(vovworld) - ວັນທີ 10/8 ແມ່ນວັນເພື່ອຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນຫວຽດນາມ. ເຖິງວ່າສົງຄາມໄດ້ລ່ວງເລີຍໄປເປັນເວລາຫຼາຍປີແລ້ວກໍ່ຕາມ, ແຕ່ຜົນຮ້າຍຢ້ອນຫຼັງຈາກທາດພິດສີສົ້ມ/ດີໂອຊິນ ຍັງຄົງສົ່ງຜົນສະທ້ອນເຖິງຊາວຫວຽດນາມ ນັບລ້ານຄົນ. ພັກ, ລັດ ແລະ ປະຊາຊົນຫວຽດນາມ ໄດ້ມີນະໂຍບາຍ ແລະ ການກະທຳແທດຈິງຫຼາຍຢ່າງ ເພື່ອເບິ່ງແຍງດູແລຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ.
ສູນກາຍຍະບຳບັດໃຫ້ຜູ້ປະສົບເຄາະຮ້າຍຈາກທາດພິດສີສົ້ມ
ວັນທີ 10/8/1961, ການບິນຖ້ຽວທຳອິດທີ່ນຳເອົາຢາຂ້າຫຍ້າ ໄດ້ຫວ່ານລົງເທດສະບານກອນຕຸມ, ເປີດສາກໃຫ້ສົງຄາມນຳໃຊ້ທາດພິດເຄມີຂອງອາເມລິກາ ຢູ່ສະໜາມຮົບພາກໃຕ້ຫວຽດນາມ. ໃນຕະຫຼອດ 10 ປີຕໍ່ມາ, ກອງທັບອາເມລິກາ ໄດ້ນຳໃຊ້ທາດພິດເຄມີປະມານ 80 ລ້ານລິດ, ເຊິ່ງລວມມີທາດພິດ 20 ປະເພດທີ່ແຕກຕ່າງກັນ, ໃນນັ້ນມີທາດພິດສີສົ້ມ/ດີໂອຊິນ ຢູ່ສະໜາມຮົບຕ່າງໆຂອງຫວຽດນາມ. ຕາມການສະຖິຕິ, ຫວຽດນາມ ມີຜູ້ຕິດທາດພິດເຄມີປະມານ 4,8 ລ້ານຄົນ, ແລະມີຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນປະມານ 3 ລ້ານຄົນ. ຜົນຮ້າຍຢ້ອນຫຼັງຂອງທາດພິດເຫຼົ່ານີ້ ໄດ້ສ້າງຄວາມລະທົມທຸກໃຫ້ຊາວຫວຽດນາມ ຫຼາຍລຸ້ນຄົນ.
ທັງປະຊາຄົມຮ່ວມແຮງຮ່ວມໃຈ
ໃນໂອກາດສະເຫຼີມສະຫຼອງວັນເພື່ອຜູ້ປະສົບເຄາະຮ້າຍຈາກທາດພິດສີສົ້ມຫວຽດນາມ ປີນີ້. ສູນກາງສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ (VAVA) ໄດ້ປຸກລະດົມຂະບວນການຂົນຂວາຍທົ່ວປະເທດຊ່ວຍເຫຼືອຜູ້ປະສົບເຄາະຮ້າຍ. ມີເງິນຈຳນວນ 2 ຕື້ກວ່າດົ່ງ ຖືກໃຊ້ເປັນຂອງຂວັນ ແລະ ທຶນຊ່ວຍເຫຼືອການຜະລິດ ໄດ້ມອບໃຫ້ 100 ກວ່າຄອບຄົວຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ. ປະຈຸບັນ, ລັດຖະບານໄດ້ອະນຸຍາດໃຫ້ VAVA ກໍ່ສ້າງສູນ 3 ແຫ່ງຢູ່ຮ່າໂນ້ຍ, ດ່ານັ້ງ, ແລະ ນະຄອນ ໂຮ່ຈິມິນ ເພື່ອລ້ຽງດູ, ສົ່ງເສີມສຸຂະພາບ, ກາຍຍະບຳບັດໃຫ້ຜູ້ປະສົບເຄາະຮ້າຍ. ທ່ານນາງ ຫງວຽນທິຫ່ຽນ, ປະທານສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ ນະຄອນດ່ານັ້ງ, ໃຫ້ຮູ້ວ່າ:
“ເມື່ອທຽບໃສ່ຊຸມປີກ່ອນ, ຊີວິດຂອງຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ ແມ່ນໄດ້ຮັບການປັບປຸງດີກວ່າເກົ່າແລ້ວ, ແຕ່ຂ້າພະເຈົ້າຍັງເປັນຫ່ວງຢູ່, ເພາະສຳລັບຄອບຄົວທີ່ມີຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ ເຖິງ 3, 4 ຄົນ, ຖ້າພໍ່ແມ່ຕາຍໄປແລ້ວ, ໃຜຈະເປັນຜູ້ເບິ່ງແຍງດູແລພວກນ້ອງ. ພວກຂ້າພະເຈົ້າຫວັງວ່າຈະມີແຫຼ່ງທຶນເປັນປົກກະຕິ ເພື່ອເບິ່ງແຍງດູແລຜູ້ປະສົບເຄາະຮ້າຍ ແລະ ໜູນຊ່ວຍຜູ້ທີ່ເຮັດວຽກງານເບິ່ງແຍງດູແລໃຫ້ເຂົາເຈົ້າ“.
ໃນໂອກາດສະເຫຼີມສະຫຼອງວັນເພື່ອຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ ປີນີ້, ບັນດາແຂວງ, ນະຄອນ ໄດ້ຈັດຕັ້ງຫຼາບຄະນະໄປມອບຂອງຂວັນໂດຍກົງໃຫ້ຜູ້ປະສົບເຄາະຮ້າຍຈາກທາດພິດສີສົ້ມ. VAVA ແຂວງເທື່ອທຽນເຫວ໋ ໄດ້ຈັດງານພົບປະ ແລະ ມອບຂອງຂວັນ 400 ພູດໃຫ້ຜູ້ປະສົບເຄາະຮ້າຍຈາກທາດພິດສີສົ້ມ, ແຕ່ລະພູດມີມູນຄ່າ 300.000 – 1 ລ້ານດົ່ງ. ໃນຂະນະນັ້ນ, ສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນແຂວງລ້າງເຊີນ ລະດົມເງິນໄດ້ກວ່າ 2 ຕື້ດົ່ງ ເພື່ອຊ່ວຍໃຫ້ຜູ້ປະສົບເຄາະຮ້າຍ, ໜູນຊ່ວຍກໍ່ສ້າງເຮືອນໃໝ່ 11 ຫຼັງ, ສ້ອມແປງເຮືອນໃຫ້ 8 ຄອບຄົວ, ດ້ວຍມູນຄ່າກວ່າ 600 ລ້ານດົ່ງ; ໜູນຊ່ວຍຜູ້ປະສົບເຄາະຮ້າຍ 43 ຄົນໄປປິ່ນປົວ, ບຳລຸງສຸຂະພາບຢູ່ໂຮງໝໍຕ່າງໆ. ສຳລັບຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນແຂວງກວາງຈີ້, ທ່ານ ເລວັນຢັງ, ປະທານ VAVA ແຂວງກວາງຈີ້, ໃຫ້ຮູ້ວ່າ:
“ໄລຍະຜ່ານມາ, ພວກຂ້າພະເຈົ້າລະດົມເງິນໄດ້ 21 ຕື້ດົ່ງ ແລະ ມອບຂອງຂວັນກວ່າ 22.000 ພູດ, ກໍ່ສ້າງສູນລ້ຽງດູ, ກາຍຍະບຳບັດ ແລະ ສອນວິຊາຊີບໃຫ້ຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ. ປີນີ້ຂົນຂວາຍເງິນຊ່ວຍເຫຼືອຜູ້ປະສົບເຄາະຮ້າຍໄດ້ເກືອບ 500 ລ້ານດົ່ງ.”
ສືບຕໍ່ປັບປຸງນະໂຍບາຍເພື່ອຜູ້ປະສົບເຄາະຮ້າຍຈາກທາດພິດສີສົ້ມ
ນັບແຕ່ປີ 2000, ຫວຽດນາມ ເລີ່ມປະຕິບັດນະໂຍບາຍໃຫ້ຜູ້ເຂົ້າຮ່ວມການຕໍ່ຕ້ານໂດຍກົງທີ່ຖືກຕິດທາດພິດເຄມີ. ພົບໂທ ຫງວຽນວັນຣິງ, ປະທານສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນຫວຽດນາມ ໃຫ້ຮູ້ວ່າ: “ປະຈຸບັນຫວຽດນາມ ມີຜູ້ເຂົ້າຮ່ວມການຕໍ່ສູ້ໂດຍກົງທີ່ຖືກຕິດທາດພິດເຄມີເກືອບ 300.000 ຄົນ ແລະ ລູກຂອງເຂົາເຈົ້າໄດ້ຮັບເງິນອຸດໜູນດ້ວຍລະດັບສູງສຸດແມ່ນ 2 ລ້ານດົ່ງ/ເດືອນ ແລະ ຕຳ່ສຸດແມ່ນ 800.000 ດົ່ງ/ເດືອນ. ປະຈຸບັນ, ທົ່ວປະເທດມີປະມານ 30% ຈຳນວນຜູ້ປະສົບເຄາະຮ້າຍຈາກທາດພິດສີສົ້ມໄດ້ຊື້ບັດປະກັນສຸຂະພາບ. ປະມານ 25% ຈຳນວນເດັກນ້ອຍຕິດທາດພິດສີສົ້ມ ໄດ້ຮັບການເບິ່ງແຍງກາຍຍະບຳບັດ. ນັບແຕ່ປີ 2000 ມາຮອດປະຈຸບັນ, ມີນະໂຍບາຍກ່ຽວກັບການໜູນຊ່ວຍຄ່າຮຽນ, ຮຽນວິຊາຊີບ, ຊອກຫາວຽກເຮັດງານທຳ, ກູ້ຢືມທຶນທຳການຜະລິດ, ກວດ, ປິ່ນປົວພະຍາດ, ກາຍຍະບຳບັດ ແມ່ນໄດ້ຮັບການປະກາດໃຊ້“.
ພ້ອມກັບການສືບຕໍ່ປັບປຸງນະໂຍບາຍ ແລະ ມີບັນດາການເຄື່ອນໄຫວໜູນຊ່ວຍຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນຢ່າງມີປະສິດທິຜົນນັ້ນ. VAVA ຈະສືບຕໍ່ບັນດາການເຄື່ອນໄຫວໜູນຊ່ວຍຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນຫວຽດນາມ ທວງເອົາຄວາມຍຸຕິທຳອີກ. ພົບໂທ ຫງວຽນວັນຣິງ, ປະທານສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນຫວຽດນາມ ໃຫ້ຮູ້ວ່າ:
“ພວກຂ້າພະເຈົ້າໂຄສະນາຂົນຂວາຍ ເພື່ອໃຫ້ປະຊາຊົນຫວຽດນາມ ແລະ ໂລກເຫັນໄດ້ໄພພິບັດຢ່າງຮ້າຍແຮງຂອງສົງຄາມເຄມີ. ພວກຂ້າພະເຈົ້າຍັງຄົງສືບຕໍ່ການຕໍ່ສູ້ທວງເອົາຄວາມຍຸຕິທຳໃຫ້ບັນດາຜູ້ປະສົບເຄາະຮ້າຍ, ບາງເທື່ອຢູ່ໃນສານ, ນອກສານ, ຂົນຂວາຍ, ອະທິບາຍເກ້ຍກ່ອມເພື່ອໃຫ້ລັດຖະບານອາເມລິກາ ຊ່ວຍເຫຼືອມະນຸດສະທຳໃຫ້ບັນດາຜູ້ປະສົບເຄາະຮ້າຍ“.
ຄວາມເອົາໃຈໃສ່ຂອງພັກ, ລັດ, ພ້ອມກັບການແບ່ງປັນຂອງປະຊາຄົມ ຈະຊ່ວຍໃຫ້ຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນຫວຽດນາມ ບັນເທົາຄວາມລະທົມທຸກທັງດ້ານຮ່າງກາຍ ແລະ ຈິດໃຈ.