວໂຮມປະເທດຊາດຫວຽດນາມຍາມໃດກໍແມ່ນສູນຮັກສາ ແລະ ກໍ່ສ້າງກຸ່ມກ້ອນມະຫາສາມັກຄີທົ່ວປວງຊົນທັງຊາດເພື່ອປະຕິບັດບັນດາໜ້າທີ່ປະຫວັດສາດຂອງປະເທດຊາດ.
ສະແຕັມຂອງແນວໂຮມປະເທດຊາດຫວຽດນາມ |
ກ່ອນນີ້ 60 ປີ, ແນວໂຮມປະເທດຊາດຫວຽດນາມໄດ້ຮັບການສ້າງຕັ້ງຂຶ້ນບົນພື້ນຖານສືບທອດບັນດາຜົນງານ, ການປະກອບສ່ວນຂອງ ແນວໂຮມຫວຽດມິນ ແລະ ແນວໂຮມລຽນຫວຽດ ໃນການປະຕິວັດເດືອນສິງຫາປີ 1945 ຊຶ່ງເປັນຂີດໝາຍໄລຍະພັດທະນາໃໝ່ຂອງກິດຈະການກໍ່ສ້າງກຸ່ມກ້ອນມະຫາສາມັກຄີທົ່ວປວງຊົນທັງຊາດ.
ສາມັກຄີທົ່ວປວງຊົນທັງຊາດເພື່ອສ້າງສາ ແລະ ປົກປັກຮັກສາປະເທດຊາດ
ທ່ານຝ້າມເທ້ຢວຽດ ອະດີດປະທານຄະນະກຳມະການສູນກາງແນວໂຮມປະເທດຊາດຫວຽດນາມ ໃຫ້ຮູ້ວ່າ ພາຍຫຼັງໄດ້ຮັບການສ້າງຕັ້ງ, ແນວໂຮມປະເທດຊາດຫວຽດນາມໄດ້ເສີມຂະຫຍາຍຄຸນປະໂຫຍດອັນໃຫຍ່ຫຼວງຂອງຕົນໃນການຕໍ່ສູ້ຕ້ານອາເມລິກາກູ້ຊາດ ກໍຄືໃນພາລະກິດການປະຕິວັດສັງຄົມນິຍົມຢູ່ພາກເໜືອ.ພ້ອມກັນນັ້ນ, ແນວໂຮມປະເທດຊາດຫວຽດນາມໄດ້ປະກອບສ່ວນເສີມຂະຫຍາຍສິດເປັນເຈົ້າຂອງປະຊາຊົນ, ອອກແຮງປຸກລະດົມປະຊາຊົນເຂົ້າຮ່ວມການເລືອກຕັ້ງສະພາແຫ່ງຊາດ ແລະ ສະພາປະຊາຊົນຂັ້ນຕ່າງໆ, ກໍ່ສ້າງອຳນາດການປົກຄອງປະຕິວັດ, ພັດທະນາການຜະລິດ, ສ້າງເສດຖະກິດ, ປະຕິບັດວິຖີຊີວິດໃໝ່, ກໍ່ສ້າງມະນຸດໃໝ່. ທ່ານຝ້າມເທ້ຢວຽດ ອະດີດປະທານຄະນະກຳມະການສູນກາງແນວໂຮມປະເທດຊາດຫວຽດນາມຢືນຢັນວ່າ :
“ແນວໂຮມປະເທດຊາດໄດ້ເຕົ້າໂຮມສາມັກຄີທຸກຊັ້ນວັນນະ, ຊົນຊັ້ນ, ຊົນຊາດຊົນເຜົ່າ ແລະ ທັງພໍ່ແມ່ພີນ້ອງຊາວຫວຽດນາມອາໄສຢູ່ຕ່າງປະເທດ. ດັ່ງນັ້ນ, ພວກເຮົາມີກຳລັງແຮງສັງລວມບົນແນວຮົບດ້ານການທະຫານການເມືອງ, ການທູດ, ປະຊາຊົນ, ສາມາດເສີມຂະຫຍາຍກຳລັງແຮງສັງລວມຂອງທົ່ວທັງຊາດເພື່ອຮັກສາເອກະລາດໃຫ້ໄດ້. ນີ້ແມ່ນຮູບການເຕົ້າໂຮມມະຫາຊົນທີ່ມີຊີວິດຊີວາ ແລະ ຊ່ວຍໃຫ້ປະຊາຊົນ ບໍວ່າຜູ້ໃດກໍມີເງື່ອນໄຂເຂົ້າຮ່ວມ”
ຜ່ານໄລຍະ 60 ປີແຫ່ງປະຫວັດສາດ, ກໍສາມາດຢືນຢັນວ່າ ແນວໂຮມປະເທດຊາດຫວຽດນາມແມ່ນຊາຍຄາລວມຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ ແລະ ກຸ່ມກ້ອນມະຫາສາມັກຄີທົ່ວປວງຊົນທັງຊາດນີ້ນັບມື້ນັບໄດ້ຮັບການຈັດຕັ້ງຢ່າງກ້ວາງຂວາງ ແລະ ເລິກເຊິ່ງ.
ເຂົ້າຮ່ວມການຕິດຕາມກວດກາ ແລະ ສັງເກດຕີລາຄາສັງຄົມ.
ແນວໂຮມປະເທດຊາດບໍ່ພຽງແຕ່ແມ່ນ ຊາຍຄາລວມຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດເທົ່ານັ້ນ, ຫາກຍັງແມ່ນຕົວແທນ, ປົກປ້ອງສິດຜົນປະໂຫຍດອັນຊອບທຳໃຫ້ແກ່ປະຊາຊົນເມື່ອ ເຂົ້າຮ່ວມການຕິດຕາມກວດກາ ແລະ ສັງເກດຕີລາຄາສັງຄົມ. ທ່ານ ເຈີນເຫົ້າ ອະດີດບັນນາທິການໃຫຍ່ວາລະສານ ແນວໂຮມປະເທດຊາດໃຫ້ຮູ້ວ່າ :
“ແນວໂຮມປະເທດຊາດໄດ້ຮັບຟັງຄຳເຫັນຂອງປະຊາຊົນ ແລະ ແນວໂຮມປະເທດຊາດເວົ້າໃຫ້ປະຊາຊົນຟັງແມ່ນສິ່ງທີ່ໃໝ່ອຽມໃນທິດທິດທາງຂອງແນວໂຮມ. ບໍ່ພຽງແຕ່ເທົ່ານັ້ນ, ແນວໂຮມຍັງມີໜ້າທີ່ຮັບຜິດຊອບສ້າງກົນໄກເພື່ອໃຫ້ພັກ ແລະ ລັດພ້ອມກັນຮັບຟັງຄຳເຫັນຂອງປະຊາຊົນ ”
ການ ຮັບຟັງຄຳເຫັນຂອງປະຊາຊົນ, ເວົ້າໃຫ້ປະຊາຊົນເຂົ້າໃຈ ແມ່ນໄດ້ຮັບຖືວ່າແມ່ນ “ເສັ້ນໄໝແດງ” ທະລຸລົງລະບົບແນວໂຮມໃນຊຸມປີມໍ່ໆມານີ້ ແລະ ກໍຍັງແມ່ນຄຳຮຽກຮ້ອງຕ້ອງການຊຸກຍູ້ແນວໂຮມປ່ຽນໃໝ່ວິທີການ, ປ່ຽນໃໝ່ຕົນເອງເພື່ອເຮັດຫຼ້ອນໜ້າທີ່ຕໍ່ປະຊາຊົນ. ທ່ານ ຫງວຽນຖ້ຽນເຍີນ ກຳມະການກົມການເມືອງ, ປະທານຄະນະກຳມະການສູນກາງແນວໂຮມປະເທດຊາດຫວຽດນາມ ໃຫ້ຮູ້ວ່າ :
“ ໄລຍະທີ່ຈະມາເຖິງ, ແນວໂຮມປະເທດຊາດຍັງເບິ່ງແຍງ ເອົາໃຈໃສ່ສ້າງບັນດາຂະບວນການປະຕິວັດຢູ່ແຕ່ລະຂົງເຂດ, ບໍລິເວນໃຫ້ສອດຄ່ອງກັບຄວາມສາມາດ ແລະ ເງື່ອນໄຂຂອງປະຊາຊົນ ເພື່ອໃຫ້ປະຊາຊົນເຫັນວ່າ ແນວໂຮມໄດ້ຮັບຟັງຄຳເຫັນຂອງປະຊາຊົນ, ພ້ອມກັບປະຊາຊົນເຮັດທຸກສິ່ງທີ່ນຳມາເຊິ່ງຜົນປະໂຫຍດໃຫ້ແກ່ປະເທດຊາດ ແລະ ປະຊາຊົນເອງ. ເມື່ອປະຊາຊົນມີຄຳເຫັນຕໍ່ພັກ, ລັດ, ຖ້າຫາກເຫັນວ່າ ຄຳເຫັນເຫຼົ່ານັ້ນ ຍັງບໍ່ທັນໄດ້ຮັບຄຳຕອບເທົ່າທີ່ຄວນນັ້ນ, ແນວໂຮມປະເທດຊາດຂັ້ນຕ່າງໆ ພ້ອມແລ້ວ ຮັບຟັງຄຳເຫັນຂອງປະຊາຊົນ, ສົມທົບກັນຮວບຮ່ວມ ຄຳເຫັນເຫຼົ່ານັ້ນຂອງປະຊາຊົນ ”
ສະເຫຼີມສະຫຼອງ 60 ປີແຫ່ງວັນສ້າງຕັ້ງ ແນວໂຮມປະເທດຊາດຫວຽດນາມ ກໍເປັນຂີດໝາຍໄລຍະພັດທະນາໃໝ່ຂອງກິດຈະການກໍ່ສ້າງກຸ່ມກ້ອນມະຫາສາມັກຄີທົ່ວປວງຊົນທັງຊາດ. ຮ່ວມເດີນທາງໃນບັນດາໄລຍະທາງແຫ່ງປະຫວັດສາດຂອງຊາດ, ແນວໂຮມປະເທດຊາດຫວຽດນາມຍາມໃດກໍເຮັດຫຼ້ອນໜ້າທີ່ກໍ່ສ້າງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ຮັບຟັງຄຳເຫັນຂອງປະຊາຊົນ, ເວົ້າໃຫ້ປະຊາຊົນເຂົ້າໃຈ, ປະກອບສ່ວນສະຕິປັນຍາ, ເຫື່ອແຮງເຂົ້າໃນພາລະກິດສ້າງສາ ແລະ ປົກປັກຮັກສາປະເທດຊາດຫວຽດນາມສັນຕິພາບ, ເອກະພາບ, ເອກະລາດ, ປະຊາທິປະໄຕ ແລະ ຮັ່ງມີເຂັ້ມແຂງ