ໄລຍະໃໝ່ໃນການພົວພັນລະຫວ່າງອາເມລິກາ-ກູບາພວມມີບັນດາບາດກ້າວເດີນທີ່ຕັ້ງໜ້າ, ແນໃສ່ຟື້ນຟູການພົວພັນທາງການທູດທີ່ຖືກຕັດຕອນນັບແຕ່ປີ 1961. ພາຍຫຼັງທີ່ມີການຈັບມືຄັ້ງປະຫວັດສາດຢູ່ທີ່ງານສົບອະດີດປະທານາທິບໍດີອາຟະລິກາໃຕ້ Nelson Mendela ເມື່ອເດືອນ 12/2013 ນັ້ນ, ການພົບປະຄັ້ງນີ້ລະຫວ່າງການນຳ 2 ທ່ານທີ່ກອງປະຊຸມສຸດຍອດບັນດາປະເທດທະວີບອາເມລິກາ ຊຶ່ງດຳເນີນໃນທ້າຍອາທິດທີ່ຜ່ານມາຢູ່ Panama ໄດ້ຮັບຖືວ່າ ແມ່ນສັນຍາລັກທີ່ເຕັມໄປດ້ວຍຄວາມໝາຍ, ເປັນຂີດໝາຍແຫ່ງຄວາມຕັດສິນໃຈເປີດໄລຍະໃໝ່ລະຫວ່າງ 2 ປະເທດບ້ານໃກ້ເຮືອນຄຽງຢູ່ທະວີບອາເມລິກາລາຕິນ.
ທ່ານປະທານາທິບໍດີ ອາເມລິກາ Barak Obama ແລະ ປະທານ ກູບາ Raul Castro ໄດ້ຈັບມືກັນຢູ່ປານາມາເມື່ອວັນທີ 11/4. |
ວັນທີ 11/4, ຕໍ່ໜ້າການເປັນສັກຂີພິຍານຂອງທ່ານເລຂາທິການໃຫຍ່ ສ.ປ.ຊ Ban Ki Moon ແລະ ບັນດາການນຳປະເທດຕ່າງໆໃນພາກພື້ນ ອາເມລິກາລາຕິນ, ທ່ານປະທານາທິບໍດີ ອາເມລິກາ Barak Obama ແລະ ປະທານ ກູບາ Raul Castro ໄດ້ຈັບມືກັນ ແລະ ແລກປ່ຽນເປັນເວລາສັ້ນ ກ່ອນທີ່ເຂົ້າຮ່ວມກອງປະຊຸມສຸດຍອດບັນດາປະເທດທະວີບອາເມລິກາຄັ້ງທີ 7. ນີ້ແມ່ນການພົບປະຢ່າງເປັນທາງການຄັ້ງທຳອິດລະຫວ່າງວໍຊິງຕັນ ແລະ ລາຮາວານ.
ການພົບປະຄັ້ງປະຫວັດສາດ.
ກ່ອນທີ່ດຳເນີນການພົບປະຄັ້ງນີ້, ທັງວໍຊິງຕັນ ແລະ ລາຮາວານ ກໍລ້ວນແຕ່ສົ່ງສານຢ່າງຈະແຈ້ງກ່ຽວກັບເລື່ອງກຽມພ້ອມປຶກສາຫາລືທຸກໆບັນຫາທີ່ຍັງຄົງຄ້າງບົນຈິດໃຈເຄົາລົບຄວາມແຕກຕ່າງກັນຂອງກັນ , ຍຶດໝັ້ນປະຕິບັດ ແລະ ມີເຈດຕະນາດີ. ໃນການແລກປ່ຽນທາງໂທລະສັບກ່ອນທີ່ໄປຮອດ Panama, ປະທານ ກູບາ Raul Castro ຢືນຢັນວ່າ ທ່ານກຽມພ້ອມປຶກສາຫາລືບາງບັນຫາທີ່ກໍ່ຄວາມໂຕ້ຖຽງກັນ ຊຶ່ງລວມທັງສິດທິມະນຸດ ແລະ ເສລີພາບທາງສື່ມວນຊົນ. ໃນຂະນະນັ້ນ, ຜູ້ນຳທຳນຽບຂາວ ກໍຢືນຢັນຢ່າງແນ່ນອນວ່າ ໄລຍະໃໝ່ໃນການພົວພັນລະຫວ່າງອາເມລິກາກັບປະເທດບ້ານໃກ້ເຮືອນຄຽງໄດ້ຖືກໄຂຂຶ້ນ ແລະ ຊຸມວັນເດືອນປີທີ່ອາເມລິກາໄດ້ແຊກແຊງຢ່າງເສລີເຂົ້າວຽກງານພາຍໃນຂອງປະເທດນີ້ໄດ້ຜ່ານພົ້ນໄປ. ເຖິງວ່າ ໄດ້ຍອມຮັບວ່າ ຍັງມີບັນດາຄວາມບໍ່ລົງລອຍກັນ ແລະ ການຫັນການພົວພັນທາງການທູດເປັນປົກກະຕິຈະເສຍເວລາຫຼາຍ ກໍຕາມ, ແຕ່ການນຳ 2 ປະເທດຕ່າງກໍເນັ້ນໜັກເຖິງຄວາມສຳຄັນຂອງວຽກງານສ້າງ ການພົວພັນທາງການທູດເປັນປົກກະຕິຄືນໃໝ່ ຈະນຳມາເຊິ່ງບັນດາກາລະໂອກາດທີ່ດີໃຫ້ແກ່ທັງ 2 ຝ່າຍ. ຊ້ຳບໍໜຳ, ທ່ານປະທານາທິບໍດີ ອາເມລິກາ Barak Obama ຍັງຍອມຮັບວ່າ ຄວາມບໍ່ລົງລອຍກັນ ແມ່ນເລື່ອງທຳມະດາ, ເພາະສິ່ງນີ້ໄດ້ເກີດຂຶ້ນນັບທັງໃນການພົວພັນລະຫວ່າງອາເມລິກາກັບປະເທດພັນທະມິດທີ່ໃກ້ຊິດ.
ສາຍພົວພັນທີ່ອົບອຸ່ນລະຫວ່າງການນຳອາເມລິກາ ແລະ ກູບາ ໃນທັນທີ່ໄດ້ຮັບຄວາມຊົມເຊີຍຢ່າງແຂງແຮງຈາກປະຊາຄົມໂລກ. ທ່ານເລຂາທິການໃຫຍ່ ສ.ປ.ຊ Ban Ki Moon ໄດ້ເນັ້ນໜັກວ່າ ການມີໜ້າຂອງປະທານ ກູບາ Raul Castroຢູ່ທີ່ກອງປະຊຸມສຸດຍອດບັນດາປະເທດທະວີບອາເມລິກາພາຍຫຼັງ 21 ປີບໍ່ເຂົ້າຮ່ວມຢ່າງລຽນຕິດ ກໍແມ່ນຄວາມຄ່ອງຄອຍຂອງຫຼາຍປະເທດໃນພາກພື້ນ. ສ່ວນປະທານາທິບໍດີ ເວເນຊູເອລາ Nicolas Maduro ກໍໄດ້ພັນລະນາເລື່ອງກູບາມີໜ້າຢູ່ປານາມາວ່າ ແມ່ນຜົນງານທີ່ໃຫຍ່ຫຼວງທີ່ສຸດຂອງອາເມລິກາລາຕິນ ແລະ ເຂດກາຣີເບ.
ຕ້ອງການມີເວລາຕື່ມອີກໃຫ້ແກ່ການສ້າງການພົວພັນທາງການທູດຮອບດ້ານລະຫວ່າງອາເມລິກາ-ກູບາຄືນໃໝ່
ຄວາມຈິງ, ນັບແຕ່ເວລາຍົກອອກຂໍ້ຕົກລົງກ່ຽວກັບການຫຍັບມໍ່ເຂົ້າກັບ ກູບາເມື່ອປີກາຍນີ້, ອາເມລິກາໄດ້ຍົກເລີກຂໍ້ຄວາມຈຳກັດຫຼາຍຢ່າງທີ່ມີຕໍ່ກູບາ. ກ່ອນອື່ນໝົດແມ່ນການລົບລ້າງບັນດາຮົ້ວກີດຂວາງໃນການພົວພັນແລກປ່ຽນລະຫວ່າງປະຊາຊົນ, ຄືຫຼຸດຜ່ອນຂໍ້ຄວາມຈຳກັດສຳລັບຊາວອາເມລິກາເມື່ອໄປທ່ຽວທ່ຽວຢູ່ກູບາ, ກໍຄືອະນຸຍາດໃຫ້ພົນລະເມືອງອາເມລິກາໄດ້ນຳໃຊ້ບັດບໍລິການທະນາຄານເມື່ອເຂົ້າທ່ອງທ່ຽວຢູ່ກູບາ ແລະ ໄດ້ຊື້ສິນຄ້າໃຊ້ສອຍເສຍພາສີຈຳໜ່າຍພິເສດເມືອບ້ານເຊັ່ນຢາສູບຫຼືເຫຼົ້າ. ການແລກປ່ຽນການຄ້າໃນບັນດາຂົງເຂດສຳຄັນຄື ໂທລະຄົມ ກໍຖືກວໍຊິງຕັນເປີດກ້ວາງ. ເດືອນ 2 /2015, ຂໍ້ຕົກລົງສະບັບໜຶ່ງໄດ້ຮັບການລົງນາມກ່ຽວກັບການສ້າງການຕິດຕໍ່ສື່ສານທາງໂທລະສັບໂດຍກົງລະຫວ່າງ 2 ປະເທດ. ຮອດທ້າຍເດືອນ 3/2015, ກະຊວງການເງິນອາເມລິກາ ກໍໄດ້ຍົກເລີກບັນດາມາດຕະການລົງໂທດສຳລັບປະມານ 60 ບໍລິສັດ ແລະ ສ່ວນບຸກຄົນທີ່ທຳມາຄ້າຂາຍກັບກູບາ. ບັນດາວິສາຫະກິດອາເມລິກາ ກໍໄດ້ຮັບອະນຸຍາດລົງທຶນເຂົ້າຂົງເຂດເອກະຊົນຢູ່ກູບາ. 2 ຝ່າຍກໍພວມສົ່ງເສີມການເປີດສະຖານທູດປະຈຳປະເທດຂອງກັນຢູ່ນະຄອນຫຼວງແຕ່ລະປະເທດ.
ແຕ່ສິ່ງກິດຂວາງຢ່າງໃຫຍ່ຫຼວງທີ່ສຸດໃນວິວັດທະນາການຫັນການພົວພັນທາງການທູດລະຫວ່າງອາເມລິກາ-ກູບາເປັນປົກກະຕິ ພັດບໍ່ນອນໃນບັນຫາການຄ້າຫຼືທ່ອງທ່ຽວເທົ່ານັ້ນ, ບັນຫາທີ່ເປັນໄລກອນແມ່ນລາຮາວານໃນປະຈຸບັນ, ຍັງຄົງຖືກອາເມລິກາຈັດເຂົ້າໃນບັນຊີລາຍຊື່ບັນດາປະເທດອຸປະຖຳໄພກໍ່ການຮ້າຍນັບແຕ່ປີ 1982 ແລະ ສິ່ງນີ້ໄດ້ກາຍເປັນສິ່ງກີດຂວາງໃຫຍ່ຫຼວງທີ່ມີຕໍ່ການ ຫັນການພົວພັນທາງການທູດລະຫວ່າງອາເມລິກາ-ກູບາເປັນປົກກະຕິ. ເຖິງວ່າປະຈຸບັນ, ທ່ານປະທານາທິບໍດີ ອາເມລິກາ Barak Obama ໄດ້ເຫັນດີກັບຂໍ້ສະເໜີຂອງກະຊວງການຕ່າງປະເທດອາເມລິກາ ແມ່ນນຳກູບາພົ້ນອອກຈາກບັນຊີລາຍຊື່ບັນດາປະເທດອຸປະຖຳໄພກໍ່ການຮ້າຍ, ແຕ່ສິດຕັດສິນພັດຂຶ້ນກັບສະພາແຫ່ງຊາດອາເມລິກາ ແລະ ອຳນາດການປົກຄອງຂອງທ່ານປະທານາທິບໍດີ ອາເມລິກາ Barak Obama ຈະມີເວລາ 45 ວັນເພື່ອຄ່ອຍຖ້າຄຳຕັດສິນສຸດທ້າຍ. ແຕ່ຕາມວົງການນັກໄຈ້ແຍກໃຫ້ຂໍ້ສັງເກດວ່າ ຈະນັບມື້ນັບມີສຽງສະໜັບສະໜູນຕື່ມອີກຕໍ່ການປົວແປງການພົວພັນລະຫວ່າງອາເມລິກາ-ກູບາ .
ຕໍ່ໜ້າຄວາມຈິງນີ້, ເຖິງເວລາແລ້ວທີ່ອາເມລິກາເຫັນວ່າ ຕ້ອງປ່ຽນແປງນະໂຍບາຍຂອງຕົນ. 2 ຝ່າຍຄວນມີເວລາຕື່ມອີກໃຫ້ແກ່ບັນດາບາດກ້າວເດີນຕໍ່ໄປ ແລະ ການພົບປະຄັ້ງປະຫວັດສາດລະຫວ່າງການນຳອາເມລິກາ-ກູບາ ເຖິງວ່າມີລັກສະນະເປັນສັນຍາລັກກໍຕາມ, ແຕ່ກໍສາມາດເຮັດໃຫ້ຫາງສຽງປາຖະໜາກ່ຽວກັບໜ້າປະຫວັດສາດໃໝ່ຖືກໄຂຂຶ້ນໃນການພົວພັນລະຫວ່າງ 2 ປະເທດພາກພື້ນອາເມລິກາລາຕິນ.