(vovworld)- ປີ 2015 ແມ່ນປີເຕັມໄປດ້ວຍການປັ່ນປ່ວນສຳລັບ ເອີລົບ ເມື່ອ ທະວີບນີ້ຕ້ອງປະເຊີນຫນ້າກັບການຂາດສະຖຽນລະພາບ ແລະ ສິ່ງທ້າທາຍທີ່ ຮ້າຍແຮງກວ່າໝູ່ໃນເຄິ່ງສັດຕະວັດຜ່ານມາ. ນັ້ນແມ່ນການຂາດສະຖຽນລະພາບກ່ຽວກັບຄວາມໝັ້ນຄົງ, ການຟື້ນຕົວຂອງພື້ນຖານເສດຖະກິດແມ່ນຊັກຊ້າ, ໄພແບ່ງແຍກໃນສະຫະພາບເອີລົບ ເພື່ອວ່າຍັງບໍ່ທັນຊອກໄດ້ສຽງເວົ້າລວມໃນການແກ້ໄຂສະພາບການຊາວອົບພະຍົບ. ບັນດາບັນຫາດັ່ງກ່າວໄດ້ເຮັດໃຫ້ສະພາບການເອີລົບ ເຕັມໄປດ້ວຍການຜັນປ່ຽນ.
ສະພາບການຊາວອົບພະຍົບເຂົ້າ ເອີລົບ
ພາບ:vtv.vn
|
ເອີລົບ ຕ້ອງປະເຊີນຫນ້າກັບວິກິດການຫລາຍຢ່າງທີ່ອາດຈະເຮັດໃຫ້ຂາດສະຖຽນລະພາບຢູ່ພາຍໃນ ແລະ ນອກເສັ້ນຊາຍແດນຂອງທະວີບນີ້. ທ່ານ Martin Schulz, ປະທານລັດຖະສະພາເອີລົບ ຍອມຮັບວ່າ: “ປີ 2015 ແມ່ນເລີ່ມຕົ້ນດ້ວຍຄວາມຢ້ານກົວ ແລະ ສິ້ນສຸດດ້ວຍຄວາມຢ້ານກົວ. ແມ່ນປີເກີດບັນດາວິກິດການທີ່ເລິກເຊິ່ງກ່ຽວກັບເສດຖະກິດ, ສັງຄົມ, ວຽກເຮັດງານທຳ, ແມ່ນປີທີ່ບັນດາປະເທດສະມາຊິກຫ່າງຈາກກັນຊື່ງບໍ່ເຄີຍມີມາກອ່ນ.”
ປີ 2015 ແມ່ນປີຂອງບັນດາເຫດບຸກໂຈມຕີກໍ່ການຮ້າຍ ແລະ ວິກິດການຊາວອົບພະຍົບ
ການກໍ່ການຮ້າຍ ແລະ ວິກິດການຊາວອົບພະຍົບ ແມ່ນການຜັນປ່ຽນ ໃຫຍ່ກວ່າໝູ່ ຢູ່ ເອີລົບໃນປີ 2015 ແລະ ນັບແຕ່ເມື່ອສົງຄາມໂລກຄັ້ງທີ 2 ແມ່ນການນາບຂູ່ຢ່າງ ຮ້າຍແຮງທີ່ສຸດ ຊື່ງ ເອີລົບ ຕ້ອງປະເຊີນຫນ້າໃນສອງສາມທົດສະວັດຜ່ານມາ.
ຝລັ່ງ ກາຍເປັນໃຈກາງຂອງການບຸກໂຈມຕີກໍ່ການຮ້າຍ 2 ຄັ້ງ ເຮັດໃຫ້ຫາງສຽງໂລກມີຄວາມວິຕົກກັງວົນ. ພາຍຫລັງການບຸກໂຈມຕີໃນໄລຍະຕົ້ນປີ ໃສ່ສຳນັກງານວາລະສານ Charlie Hebbdo ຢູ່ ປາຣີ, ຝລັ່ງ ແລະ ບັນດາປະເທດ ເອີລົບ ຍາມໃດກໍຍົກສູງສະຕິລະມັງລະວັງ. ແຕ່ມາຮອດເຫດບຸກໂຈມຕີຢ່າງໂຫດຮ້າຍສາມານກວ່າ, ມີຂອບຂະຫນາດໃຫຍ່ກວ່າທີ່ເກີດຂຶ້ນເມື່ອວັນທີ 13/11 ຢູ່ ປາຣີ ໄດ້ເຮັດໃຫ້ 100 ຄົນເສຍຊີວິດ, ເອີລົບ ຖືກກະທົບກະເທືອນຢ່າງແທ້ຈິງ. ຫລາຍປະເທດ ຢູ່ ເອີລົບ ໄດ້ຊອກວິທີເພີ່ມທະວີການປ້ອງກັນຄວາມສະຫງົບ. ຫນຶ່ງໃນບັນດາມາດຕະການໄດ້ເຕື້ອງເຖິງແມ່ນຄິດໄລ່ຊັ່ງຊາການຢຸດຕິສົນທິສັນຍາ Schengen, ຊື່ງແມ່ນສົນທິສັນຍາວ່າດ້ວຍການໄປມາຢ່າງເສລີລະຫວ່າງບັນດາປະເທດ ເອີລົບ. ບັນດາປະເທດ ສະມາຊິກ ອີຢູ ກໍເປັນເອກະພາບກ່ຽວກັບຂໍ້ຕົກລົງເປີດຊ່ອງທາງໃຫ້ການນຳໃຊ້ລະບົບຮັບເອົາຂໍ້ມູນຂ່າວຈາກຜູ້ໂດຍສານ PNR (Passenger name record) ໂດຍບໍ່ຫົວຊາຕໍ່ຄວາມວິຕົກກັງວົນກ່ຽວກັບເລື່ອງຂໍ້ມູນສ່ວນບຸກຄົນຈະຖືກຂາດຄວາມລັບ. ການກວດກາຊາຍແດນພາຍໃນກຸ່ມ ກໍເຂັ້ມງວດກວ່າເກົ່າ.
ເພື່ອສະກັດກັ້ນການນາບຂູ່ກໍ່ການຮ້າຍຢ່າງຍາວນານ, ສິ່ງສຳຄັນກວ່າ ນັ້ນແມ່ນ ສະຖຽນລະພາບທາງສັງຄົມ ແຕ່ສິ່ງນີ້ຖືກຜົນສະທ້ອນຢ່າງຫນັກຫນ່ວງ ຍ້ອນເກີດວິກິດການຊາວອົບພະຍົບຄັ້ງໃຫຍ່ສຸດ ນັບແຕ່ຕົ້ນສັດຕະວັດທີ 21. ຊາວອົບພະຍົບຈາກ ຊີຣີ, ອີຣັກ, ອາບການີສະຖານ ຫລັ່ງໄຫລໄປເຖິງ ເອີລົບ ໃນຕະຫລອດປີ 2015. ຕາມການປະກາດຂອງອົງການອົບພະຍົບສາກົນ (IOM) ແລ້ວ, ຈຳນວນຊາວອົບພະຍົບຍົກຍ້າຍເຖິງ ເອີລົບ ດ້ວຍທາງທະເລ ແລະ ທາງບົກໃນປີ 2015 ແມ່ນລື່ນກາຍ 1 ລ້ານ ຄົນ, ເພີ່ມຂຶ້ນຢ່າງຫນ້ອຍສຸດແມ່ນ 4 ເທົ່າເມື່ອທຽບໃສ່ປີ 2014. ແຕ່ໃນກອງປະຊຸມສຸດຍອດດຳເນີນເມື່ອທ້າຍປີ 2015, ອີຢູ ຍັງບໍ່ທັນເປັນເອກະພາບ ມາດຕະການໃດເພື່ອແກ້ໄຂສິ່ງທ້າທາຍໃຫຍ່ສຸດນີ້ ແນໃສ່ແທນໃຫ້ບັນດາມາດຕະການມີລັກສະນະຮັບມືປະຈຸບັນ.
ເອີລົບ ຂາດຄວາມສາມັກຄີ ແລະ ແບ່ງແຍກກັນ
ການຂາດຄວາມສາມັກຄີ ຂອງອີຢູ ເຄີຍເກີດຂຶ້ນໃນວິດກິດການຫນີ້ສິນຂອງ ເກຼັກ ເຮັດໃຫ້ ອີຢູ ຖືກຕົກເຂົ້າສູ່ສະພາບອາດຈະຖືກລົ້ມລະລາຍ. ວິກິດການເກີດຂຶ້ນຢ່າງລຽນຕິດໃນປີ 2015 ອາດຈະເຮັດໃຫ້ ເອີລົບຖືກແບ່ງແຍກ, ພິເສດ ແມ່ນບັນດາຄວາມບໍ່ລົງລອຍກັນໃນວິທີແກ້ໄຂສະພາບຊາວອົບພະຍົບ. ເອີລົບ ຕ້ອງປະເຊີນຫນ້າກັບການເລືອກເຟັ້ນທີ່ຫຍຸ້ງຍາກນັ້ນແມ່ນ ຕ້ອງຊ່ວຍເຫລືອ ຫລື ຄວບຄຸມຢ່າງແຫນ້ນແຟ້ນ ເພື່ອປົກປັກຮັກສາຄວາມສະຫງົບປອດໄພຂອງຕົນ. ມາຮອດປະຈຸບັນ, ມີບັນດາສະມາຊິກເດັດດ່ຽວບໍ່ຮັບເອົາໂຄຕ້າ ເຂົ້າເມືອງ, ບໍ່ຍອມເຫັນດີການຕັ້ງຖິ່ນຖານຄົງທີ່ໃຫ້ຊາວອົບພະຍົບມາຈາກ ຮຸງກາຣີ, ສະໂລວາກີ, ໂປໂລຍ.. ສ່ວນບັນດາປະເທດອື່ນ ພຽງແຕ່ຮັບເອົາຊາວອົບພະຍົບຈຳນວນນ້ອຍ ແລະ ທ່າອ່ຽງລວມ, ນັ້ນແມ່ນຊອກວິທີຍູ້ຊາວອົບພະຍົບອອກຈາກເຂດຊາຍແດນ ເອີລົບ ຍິ່ງໄກກໍ່ຍິ່ງດີ. ຊາວອົບພະຍົບ ບໍ່ພຽງແຕ່ສົ່ງຜົນສະທ້ອນຢ່າງຫນັກຫນ່ວງເຖິງດ້ານເສດຖະກິດ, ຄວາມສະຫງົບປອດໄພ, ສັງຄົມເທົ່ານັ້ນ ຫາກຍັງແມ່ນສາຍເຫດກໍ່ຄວາມແບ່ງແຍກສາດສະຫນາ, ເຊື້ອຊາດຜິວຜັນ, ນາບຂູ່ເຖິງທີ່ຕັ້ງບົດບາດຂອງບັນດາພັກກຳອຳນາດ ເມື່ອຫາງສຽງນັບມື້ນັບ ບໍ່ພໍໃຈ ແລະ ຫັນມາສະຫນັບສະຫນູນພັກຂວາຈັດຕ້ານຕ່າງດ້າວ
ເສດຖະກິດບໍທັນຟື້ນຕົວ
ຜົນກະທົບຈາກວິກິດການການເງິນທົ່ວໂລກແຕ່ປີ 2008 ແລະ ວິກິດການຫນີ້ສາທາລະນະ ຢູ່ ເອີລົບ ຍັງບໍ່ທັນແກ້ໄຂຢ່າງເຖິງຖອງ ນັ້ນອາດຈະແມ່ນສາຍເຫດເຮັດໃຫ້ພື້ນຖານເສດຖະກິດ ຂອງທະວີບນີ້ ບໍ່ທັນຟື້ນຕົວໃນປີ 2015, ຊ້ຳບໍ່ໜຳ ຍັງຕົກເຂົ້າສູ່ສະພາບຊັກຊ້າ. ບັນດາບ້ວງກູ້ຊ່ວຍ, ມາດຕະການປະຕິຮູບຖືກວາງອອກຢ່າງລຽນຕິດ ແຕ່ບໍ່ທັນບັນລຸປະສິດທິຜົນປານໃດ. ອີຢູ ຍັງຄົງປະເຊີນຫນ້າກັບກຳລັງດັນຫນີ້ສາທາລະນະຢ່າງໃຫຍ່ຫລວງ, ພິເສດ ແມ່ນເກຼັກ ແລະ ອີຕາລີ ຍັງແມ່ນບັນດາປະເທດມີອັດຕາຫນີ້ສາທາລະນະຫລາຍສຸດ. ເລື່ອງຊຸກຍູ້ການປະຕິຮູບໂຄງປະກອບ ຢ່າງຊັກຊ້າ, ຮັດກຸມງົບປະມານ ທີ່ແກ່ຍາວ. ສຳລັບປະເທດຈຳນວນຫນຶ່ງ, ບັນຫາຮັດກຸມງົບປະມານປະຈຸບັນ ພຽງແຕ່ແມ່ນສິ່ງບໍ່ຈຳເປັນຕໍ່ການນາບຂູ່ກໍ່ການຮ້າຍ.
ປີ 2016: ເອີລົບ ສືບຕໍ່ປະສົບກັບຄວາມຫຍຸ້ງຍາກ
ຕາມວົງການນັກສັງເກດການແລ້ວ, ຈາກສະພາບການໃນປີ 2015, ເອີລົບ ຈະປະເຊີນຫນ້າກັບສິ່ງທ້າທາຍຫລາຍຢ່າງໃນປີໃຫມ່ ດ້ວຍວິກິດການເກີດຂຶ້ນເປັນສອງຄັ້ງ. ທີຫນຶ່ງ ວິກິດການເສດຖະກິດຈາກ ເກຼັກ ຫັນໄປສູ່ ອີຕາລີ ເຮັດໃຫ້ປະເທດນີ້ປະເຊີນຫນ້າກັບອັດຕາຫວ່າງງານສູງ ແລະ ລະດົມບັນດາບ້ວງກູ້ຢືມ. ທີສອງ ວິກິດການຊາວອົບພະຍົບຈະນັບມື້ນັບສັບສົນ ຍ້ອນບັນດາກົນອຸບາຍບຸກໂຈມຕີກໍ່ການຮ້າຍ. ນອກນັ້ນ ບັນຫາຈຳນວນຫນຶ່ງອາດຈະຊົ່ວຮ້າຍກວ່າ ນັ້ນແມ່ນ ບັນດາການນຳຕົ້ນຕໍຂອງ ອີຢູ ຈະເສຍທ່າຮັບດ້ານການເມືອງ ສະນັ້ນ ຍາກທີ່ວາງອອກບັນດາການກະທຳລວມໃນກຸ່ມຫລື ບັນດາຄວາມວິຕົກກັງວົນກ່ຽວກັບເລື່ອງ ອັງກິດ ຖອນອອກຈາກ ອີຢູ ຫລືສືບຕໍ່ເປັນສະມາຊິກຂອງກຸ່ມນີ້. ຕີລາຄາກ່ຽວກັບປີ 2016, ປະທານຄະນະກຳມະການເອີລົບ Jean Claude Juncker ຍອມຮັບວ່າ ທ່ານບໍ່ມີຄວາມຫວັງຫຍັງ.
ປີ 2015 ໃກ້ຈະສິ້ນສຸດ. ບັນດາປະເທດ ເອີລົບ ຈະຫວັງວ່າ ຊຸມມື້ທ້າຍປີຜ່ານໄປຢ່າງວ່ອງໄວ ເພາະປີນີ້ແມ່ນປີທີ່ເກີດຄວາມຜັນປ່ຽນຫລາຍຢ່າງ. ເຖິງຢ່າງໃດກໍຕາມ ປີ 2016 ຈະມາເຖິງ ທະວີບນີ້ ອາດຈະສືບຕໍ່ປະສົບກັບຄວາມຫຍຸ້ງຍາກ.